Read Da'a Kaili YOHANES 13 Bible Online

YOHANES 13 - Da'a Kaili bible

YOHANES 13

¹Tempo etu namosumo Eo Bete Paska. Pade ninjani Yesusmo ntora naratamo tempona I'a mompalasi dunia e'i manjili mpaka ri ja'i Umana. I'a mpu'u-mpu'u nompotowe ira to najadi bagiana riara dunia. Jadi tempo etumo nipopokitana ka ira towena to da'a ria kaopu-opuna. [35]

²Yesus bo anaguru-anaguruna nekatoko nanggoni mpasanggani-nggani. Tempo etu Magau nu Seta naopumo nosiwawayo riara pekiri Yudas ana i Simon Iskariot ala mompobalu Yesus ka balina.

³Ninjani Yesus Umana Alatala nombawai pura-pura kuasa ka I'a. Pade ninjanina wo'u I'a narata nggari ja'i Alatala bo I'a kana manjili mpaka ri ja'i Alatala.

⁴Jadi nekanggoremo I'a nombawonju baju nggumbana, pade nialana saongu handu nipo'una ri kopena.

⁵Naopu etu nialana ue nitolina riara loya. Pade nompamulamo I'a nombarama kada anaguruna samba'a bo samba'a. Pade nipe'ena kada ira ante handu to nipo'u ri kopena etu. [36]

⁶Tempo Yesus narata ri ja'i Simon Petrus, nangulimo i Petrus ka I'a, “Pue, da'a masipato Komi mombarama kadaku!”

⁷Nanguli Yesus ka i'a, “We'i-we'i da'apa ninjanimu nuapa batuana to nikawiaku e'i. Tapi nggapurina kana munjani.”

⁸Tapi nanguli wo'umo i Petrus ka Yesus, “Ne'e, Pue! Ne'e ntoto Komi mombarama kadaku!” Nesonomo Yesus, “Ane Aku da'a mombarama kadamu, da'a ntoto maria posinggamosumu ante Aku.”

⁹Nangepe etu nanguli wo'umo i Simon Petrus, “Ane iwetu, Pue, ne'e aga kadaku rarama Komi tapi pale bo balenggaku wo'u.”

¹⁰Tapi nangulimo Yesus ka i'a, “Tau naopu nandiu nagasa puramo korona, da'a mana paraluu radiu. Aga kadana kana rarama mpakagasa. Komi etu nagasamo, aga da'a pura-pura komi.”

¹¹Niuli Yesus iwetu sabana ninjanina isema to mompobalu I'a ka balina. Etu sampe niulina, “Da'a pura-pura komi nagasa.”

¹²Naopu Yesus nombarama kada ira, nialanamo baju nggumbana nipasuana bali, pade nekatokomo I'a ri meja. Naopu etu nekutanamo I'a ka anaguru-anaguruna, “Ninjani komi batuana nuapa to lako nikawiaku ka komi pani'a?

¹³Komi nanguli Aku Guru bo Pue komi, pade tesa komi etu nakono, sabana Aku e'i mpu'u-mpu'u Guru bo Pue komi.

¹⁴Jadi ane Aku e'i, Guru bo Pue komi, nompakaede koroku nombarama kada komi, masipato komi wo'u mompakaede koro komi mosirama kada samba'a bo samba'a.

¹⁵Aku nompopokita ka komi saongu jonjo ala nuapa to nipowiaku etu wo'u rapowia komi samba'a bo samba'a.

¹⁶Aku mpu'u-mpu'u notesa ka komi, samba'a batua da'a neliu nggabete katuwuna nggari ja'i madikana. Iwetu wo'u samba'a tau nipakau da'a neliu nggabete katawuna nggari tau nompakau i'a.

¹⁷Ane etu manoto ranjani komi, madamba mpu'umo komi ane komi mompowia to nitesaku etu.

¹⁸Nuapa to niuliku pani'a da'a nipawela ka komi pura-pura. Ninjaniku mamimo isema to nipelisiku. Tapi kana rapakadupa nuapa to nitulisi riara Buku Nagasa to nanguli iwe'i: ‘Tau nanggoni mpasanggani-nggani ante Aku, i'amo majadi baliku banepia.’ [37]

¹⁹Etu nitesaku ka komi we'i-we'i tempo etu da'apa najadi ala ane majadimo ngina raparasaya komimo Aku e'i mpu'u-mpu'u Alatala.

²⁰Aku mpu'u-mpu'u notesa ka komi, isema-sema mantarima tau to nipakauku ira wo'u mantarima Aku. Pade isema-sema mantarima Aku ira wo'u mantarima Umaku to nompakau Aku.”

²¹Naopu Yesus nombatesa etu pura-pura nasusa mpu'umo rarana. Pade niulina, “Aku mpu'u-mpu'u notesa ka komi, naria samba'a nggari tatongo komi to mompobalu Aku ka baliku.”

²²Nangepe etu anaguru-anaguruna aga nosikita mbotomo ante kaingu nu rara sabana da'a ninjani ira isema to nipatuju Yesus etu.

²³Tempo etu samba'a anaguruna to nipotowe Yesus nekatoko ri sinjorina.

²⁴Jadi i Simon Petrus nombakode roana etu ante matana pade nanguli, “Pekutana ka Guru bara isema to nipatujuna etu.”

²⁵Jadi anaguru to nekatoko ri sinjori Yesus etu nompakamosu I'a pade nekutana, “Pue, isema to nipatuju Komi etu?”

²⁶Nesonomo Yesus, “Isema to kuwai ka roti to kutome riara ue mpane, i'amo to nipatujuku.” Naopu etu Yesus nangala sanggoto roti nitomena riara ue mpane pade niwaina ka Yudas ana i Simon Iskariot.

²⁷Iwetu Yudas nangala roti etu kaliu-liu nesuamo Magau nu Seta riara nta'ina. Pade nangulimo Yesus ka Yudas, “Pakasalisa urusimo nuapa madota mukawia!”

²⁸Da'a ria kamba samba'a ira sampekatoko nanggoni etu to nangginjani nuapa patuju Yesus notesa iwetu ka Yudas.

²⁹Naria to nompekiri Yesus nompakau Yudas malau mangoli bara nuapa-nuapa rapake ira riara mposusa etu bara mombawai doi ka tau nakasiasi, sabana Yudas topomboliaka doi ira.

³⁰Jadi naopu Yudas nangala roti nggari ja'i Yesus, nalaimo i'a nggari setu. Tempo etu nawengimo.

³¹Sangga nalaipa Yudas nangulimo Yesus ka anaguruna, “We'i-we'i Aku, Ana nu Manusia kana ratoiya bo rapakabete. Pade nggari nuapa to majadi ri ja'iku etu Alatala wo'u ratoiya bo rapakabete.

³²Ane Alatala ratoiya bo rapakabete nggari nuapa to majadi ri ja'iku Aku wo'u ratoiya bo rapakabete Alatala nggari kajadia etu. Pade etu masalisa majadi.

³³Ana-anaku, Aku da'a mana masaeka mosanggani-nggani ante komi. Komi kana mangelo Aku tapi ewa to niuliku ka topanggeniaka-topanggeniaka nto Yahudi bopia, iwetu wo'u kuuli ka komi we'i-we'i, ‘Ri umba kukalau komi da'a mamala malau.’

³⁴Naria parenta nabou kuwai ka komi iwe'i: Komi kana mosipotowe samba'a bo samba'a. Nasimbayu ewa Aku nompotowe komi iwetu wo'u komi kana mosipotowe samba'a bo samba'a.

³⁵Ane komi mosipotowe samba'a bo samba'a kana ranjani ntau puramo komi etu anaguru-anaguruku.”

³⁶Pade nekutanamo i Petrus ka Yesus, “Pue, ri umba rakalau Komi?” Nesonomo Yesus, “Ri umba kukalau da'apa mamala iko malau. Tapi banepianapa pade iko malau mantuki Aku.”

³⁷Nesono wo'umo i Petrus ka I'a, “Iwenu sampe aku da'a mamala mantuki Komi we'i-we'i, Pue? Nasadiamo aku mamate manjaliku Komi!”

³⁸Nesonomo Yesus, “Mpu'u-mpu'u iko madota mamate manjaliku Aku? Aku mpu'u-mpu'u notesa ka iko, da'apa manu mora'o ngina njau tolungganimo iko mombasapu Aku.”