Read Da'a Kaili YOHANES 20 Bible Online

YOHANES 20 - Da'a Kaili bible

YOHANES 20

¹Ri eo Aka kampadondo njiina nalaumo i Maria Magdalena mpaka ri dayo Yesus. Sangga naratapa i'a ri dayo nikitanamo watu nipompiku dayo etu nikaliakamo nggari pewobo dayo etu.

²Jadi nangowamo i'a mpaka ri ja'i Simon Petrus bo anaguru to nipotowe Yesus etu, pade niulina ka ira, “Niala ntaumo watabaku Yesus nggariara dayo, pade da'a ninjani kami bara ri umba nipomboli ira!”

³Nangepe etu nalaimo i Petrus bo anaguru ntanina etu mpaka ri dayo.

⁴Nangowamo ira romba'a mpaka gusa'a tapi anaguru ntanina etu neliu nggagasipa pade i Petrus. Jadi i'a nokolu narata ri dayo.

⁵Sangga naratapa i'a ri dayo notunggoumo i'a nompeside riara dayo. Nikitana kae gandisi niposompu Yesus ri setu. Tapi i'a da'a nesua riara dayo etu.

⁶Pade naratamo i Simon Petrus nggapurina. I'a kaliu-liu nesua riara dayo etu. Nikitana kae gandisi niposompu Yesus ri setu.

⁷Pade nikitana wo'u kae nipompo'u balengga Yesus. Tapi kae etu da'a nipasanggani ante kae gandisi etu, aga nilulu mpakabelo-belo niboli ri peto'o ntanina ri sinjorina.

⁸Pade nesua wo'umo anaguru ntanina to nokoluna narata ri dayo etu. Nikitana kae etu pade niparasayanamo.

⁹Tempo etu da'apa ninjani ira patuju tesa to nitulisi riara Buku Nagasa nggaolu to nanguli Yesus kana matuwu bali nggari kamatena.

¹⁰Naopu etu nanjilimo ira romba'a mpaka ri sapo.

¹¹Tapi i Maria Magdalena danekanggore ri sawaliku dayo etu nageo-geo. Tempo i'a nageo ri setu notunggoumo i'a nompeside riara dayo.

¹²Ri setu nikitana romba'a malaeka nobaju nabula nekatoko ri walea pomboli watabaku Yesus, samba'a ri balenggana pade samba'a ri kadana.

¹³Pade nekutanamo malaeka-malaeka etu ka i Maria, “Nokuya komi nageo-geo?” Nesonomo i Maria, “Pueku niala ntaumo nggari se'i pade da'a ninjaniku ri umba nipomboli ira.”

¹⁴Naopu etu i'a nompeili ri talikuna nikitana Yesus nenggore ri setu, aga da'apa ninjanina I'amo Yesus.

¹⁵Nekutanamo Yesus ka i'a, “Nindo, nokuya komi nageo-geo? Isema nielomu?” Niuli Maria bara topokarajaa ri pampa etu. Jadi nesonomo i'a ri ja'ina, “Uma, ane komimo to nangala watabakuna nggari se'i ulimo ka aku bara ri umba nipomboli komi ala aku mamala malau mangala I'a.”

¹⁶Nangulimo Yesus ka i'a, “Maria.” Nangepe etu negoli ntaliku i Maria pade nangulimo i'a ante Basa Ibrani, “Rabuni!” Batuana “Guru.”

¹⁷Pade nangulimo Yesus ka i'a, “Ne'epa ruru Aku musoko, sabana Aku da'apa neore mpaka ri ja'i Umaku. Tapi kalaumo mpaka ri ja'i sampesuwu-sampesuwuku pade ulimo ka ira iwe'i: ‘Aku malaumo mpaka ri ja'i Umaku bo Umamu, etumo Alatalaku bo Alatalamu.’ ”

¹⁸Jadi nalaumo i Maria Magdalena mpaka ri ja'i anaguru-anaguru Yesus pade niulina, “Nikitakumo i Pue!” Pade nitesana wo'u ka ira pura-pura nuapa to nitesa Yesus ka i'a.

¹⁹Ri eo Aka etu wo'u tempo nggawengina anaguru-anaguru Yesus nasiromu ri saongu sapo. Pewobo sapo etu nikunci sabana ira naeka ka topanggeniaka-topanggeniaka nto Yahudi. Sampegoli naratamo Yesus nekanggore ri tatongo ira, pade niulina ka ira, “Pue mombagane komi.”

²⁰Naopu Yesus nombatabe ira iwetu nipopokitanamo ka ira palena bo usuna. Sangga nanggita Yesus nadamba mpu'umo rara ira.

²¹Pade nanguli wo'umo Yesus ka ira, “Pue mombagane komi. Nasimbayu ewa Umaku nompakau Aku iwetu wo'u Aku mompakau komi.”

²²Naopu etu nitawuinamo ira ante nosana pade nanguli, “Tarima komimo Nosa Nagasa nu Alatala.

²³Ane komi mombaampungi silaka ntau, silaka ira kana raampungi Alatala, pade ane komi da'a mombaampungi silaka ntau, silaka ira da'a wo'u raampungi Alatala.”

²⁴Tomas, samba'a nggari sampulu romba'a anaguru Yesus, to niuli wo'u Ngana Norapi, da'a naria nosanggani-nggani ante roa-roana tempo Yesus narata nompopokita korona ka ira.

²⁵Jadi nangulimo anaguru-anaguruna ntanina ka i Tomas, “Nikita kamimo i Pue!” Tapi nangulimo i Tomas, “Ane aku da'apa manggita walea paku ri palena pade mombadika koyampaleku ri walea etu bo mombadika paleku ri walea tawala ri usuna, da'apa ntoto kuparasaya.”

²⁶Walumbengi kaliuna nasiromu wo'umo anaguru-anaguru Yesus riara njapo etu, pade i Tomas wo'u naria nosanggani-nggani ante roana ri setu. Pewobo nikunci puramo tapi naupa iwetu naratamo Yesus nenggore ri tatongo ira, pade niulina ka ira, “Pue mombagane komi.”

²⁷Naopu etu niulina ka i Tomas, “Dikamo koyampalemu ri se'i. Kitamo paleku e'i. Pade dikamo palemu ri walea tawala ri usuku e'i. Ne'e mana mabata-bata raramu, tapi parasayamo.”

²⁸Pade nangulimo i Tomas ka Yesus, “Pueku! Alatalaku!”

²⁹Nangulimo Yesus ka i Tomas, “Iko nomparasaya sabana iko nanggita Aku. Tapi neliu nggabelopa tau to nomparasaya nau da'a nanggita Aku.”

³⁰Danadeapa tandai-tandai to nipogumaa ntanina to nikawia Yesus tempo I'a danaria nosanggani-nggani ante anaguru-anaguruna anu da'a nitulisi riara buku e'i.

³¹Tapi nuapa to nitulisi riara buku e'i, patujuna ala manggeni komi momparasaya Yesus etumo mpu'u-mpu'u Magau to Mompakasalama, Ana nu Alatala. Pade patujuna wo'u ala komi mamala mombarata katuwua mabelo sampe ri kasae-saena ante momparasaya I'a.