Read Da'a Kaili LUKAS 7 Bible Online

LUKAS 7 - Da'a Kaili bible

LUKAS 7

¹Naopu Yesus notesa ka tau dea nalaumo I'a mpaka ri ngata Kapernaum.

²Ri setu naria samba'a balengga tantara Roma. Pade naria wo'u samba'a batua to nipotowena. Batua etu naju'a ntomo.

³Tempo balengga tantara etu nangepe kareba Yesus nipakauna bara sakuya mba'a totu'a nto Yahudi mpaka ri ja'i Yesus merapi ala I'a marata mompakabelo batuana to naju'a etu.

⁴Tempo totu'a nto Yahudi narata ri ja'i Yesus ira mpu'u-mpu'u nerapi tulungi ka I'a. Niuli ira, “Balengga tantara e'i kana masipato ratulungi Komi,

⁵sabana i'a nompotowe kita to Yahudi pade i'a wo'u nombawai doi nombabangu sapo mpodade kami.”

⁶Nangepe etu nalaumo Yesus mpasanggani-nggani ante ira mpaka ri ja'i balengga tantara etu. Tempo ira namosu ri sapona balengga tantara etu nompakau roana malau mantomunaka Yesus ante manguli, “Uma, da'a paraluu Komi marata ri sapoku, sabana aku da'a masipato mantarima Komi riara njapoku.

⁷Aku mboto wo'u da'a masipato marata ri ja'imu. Aga ulimo sambela rombela pade batuaku etu kana mabelo.

⁸Ninjaniku i'a kana mabelo sabana aku wo'u samba'a tau to natundu ri ja'i balenggaku. Pade naria anabua-anabua to natundu ri ja'iku wo'u. Ane aku manguli ka samba'a anabua, ‘Kalaumo,’ i'a kana malau. Pade ane aku manguli ka anabua ntanina, ‘Kamaimo se'i,’ i'a kana momai. Pade ane aku manguli ka batuaku, ‘Powiamo e'i,’ i'a kana mowia etu.”

⁹Tempo Yesus nangepe tesa etu nasumaramo I'a, pade niulina ka tau dea to nantuki I'a, “Natantu mpu'u pomparasaya tau etu! Nau ri ja'i ntau to Israel da'a ria sanggani nirataku pomparasaya ntau to naroso ewa pomparasaya ntau e'i!”

¹⁰Naopu etu nanjilimo tau to nipakau balengga tantara etu. Tempo ira narata ri sapo balengga tantara etu, nabelomo batua to naju'a etu.

¹¹Da'a nasaeka nggari setu nalaumo Yesus mpaka ri saongu ngata to nosanga ka ngata Nain. Anaguru-anaguruna nosanggani ante I'a pade nadea mpu'u tau ntanina nantuki I'a.

¹²Tempo Yesus namosu bobaa mesua riara ngata etu nikitanamo topokowa tomate nesuwu nggariara ngata etu. Tomate etu ngana langgai to samba'ana lau, ana nggari samba'a besi tobalu. Nadea wo'u tau nggari ngata etu nantuki tobalu etu.

¹³Tempo Yesus nanggita tobalu etu, naasimo matana, pade niulina ka i'a, “Ne'e mana motumangi.”

¹⁴Pade nalaumo Yesus nompakamosu pokowa ntomate etu pade nisokona. Tau-tau nokowa tomate etu nenonto, pade notesamo Yesus, “E, kabilasa, Aku manguli ka iko, pembangumo!”

¹⁵Pade nembangumo kabilasa to namate etu. I'a nekatoko pade nompamula notesa-tesa. Naopu etu Yesus nombawai i'a ka indona.

¹⁶Nanggita etu naekamo pura-pura tau ri setu, pade nompamulamo ira nombatoiya Alatala. Niuli ira, “Samba'a nabi to nabetena narata ri tatongota. Naratamo Alatala mompakabelo todeana.”

¹⁷Naopu etu natolelemo kareba Yesus etu ka pura-pura tau ri Bagia Yudea, pade ri bagia ntanina to namosuna wo'u.

¹⁸Anaguru-anaguru Yohanes Topediu nombatesa ka i'a pura-pura nuapa to nipowia Yesus. Nangepe etu Yohanes nompokio romba'a anaguruna,

¹⁹pade nipakauna ira malau mompekutana Yesus. Niuli Yohanes, “Uli ka I'a iwe'i: ‘Komi e'imo Magau to Mompakasalama to nijanji Alatala, bara damariapa ntanina to rapopea kami?’ ”

²⁰Pade nalaumo ira romba'a mpaka ri ja'i Yesus pade nanguli, “Yohanes nompakau kami mekutana ri ja'i Komi iwe'i: ‘Komi e'imo Magau to Mompakasalama to nijanji Alatala, bara damariapa to rapopea kami?’ ”

²¹Tempona etu nadea tau naju'a nipakabelo Yesus, pade nadea seta nipopalaina nggari ja'i ntau, pade nadea toburo nipakabelona sampe namala ira nekita bali.

²²Jadi nesonomo Yesus ka ira to nipakau Yohanes etu, “Panjilimo komi mpaka ri ja'i Yohanes, pade tesamo ka i'a pura-pura nuapa to niepe pade nikita komi. Tau naburo namala nekita, tau napunggu namala nolumako, tau naju'a bete nipakabelo bali, tau nabongo namala neepe, tau namate nipakatuwu bali, pade Kareba Belo nggari ja'i Alatala nipatolele ka tau napakasi.

²³Nabelo ntotomo tau to da'a nokanggaura nomparasaya Aku.”

²⁴Sangga nalaipa tau to nipakau Yohanes etu, nompamulamo Yesus notesa ka tau dea etu ewa katuwu Yohanes. Niulina, “Nuapa patuju komi nalau ranggarawana bopia? Aga manggita wio niburu mpoiri gusa'a guse'i? Natantu da'a iwetu.

²⁵Jadi nuapa patuju komi malau gusetu? Ala manggita samba'a tau to nopakea nagaya? Natantu da'a wo'u, sabana tau nopakea nagaya pade nagana katuwuna iwetu aga neto'o ri sapo magau.

²⁶Jadi nuapa patuju komi malau gusetu? Ala manggita samba'a nabi? Nakono! Toramo! Yohanes neliu nggari nabi-nabi ntanina,

²⁷sabana i'amo tau to nitesa riara Buku Nagasa iwe'i: ‘Kitamo! Aku mompakau batuaku mokolu nggari ja'imu, ala i'a mompakasadia jala ka Komi.’ ” [11]

²⁸Nanguli wo'umo Yesus, “Riara dunia e'i da'apa ria samba'a tau to neliu nggalanga katuwuna nggari Yohanes. Tapi tau to neliu nggaede katuwuna riara Poparenta nu Alatala i'apa neliu nggalanga katuwuna nggari ja'i Yohanes.”

²⁹Tempona pura-pura tau nangepe tesa Yesus, ira ante topomperapi balasitee wo'u nasituju ante nia Alatala, sabana ira pura-pura nidiu Yohanes ewa tandaina najeamo ira nggari silaka-silaka ira.

³⁰Tapi to Parisi ante guru-guru agama da'a nadota nantarima nia Alatala ka ira. Etumo sabana ira da'a nadota radiu Yohanes.

³¹Pade niuli Yesus wo'umo, “Aku motesa mompakanoto ka komi inggu tau-tau tempo we'i-we'i.

³²Ira nasimbayu ewa ngana-ngana nekatoko ri potomu, to nggari sampeto'ona nompongare roana to santanina iwe'i: ‘Kami nantawui sasuli ala mompakadamba rara komi, tapi komi da'a ria nadamba. Kami nodade nasusa, tapi komi da'a ria notumangi.’

³³Tempo Yohanes etu narata, i'a napuasa pade da'a nanginu anggur, pade niuli komi, ‘I'a nipesua nu seta!’

³⁴Aku, Ana nu Manusia narata nanggoni ante nanginu, pade niuli komi, ‘Kitamo tau etu! Nadoko, to nalangu, wega ntopomperapi balasitee ante tau to nadea silakana!’

³⁵Naupa damo iwetu kabelo nu Alatala manoto rakita wuana riara nggatuwu ntau to nantarima kabelo nu Alatala etu.”

³⁶Naria samba'a tau to Parisi nosanga ka i Simon nombagaga Yesus manggoni mpasanggani ri sapona. Jadi nalaumo Yesus mpaka ri sapona pade nekatoko nanggoni mpasanggani-nggani.

³⁷Ri ngata etu naria wo'u samba'a besi bajinga. Tempona i'a nangepe Yesus naria nanggoni ri sapo i Simon tau to Parisi etu, nalaumo i'a nanggeni saongu botolo nggedi to nipowia nggari watu pualam to niisi minya to neliu nggawongina.

³⁸I'a narata nompakamosu kada Yesus nggari talikuna pade nageo. Pade ue matana nisasiina ka kada Yesus, pade nipe'ena kada Yesus ante wo'ona sampe nabai. Naopu etu kada Yesus niekina pade nitolina minya wongi etu.

³⁹Sangga nanggita etu, notesamo i Simon riara nta'ina, “Tau e'i kakonona da'a samba'a nabi. Ane I'a samba'a nabi natantu ranjanina isema besi to nanjoko I'a etu, sabana besi etumo tunggai nowia silaka riara nggatuwuna.”

⁴⁰Tapi nangulimo Yesus ka i Simon, “Simon, naria sangaya kutesa ka komi.” Nesonomo i Simon, “Iyo, tesamo nuapa, Guru.”

⁴¹Pade nanguli Yesus, “Naria romba'a tau to noinda ri ja'i ntau to nompopoinda doina. Samba'a nanginda limatu mpeka doi salaka pade samba'a nanginda lima mpeka doi salaka. [12]

⁴²Tau romba'a topanginda doi etu da'a mana nompakule mombabayari mpakaopu inda ira etu. Jadi nanguli pue nu doi ka ira romba'a etu iwe'i: ‘Doiku to niinda komi romba'a etu mana kutuntu ka komi.’ ” Pade nanguli Yesus ka i Simon, “Ri olo ira romba'a etu sema to neliu nompotowe pue doi etu?”

⁴³Nangulimo i Simon, “Pombarataku tau to nelabi kadea indana etu to neliu pompotowena.” Nesono Yesus, “Pombaratamu etu nakono.”

⁴⁴Naopu etu Yesus nompeeli besi etu ante nanguli ka i Simon, “Nikitamu besi e'i? Tempo Aku narata ri sapomu da'a nipakasadiamu ue kupombarama kadaku nantuki ada kita to Yahudi. Tapi besi e'i nombarama kadaku ante ue matana pade nipakabaina ante wo'ona.

⁴⁵Komi da'a nombatotoaka Aku ante nombaeki Aku. Tapi besi e'i da'a ria kabasana nombaeki kadaku nggari lamba karataku ri se'i.

⁴⁶Komi da'a nombatoli minya wongi ri balenggaku, tapi besi e'i nombatoli minya wongi ri kadaku.

⁴⁷Jadi kuuli ka komi, Simon, nggari kabete towe besi e'i nantujuraka silakana to nadeana etu niampungi Alatalamo. Ane tau niampungi aga sakedi aga sakedi wo'u pompotowena.”

⁴⁸Pade nangulimo Yesus ka besi etu, “Silaka-silakamu naopu puramo niampungi.”

⁴⁹Naopu etu nompamulamo tau-tau ntanina to nekatoko nanggoni mpasanggani ante Yesus notesa samba'a bo samba'a, “Isema tau e'i sampe I'a namala mombaampungi silaka!”

⁵⁰Tapi nangulimo Yesus ka besi etu, “Sabana iko nomparasaya nipakasalamamo iko. Patinggulimo iko ante mabelo!”