Read Da'a Kaili YOHANES 19 Bible Online

YOHANES 19 - Da'a Kaili bible

YOHANES 19

¹Naopu etu i Pilatus nompakau tantara-tantarana mombaporo Yesus.

²Naopu nombaporo I'a, tantara-tantara etu nompowia saongu songgo nggari karui pade nipoposonggo ira ka Yesus. Naopu etu nipasua ira ka I'a santonga baju nakamumu ewa baju magau.

³Pade ira tunggai nompakamosu Yesus nompongei-ngei I'a ante nanguli, “Ratoiyata Magau nto Yahudi!” Pade nisapa-sapa iramo lenje Yesus.

⁴Naopu etu nesuwu wo'umo i Pilatus mpaka ri sawalikuna nanguli ka tau-tau to Yahudi, “Kita komimo! I'a kukeni mesuwu mpaka ri ja'i komi ala ranjani komi da'a ntoto naria salana nirataku.”

⁵Pade Yesus nikeni nesuwu ri sawalikuna nosonggo karui bo nobaju magau nakamumu. Pade nangulimo i Pilatus ka tau dea etu, “Kitamo! E'imo I'a!”

⁶Sangga nanggita Yesus nongare-ngaremo balengga-balengga topanggeni agama bo topojaga-topojaga Sapo Mpepue, “Pakumo I'a ri kayu parika! Pakumo I'a ri kayu parika!” Nangulimo i Pilatus ka ira, “Ala komi mbotomo I'a, pade paku I'a ri kayu parika, sabana tau etu da'a ntoto naria salana nirataku.”

⁷Nesonomo tau-tau to Yahudi ka i'a, “Nantuki Atura-atura kami tau e'i masipato rapatesi sabana I'a nompangaku korona Ana nu Alatala!”

⁸Sangga nangepe pantesa tau-tau to Yahudi etu nantambai kaeka rara i Pilatus.

⁹Jadi nesua balimo i'a riara njapona pade Yesus wo'u nikeni nesua ri setu. Pade nekutanamo i Pilatus ka Yesus, “Tau nggari umba kakonona Komi e'i?” Tapi Yesus da'a nesono.

¹⁰Jadi nanguli wo'umo i Pilatus ka I'a, “Iwenumo? Da'a madota Komi motesa ante aku? Da'a ninjanimu aku e'i nakuasa mombakabasaka Komi, pade nakuasa wo'u mombapaku Komi ri kayu parika?”

¹¹Nesonomo Yesus, “Da'a ntoto ria kuasamu ri ja'iku ane da'a niwai Alatala ka komi. Jadi tau-tau to nanggeni Aku ri ja'imu neliu mpu'u kabete silaka ira.”

¹²Sangga i Pilatus nangepe pantesa Yesus etu, nielonamo jala ala Yesus mamala rakabasaka. Tapi nongare wo'umo tau-tau to Yahudi, “Ane komi mombakabasaka tau etu komi da'a nowega ante Magau Kaisar! Isema-sema nompangaku korona samba'a magau, i'amo bali Magau Kaisar!”

¹³Nangepe tesa tau-tau to Yahudi etu, nikeni Pilatusmo Yesus mpaka ri sawalikuna pade nekatokomo i'a ri kadera mpotangara to nosanga ka “Jaula Watu.” Ane riara basa Ibrani sangana “Gabata.”

¹⁴Tempo etu nawela eo mpompakasadia tempo Posusa Paska, kira-kira ntongo eo. Nangulimo i Pilatus ka tau-tau to Yahudi, “E'imo magau komi!”

¹⁵Tapi nongare-ngaremo ira, “Patesimo I'a! Patesimo I'a! Pakumo I'a ri kayu parika!” Nanguli i Pilatus ka ira, “Iwenu? Masipato aku mombapaku magau komi ri kayu parika?” Nesonomo balengga-balengga topanggeni agama, “Aga Magau Kaisar magau kami!”

¹⁶Kaopuna i Pilatus nombawai Yesus ka tau-tau to Yahudi ala I'a rapaku ri kayu parika sampe mamate. Pade Yesus nikeni tantara-tantara nggari setu.

¹⁷Nalaimo I'a nggari ngata etu ante nanjumbuaka mboto kayu rapomparika I'a mpaka ri peto'o to nosanga ka Peto'o Wuku Balengga. Ane riara basa Ibrani sangana “Golgota.”

¹⁸Ri setumo Yesus nipaku ira ri kayu parika. Nosanggani-nggani ante I'a naria wo'u romba'a tau ntanina to nipaku ri kayu parika, samba'a ri sabingga ngganana, samba'a ri sabingga njidina pade Yesus ri tatongona.

¹⁹Naria dopi nitulisi nipakasadia i Pilatus to nipataka ri kayu pomparika Yesus to nanguli iwe'i: YESUS TO NAZARET, MAGAU NTO YAHUDI.

²⁰Dopi nitulisi etu nibasa nadea tau to Yahudi sabana peto'o Yesus nipaku ri kayu parika etu namosu ngata Yerusalem, pade tesa etu nitulisi riara tolungaya basa, etumo Basa Ibrani, Basa Latin, [44] pade Basa Yunani.

²¹Nanggita etu nangulimo balengga-balengga topanggeni agama ka i Pilatus, “Ne'e ratulisi komi ‘Magau nto Yahudi.’ Agina ratulisi komi ‘Tau e'i nompangaku korona Magau nto Yahudi.’ ”

²²Tapi nesonomo i Pilatus, “Nuapa to nitulisiku etu, batena etumo!”

²³Naopu tantara-tantara nombapaku Yesus ri kayu parika ira nangala pakeana pade nibagi-bagi ira patabagia, simbau sabagia. Baju nggumbana wo'u niala ira, tapi baju etu da'a naria pojauna, aga nitanu wa'amo santonga lau.

²⁴Etu sampe tantara-tantara etu nanguli, “Ne'e raserita baju nggumba e'i. Agina kita mompenoa mowia nomoro. Isema mawela nomoro i'a mombarata baju e'i.” Etu pura-pura najadi ala madupa tesa to nitulisi riara Buku Nagasa to nanguli iwe'i: “Ira nosibagi-bagi ka pakeaku, pade bajuku nipompenoa ira.” [45] Jadi nuapa to nipowia tantara-tantara etu nasimbayu ntoto ewa to nitulisi nggaolu.

²⁵Namosu ri pu'u kayu pomparika Yesus etu indona nenggore mpasanggani-nggani ante sampesuwu besi nu indona. Naria wo'u i Maria rongo i Klopas pade i Maria Magdalena.

²⁶Sangga Yesus nanggita indona nenggore ri setu ri sinjori anaguruna to nipotowena, niulinamo ka indona, “Nindo, etumo anamu.”

²⁷Pade niulina wo'umo ka anaguruna etu, “Etumo indomu.” Jadi nompamula nggari eo etu, anaguru etu nantarima indo Yesus neto'o riara njapona.

²⁸Ninjani Yesus naopumo mpengele-ngele bagona. Jadi notesamo I'a ala madupamo tesa to nitulisi riara Buku Nagasa. Niulina, “Nabai tamboloku.” [46]

²⁹Ri setu naria saongu tubu niisi ante ue anggur to napoi. Jadi naria tau nangala sangele wunga to nasimbayu ewa lumu nitome ira riara ue anggur etu. Naopu etu nitosupaka ira wunga etu ri wuntu sanggoto kayu pade nipopoinu ira ka Yesus.

³⁰Naopu Yesus nanjasipi anggur etu niulina, “Naopu puramo bagoku.” Naopu etu notunggoumo balenggana pade nalaimo nosana.

³¹Eo etu eo mpompakasadia ka Eo Mpenonto, pade Eo Mpenonto etu nawela posusa Paska nto Yahudi. Topanggeniaka-topanggeniaka nto Yahudi da'a madota watabaku ntau nipaku ri kayu parika etu rapakela makambero ri setu tempo Eo Mpenonto. Jadi etu sampe ira nerapi ka i Pilatus ala kada tau-tau nipaku ri kayu parika etu raboba mpakakoto ala tau-tau etu masalisa mamate pade watabaku ira masalisa rata'uraka nggari kayu parika.

³²Jadi nalaumo tantara-tantara nombaboba mpakakoto kada-kada tau romba'a to nipaku ri kayu parika mpasanggani-nggani ante Yesus.

³³Tapi tempo ira narata ri ja'i Yesus nikita ira namatemo I'a. Jadi da'a najadi ira nombaboba mpakakoto kada Yesus.

³⁴Aga naria samba'a nggari tatongo tantara etu nombatosu usu Yesus ante tawalana. Pade kaliu-liu nesuwumo lei ante ue nggari usu Yesus.

³⁵Tau to nanggita kajadia etu ante matana mboto, i'amo to nompatolele kajadia etu ka komi ala komi wo'u momparasaya. Nakonomo tesana etu pade ninjanina mbotomo tesana etu nakono.

³⁶Pura-pura etu najadi ala madupa nuapa to nitulisi riara Buku Nagasa to nanguli iwe'i: “Da'a ria sampeka wukuna to rapakakoto.” [47]

³⁷Pade naria wo'u tesa ntanina riara Buku Nagasa to nanguli, “Ira kana mantingoa tau to nitosu ira tawala.” [48]

³⁸Naopu etu naria samba'a tau nosanga ka Yusuf nggari ngata Arimatea nalau nomperapi watabaku Yesus ka i Pilatus. Yusuf etu samba'a topantuki Yesus, aga da'a ninjani ntau sabana i'a naeka ka topanggeniaka nto Yahudi. Pomperapi Yusuf etu nipoiyo i Pilatus. Jadi nalaumo Yusuf nanta'uraka watabaku Yesus nggari kayu parika.

³⁹Nosanggani-nggani ante Yusuf naria wo'u i Nikodemus, tau to narata nanggita Yesus tempo nggawengina bopia. I'a nanggeni galo rampa-rampa nawongi nosanga ka mur bo gaharu, kira-kira tolumpulu kilo katomona.

⁴⁰Pade niala ira romba'a watabaku Yesus nisompu ira ante kae gandisi to nalusuna nosanggani ante rampa-rampa to nawongi etu nantuki ada nto Yahudi.

⁴¹Namosu peto'o nipombapaku Yesus ri kayu parika naria salimpu pampa. Riara pampa etu naria saongu dayo nabou nipa'a ri bulu watu anu da'apa sanggani nipake.

⁴²Jadi watabaku Yesus niboli ira riara dayo etu, sabana namosumo dayo etu pade mana masaeka pamulana Eo Mpenonto.