Read Da'a Kaili YOHANES 8 Bible Online

YOHANES 8 - Da'a Kaili bible

YOHANES 8

¹Tapi Yesus lau nantende mpaka ri bunggu nu Bulu Zaitun.

²To nailena kampadondo njiina nalau wo'umo I'a nesua riara Sapo Mpepue, pade pura-pura tau dea narata ri ja'ina. Pade nekatokomo I'a nompatuduki ira.

³Tempo etu naratamo guru-guru agama bo tau-tau to Parisi nanggeni samba'a besi to nirata ira nebualo. Besi etu nipopekanggore ira ri tatongo ntau dea.

⁴Pade niuli ira ka Yesus, “Guru, besi e'i nirata kami nebualo.

⁵Riara Atura-atura agama naria parenta i Musa ka kita to nanguli besi-besi noinggu iwetu kana rarempe ante watu sampe mamate. Iwenu pombaratamu ewa powia besi e'i?”

⁶Patuju nu pompekutana ira etu ala mangelo sala Yesus sampe ira mamala mompakasala I'a. Tapi Yesus da'a notingo. I'a aga notunggou nantulisi ri tana ante koyampalena.

⁷Tapi da'a nenonto ira nompekutana-tana I'a. Jadi kaopuna nekanggoremo Yesus nanguli ka ira, “Isema-sema nggari tatongo komi etu to da'a nasilaka, i'amo mokolu mombarempe besi e'i ante watu.”

⁸Naopu Yesus notesa iwetu notunggou wo'umo I'a nantulisi ri tana ante koyampalena.

⁹Sangga nangepe pantesa Yesus etu nalaimo ira nggari setu samba'a bo samba'a nompamula nggari totu'a sampe naboli damo Yesus ante besi etu ri ngayona.

¹⁰Pade nekanggoremo Yesus nanguli ka besi etu, “Ri umba puramo tau pani'a? Mana ria to madota mompakasala iko?”

¹¹Nesonomo besi etu, “Da'a mana ria, Pue.” Nangulimo Yesus, “Aku wo'u da'a mompakasala iko. Panjilimo iko, pade ne'e mana mowia silaka.”]

¹²Nanguli wo'umo Yesus ka tau dea, “Aku e'imo reme nu dunia. Isema-sema majadi topantuki Aku da'a molumako riara karumauna, tapi ira kana mombarata reme to mombawai katuwua mabelo.”

¹³Nesonomo tau-tau to Parisi ka I'a, “Komi etu nantesa koromu mboto! Pantesamu etu da'a nakono!”

¹⁴Nangulimo Yesus, “Nau Aku nantesa koroku mboto, pantesaku e'i nakono sabana ninjaniku nggari umba karataku pade mpaka ri umba wo'u kukalau. Tapi da'a ninjani komi nggari umba karataku pade mpaka ri umba kukalau.

¹⁵Komi etu nompakatantu sala ntau nantuki pompekiri manusia. Tapi Aku e'i da'a nompakatantu sala ntau.

¹⁶Tapi ane rapana Aku mowia etu natantumo pombabutusiku kana manoa, sabana Aku da'a aga njamba'aku. Umaku to nompakau Aku nomporoa Aku.

¹⁷Riara Atura-atura agama komi naria nitulisi iwe'i: ‘Ane maria romba'a sabi mantakono sangele riara mpotangara, tesa ira namala raparasaya.’

¹⁸Naria romba'a to nompakanoto isema Aku e'i. Samba'a Aku mboto, pade karomba'ana Umaku to nompakau Aku.”

¹⁹Pade nekutanamo ira ka I'a, “Ri umbamo Umamu?” Nesonomo Yesus, “Komi da'a ntoto nangginjani isema kakonona Aku e'i. Pade da'a wo'u ninjani komi Umaku. Ane ninjani komi Aku, natantu ranjani komi wo'u Umaku.”

²⁰Pantesa Yesus etu nitesana tempo I'a nompatuduki tau namosu ante peti mpesomba riara Sapo Mpepue. Da'a ria samba'a tau namala manjoko I'a sabana da'apa narata tempona.

²¹Pade nanguli wo'umo Yesus ka ira, “Aku kana malai nggari se'i pade komi kana mangelo Aku, tapi komi aga mamate riara silakamu. Komi da'a mamala malau ri peto'o kukalau.”

²²Nangepe etu notesamo topanggeniaka-topanggeniaka nto Yahudi samba'a bo samba'a, “Bara I'a mopatuju mompatesi korona mboto, sabana niulina, ‘Komi da'a mamala malau ri peto'o kukalau.’ ” [18]

²³Tapi nangulimo Yesus ka ira, “Komi e'i nopu'u nggari kaedena, tapi Aku e'i nopu'u nggari kalangana. Komi nggari dunia e'i, tapi Aku da'a nggari dunia e'i.

²⁴Etu sampe niuliku ka komi, komi kana mamate riara silakamu. Sabana ane komi da'a momparasaya Aku e'imo I'a, natantumo komi kana mamate riara silakamu.”

²⁵Pade nekutana wo'umo ira, “Isema tano kakono-konona komi etu?” Nesonomo Yesus, “Mana ria gunana kutesa ka komi! [19]

²⁶Danadeapa mamala kutesa mompakasala komi. I'a to nompakau Aku etu nanoa. Pade nuapa to niepeku nggari ja'ina etu wo'u kutesa ka manusia ri dunia e'i.”

²⁷To nitesa Yesus etu nantesa Umana, tapi da'a ninjani ira patujuna etu.

²⁸Etu sampe I'a nanguli ka ira, “Ane komi mangonggotaka Aku, Ana nu Manusia mpakalanga-langa banepia, [20] tempo etumo kana ranjani komi Aku e'imo I'a to nipakau Alatala. Pade kana ranjani komi wo'u da'a ria sangaya to nipowiaku nantuki dotaku mboto. Tapi Aku bate-batena notesa nantuki nuapa to nipatuduki Umaku ka Aku.

²⁹Pade to nompakau Aku etu wo'u nomporoa Aku. Da'a nipalambana Aku njamba'aku, sabana Aku bate-batena nompowia to nompakadamba rarana.”

³⁰Tempo Yesus notesa iwetu nadeamo tau nomparasaya I'a.

³¹Naopu etu nangulimo Yesus ka tau-tau to Yahudi to nomparasaya I'a, “Ane komi maroo mantuki tesaku komi mpu'u-mpu'u majadi topantuki Aku.

³²Pade ante iwetu komi kana mangginjani pepatuduki to nakonona sampe komi mana rapobatua.”

³³Nesonomo tau-tau to Yahudi etu, “Kami e'i muli Abraham. Da'apa naria sanggani kami nipobatua ntau. Nokuya Komi nanguli ka kami, ‘Komi mana rapobatua?’ ”

³⁴Nesonomo Yesus ka ira, “Aku mpu'u-mpu'u notesa ka komi, isema-sema nompowia silaka i'a nipobatua silaka.

³⁵Ane samba'a batua, da'a natantu i'a maroo raranjapo madikana. Tapi ane ana madika mboto, natantumo i'a maroo raranjapo umana.

³⁶Jadi ane Ana nu Alatala mbotomo to manggabasaka komi nggari silaka, komi mpu'u-mpu'u matekabasaka!

³⁷Ninjaniku komi etu pura-pura muli Abraham. Tapi nau damo wa'a danaria komi to madota mompatesi Aku, sabana komi da'a ntoto madota mantarima pepatudukiku.

³⁸Nuapa to nikitaku ri ja'i Umaku etumo to nitesaku ka komi. Tapi komi etu aga nompowia nuapa to nipatuduki umamu ka komi.”

³⁹Nesonomo ira ka Yesus, “Uma kami Abraham.” Nangulimo Yesus, “Ane mpu'u-mpu'u komi etu muli Abraham, natantumo pokainggu komi kana mabelo ewa pokainggu Abraham.

⁴⁰Aku nompasimbayu ka komi pepatuduki to nakono to niepeku nggari ja'i Alatala mboto tapi komi aga madota mompatesi Aku. Da'a iwetu pokainggu Abraham!

⁴¹Pokainggu komi e'i ewa pokainggu uma komi mboto!” Nesono wo'umo ira, “Kami e'i da'a ana wone! Uma kami aga samba'a lau, etumo Alatala!”

⁴²Nangulimo Yesus ka ira, “Ane Alatala etu Uma komi, komi kana mompotowe Aku, sabana Aku narata nggari ja'ina. Aku da'a narata nantuki dotaku mboto, tapi nantuki dotana to nompakau Aku.

⁴³Nuapa sabana sampe da'a ntoto ninjani komi batuana pantesaku? Sabana komi da'a madota mantarima pepatudukiku.

⁴⁴Magau nu Setamo uma komi! Pade komi batena madota mantuki dota nu uma komi etu. Nggari pamulanamo i'a bate-batena topepatesi, pade da'a ntoto naria to nanoana ri ja'ina, nau aga sakedi. Ane i'a nodawa etu masipato mpu'u sabana iwetu mamimo ingguna. I'a topodawa pade uma nu pura-pura topodawa.

⁴⁵Jadi etumo sabana ane Aku nombatesa ka komi tesa to nakonona komi da'a madota momparasaya tesa etu.

⁴⁶Isema nggari ja'i komi etu mamala mompakanoto Aku e'i nowia silaka? Ane Aku notesa ka komi tesa to nakonona, nokuya komi da'a nomparasaya Aku?

⁴⁷Tau-tau to najadi bagia nu Alatala madota mantarima Tesa nu Alatala. Tapi komi da'a madota mantarima tesa etu sabana komi da'a bagia nu Alatala.”

⁴⁸Nangepe tesa etu tau-tau to Yahudi nanguli sinja'i Yesus iwe'i: “Nakono mpu'u tesa kami! Komi e'imo tau to Samaria to nipesua seta!”

⁴⁹Nesonomo Yesus, “Aku e'i da'a nipesua seta. Aku nombabila Umaku, tapi komi etu nanguli sinja'i Aku.

⁵⁰Aku da'a miki rabila ntau. Naria mamimo samba'a to nombabila Aku pade I'amo to nompakatantu Aku nanoa.

⁵¹Aku mpu'u-mpu'u notesa ka komi, isema-sema mantuki tesaku ira da'a ntoto mamate sampe ri kasae-saena.”

⁵²Nangepe etu nangulimo tau-tau to Yahudi ka Yesus, “We'i-we'i ninjani kami mpu'umo Komi etu nipesua seta! Abraham pade nabi-nabi nggaolu namate puramo. Tapi Komi nanguli isema-sema mantuki tesamu da'a ntoto mamate sampe ri kasae-saena!

⁵³Iwenumo? Komipa neliu nggabete nggari pueta Abraham? I'a pade nabi-nabi nggaolu namate puramo! Ulimo! Isema ntoto Komi sampe Komi nabia nanguli iwetu?”

⁵⁴Nesonomo Yesus, “Ane Aku miki rabila ntau da'a ntoto ria batuana. Tapi Umaku to nipangaku komi Alatalamu, I'amo to nombabila Aku.

⁵⁵Komi da'a nosinjani ante I'a. Tapi Aku nosinjani belo ante I'a. Ane Aku manguli Aku da'a nosinjani ante I'a Aku e'i majadi topodawa nasimbayu ewa komi. Tapi Aku mpu'u-mpu'u nosinjani ante I'a pade Aku natutu nantuki tesana.

⁵⁶Totu'a komi nggaolu Abraham nadamba mpu'u rarana sabana ninjanina i'a kana manggita karataku ri dunia. Nikitanamo pade nadamba mpu'umo rarana.”

⁵⁷Nanguli wo'umo tau to Yahudi etu ka Yesus, “Komi etu da'apa nagana limampulu mpae umurumu! Iwenu sampe Komi nanguli nikita Komimo totu'a kami nggaolu Abraham?”

⁵⁸Nesonomo Yesus, “Aku mpu'u-mpu'u notesa ka komi, da'apa Abraham nesuwu, Aku e'i njau nariamo!” [21]

⁵⁹Nangepe pantesa Yesus etu tau-tau to Yahudi nangala watumo madota mombarempe I'a sampe mamate. Tapi notinggalipomo I'a nggari tatongo ira pade nalai nompalasi Sapo Mpepue etu.