Read Da'a Kaili YOHANES 16 Bible Online

YOHANES 16 - Da'a Kaili bible

YOHANES 16

¹“Pura-pura etu niuliku ka komi ala komi ne'e mokanggaura momparasaya.

²Komi kana rapopalai nggariara sapo mpodade nto Yahudi. Pade kana marata tempona tau to mompatesi komi mompekiri powia ira etu mompakadamba rara Alatala.

³Etu pura-pura rapowia ira ri ja'i komi sabana ira da'a nosinjani ante Umaku pade da'a wo'u nosinjani ante Aku.

⁴Pura-pura etu niuliku ka komi we'i-we'i ala ane etu majadi kana ratora komi kajadia-kajadia etu nitesaku mamimo ka komi.” “Tesa etu da'a niuliku ka komi nggari pamulana sabana Aku danosanggani-nggani ante komi.

⁵Tapi we'i-we'i Aku malau mpaka ri ja'i Umaku to nompakau Aku pade da'a ria samba'a nggari tatongo komi nompekutana ri umba kukalau.

⁶Nasusa mpu'u rara komi sabana Aku notesa ka komi pani'a Aku kana malau.

⁷Tapi naupa iwetu kakono-konona neliu nggabelo ka komi ane Aku malau. Sabana ane Aku da'a malau Topetulungi da'a marata ri ja'i komi. Tapi ane Aku malau Aku kana mompakau I'a marata ri ja'i komi.

⁸Ane Topetulungi etu marata I'a kana mompakanoto ka manusia ri dunia ira nasilaka. Pade rapakanotona wo'u ka ira kanoaku, pade rapakanotona natantumo potangara nu Alatala.

⁹Rapakanotona manusia nasilaka sabana ira da'a nomparasaya Aku.

¹⁰Rapakanotona wo'u kanoaku, sabana Aku malau mpaka ri ja'i Umaku pade komi mana manggita Aku.

¹¹Pade kana rapakanotona wo'u natantumo Alatala mombasuku tau nasilaka, sabana Magau nu Seta to nombakuasai dunia e'i naopumo nitangara.

¹²Danadeapa madota kutesa ka komi tapi da'a rapakule komi mantarima etu pura-pura we'i-we'i.

¹³Tapi ane maratamo Nosa Nagasa etu I'amo to manggeni komi mangginjani pura-pura pepatuduki to nakonona. I'a da'a motesa nantuki dotana mboto. Tapi nuapa to niepena, etumo to ratesana. Pade I'a kana motesa ka komi nuapa to majadi ri eo nggapurina.

¹⁴I'a kana mombabila Aku bo mompakabete sangaku sabana nuapa to nitarimana nggari ja'iku etumo to ratesana mpakanoto ka komi.

¹⁵Pura-pura nuapa to naria ri ja'i Umaku, etu pura-pura bagiaku wo'u. Etu sampe niuliku ka komi nuapa to nitarima Nosa Nagasa nggari ja'iku etumo to ratesana mpakanoto ka komi.”

¹⁶“Sampalaipa komi mana manggita Aku. Pade sampalaipa wo'u komi kana manggita Aku.”

¹⁷Nangepe tesana etu nosipekutana mbotomo anaguruna samba'a bo samba'a, “Nuapa ntoto patujuna nanguli ka kita ‘Sampalaipa komi mana manggita Aku, pade sampalaipa wo'u komi kana manggita Aku?’ Pade nuapa wo'u patuju tesana nanguli ‘Aku malau mpaka ri ja'i Umaku?’ ”

¹⁸Nosipekutana nju'umo ira, “Nuapa patuju tesana ‘Sampalaipa?’ Da'a ntoto ninjanita patuju tesana etu.”

¹⁹Ninjani Yesus ira madota mompekutana I'a. Jadi niulina ka ira iwe'i: “Nikitaku komi tunggai nosipekutana mbotomo nuapa patuju pantesaku pani'a tempo Aku nanguli, ‘Sampalaipa komi mana manggita Aku pade sampalaipa wo'u komi kana manggita Aku.’

²⁰Aku mpu'u-mpu'u notesa ka komi, komi kana motumangi bo mageo mpajea manggita nuapa to majadi ri ja'iku, tapi baliku ri dunia e'i kana madamba-damba. Komi kana masusa rara manggita etu tapi kasusa rara komi kana mabali majadi kadamba nu rara.

²¹Ane samba'a besi ntora moana natantumo nasusa mpu'u rarana sabana naratamo ntoana moana. Tapi ane nesuwumo anana etu nikalinganamo susa rarana etu. Nadamba mpu'u rarana sabana samba'a ngana nesuwu ri dunia.

²²Iwetu wo'u ante komi. We'i-we'i nasusamo rara komi. Tapi Aku kana mosirata bali ante komi pade tempo etu komi kana madamba bali. Pade da'a ria samba'a tau mamala mompakalipo kadamba nu rara komi etu.

²³Tempo etu komi da'a mana mekutana nuapa-nuapa ri ja'iku. Aku mpu'u-mpu'u notesa ka komi, nuapa-nuapa raperapi komi nggari ja'i Umaku ante manguli sangaku kana rawaina ka komi.

²⁴Sampe we'i-we'i komi da'apa nomperapi nuapa-nuapa ante manguli sangaku. Tapi perapimo we'i-we'i pade komi kana rawai ala komi mpu'u-mpu'u madamba!”

²⁵“Tesa to niuliku ka komi e'i aga nijaliliku. Tapi kana marata tempona da'a mana kujalili ka komi, tapi kana kutesa mpakanoto ka komi Umaku.

²⁶Tempo etumo komi kana merapi ri ja'i Umaku ante manguli sangaku. Da'a paraluu Aku momperapi nuapa-nuapa ka komi ri ja'i Umaku.

²⁷Sabana Umaku mboto nompotowe komi. I'a nompotowe komi sabana komi nompotowe Aku pade niparasaya komimo Aku e'i narata nggari ja'ina.

²⁸Aku e'i narata nggari ja'i Umaku pade nomai riara dunia e'i. Tapi we'i-we'i Aku mompalasi dunia e'i pade manjili mpaka ri ja'i Umaku.”

²⁹Pade nangulimo anaguruna ka I'a, “Kitamo! We'i-we'i Komi notesa ante nanoto ka kami, da'a mana ante jalili.

³⁰We'i-we'i nanotomo ka kami Komi nangginjani mpengele-ngele. Da'a paraluu tau nompekutana Komi. Etu sampe niparasaya kami Komi mpu'u-mpu'u narata nggari ja'i Alatala.”

³¹Nesonomo Yesus, “Mpu'u-mpu'u niparasaya komimo we'i-we'i?

³²Toramo! Kana marata tempona, pade kakonona naratamo tempo etu, komi kana raposimpotatare. Komi mbau manjili mpaka ri sapomu mboto, komi mompalasi Aku njamba'aku. Tapi Aku da'a mpu'u njamba'aku sabana Umaku kana mosanggani-nggani ante Aku.

³³Pura-pura etu nitesaku ka komi ala masana rara komi sabana mosaongu rara ante Aku. Riara dunia e'i komi kana rapandasa. Tapi pakaroso rara komi! Kuasa to naja'a riara dunia e'i nidagikumo!”