Read Da'a Kaili YOHANES 4 Bible Online

YOHANES 4 - Da'a Kaili bible

YOHANES 4

¹Tau-tau to Parisi nangepe lele to nanguli nadeamo tau to nalau ri ja'i Yesus ala radiu majadi topantuki I'a sampe topantuki Yesus neliu nggadea nggari topantuki Yohanes Topediu.

²Kakonona da'a Yesus mboto to nombadiu tau aga anaguru-anaguruna.

³Jadi tempo Yesus nangginjani tau-tau to Parisi nangepe lele etu nalaumo I'a nompalasi Bagia Yudea nanjili bali mpaka ri Bagia Galilea.

⁴Riara mpolumakona etu Yesus kana moliu ri Bagia Samaria.

⁵Jadi naratamo Yesus ri saongu ngata ri Bagia Samaria nosanga ka ngata Sikhar. Ngata etu namosu tana to niwai Yakub ka anana Yusuf nggaolu.

⁶Ri setu naria saongu buwu to niuli Buwu Yakub. Jadi nenontomo Yesus pade nekatoko ri sinjori buwu etu, sabana nalengemo I'a nolumako. Tempo etu natongomo eo.

⁷Anaguru-anaguru Yesus napola mpaka riara ngata etu mangoli panggoni. Tempo Yesus nekatoko ri buwu etu naratamo samba'a besi to Samaria nantombu ue. Nangulimo Yesus ka i'a, “Indo, wai ka Aku sanu ue komi kuinu.”

⁸

⁹Nangulimo besi to Samaria etu ka I'a, “Komi etu tau to Yahudi, aku e'i tau to Samaria. Iwenu sampe Komi merapi ue inu nggari ja'iku?” Niulina iwetu sabana nabiasa tau-tau to Yahudi da'a madota mosanggani-nggani ante tau-tau to Samaria.

¹⁰Nesonomo Yesus, “Ane munjani pewai bayangi nu Alatala pade isema Aku to nomperapi ue inu nggari ja'imu, natantumo komi mboto kana momperapi ue inu nggari ja'iku. Pade Aku kana mombawai ka komi ue to mombawai katuwua mabelo.”

¹¹Naopu etu nanguli wo'umo besi etu, “Uma, da'a ria posanggu Komi rapombasanggu ue e'i, pade buwu e'i nandala mpu'u. Nggari umba rapangala Komi ue to mombawai katuwua mabelo to nitesa Komi etu?

¹²Iwenumo? Komi neliu nggakuasa nggari totu'a kami nggaolu Yakub to nombawai buwu e'i ka kami majadi sosora? I'a mboto nanginu ue nggari buwu e'i pade wa'a wo'u ana-anana bo pompatuwuna.”

¹³Nanguli wo'umo Yesus ka besi etu, “Isema-sema manginu ue nggari buwu e'i kana mabaipa tambolona.

¹⁴Tapi isema-sema manginu ue to kuwai ka i'a, mana mabai tambolona sampe ri kasae-saena. Sabana ue to kuwai ka i'a etu majadi ewa ue mpemata moili nggariara nggatuwuna sampe i'a mombarata katuwua mabelo sampe ri kasae-saena.”

¹⁵Nangepe etu nanguli wo'umo besi etu, “Ane iwetu, Uma, wai ka akumo ue etu ala mana mabai tamboloku pade ne'e mana aku malenge momai mantombu ue e'i.”

¹⁶Nangulimo Yesus ka i'a, “Kalau pokiomo ruru rongomu pade panjili bali ri se'i ante i'a.”

¹⁷Nesonomo besi etu, “Aku da'a norongo.” Nanguli Yesus ka i'a, “Nakono mpu'u tesamu to nanguli komi da'a norongo.

¹⁸Sabana naria limamba'a langgai to nomporongo komi pade langgai to naria ri ja'imu we'i-we'i da'a rongomu. Nakonomo tesa to niulimu pani'a.”

¹⁹Pade nangulimo besi etu, “Uma, nanotomo ka aku Komi etu samba'a nabi.

²⁰Totu'a kami nggaolu nombasomba Alatala ri bunggu bulu e'i, tapi komi tau to Yahudi nanguli aga ri ngata Yerusalem masipato tau mombasomba Alatala.”

²¹Nesonomo Yesus ka i'a, “Indo, parasayamo tesaku e'i. Kana marata tempona tau da'a mana mombasomba Umata Alatala ri bulu e'i pade da'a wo'u ri ngata Yerusalem.

²²Komi to Samaria nombasomba anu da'a ninjani komi. Tapi kami tau to Yahudi nombasomba to ninjani kami mamimo, sabana Magau to Mompakasalama meumba nggari tatongo ntau to Yahudi.

²³Tapi kana marata tempona banepia, pade kakonona naratamo tempona etu, tau-tau to mpu'u-mpu'u mombasomba Umata Alatala kana mombasomba I'a ante kuasa nggari ja'i Nosa Nagasa nu Alatala [7] nantuki pepatuduki to nakonona. Sabana topesomba-topesomba iwetumo to nielo Umata Alatala.

²⁴Alatala ewa nosa to da'a namala nikita. Jadi tau-tau to madota mombasomba I'a kana mombasomba I'a ante kuasa nggari ja'i Nosa Nagasa nu Alatala nantuki pepatuduki to nakonona.”

²⁵Nesono wo'umo besi etu, “To ninjaniku kana marata samba'a Magau to Mompakasalama to niuli Kristus. Ane I'a etu marata I'a kana motarangga mpakanoto mpengele-ngele ka kita.”

²⁶Nangulimo Yesus ka besi etu, “Aku to notesa ka komi we'i-we'i, Akumo tau to niulimu etu.”

²⁷Tempo ira danotesa-tesa naratamo anaguru-anaguru Yesus nggariara ngata. Natekaja ira nanggita Yesus notesa-tesa ante samba'a besi. Tapi da'a ria kamba samba'a nabia nompekutana besi etu, “Nuapa paraluumu?” Ira da'a wo'u nabia nompekutana Yesus, “Nuapa sabana Guru notesa-tesa ante besi etu?”

²⁸Naopu etu besi etu nombaboli gumbana ri setu pade nanjilimo i'a mpaka riara ngata. Narata ri setu niulina ka tau-tau riara ngata etu,

²⁹“Kamaimo kita lau manggita samba'a tau guria to nombatesa ka aku pura-pura nuapa to nipowiaku. Bara suka I'amo Magau to Mompakasalama to nijanji Alatala?”

³⁰Nangepe tesa besi etu nalaumo ira nggariara ngata etu mpaka ri ja'i Yesus.

³¹Tempo besi etu nalau mpaka riara ngata nangulimo anaguru-anaguru Yesus ka I'a, “Maimo Guru, manggonimo kita.”

³²Tapi nesonomo Yesus, “Nariamo panggoniku anu da'a ninjani komi.”

³³Nangepe etu nosipekutanamo ira samba'a bo samba'a, “Naria tau nanggeni panggoni ka I'a?”

³⁴Jadi nangulimo Yesus ka ira, “Panggoniku etumo mantuki dota Alatala to nompakau Aku pade mompakaopu bago to niparasayana ka Aku.

³⁵Naria pantesa komi iwe'i: ‘Patambulapa pade marata tempo mokato.’ Tapi kuuli ka komi, ‘Antoakamo ante mata komi mboto, pae-pae ri tinalu etu nakunimo, namalamo rakato.

³⁶Tau-tau topokato nantarima tambona. Nompamulamo ira nompasiromu asele mpobago ira, etumo manusia to matuwu sampe ri kasae-saena. Pade topotuja bo topokato mamala madamba-damba mpasanggani-nggani.’

³⁷Nakono mpu'u tesa to nanguli, ‘To samba'ana notuja to santanina nokato.’

³⁸Aku nompakau komi malau mombakato anu da'a nituja komi. Tau ntanina notuja pade komimo to nantarima asele mpanggawia ira.”

³⁹Riara ngata to Samaria etu nadeamo tau to nomparasaya Yesus sabana niepe iramo tesa besi etu to nanguli, “I'a nantesa ka aku pura-pura nuapa to nipowiaku.”

⁴⁰Jadi nalaumo ira mpaka ri ja'i Yesus. Narata ri setu nerapimo ira ante mpu'u-mpu'u ala Yesus mesai ri ngata ira bara sakuya kasaena. Jadi nesai mpu'umo Yesus ri setu rombengi kasaena.

⁴¹Pade nantambaimo kadea ntau to nomparasaya Yesus sabana niepe ira mbotomo tesana.

⁴²Naopu etu nangulimo ira ka besi etu, “We'i-we'i niparasaya kami mpu'umo, da'a aga nggari tesamu tapi niepe kami mbotomo tesana. Pade ninjani kamimo I'a mpu'u-mpu'u Magau to Mompakasalama manusia ri dunia.”

⁴³Naopu neto'o ri setu rombengi kasaena nanggaliwomo Yesus napola mpaka ri Bagia Galilea.

⁴⁴Nariamo sanggani bopia Yesus mboto nanguli, “Samba'a nabi da'a nibila ntau ane riara ngatana mboto.”

⁴⁵Jadi tempo I'a narata ri Bagia Galilea I'a nitarima tau-tau to Galilea ante nadamba rara. Sabana ira wo'u nantuki Posusa Eo Bete Paska ri ngata Yerusalem bopia pade nikita ira mbotomo pura-pura nuapa to nipowia Yesus ri setu.

⁴⁶Pade nalau wo'umo I'a mpaka ri ngata Kana ri Bagia Galilea, ngata nipompajadina ue newali anggur bopia. Ri ngata Kapernaum naria samba'a madika to nokarajaa riara sapo magau, anana naju'a ntomo.

⁴⁷Sangga nangepe lele to nanguli naratamo Yesus ri Bagia Galilea nggari Bagia Yudea, nalaumo madika etu mpaka ri ja'ina pade nerapi ante mpu'u-mpu'u, “Tulungi malau mpaka ri ngata Kapernaum mompakabelo anaku, sabana ntora namatemo i'a!”

⁴⁸Nangepe etu nangulimo Yesus ka i'a, “Ane komi pura-pura da'a nanggita tandai-tandai to nipogumaa bo kabaraka-kabaraka komi da'a ntoto nomparasaya.”

⁴⁹Nangulimo madika etu ka Yesus, “Pue, kuperapi ka Komi masalisa kita malau sampe anaku danaria nosana.”

⁵⁰Nanguli Yesus ka i'a, “Panjilimo komi! Nabelomo anamu!” Nangepe etu niparasaya madikamo tesa to niuli Yesus ka i'a etu. Jadi nanjilimo i'a.

⁵¹Tempo i'a da ri tatongo jala i'a nitomunaka bara sakuya mba'a batuana nggari Kapernaum. Ira nanguli ka i'a, “Nabelomo ana komi!”

⁵²Pade i'a nompekutana ira, “Ipiamo anaku nompamula nabelo ju'ana?” Nesonomo ira, “Yowi ntongo eo kira-kira tinti saongu nana'umo panena.”

⁵³Pade natitoramo madika tinti saongu yowi Yesus nanguli ka i'a, “Nabelomo anamu!” Pade madika saongu njapo nomparasaya Yesus.

⁵⁴Etumo tandai to nipogumaa karongganina to nipowia Yesus tempo I'a narata bali nggari Bagia Yudea mpaka ri Bagia Galilea.