Read Da'a Kaili LUKAS 9 Bible Online

LUKAS 9 - Da'a Kaili bible

LUKAS 9

¹Yesus nompokio sampulu romba'a anaguruna pade niwaina ka ira kuasa mompopalai seta-seta pade mompakabelo ju'a-ju'a.

²Pade nipakauna ira malau mompakabelo tau to naju'a pade mompatolele Kareba Belo, to nanguli Pue Alatala nompamulamo noparenta ewa samba'a magau.

³Yesus nombatagi ira, “Ne'e manggeni bara nuapa-nuapa riara mpolumako komi. Ne'e manggeni lembau bara batutu, bara manggeni baku, bara manggeni doi, bara manggeni rontonga baju.

⁴Ane komi marata ri saongu ngata pade maria pue njapo mompopesai komi, peto'omo komi ri setu sampe komi malai nggari ngata etu.

⁵Pade ri umba-umba komi da'a ratarima ntau, sapunaimo sowu nggari kadamu tempo komi malai ala majadi popatora ka tau ri setu ira kana rasuku Alatala.”

⁶Naopu etu nalaimo anaguru Yesus nalau nompebutu ngata mompatolele Kareba Belo, pade mompakabelo tau to naju'a ri umba-umba.

⁷Tempona Magau Herodes Antipas nangepe tesa ewa nuapa to nipowia Yesus riara poparentana ri Galilea, naingumo i'a, sabana naria tau to nanguli, “Tau e'i kakonona Yohanes Topediu to natuwu bali nggari kamatena.”

⁸Naria wo'u to nanguli, “I'a nabi Elia neumba bali.” Pade tau to santanina nanguli, “I'a samba'a nabi nggaolu to natuwu bali.”

⁹Tapi nangulimo i Herodes, “Nipakaukumo tau nombatompo balengga Yohanes bopia. Jadi tau e'i, sema kakonona I'a? Nadeamo tesa niepeku ewa I'a.” Etu sampe i Herodes nangelo jala ala mosirata ka Yesus.

¹⁰Sangga nanjilipa anaguru-anaguru Yesus notesamo ira ka I'a ewa pura-pura nuapa to nipowia ira. Naopu etu Yesus nanggeni ira sampulu romba'a nalau nompatani ri saongu ngata to nosanga ka ngata Betsaida.

¹¹Tapi tempo tau dea nangginjani patuju Yesus, ira pura-pura nantuki I'a. Pade ri tatongo jala ri setu Yesus nantarima ira pade nompatuduki ka ira tesa ewa Poparenta nu Alatala. Pade nipakabelona wo'u tau-tau to naju'ana ri setu.

¹²Tempo ntora mawengimo naratamo anaguru Yesus sampulu romba'a etu nanguli ka I'a, “Guru, agina tau dea etu rapakau matingguli ala ira mamala malau mangelo panggoni ante peto'o rapaturu ira, apa peto'ota e'i nakalinoa.”

¹³Tapi nangulimo Yesus ka ira, “Komi mompakoni ira.” Nesonomo anaguruna etu, “To naria ri ja'i kami aga limaongu roti bo romba'a bau. Etu da'a magana ratibo ka ira ane kita da'a malau mangoli mpakadea panggoni.”

¹⁴(Kadea ira ri setu kira-kira limanjobu mba'a langgai.) Tapi nangulimo Yesus ka anaguruna, “Pakaumo ira etu mekatoko kira-kira limampulu mba'ana sampeto'o.”

¹⁵Pade nipowia anaguru Yesus nuapa to niulina ka ira. Nipakau ira pura-pura tau etu nekatoko.

¹⁶Naopu etu Yesus nangala limaongu roti bo romba'a bau etu, pade nantingoa langi nosambaya nanguli tarima kasi ri ja'i Alatala. Pade nibingga-binggana roti ante bau etu pade niwaina ka anaguruna nombatibo-tibo ka tau dea.

¹⁷Ira pura-pura nanggoni sampe nabosu. Pade anaguruna nompasiromu labi panggoni to nabolina, naponupa sampulu rotonda.

¹⁸Naria sanggani Yesus nosambaya njamba'ana, anaguru-anaguruna da'a nakawao ante I'a. Naopu I'a nosambaya Yesus nompekutana ira, “Nantuki tesa ntodea, isema Aku e'i?”

¹⁹Nesonomo ira, “Naria to nanguli Komi Yohanes Topediu to natuwu bali. Naria wo'u sanu nanguli Komi nabi Elia to neumba bali. Pade naria wo'u to nanguli bara Komi samba'a nabi nggaolu to natuwu bali.”

²⁰Pade Yesus nekutana sangganipa, “Tapi nantuki pombarata komi, isema Aku e'i?” Nesonomo i Petrus, “Komi Magau to Mompakasalama to nijanji Alatala!”

²¹Naopu i Petrus nompangaku etu Yesus nombatagi ira, “Ne'e mpu'u rauli etu ka isema-sema!

²²Aku, Ana nu Manusia kana rapandasa mpu'u pade Aku rapoara totu'a-totu'a nto Yahudi ante balengga-balengga topanggeni agama bo guru-guru agama. Aku kana rapatesi pade ri eo katolueona Aku kana matuwu bali.”

²³Naopu etu niulina ka pura-pura tau ri setu, “Isema-sema madota majadi topantuki Aku i'a kana mombakabasaka dotana mboto, pade eo-eo i'a kana masadia mantuki Aku nau sampe mamate rapaku ri kayu parika.

²⁴Sabana isema-sema da'a masadia mantuki Aku nau sampe mamate i'a da'a mombarata katuwua mabelo sampe ri kasae-saena. Tapi isema-sema mombakabasaka pura-pura dota rarana pade mantuki Aku nau sampe rapatesi, i'a kana mombarata katuwua mabelo sampe ri kasae-saena.

²⁵Natantumo da'a ria gunana ane samba'a tau mombarata pura-pura nuapa to naria ri dunia tapi da'a masalama, aga rasuku sampe ri kasae-saena ri naraka.

²⁶Isema-sema maeya mompangaku Aku pade tesaku, Aku wo'u kana maeya mompangaku i'a tempona Aku manjili ri dunia. Tempo etu Aku kana marata ante kuasa bo remeku mosanggani-nggani ante kuasa bo reme Umaku Pue Alatala ante malaeka-malaeka to nagasana.

²⁷Tapi toramo! Mana masaeka etu majadi! Naria bara sakuya mba'a ri tatongo komi e'i da'apa mamate ane da'apa rakita ira Pue Alatala mompamula moparenta.”

²⁸Kira-kira walumbengi kaliuna Yesus nombawai pepatuduki etu ka ira, I'a nanggeni i Petrus, Yohanes ante Yakobus nalau nantende ri saongu buluna mosambaya ka Alatala.

²⁹Tempo Yesus danosambaya nabalimo lenjena pade bajuna najadi nabula nenggila sanggani.

³⁰Tempona etu naratamo tau romba'a notesa ante I'a, etumo i Musa ante Elia, nabi Alatala nggaolu.

³¹Ira romba'a nompopokita koro ira riara reme nggari suruga. Pade ira notesa ewa kamate Yesus to majadi ri ngata Yerusalem.

³²Tempona etu i Petrus bo romba'a roana nangantu mpu'u sampe ira napisi. Tempo ira nembangu nikita ira reme Yesus ante romba'a tau nenggore ri setu nosanggani ante I'a.

³³Tempo tau romba'a etu nompamula nompalasi Yesus nangulimo i Petrus ka I'a, “Guru, nasana mpu'u kami ri se'i. Nabelopa kami mompowia toluongu pakumpa ri se'i, saongu ka Komi, saongu ka i Musa pade saongu ka Elia.” Tapi da'a ninjani i Petrus nuapa nitesana etu sabana da'a nanoto rarana nanggita kajadia pane'a.

³⁴Tempo i Petrus danotesa naratamo kulimu nombabungu ira pura-pura, pade naekamo ira sabana ira nibungu kulimu.

³⁵Pade nggariara kulimu etu naria suara nanguli, “E'imo Anaku to nipelisiku. Epe komimo tesana!”

³⁶Sangga nalino suara etu, nikita ira damo Yesus njamba'ana ri setu. Nompamula nggari tempona etu ira tolumba'a nomboli riara nta'i ira ewa kajadia etu. Da'apa ira madota motesa ka samba'a tau ewa nuapa to nikita ira.

³⁷Kaeona mpadondo notuamo Yesus ante anaguruna nggari buluna etu. Narata ri kadelena nadea tau narata ri ja'i Yesus.

³⁸Naria samba'a langgai nggari tatongo ntau dea etu nongare ka Yesus, “Guru! Tulungi kita ka aku ruru anaku, anaku aga samba'ana lau.

³⁹Ane nesuamo seta ri ja'ina i'a kaliu-liu nongare pade korona nolalete sampe ngangana nawura. Seta etu da'a ria nalai-lai nompandasa ngana etu. Nasae pade i'a nesuwu nggari ja'ina.

⁴⁰Niperapiku ka anaguru-anaguru Komi mompopalai seta etu, tapi da'a nipakule ira.”

⁴¹Nangepe etu nangulimo Yesus ka tau ri setu, “Iwenu tanu komi? Komimo tanu tau mpu'u-mpu'u da'a nomparasaya pade topesapuaka! Sakuyapa kasaena Aku kana mosanggani ante komi pade mosabara ri ja'i komi?” Naopu etu nangulimo Yesus ka uma ngana to naju'ana etu, “Keni wemaimo anamu!”

⁴²Tempona ngana etu nolumako mpaka ri ja'i Yesus, nidungganaka nu setamo i'a pade korona nokalalete-lete. Tapi Yesus nompopalai seta pade nompakabelo ngana etu nggari ju'ana. Sangga nabelopa ngana etu niwaina ka umanamo.

⁴³Nanggita kabete kabaraka Alatala etu, nasumara mpu'umo pura-pura tau ri setu. Tempona tau danasumarapa nanggita pura-pura nuapa to nikawia Yesus, nangulimo I'a ka anaguru-anaguruna,

⁴⁴“Pariara mpakabelo-belo nuapa to niuliku e'i. Kana marata tempona Aku, Ana nu Manusia kana rawai ka baliku.”

⁴⁵Tapi anaguru-anaguru Yesus etu da'a nangginjani nuapa batuana to nitesana etu. Batua nu tesa etu danitabuniaka ka ira sampe da'apa ninjani ira. Pade da'a nabia ira nompekutana batuana ri ja'ina.

⁴⁶Pade nompamulamo anaguru-anaguru Yesus nosinggarau mbotomo bara isema nggari ja'i ira etu to neliu nggalanga katuwuna.

⁴⁷Yesus nangginjani pompekiri ira. Jadi nialana samba'a ngana nggedi pade nipopekanggorena ri sinjorina ri setu.

⁴⁸Pade niulina ka ira, “Isema-sema to mantarima samba'a ngana sabana i'a topomparasaya Aku, etu batuana i'a wo'u mantarima Aku. Pade isema-sema mantarima Aku i'a wo'u mantarima Alatala to nompakau Aku. Jadi isema nggari ja'i komi pura-pura e'i to naede katuwuna i'amo to neliu nggalanga katuwuna riara mpanggita Alatala.”

⁴⁹Naopu etu nangulimo Yohanes ka Yesus, “Guru, kami nanggita samba'a tau nompopalai seta ante kuasa nggari sanga Komi. Tau etu nitagi kami sabana i'a da'a topantuki kita.”

⁵⁰Tapi nanguli Yesus ka i'a, “Ne'e komi mombatagi i'a, sabana isema da'a nangewa komi i'a roa komi.”

⁵¹Tempona namosumo ntoana Yesus meore mpaka ri suruga I'a nompakatantu polumakona kana malau mpaka ri ngata Yerusalem.

⁵²Pade nipakauna tau mokolu ka I'a ala mompakasadia mpengaya-ngaya ka I'a. Jadi nalaumo ira pade nesua riara saongu ngata nto Samaria.

⁵³Tapi pue ngata etu da'a nadota nantarima Yesus sabana ninjani ira patujuna malau mpaka ri ngata Yerusalem.

⁵⁴Sangga ninjani Yakobus bo Yohanes pue ngata etu da'a madota mantarima Yesus, nangulimo ira ka I'a, “Pue, ane rapodota Komi, raperapi kami apu nggari langi mana'u mompalabu tau-tau e'i.”

⁵⁵Tapi Yesus nompeili ira romba'a pade nanggarau ira.

⁵⁶Naopu etu nalaimo ira mpaka ri ngata to santanina.

⁵⁷Tempo Yesus ante anaguruna nompapola polumako ira naria samba'a tau nanguli ka I'a, “Ri umba-umba rakalau Komi aku kana mantuki Komi!”

⁵⁸Nangulimo Yesus ka i'a, “Asulako naria bolona rapaturuna bo tonji naria jumuna, tapi Aku, Ana nu Manusia da'a ria peto'o kupaturu.”

⁵⁹Pade nanguli wo'umo Yesus ka samba'a tau ntanina, “Kamaimo, tukimo Aku!” Tapi nesonomo tau etu, “Pue, paloga ntanimo ruru aku manjili mombatana umaku. Naopu etu pade aku momai mantuki Komi.”

⁶⁰Tapi nangulimo Yesus ka i'a, “Waikamo tau-tau to namate mombatana tau to namatena. Komi kana malau mpaka ri umba-umba mompatolele Kareba Belo ewa Poparenta nu Alatala.”

⁶¹Naria wo'u samba'a tau ntanina nanguli ka Yesus, “Aku kana mantuki Komi, Pue, tapi paloga ntani ruru aku malau mopasabi ka kami saongu njapo.”

⁶²Tapi nangulimo Yesus ka i'a, “Ane komi mopajeko naoso nakampeili, etu da'a nabelo. Wa'a wo'u ante topantuki Aku. Ane i'a kana mombatora nuapa to nipalasina da'a masipato i'a rapake riara Poparenta nu Alatala.”