Read Da'a Kaili YOHANES 15 Bible Online

YOHANES 15 - Da'a Kaili bible

YOHANES 15

¹Nanguli wo'umo Yesus ka ira, “Aku e'imo walaa anggur to nakonona, pade Umaku pue ntinalu anggur etu.

²Rangga-ranggaku to da'a nowua nikoto nitajiakana. Tapi rangga-rangga to nowua nipegasana mpakabelo-belo ala mantambai kadea nu wuana.

³Komi etu nagasamo sabana niepe komimo pepatuduki to nitesaku ka komi.

⁴Komi kana maroo mosaongu rara ante Aku pade Aku wo'u maroo mosaongu rara ante komi. Rangga-rangga to noga'a nggari batana da'a mamala mowua. Aga rangga-rangga to nasintaka ri bata kayu etu to mowua. Iwetu wo'u komi da'a mamala mowua ane komi da'a maroo mosaongu rara ante Aku.

⁵Aku e'imo walaa anggur pade komi etumo rangga-ranggana. Ane komi maroo mosaongu rara ante Aku pade Aku maroo mosaongu rara ante komi, komi kana mowua madea. Tapi ane komi moga'a nggari ja'iku komi da'a mamala mompowia nuapa-nuapa.

⁶Tau da'a naroo nosaongu rara ante Aku kana ratajiaka nasimbayu ewa rangga kayu ratajiaka sampe majadi mangau. Rangga-rangga ewa etu aga rapasiromu ratajiaka riara apu pade rapalabu.

⁷Ane komi maroo mosaongu rara ante Aku pade tesaku maroo riara nta'i komi, perapimo nuapa-nuapa to nipodota komi pade etu kana rawai ka komi.

⁸Ane komi mowua madea manotomo komi mpu'u-mpu'u anaguruku. Pade ante iwetu Umaku kana ratoiya bo rabila.

⁹Nasimbayu ewa Umaku nompotowe Aku, iwetu wo'u Aku nompotowe komi. Komi kana maroo mosaongu rara ante Aku ala komi mombarasai pepotoweku.

¹⁰Ane komi mantuki parenta-parentaku, komi mpu'u-mpu'u maroo mosaongu rara ante Aku pade mombarasai pepotoweku nasimbayu ewa Aku wo'u nantuki parenta Umaku pade naroo nosaongu rara ante I'a pade nombarasai pepotowena.

¹¹Pura-pura e'i niuliku ka komi ala kadamba nu raraku mamala wo'u rarasai komi pade ala komi mpu'u-mpu'u madamba rara.

¹²Iwe'imo parentaku kuuli ka komi: posipotowemo samba'a bo samba'a nasimbayu ewa Aku nompotowe komi.

¹³Iwe'imo jonjo tau mpu'u-mpu'u nompotowe wegana: i'a nombawai katuwuna manjaliku wegana.

¹⁴Komimo wega-wegaku ane komi mantuki parenta-parenta to niwaiku ka komi.

¹⁵Aku mana manguli komi batua, sabana samba'a batua da'a nangginjani nuapa to nipowia madikana. Tapi we'i-we'i Aku manguli komi wegaku. Nanotomo etu sabana pura-pura nuapa to niepeku nggari ja'i Umaku etu wo'u nitesaku ka komi.

¹⁶Da'a komi to nompelisi Aku, tapi Aku to nompelisi komi pade nompakau komi malau mowua madea, etumo wua to da'a maopu-opu. Ane komi mowua iwetu nuapa-nuapa raperapi komi nggari ja'i Umaku ante manguli sangaku kana rawaina ka komi.

¹⁷Jadi iwe'imo parentaku ka komi: posipotowemo samba'a bo samba'a.”

¹⁸“Ane komi raporau rara ntau ri dunia to da'a nomparasaya, kana ratora komi ira nokolu nomporau Aku.

¹⁹Ane rapana komi nosimporoa ante tau da'a nomparasaya Aku, natantumo ira kana mompotowe komi sabana komi roa ira mboto. Tapi komi da'a nosimporoa ante ira sabana Aku nompelisi komi ala malai nggari ja'i ira. Jadi etu sampe ira nomporau rara komi.

²⁰Toramo nuapa to niuliku ka komi pani'a, ‘Samba'a batua da'a neliu nggabete katuwuna nggari madikana.’ Ane Aku nipandasa ira, natantumo komi wo'u kana rapandasa ira. Ane pepatudukiku nituki ira, natantumo pepatuduki komi wo'u kana ratuki ira.

²¹Pura-pura etu kana rapowia ira ka komi sabana komi najadi topantuki Aku. Etu rapowia ira sabana ira da'a ntoto nosinjani ante Alatala to nompakau Aku.

²²Ane rapana Aku da'a narata nombatesa ka ira, ira da'a nasala. Tapi naratamo Aku pade nitesaku mamimo ka ira. Jadi mana ria tanje ira mowia silaka.

²³Isema-sema nomporau Aku ira wo'u nomporau Umaku.

²⁴Ane Aku da'a nompowia kabaraka-kabaraka ri tatongo ira anu da'a sanggani nipowia tau ntanina ira da'a nasilaka. Tapi nikita iramo kabaraka-kabaraka etu pade ira batena nomporau Aku ante Umaku wo'u.

²⁵Tapi etu najadi ala madupa tesa to nitulisi riara Atura-atura agama ira iwe'i: ‘Ira nomporau Aku nau da'a naria sabana.’ [39]

²⁶Aku kana mompakau ka komi Topetulungi nggari ja'i Umaku, etumo Nosa Nagasa nu Alatala to mompakanoto ka komi pepatuduki to nakonona. Ane I'a marata I'amo to majadi sabiku.

²⁷Pade komi wo'u majadi sabiku sabana komimo to nosanggani-nggani ante Aku nggari pamula panggawiaku riara dunia e'i.”