Read Da'a Kaili YOHANES 12 Bible Online

YOHANES 12 - Da'a Kaili bible

YOHANES 12

¹Onoeopa pade marata Eo Bete Paska nalaumo Yesus mpaka ri ngata Betania, ngata nipeto'o i Lazarus to nipakatuwu Yesus bali nggari kamatena bopia.

²Ri setu ira nompowia posusa mombabila I'a. Marta nantulungi nanggeni panggoni ka ira pade i Lazarus naria ri tatongo tau-tau to nekatoko nanggoni mpasanggani-nggani ante Yesus.

³Tempo ira nekatoko ri setu i Maria nangala sabotolo minya wongi to nasuli mpu'u olina, kira-kira santongo lite isina. [25] Pade naratamo i'a nombatoli lana etu ri kada Yesus pade nipe'ena ante wo'ona sampe nangau. Pade ranjapo etu pura-pura nawongi mpu'u soana nggari minya wongi etu.

⁴Nanggita etu notesamo samba'a anaguru Yesus to nosanga ka Yudas Iskariot to mompobalu Yesus banepia. Niulina,

⁵“Nokuya minya to nasuli olina etu da'a nipobalu nte toluatu mpeka doi salaka [26] pade doi etu rawai ka tau nakasiasi?”

⁶Kakonona Yudas da'a nantora tau nakasiasi, tapi i'a madota mompelea doi etu, sabana i'amo anaguru to niparasaya nombaboli doi ira, pade sanggani-sanggani i'a nompelea doi etu. Etu sampe i'a notesa iwetu.

⁷Tapi nangulimo Yesus ka Yudas, “Palambamo i'a manggawia etu, sabana to nikawiana etu mantora eo pombatana Aku banepia.

⁸Tau nakasiasi bate-batena maria ri tatongo komi, tapi Aku e'i da'a mana masaeka ri tatongo komi.”

⁹Nadeamo tau to Yahudi nangepe lele Yesus naria ri ngata Betania. Jadi nalaumo ira mpaka ri setu ala manggita Yesus pade ala manggita i Lazarus wo'u to nipakatuwu Yesus bali nggari kamatena.

¹⁰Jadi balengga-balengga topanggeni agama nasintuwu madota mompatesi i Lazarus wo'u.

¹¹Sabana nggari i Lazarus etumo nadeamo tau to Yahudi da'a mana madota mantuki balengga-balengga topanggeni agama. Ira aga madota mantuki Yesus bo momparasaya I'a.

¹²Naeo mpadondona nadeamo tau to narata ri ngata Yerusalem ala mantuki posusa Paska etu nangepe lele Yesus nompakamosu ngata Yerusalem.

¹³Jadi niala ira lolo tawa nggaluku [27] pade nalaumo ira nombatomunaka Yesus. Nongare-ngaremo ira, “Ratoiyata Alatala! Perapi Pue Mombagane Magau to narata niposumba i Pue! Perapi I'a mombagane Magau nto Israel!”

¹⁴Yesus nosirata ka saongu ana keledai pade nipesawina. Kajadia etu nompakadupa tesa nitulisi riara Buku Nagasa iwe'i:

¹⁵“Ne'e komi maeka, pue ngata Yerusalem! [28] Kitamo! Magau komi marata nesawi ana keledai!” [29] [30]

¹⁶Tempo etu da'apa ninjani anaguru-anaguruna batuana kajadia etu. Tapi naliu Yesus natuwu bali nggari kamatena pade neoremo mpaka ri suruga, nanotomo ka ira tesa-tesa nggari Buku Nagasa etu nantesa Yesus pade etumo to najadi ri ja'ina.

¹⁷Tempo etu ri ngata Yerusalem nadeamo tau to nosanggani-nggani ante Yesus tempo I'a nompokio i Lazarus nggariara dayona pade nompakatuwu bali i'a. Ira batena nantesa ka tau ntanina kajadia etu.

¹⁸Etumo sampe nadea tau nalau nantomunaka Yesus sabana niepe ira Yesusmo to nompowia kabaraka etu.

¹⁹Nanggita etu nangulimo tau-tau to Parisi samba'a bo samba'a, “Nidagimo kita! Kitamo! Pura-pura tau ri dunia e'i nalau nantuki I'a!”

²⁰Ri tatongo ntau dea to nalau mepue ka Alatala ri ngata Yerusalem tempo posusa Paska etu naria wo'u bara sakuya mba'a to Yunani.

²¹Ira narata ri ja'i Filipus pade nanguli ka i'a, “Ane mamala kami wo'u madota mosirata ka Yesus.” (Filipus etu tau nggari ngata Betsaida ri Bagia Galilea.)

²²Sangga nangepe pomperapi ira etu nalaumo i Filipus notesa ka Andreas pade ira romba'a nalau nombatesa pomperapi etu ka Yesus.

²³Nangulimo Yesus ka ira, “Naratamo tempona Aku, Ana nu Manusia rapakabete pade rabila.

²⁴Aku mpu'u-mpu'u notesa ka komi, ane rapana ongu pae da'a ratuja ri tana pade raiwu nasimbayu ewa tomate, pae etu bate-batena aga saongu lau. Tapi ane ongu pae etu ratuja ri tana pade raiwu nasimbayu ewa tomate, kaopuna pae etu mowua madea.

²⁵Isema-sema aga nompotowe katuwuna riara dunia e'i kana malipo katuwuna banepia. Tapi isema-sema da'a nompotowe katuwuna riara dunia e'i, ira kana mombarata katuwua mabelo sampe ri kasae-saena.

²⁶Isema-sema madota mantulungi Aku kana mantuki Aku ala ira mosanggani-nggani ante Aku. Pade isema-sema mantulungi Aku kana rabila Umaku.

²⁷We'i-we'i nasusamo raraku e'i. Nuapa masipato kuuli we'i-we'i? Da'a masipato Aku manguli, ‘Uma, kabasakamo Aku nggari kasusana to marata ri ja'iku.’ Sabana patuju karataku e'i ala mombarasai kasusa etu!

²⁸Tapi iwe'i to masipato kuuli: ‘Uma, powiamo to mompakabete sangamu!’ ” Naopu I'a nanguli iwetu nariamo suara nggari langi nanguli, “Nipakabetekumo sangaku, pade kana kupakabetepa ngina.”

²⁹Nangepe suara etu nariamo tau-tau to nanguli, “Etu aga guntu.” Tapi naria wo'u sanu ira nanguli, “Naria malaeka notesa ka I'a.”

³⁰Jadi nangulimo Yesus ka ira, “Suara to niepe komi pani'a da'a nitesa ala mantulungi Aku, tapi ala mantulungi komi.

³¹We'i-we'i naratamo tempona sala manusia ri dunia kana ratangara. We'i-we'i tempona wo'umo Magau nu Seta to nakuasana riara dunia rapopalai.

³²Pade ane Aku raonggotaka mpakalanga nggari dunia e'i [31] Aku kana manggeni pura-pura tau marata ri ja'iku.”

³³Yesus notesa iwetu ala mompakanoto iwenu jala nggamatena.

³⁴Pade nangulimo tau dea ka I'a, “Naria nitulisi riara buku Atura-atura agama Magau to Mompakasalama to nijanji Alatala kana matuwu sampe ri kasae-saena. Jadi iwenu sampe Komi nanguli Ana nu Manusia kana raonggotaka mpakalanga? Isema Ana nu Manusia etu?” [32]

³⁵Nesonomo Yesus, “Damo sampalai reme maroo ri ja'i komi. Jadi agina komi molumako tempo danarawa ala ne'e komi rarata rumau. Tau nolumako riara karumauna da'a nanoto mpaka ri umba rakalauna.

³⁶Parasayamo reme etu tempo danaria nosanggani-nggani ante komi ala komi wo'u majadi ana-ana nu reme.” Sangga notesa iwetu nalaimo Yesus nggari ja'i ntau dea. I'a da'a mana nosanggani-nggani ante ira.

³⁷Naupa nadeamo kabaraka nikawiana ri ngayo ntau dea, ira da'a nomparasaya I'a.

³⁸Etu pura-pura najadi ala madupamo tesa to nitulisi nabi Yesaya nggaolu iwe'i: “Pue, da'a ria to nomparasaya kareba to nikeni kami ka ira! Da'a ria to nompariara nta'i kabaraka-kabaraka to nipopokita i Pue ka ira!” [33]

³⁹Jadi ira da'a namala nomparasaya, sabana naria wo'u tesa Alatala to nipasimbayu nabi Yesaya nggaolu iwe'i:

⁴⁰“Nitunggaiku nompakaburo mata ira pade nompakako'o rara ira, ala mata ira da'a mamala mekita pade rara ira da'a mangginjani, pade ira da'a manjili ri ja'iku ala Aku mompakabelo ira.” [34]

⁴¹Iwetumo tesa to niuli nabi Yesaya nggaolu sabana nikitana mamimo baraka Yesus pade nitesana nombaboto etu.

⁴²Naupa iwetu nadea wo'u topanggeniaka nto Yahudi to nomparasaya Yesus. Aga ira da'a nabia nompangaku etu ri ngayo ntau dea sabana naeka ira ka to Parisi, ne'e-ne'e ira rasuwuraka nggariara sapo mpodade.

⁴³Sabana neliupa dota ira rabila manusia pade rabila Alatala.

⁴⁴Pade nongaremo Yesus ri tatongo ntau dea, “Isema-sema nomparasaya Aku, da'a aga nomparasaya Aku tapi ira wo'u nomparasaya Alatala to nompakau Aku.

⁴⁵Pade isema-sema to nanggita Aku, ira wo'u nanggita Alatala to nompakau Aku.

⁴⁶Aku e'i nomai ri dunia e'i ewa reme ala isema-sema momparasaya Aku mana meto'o riara karumauna.

⁴⁷Ane maria tau to mangepe tesaku tapi da'a mantuki tesa etu, da'a Aku to mompakasala ira. Sabana Aku narata riara dunia e'i da'a ala mompakasala manusia, tapi ala mompakasalama manusia.

⁴⁸Ane tau da'a madota mantarima Aku pade da'a madota mangepe tesaku nariamo to mompakasala ira. Tesa to nitesaku ka ira etumo to mompakasala ira ri kaopu nu dunia.

⁴⁹Sabana Aku da'a notesa nantuki dotaku mboto. Aku aga nombatesa bo nanguli nuapa to niparenta Umaku ka Aku, sabana I'amo to nompakau Aku marata ri dunia.

⁵⁰Pade ninjaniku wo'u parentana etu mombawai katuwua mabelo sampe ri kasae-saena. Jadi tesa to nitesaku ka komi aga nantuki nuapa to niparenta Umaku ka Aku.”