Read Da'a Kaili YOHANES 10 Bible Online

YOHANES 10 - Da'a Kaili bible

YOHANES 10

¹“Aku mpu'u-mpu'u notesa ka komi, tau to nesua riara gimpu aga nompone wala da'a nesua nggari pewobo, tau etu topangangga pade topeago.

²Tapi tau to nesua nggari pewobo gimpu, i'amo topoewu bimba-bimba etu.

³Topanggatono gimpu kana mombabea pewobo ka i'a, pade bimba-bimba etu kana mompetalinga suarana tempo i'a mompokio sanga ira saongu-saongu. Pade i'a kana manggeni ira mpaka ri sawalikuna.

⁴Ane bimba-bimba nesuwu puramo ri sawalikuna, topoewu etu molumako mokolu ka bimbana. Pade bimba-bimba mantuki ri purina, sabana bimba-bimba etu nangginjani suara ntopoewu etu.

⁵Bimba-bimba etu da'a madota mantuki tau ntanina. Ira aga mongowa malai pura nggari ja'ina, sabana da'a ninjani ira suara ntau etu.”

⁶Yesus nombatesa porapa etu ka tau-tau to Parisi, tapi patuju nu porapa etu da'a ninjani ira.

⁷Sabana etu nanguli wo'umo Yesus ka ira, “Aku mpu'u-mpu'u notesa ka komi, Aku e'imo pewobo mesua riara gimpu bimba.

⁸Pura-pura tau to narata nokolu ka Aku ira etumo topangangga pade topeago. Tapi bimba-bimba da'a nompetalinga suara ira.

⁹Aku e'imo pewobo etu. Isema-sema mesua mojala ri ja'iku ira kana rapakasalama. Ira mamala mesua pade mesuwu mombarata panggoni.

¹⁰Ane topangangga, ira aga momai mangangga pade mepatesi bo mompakaropu. Tapi Aku e'i narata ala manusia mombarata katuwua to neliu mpu'u kabelona.”

¹¹“Aku e'imo topoewu to nabelona. Aku mombawai katuwuku mboto ala bimbaku mamala matuwu.

¹²Ane tau aga nigaji, i'a da'a topoewu bimba pade i'a da'a wo'u pue bimba etu. Etu sampe ane i'a manggita asulako momai mombaraga bimba-bimbana i'a aga mangowa malai mompalasi bimba-bimba etu. Pade bimba etu kana rasoko nu asulako, pade bimba ntanina raraga raposimpotatarena.

¹³Tau nigaji etu aga mangowa malai iwetu sabana i'a aga nigaji. I'a da'a nompotowe bimba-bimba etu.

¹⁴Aku e'imo topoewu to nabelona. Nasimbayu ewa Umaku nangginjani Aku pade Aku wo'u nangginjani I'a, iwetu wo'u Aku nangginjani pura-pura bimbaku pade bimba-bimbaku nangginjani Aku. Pade Aku mombawai katuwuku mboto ala bimba-bimbaku mamala matuwu.

¹⁶Danariapa bimba-bimbaku ntanina anu da'apa nesua riara gimpu e'i. Ira wo'u kana kukeni ri se'i. Ira kana mompetalinga suaraku pade pura-pura bimbaku kana majadi salunu. Pade ira rapoewu samba'a lau topoewu.

¹⁷Umaku nompotowe Aku sabana Aku nombawai katuwuku ala Aku mamala matuwu bali.

¹⁸Da'a ria samba'a tau mamala mompatesi Aku. Tapi Aku mombawai katuwuku nantuki dotaku mboto. Aku nakuasa mombawai katuwuku rapatesi iwetu pade Aku nakuasa wo'u matuwu bali, sabana etumo parenta to nitarimaku nggari ja'i Umaku.”

¹⁹Nangepe pantesa Yesus etu nosisala paha wo'umo sangganipa tau-tau to Yahudi.

²⁰Naria nadea ira to nanguli, “I'a nipesua seta! Nagilamo I'a! Nokuya komi madota mangepe pantesana?”

²¹Tapi naria wo'u sanu tau nanguli, “Da'a! Ane tau nipesua seta da'a iwetu tesana! Natantumo seta da'a namala mompakabelo tau naburo!”

²²Tempo etu naratamo ntoana Posusa Mombatora Pompareki Sapo Mpepue ri ngata Yerusalem. [22] Posusa etu nawela tempo leni.

²³Yesus nolumako ri tambale Sapo Mpepue to nosanga ka Tambale Salomo.

²⁴Pade naratamo tau-tau to Yahudi nantatiku I'a ri setu. Nekutanamo ira ka I'a, “Sakuya kasaena Komi mompalamba kami naingu? Ane Komi mpu'u-mpu'u Magau to Mompakasalama to nijanji Alatala, uli pakanotomo ka kami!”

²⁵Nesonomo Yesus, “Naopumo niuliku ka komi aga da'a niparasaya komi. Kabaraka-kabaraka to nikawiaku ante kuasa nggari ja'i Umaku nompakanoto ka komi isema Aku e'i.

²⁶Tapi da'a ntoto niparasaya komi sabana komi da'a bimba-bimbaku.

²⁷Bimba-bimbaku nompetalinga pantesaku pade Aku nangginjani ira pade ira nantuki Aku.

²⁸Aku nombawai ka ira katuwua mabelo sampe ri kasae-saena pade natantumo ira da'a rasuku sampe ri kasae-saena. Da'a ntoto maria samba'a tau mamala manggeni bimbaku malai nggari ja'iku.

²⁹Umaku to neliu nggakuasa, pade I'amo to nombawai bimba-bimba etu ka Aku. Da'a ntoto ria samba'a tau mamala manggeni ira malai nggari ja'ina.

³⁰Aku bo Umaku da'a ria posisalana, aga samba'a lau.”

³¹Nangepe tesana etu tau-tau to Yahudi nangala watumo sangganipa madota mombarempe Yesus.

³²Tapi nangulimo Yesus ka ira, “Nadeamo panggawia to nabelo nggari ja'i Umaku to nipopokitaku ka komi. Nggari panggawia umbana sampe komi madota mombarempe Aku ante watu?”

³³Nesonomo tau-tau to Yahudi, “Da'a nggari panggawiamu to nabelona etu sampe kami madota mombarempe Komi ante watu, tapi sabana Komi nompakakedi Alatala. Komi etu aga manusia biasa, tapi Komi nompakasimbayu koromu ante Alatala!”

³⁴Nesonomo Yesus, “Riara Atura-atura agama komi naria nitulisi tesa Alatala to niuli ka topanggeniaka nto Israel nggaolu iwe'i: ‘Niuliku komi pura-pura ewa Alatala.’ [23]

³⁵Nuapa to nitulisi riara Buku Nagasa etu da'a ria nabali-bali tapi bate-batena nalaku sampe ri kasae-saena. Tau-tau to nantarima Tesa nu Alatala nggaolu etu nikasangaina ‘ewa Alatala.’

³⁶Aku e'imo to nipelisi Alatala bo nipakauna mpaka riara dunia. Jadi nokuya komi nanguli Aku nompakakedi Alatala ante notesa, ‘Aku e'imo Ana nu Alatala?’

³⁷Ane Aku da'a mompowia bago to niparasaya Umaku ka Aku, ne'e raparasaya komi Aku.

³⁸Tapi ane Aku mompowia bago etu, naupa komi da'a madota momparasaya Aku, masipato komi momparasaya nuapa to nipowiaku etu. Ante iwetu kana ranjani komi bo manoto ka komi Aku e'i nosaongu ante Umaku pade Umaku wo'u nosaongu ante Aku.”

³⁹Nangepe etu sangganipa wo'u tau-tau to Yahudi nompasimbuku manjoko Yesus, tapi I'a notinggalipo nggari tatongo ira.

⁴⁰Naopu etu nalau wo'umo Yesus mpaka ri sambote Binangga Yordan ri peto'o Yohanes Topediu pamulana nombadiu tau bopia. Pade naroomo Yesus ri setu.

⁴¹Tempo I'a ri setu nadeamo tau narata ri ja'ina. Pade nangulimo ira samba'a ka roana, “Yohanes da'a ntoto nompowia kabaraka. Tapi pura-pura nuapa to nitesana ewa Yesus nakono mpu'u!”

⁴²Pade nadeamo tau ri setu nomparasaya Yesus.