Read Da'a Kaili YOHANES 17 Bible Online

YOHANES 17 - Da'a Kaili bible

YOHANES 17

¹Naopu Yesus notesa iwetu nantingoamo I'a ri langi pade nosambaya iwe'i: “Umaku, naratamo tempona. Popokitamo kuasa bo kagaya nu Anamu ala Anamu wo'u mamala mompopokita kuasa bo kagayamu.

²Komi nombawai ka Aku kuasa moparenta pura-pura manusia ala Aku mamala mombawai katuwua mabelo sampe ri kasae-saena ka tau-tau to niwaimu ka Aku.

³Iwe'imo sampe manusia matuwu mabelo sampe ri kasae-saena: Ira mosinjani ante Komi, Alatala to nakonona to samba'a lau, pade ira mosinjani wo'u ante Yesus Kristus to nipakaumu etu.

⁴Aku nompopokita kuasa bo kagayamu riara dunia e'i ante nompakaopu panggawia to niparasayamu ka Aku.

⁵We'i-we'i, Uma, Aku merapi wai ka Akumo kuasa bo kagayaku ri ngayomu nasimbayu ewa kuasa bo kagaya to naria ri ja'iku mpasanggani-nggani ante Komi tempo dunia da'apa nipajadi.”

⁶“Uma, nipopanjanikumo Komi ka tau-tau to niwaimu ka Aku nggariara dunia e'i. Ira etu bagiamu mamimo. Pade ira wo'u niwaimu ka Aku, pade nituki iramo tesamu.

⁷We'i-we'i ninjani iramo nuapa pura to niwaimu ka Aku mpu'u-mpu'u nopu'u nggari ja'imu, Uma.

⁸Sabana pura-pura tesa to niulimu ka Aku, pade tesa-tesa etu nitarima iramo. Nanotomo ka ira Aku narata nggari ja'imu, pade niparasaya ira wo'umo Komi to nompakau Aku.

⁹Aku mosambaya ka ira anaguruku e'i. Da'a pura-pura manusia to niposambayaku tapi aga ira to niwaimu ka Aku, sabana ira etu mpu'u-mpu'u bagiamu.

¹⁰Pura-pura tau to najadi bagiaku, ira wo'u najadi bagiamu. Pade pura-pura tau to najadi bagiamu wo'u najadi bagiaku. Pade kuasa bo kagayaku nanoto nikita riara nggatuwu ira.

¹¹Mana masaeka Aku meto'o ri dunia e'i. Aku kana malau mpaka ri ja'imu tapi ira daneto'o ri dunia e'i. O, Umaku to nagasa. Jagaimo ira ante kuasamu mboto, kuasa to niwaimu ka Aku. Jagaimo ira ala ira mosaongu rara nasimbayu ewa Komi bo Aku wo'u nosaongu rara.

¹²Tempo Aku danosanggani-nggani ante ira Akumo to nombajagai ira ante kuasamu, etumo kuasa to niwaimu ka Aku. Nijagaiku ira sampe da'a ria ntanina to natontona, aga i'a to masipato matonto sampe ri kasae-saena. Etu najadi ala madupa nuapa to nitulisi riara Buku Nagasa. [40]

¹³We'i-we'i Aku malau mpaka ri ja'imu, Uma. Pura-pura e'i nitesaku ka anaguruku tempo Aku danaria riara dunia e'i ala ira mpu'u-mpu'u madamba ante kadamba nu rara nggari ja'iku mboto.

¹⁴Uma, nipasimbayuku ka iramo tesamu. Pade tau-tau riara dunia e'i nompokarau ira, sabana anaguruku etu da'a nosaongu pekiri ante ira nasimbayu ewa Aku wo'u da'a nosaongu pekiri ante tau-tau etu.

¹⁵Aku da'a nerapi ala Komi mangala ira nggari dunia e'i. Tapi kuperapi ala Komi mombajagai ira nggari Magau nu Seta.

¹⁶Ira da'a nosaongu pekiri ante tau-tau da'a nomparasaya nasimbayu ewa Aku wo'u da'a nosaongu pekiri ante tau-tau etu.

¹⁷Pajadimo ira bagiamu to nagasana, Uma, ante mompatuduki ka ira pepatuduki to nakonona. Tesamu, Uma, etumo pepatuduki to nakonona.

¹⁸Nasimbayu ewa Komi nompakau Aku nomai riara dunia e'i, iwetu wo'u Aku nompakau ira malau mpaka ri ja'i tau ntanina riara dunia e'i.

¹⁹Uma, Aku mombawai koroku mboto manjaliku ira ala ira wo'u mamala majadi bagiamu to nagasana ante mangginjani pepatuduki to nakonona.”

²⁰“Da'a aga anaguruku e'i kuposambaya, tapi Aku wo'u mosambaya ka pura-pura tau to momparasaya Aku banepia ante mangepe tesa-tesa to rapatolele anaguru-anaguruku e'i.

²¹Uma, kuperapi ala ira pura-pura mosaongu rara. Nasimbayu ewa Aku nosaongu rara ante Komi bo Komi nosaongu rara ante Aku, kuperapi ala ira wo'u mosaongu rara ante Kita ala pura-pura tau momparasaya Komimo to nompakau Aku e'i.

²²Niwaiku ka iramo kuasa to niwaimu ka Aku ala ira mosaongu rara nasimbayu ewa Kita wo'u nosaongu rara.

²³Aku nosaongu rara ante ira pade Komi nosaongu rara ante Aku ala ira mpu'u-mpu'u mosaongu rara. Ane iwetu kana manoto ka pura-pura manusia Komimo to nompakau Aku pade Komi to nompotowe ira nasimbayu ewa Komi nompotowe Aku.

²⁴Uma, to nipodotaku ala tau-tau to niwaimu ka Aku etu mamala mosanggani-nggani ante Aku ala rakita ira kuasa bo kagayaku; etumo kuasa bo kagaya to niwaimu ka Aku sabana Komi nompotowe Aku nggari lamba pamulana da'apa dunia nipajadi.

²⁵O, Umaku to nanoana. Manusia riara dunia e'i da'a nosinjani ante Komi, tapi Aku nosinjani ante Komi. Pade anaguruku e'i nangginjani Komimo to nompakau Aku.

²⁶Nipopanjaniku ka iramo Komi, Uma. Pade Aku bate-batena mompopanjani Komi ka ira ala towemu to naria ri ja'iku bate-batena maria wo'u ri ja'i ira, pade ala Aku mboto mamala mosaongu rara ante ira.”