Read Da'a Kaili YOHANES 14 Bible Online

YOHANES 14 - Da'a Kaili bible

YOHANES 14

¹Nangulimo Yesus ka anaguruna, “Ne'e masusa rara komi. Parasayamo Alatala, pade parasaya wo'u Aku.

²Ri sapo Umaku nadea mpu'u peto'o. Aku malau mpaka ri setu mompakasadia peto'o ka komi. Ane da'a iwetu kana kuuli mpakanoto ka komi.

³Pade maopu Aku malau mompakasadia peto'o ka komi Aku kana manjili bali mai mangala komi ala ri umba kupeto'o ri setu wo'u rapeto'o komi.

⁴Peto'o kukalau etu ninjani komimo jalana.”

⁵Nangulimo i Tomas ka I'a, “Pue, da'a ninjani kami ri umba rakalau Komi. Jadi iwenu kami mangginjani jala mpaka gusa'a?”

⁶Nesonomo Yesus ka i'a, “Aku e'imo jala, Akumo to mompakanoto tesa to nakonona ewa Alatala, pade Akumo to mombawai katuwua. Da'a ria samba'a mamala malau mpaka ri ja'i Umaku ane da'a ante Aku.

⁷Ane komi mosinjani ante Aku, komi mosinjani wo'u ante Umaku. Pade nompamula we'i-we'i nosinjanimo komi ante I'a pade nikita komimo I'a.”

⁸Nanguli i Filipus ka Yesus, “Pue, popokita ka kamimo Umamu, pade masana rara kami.”

⁹Nesonomo Yesus ka i'a, “Iwenumo, Filipus, nasaemo Aku nosanggani-nggani ante komi tapi komi da'apa nosinjani ante Aku? Isema-sema nanggita Aku, nikitana wo'umo Umaku. Jadi iwenu sampe komi nanguli, ‘Popokita ka kamimo Umamu?’

¹⁰Iwenumo? Da'apa ntoto niparasayamu Aku e'i nosaongu ante Umaku pade Umaku nosaongu ante Aku? Nuapa to niuliku ka komi da'a tesaku mboto. Tapi Umaku to naroo ri ja'iku to nompowia etu pura-pura.

¹¹Parasayamo tesaku e'i, Aku mpu'u-mpu'u nosaongu ante Umaku pade Umaku wo'u nosaongu ante Aku. Ane etu nakaja raparasaya komi ante nangepe tesaku, parasayamo sabana nikita komi kabaraka-kabaraka to nipowiaku.

¹²Aku mpu'u-mpu'u notesa ka komi, isema-sema to nomparasaya Aku ira mamala mompowia kabaraka ewa to nipowiaku. Pade da'a aga etu, ira mamala mowia kabaraka to meliu nggabete nggari to nipowiaku, sabana Aku malau mpaka ri ja'i Umaku.

¹³Pade nuapa-nuapa to raperapi komi ante manguli sangaku etu kana kupowia ka komi, ala nggari powiaku etu Umaku rabila bo ratoiya.

¹⁴Nuapa-nuapa raperapi komi ante manguli sangaku kana kupowia ka komi.”

¹⁵“Ane komi mompotowe Aku komi kana mantuki parenta-parentaku.

¹⁶Pade Aku kana merapi ri ja'i Umaku ala rawaina ka komi Topetulungi ntanina, to maroo ri ja'i komi sampe ri kasae-saena.

¹⁷Topetulungi etumo Nosa Nagasa nu Alatala to mompakanoto ka komi pepatuduki to nakonona. Tau-tau ri dunia e'i to da'a nomparasaya da'a mamala mantarima I'a sabana ira da'a nanggita I'a bo ira da'a nosinjani ante I'a. Tapi komi kana mosinjani ante I'a sabana I'a nosanggani-nggani ante komi we'i-we'i pade I'a kana meto'o riara nta'i komi ngina.

¹⁸Aku da'a mompalasi komi ewa ngana pailu. Tapi Aku kana manjili bali ri ja'i komi.

¹⁹Da'a mana masaeka Aku mana rakita tau-tau ri dunia e'i. Tapi komi kana manggita Aku. Pade komi kana matuwu sabana Aku kana matuwu bali.

²⁰Ane maratamo tempo etu kana ranjani komi Aku nosaongu ante Umaku pade komi wo'u nosaongu ante Aku pade Aku nosaongu ante komi.

²¹Isema-sema mompariara nta'i pade mantuki parenta-parentaku ira etumo to nompotowe Aku. Pade ira to nompotowe Aku kana rapotowe Umaku wo'u, pade Aku mboto mompotowe ira pade mompopokita koroku ka ira.”

²²Pade nekutana Yudas (da'a Yudas Iskariot) ka Yesus, “Pue, nuapa sabana Komi aga mompopokita koromu ka kami, da'a ka pura-pura manusia ri dunia?”

²³Nesonomo Yesus, “Isema-sema mompotowe Aku kana mantuki tesaku. Pade Umaku kana mompotowe i'a pade kami kana marata meto'o mpasanggani-nggani ante i'a.

²⁴Tapi tau da'a nompotowe Aku da'a wo'u madota mantuki tesaku. Pade tesa to niepe komi e'i da'a nggari ja'iku mboto, tapi nggari ja'i Umaku to nompakau Aku.

²⁵Pura-pura tesa etu nitesaku ka komi tempo Aku danaria nosanggani-nggani ante komi.

²⁶Tapi ane Nosa Nagasa nu Alatala marata I'a kana mompatuduki ka komi mpengele-ngele pade mompopatora ka komi pura-pura nuapa to nitesaku ka komi. Sabana I'amo Topetulungi to rapakau Umaku manjambei Aku.

²⁷Aku kana mompakasana rara komi ante kasana nu rara nggari ja'iku mboto. Pade kasana nu rara etu da'a nasimbayu ewa kasana nu rara nggari ja'i manusia ri dunia to naja'a e'i. Jadi ne'e komi masusa rara, ne'e komi maeka rara.

²⁸Niepe komimo tesaku pani'a to nanguli Aku malau nggari ja'i komi tapi Aku kana manjili bali ri ja'i komi. Ane mpu'u-mpu'u komi mompotowe Aku komi kana madamba rara mangepe tesa nanguli Aku malau mpaka ri ja'i Umaku, sabana I'a neliu nggakuasa nggari Aku e'i.

²⁹Tesa etu niuliku ka komi we'i-we'i tempo da'apa najadi ala ane majadimo ngina kana raparasaya komimo.

³⁰Da'a mana madea gaga pantesa kuuli ka komi, sabana Magau nu Seta to nombakuasai dunia e'i ntora naratamo mompandasa Aku. [38] I'a da'a nakuasa ri ja'iku,

³¹tapi etu kana majadi ala manusia ri dunia e'i mangginjani Aku nompotowe Umaku pade Aku nompowia pura-pura nuapa to niparentana ka Aku. Kamaimo kita malai nggari se'i.”