Read Da'a Kaili YOHANES 5 Bible Online

YOHANES 5 - Da'a Kaili bible

YOHANES 5

¹Naopu etu nanjili balimo Yesus mpaka ri ngata Yerusalem ala mantuki eo bete nto Yahudi ri setu.

²Ri ngata Yerusalem namosu bobaa ngata to nosanga ka Bobaa Bimba naria saongu kola to niuli riara Basa Ibrani Kola Betesda. Nantalili kola etu naria limaongu tambale.

³Ri tambale etu nadea mpu'u tau naju'a naturu. Naria tau naburo, naria tau nakejo, naria tau napunggu. [Ira pura-pura nompopea ue mojajompe.

⁴Apa sanggani-sanggani malaeka i Pue nana'u riara ue kola etu nombajajompe ue. Pade isema-sema mokolu nesua riara ue tempona ue etu nojajompe, i'a kaliu-liu nabelo nggari ju'ana.]

⁵Ri setu naria samba'a langgai to naju'a tolumpulu bo walumpaemo kasaena.

⁶Tempo Yesus nanggita tau etu naturu ri setu pade ninjanina sakuya kasaena ju'ana etu, nekutanamo I'a ka tau etu, “Madota iko mabelo?”

⁷Nesonomo tau naju'a etu, “Uma, da'a ria tau manggeni aku mpaka riara kola tempo ue kola etu nojajompe. Bate-batena tempo aku dalaku mompasimbuku malau mesua nariamo tau ntanina nokolu nesua riara ue etu.”

⁸Pade nangulimo Yesus ka i'a, “Pembangumo! Lulumo ompa paturumu pade polumakomo!”

⁹Kaliu-liu nabelomo ju'a ntau etu. Nilulunamo ompana pade nolumakomo i'a. Tempo kajadia etu nawela Eo Mpenonto.

¹⁰Sabana etu nangulimo topanggeniaka-topanggeniaka nto Yahudi ka tau lako nabelo nggari ju'ana etu, “Eo e'i Eo Mpenonto. Da'a mamala iko mompasinaka ompamu iwetu!”

¹¹Tapi nangulimo tau etu, “Tau to nompakabelo ju'aku pani'a nanguli ka aku, ‘Lulumo ompamu bo polumakomo!’ ”

¹²Nekutanamo tau-tau to Yahudi etu, “Isema tanu nompakau iko mombalulu ompamu pade molumako?”

¹³Tapi da'a ninjani ntau lako nabelo nggari ju'ana etu bara isema to nompakabelo ju'ana, sabana Yesus notinggalipo nggari tatongo ntau dea etu.

¹⁴Naopu etu Yesus nomposintomu tau etu riara Sapo Mpepue, pade niulina ka i'a, “Kitamo! Nabelomo ju'amu. Jadi ne'e mana iko mompowia silaka ala ne'e iko mawela to neliu nggaja'a nggari ju'amu etu.”

¹⁵Naopu etu nalaumo tau etu mpaka ri ja'i topanggeniaka nto Yahudi pade niulina ka ira Yesusmo to nompakabelo ju'ana.

¹⁶Jadi nompamulamo ira mangelo jala mompandasa Yesus, sabana I'a nompakabelo tau naju'a etu ri Eo Mpenonto.

¹⁷Tapi nangulimo Yesus ka ira, “Umaku bate-batena nokarajaa sampe ri eo e'i, pade Aku wo'u kana mokarajaa.”

¹⁸Nangepe tesa Yesus etu topanggeniaka-topanggeniaka nto Yahudi nantambai nangelo jala mompatesi I'a. Sabana I'a da'a aga nombaliunaka ada-ada Eo Mpenonto tapi I'a wo'u nanguli Alatala Umana mboto. Ante nanguli iwetu I'a nompakasimbayu korona ante Alatala.

¹⁹Pade nesonomo Yesus ka topanggeniaka-topanggeniaka nto Yahudi etu, “Aku mpu'u-mpu'u notesa ka komi, Aku da'a mamala mompowia nuapa-nuapa nantuki dotaku mboto, tapi nuapa to nikitaku nggari ja'i Umaku etumo to nipowiaku. Nuapa-nuapa to nipowia Umaku, etu wo'u to kupowia.

²⁰Sabana Umaku nompotowe Aku Anana pade nipopokitana ka Aku pura-pura nuapa to nipowiana. Pade da'a aga etu, I'a kana mompopokita tandai-tandai to meliu nggabete nggari powia-powia etu pani'a ala rapogumaa komi.

²¹Nasimbayu ewa Umaku nompakatuwu bali tau namate pade nombawai ka ira katuwua nabou, iwetu wo'u Aku Anana nombawai katuwua nabou ka isema-sema to nipodotaku.

²²Umaku mboto da'a mombatangara isema-sema sabana kuasa mombatangara manusia niwainamo ka Aku Anana

²³ala pura-pura tau mombabila Anana nasimbayu ewa ira nombabila I'a. Isema-sema da'a nombabila Aku e'i batuana ira da'a wo'u nombabila Umaku to nompakau Aku.

²⁴Aku mpu'u-mpu'u notesa ka komi, isema-sema mangepe pantesaku pade momparasaya Pue Alatala to nompakau Aku, ira kana mombarata katuwua mabelo sampe ri kasae-saena. Ira da'a mawela pesuku tapi ira nikabasakamo nggari kamatea pade nombarata katuwua nabou.

²⁵Aku mpu'u-mpu'u notesa ka komi, kana marata tempona banepia, pade kakonona naratamo tempona etu, tau-tau namate kana mangepe suara Ana nu Alatala, pade ira to mangepe suara etu kana matuwu bali.

²⁶Sabana nasimbayu ewa Umaku Alatala nakuasa mombawai katuwua ka manusia, iwetu wo'u Aku Anana niwaina ka kuasa mombawai katuwua ka manusia.

²⁷Pade niwaina wo'u ka Aku kuasa mombatangara manusia sabana Akumo to niuli Ana nu Manusia.

²⁸Ne'e komi mogumaa mangepe tesaku etu, sabana kana marata tempona pura-pura tau namate riara dayo kana mangepe suaraku.

²⁹Pade ira kana membangu nggariara dayo. Ira to nabelo pokaingguna kana membangu mombarata katuwua mabelo. Pade ira to naja'a pokaingguna kana membangu ala rasuku.”

³⁰“Aku da'a mamala mompowia nuapa-nuapa nantuki dotaku mboto. Aku nombatangara nantuki nuapa to niepeku nggari ja'i Umaku, pade potangaraku nanoa sabana Aku da'a nantuki dotaku mboto tapi aga dota nu Umaku to nompakau Aku.

³¹Ane aga Aku njamba'aku motesa mompakanoto isema Aku e'i natantu da'a masipato raparasaya pantesaku etu.

³²Tapi naria samba'a tau ntanina to nompakanoto isema Aku, pade ninjaniku tesana etu nakono.

³³Komi nombasuro tau nalau mpaka ri ja'i Yohanes Topediu pade i'a nompakanoto isema Aku e'i.

³⁴Kakonona da'a paraluu manusia mompakanoto isema Aku. Tapi niuliku iwetu ala komi mamala rapakasalama.

³⁵Yohanes Topediu etu nasimbayu ewa saongu poindo najela to newanta, pade komi nadamba-damba nantarima remena etu. Tapi kadamba nu rara komi etu aga sampalai.

³⁶Tapi naria sangelepa to neliu nggabete nggari tesa Yohanes Topediu to nompakanoto isema Aku. Etumo panggawiaku to niparasaya Umaku ka Aku ala kupakaopu. Pade panggawia etumo nompakanoto Aku e'i nipakau Umaku.

³⁷Pade Umaku to nompakau Aku wo'u nompakanoto isema Aku. Da'apa sanggani komi nangepe suarana pade da'apa wo'u sanggani komi nanggita lenjena.

³⁸Pade tesa-tesana da'a niboli komi riara nta'i. Nanotomo etu sabana Aku to nipakauna da'a niparasaya komi.

³⁹Komi naraji neguru isi Buku Nagasa sabana niuli komi nggariara buku etu komi mombarata katuwua mabelo sampe ri kasae-saena. Tapi isi Buku Nagasa etumo to nompakanoto isema Aku.

⁴⁰Tapi naupa iwetu komi da'a madota marata ri ja'iku ala mombarata katuwua mabelo sampe ri kasae-saena.

⁴¹Aku e'i da'a miki rabila manusia.

⁴²Tapi ninjaniku da'a ntoto naria towe ri ja'i Alatala riara nta'i komi.

⁴³Aku e'i narata ri ja'i komi niposumba Umaku, tapi komi da'a madota mantarima Aku. Tapi ane tau ntanina marata ri ja'i komi nantuki dotana mboto, tau etumo to ratarima komi.

⁴⁴Natantumo da'a mamala komi momparasaya Aku sabana komi damadota ratoiya ntau. Komi da'a ntoto nompasimbuku ala ratoiya Alatala to samba'a lau!

⁴⁵Tapi naupa iwetu ne'e rapekiri komi bara Aku to mompangadu komi ri ngayo Umaku banepia. Naria to mompangadu komi, etumo nabi i Musa mboto to nisarumaka komi.

⁴⁶Sabana ane komi mpu'u-mpu'u nomparasaya tesa nabi i Musa, natantumo komi wo'u kana momparasaya Aku, sabana koroku e'imo to nitesa nabi i Musa riara buku-bukuna.

⁴⁷Tapi ane da'a niparasaya komi nuapa to nitulisi nabi i Musa iwenumo komi mamala momparasaya pantesaku?”