Read Da'a Kaili YOHANES 11 Bible Online

YOHANES 11 - Da'a Kaili bible

YOHANES 11

¹Naria samba'a langgai nosanga ka i Lazarus to neto'o ri ngata Betania nosanggani-nggani ante sampesuwuna besi to nosanga ka i Maria bo i Marta. Maria etumo besi to nombatoli minya wongi ri kada Yesus pade nipe'ena ante wo'ona. Naria sanggani i Lazarus naju'a ntomo.

³Jadi romba'a sampesuwu i Lazarus etu nompakau tau malau manguli ka Yesus iwe'i: “Pue, wegamu to nipotowemu naju'a.”

⁴Sangga nangepe kareba etu nangulimo Yesus, “Ju'ana etu da'apa rapomatena. Etu najadi ala Alatala rabila bo ratoiya ntau, sabana nggari ju'a etu Aku, Ana nu Alatala kana rabila bo ratoiya.”

⁵Yesus nompotowe i Marta, i Maria bo i Lazarus.

⁶Jadi tempo Yesus nangepe kareba to nanguli i Lazarus naju'a nitunggaina neto'o rombengipa kasaena ri peto'o nikalauna etu.

⁷Naliu rombengi etu niulina ka anaguru-anaguruna, “Mai manjilimo kita mpaka ri Bagia Yudea.” [24]

⁸Nesonomo anaguruna, “Guru, da'apa nasae tau-tau to Yahudi ri setu nadota mombarempe Komi ante watu sampe mamate. Nuapa sabana we'i-we'i Guru madota malau mpaka ri setu?”

⁹Nangulimo Yesus ka ira, “Saeo saena sampulu rojaa. Tau to nolumako ri eona da'a matipasunu ri watu apa nikitana reme to nompakarawa jalana.

¹⁰Tapi tau to nolumako tempo nggawengina kana matipasunu ri watu sabana da'a ria reme ri ja'ina mompakarawa jalana.”

¹¹Iwetumo panguli Yesus ka anaguruna. Naopu etu nipapolana pantesana etu ka ira. Niulina, “Wegata i Lazarus napisimo. Tapi Aku malau mombalike i'a.”

¹²Pade nangulimo anaguru-anaguru Yesus, “Ane i Lazarus napisimo, i'a kana mabelo bali nggari ju'ana etu.”

¹³Tapi kakonona patuju tesa Yesus nanguli i Lazarus namatemo.

¹⁴Sabana etu, Yesus nanguli ntodomo ka anaguru-anaguruna, “Lazarus namatemo.

¹⁵Nadamba raraku Aku da'a naria ri setu tempo i'a namate, sabana to najadina etu manggeni belo ka komi ala komi momparasaya Aku. Kamaimo, kita malau manggita i Lazarus.”

¹⁶Pade nangulimo i Tomas to nidae “Ngana Norapi” ka roa-roana anaguru Yesus, “Kamaimo, kita mantuki I'a ala kita wo'u mamate mpasanggani-nggani ante I'a.”

¹⁷Tempo Yesus narata ri ngata Betania patambengimo kasaena i Lazarus niboli riara dayona.

¹⁸Ngata Betania etu namosu ante ngata Yerusalem, kira-kira toluongu kilo kakawaona.

¹⁹Jadi nadeamo tau to Yahudi narata ri ja'i Marta bo i Maria mompakawoe rara ira romba'a sabana sampesuwu ira i Lazarus namatemo.

²⁰Sangga i Marta nangepe lelena namosumo Yesus, nalaumo i'a nantomunaka I'a. Aga i Maria nopea ri sapona.

²¹Sangga nikitana Yesus nangulimo i Marta ka I'a, “Pue, ane Komi naria ri se'i tempo etu, sampesuwuku i Lazarus da'a namate.

²²Tapi naupa iwetu ninjaniku nuapa-nuapa raperapi Komi we'i-we'i kana rawai Alatala ka Komi.”

²³Nangulimo Yesus ka i Marta, “Sampesuwumu etu kana matuwu bali.”

²⁴Nanguli i Marta, “Iyo. Ninjanikumo i'a kana matuwu bali tempo pura-pura tau namate matuwu bali ri kaopu nu dunia.”

²⁵Nanguli Yesus ka i Marta, “Aku e'imo to mompakatuwu bali tau namate pade to mombawai katuwua. Isema-sema momparasaya Aku naupa i'a namatemo i'a kana matuwu bali.

²⁶Pade isema-sema to natuwu bo nomparasaya Aku, ira mana mamate sampe ri kasae-saena. Niparasayamu to niuliku e'i?”

²⁷Nanguli i Marta, “Iyo, Pue. Niparasayakumo Komi etu Ana nu Alatala, Magau to Mompakasalama to nijanji Alatala kana marata ri dunia.”

²⁸Naopu i Marta notesa ka Yesus iwetu, nalaumo i'a nompokio i Maria pade nosiwawayo ka i'a, “Naratamo Guru. I'a madota mosirata ka iko.”

²⁹Nangepe pantesa i Marta etu, nekanggoremo i Maria nalau nasalisa nomposirata Yesus.

³⁰Tempo etu Yesus da'apa nesua riara ngata Betania. I'a da ri sawalikuna ri peto'o niposiratana ante i Marta.

³¹Tau-tau to Yahudi to nompakawoe rara i Maria rara njapona nanggita i'a nompari-mpari nalau. Jadi ira wo'u nalau nantuki i'a. Niuli ira, “I'a nalau nageo ri dayo ria.”

³²Sangga naratapa i Maria ri ja'i Yesus nekadedemo i'a ri ngayona ante nanguli, “Pue, ane Komi naria ri se'i bopia natantumo sampesuwuku da'a namate.”

³³Tempo Yesus nanggita i Maria bo roa-roana to nantuki i'a nageo-geo, nasusa mpu'umo rarana.

³⁴Pade nekutanamo I'a ka ira, “Ri umba tanu dayona?” Nesonomo ira, “Pue, kamaimo lau rakitata.”

³⁵Pade nageomo Yesus.

³⁶Nanggita etu nangulimo tau-tau to Yahudi to nantuki i Maria etu, “Kitamo. Nipotowe Yesus mpu'u i Lazarus.”

³⁷Tapi naria wo'u sanu ira nanguli samba'a ka roana, “Tau naburo namala nipakabelona. Iwenu sampe I'a da'a namala nompakabelo ju'a i Lazarus ala i'a da'a namate?”

³⁸Ante nasusa wo'umo rarana Yesus nompakamosu dayo i Lazarus. Dayo etu saongu bololia ri kente nu bulu, bolona nitondo ante watu bete.

³⁹Nangulimo Yesus, “Kaliakamo watu etu!” Tapi nangulimo i Marta sampesuwu ntomate etu, “Pue, natantu nawaumo i'a, sabana patambengimo i'a riara dayo etu.”

⁴⁰Nangulimo Yesus ka i Marta, “Iwenu? Da'a niuliku ka komi pani'a ane komi momparasaya Aku komi kana manggita kabete nu kuasa Alatala?”

⁴¹Naopu etu nikaliaka iramo watu bete nipombatondo dayo etu. Pade nantingoamo Yesus ante nanguli, “Umaku, Aku nosukuru sabana posambayaku e'i niepemumo.

⁴²Ninjaniku Komi bate-batena nangepe posambayaku, tapi niuliku iwetu ala raepe tau-tau ri se'i ala ira mamala momparasaya Komimo to nompakau Aku momai ri dunia e'i.”

⁴³Naopu notesa iwetu nongaremo Yesus ante suara namangga, “Lazarus! Kamaimo!”

⁴⁴Pade nesuwumo tomate etu nggariara dayona. Kadana bo palena daniwewe pompo'u sompu pade balenggana danipo'u pasapu. Pade nangulimo Yesus ka ira ri setu, “Wolemo pompo'una etu ala i'a mamala molumako mabelo.”

⁴⁵Nanggita kajadia etu nadeamo tau to Yahudi to narata mompakawoe rara i Maria nomparasaya Yesus.

⁴⁶Tapi naria sanu tau nggari tatongo ira to nalau mpaka ri ja'i tau-tau to Parisi nombatesa ka ira nuapa to nipowia Yesus etu.

⁴⁷Jadi balengga-balengga topanggeni agama bo tau-tau to Parisi nompasiromu Polibu Bete Agama Yahudi. Niuli ira ka topolibu to nasiromu etu, “Nuapa masipato rapowiata? Nadea mpu'u kabaraka to nipowia ntau etu.

⁴⁸Ane kita batena mompalamba I'a iwetu, natantumo pura-pura tau kana momparasaya I'a! Pade kaopuna tantara Roma kana marata mombagero Sapo Mpepueta bo njumaongu ngatata!”

⁴⁹Naria samba'a nggari tatongo ira to nosanga ka i Kayafas, to najadi Balengga Topanggeni Agama mpae etu. I'a nanguli ka ira, “Da'a ninjani komi nuapa-nuapa!

⁵⁰Da'a ntoto ninjani komi nuapa to nanggeni belo ka todea! Nabelopa samba'a tau mamate manjaliku todea ala pura-pura todea ne'e rapakaropu!”

⁵¹Kakonona tesa i Kayafas etu da'a nitesana nggari pekirina mboto. Tapi ewa Balengga Topanggeni Agama Yahudi mpae etu, i'a nombaboto kamate Yesus manjaliku todea to Yahudi.

⁵²Pade da'a aga to Yahudi, tapi ala pura-pura ana nu Alatala to neto'o ri umba-umba ri dunia mamala rapasiromu majadi nosaongu.

⁵³Jadi nompamula nggari eo etu nasintuwumo topanggeniaka-topanggeniaka nto Yahudi mompatesi Yesus.

⁵⁴Sabana etu Yesus mana nosanggani-nggani ante todea to Yahudi. Tapi nalaumo I'a nggari Bagia Yudea etu mpaka ri bagia to namosu karawa baina, etumo ri ngata Efraim. Pade naroomo I'a ri setu mpasanggani-nggani ante anaguruna.

⁵⁵Tempo etu namosumo ntoana Posusa Paska. Jadi nadeamo tau nggari ngata-ngata bo boya-boya nto Yahudi nantende mpaka ri ngata Yerusalem ala mantuki ada pompegasa koro ira da'apa pamula nu Posusa Paska etu.

⁵⁶Narata ri setu ira nangelo-ngelo Yesus. Pade tempo ira nasiromu ri Sapo Mpepue nosimpekutana ira samba'a bo samba'a, “Iwenu pombarata komi? Bara da'a mabia I'a marata ri posusa e'i.”

⁵⁷Iwetu panguli ira sabana nariamo parenta nggari balengga-balengga topanggeni agama bo tau-tau to Parisi to nanguli iwe'i: “Isema-sema nangginjani peto'o Yesus, kana raulina ka kami ala I'a mamala rasoko kami!”