Read Da'a Kaili YOHANES 9 Bible Online

YOHANES 9 - Da'a Kaili bible

YOHANES 9

¹Tempo Yesus riara mpolumakona I'a nanggita samba'a tau to naburo mami nggari pesuwuna.

²Nekutanamo anaguru-anaguru Yesus ka I'a, “Guru, isema to nasilakana sampe tau e'i naburo mami nggari pesuwuna? Totu'ana atau i'a mboto?”

³Nesonomo Yesus, “Da'a i'a nasilaka, da'a wo'u totu'ana. Tapi etu najadi ala kabaraka nu Alatala mamala rakita riara nggatuwuna.

⁴Ane eona danarawa kita kana manggawia panggawia nu Alatala to nompakau Aku. Sabana ane nggawengina da'a mana naria samba'a to mamala manggawia.

⁵Sakuya kasaena Aku riara dunia e'i Akumo najadi reme to mompakareme rara manusia.”

⁶Naopu I'a notesa iwetu Yesus nantailu tana pade nialana nipiji-pijina ante koyampalena sampe najadi depu, pade nigesena depu etu ri mata ntoburo etu.

⁷Pade niulina ka tau etu, “Kalau do'umo matamu ri ue kola Siloam.” (Sanga Siloam etu batuana “Nipakau.”) Jadi nalau mpu'umo toburo etu. Narata ri kola Siloam nido'unamo matana pade natinggulimo i'a ante matana to nanaa.

⁸Tau-tau saboya ante i'a pade tau-tau to nanggita i'a nerapi-rapi ri wiwi jala bopia, ira nosipekutana samba'a bo samba'a, “Da'a i'a etumo tau to nekatoko ri wiwi jala nerapi-rapi bopia?”

⁹Naria to nanguli, “Nakono! I'a mamimo!” Tapi naria wo'u sanu tau nanguli, “Da'a i'a, aga lenjena nasimbayu.” Tapi i'a mboto nanguli, “Akumo e'i!”

¹⁰Jadi nekutanamo ira ka i'a, “Iwenu sampe matamu nipakanaamo?”

¹¹Nesonomo i'a, “Tau to nosanga ka Yesus nompowia depu, pade depu etu nigesena ri mataku. Pade nipakauna aku malau mombado'u mataku ri kola Siloam. Jadi nalau mpu'umo aku nombado'u mataku ri ue kola Siloam etu. Naopu aku nendo'u namalamo aku nekita.”

¹²Nekutana wo'umo ira ka i'a, “Ri umbamo tau etu?” Nesonomo toburo etu, “Da'a ninjaniku.”

¹³Tempo Yesus nombagalo tana ante iluna pade nompakanaa mata ntoburo etu nawela Eo Mpenonto. Jadi etu sampe toburo to nabelomo matana etu nikeni ntau mpaka ri ja'i tau-tau to Parisi.

¹⁵Pade tau-tau to Parisi wo'u nompekutana toburo etu, “Iwenu sampe matamu nipakanaa?” Nesonomo i'a, “I'a nombagese depu ri mataku. Pade naopu aku nendo'u namalamo aku nekita.”

¹⁶Pade nangulimo bara sakuya mba'a to Parisi, “Ane iwetu nanotomo tau etu da'a nggari ja'i Alatala, sabana I'a da'a natundu riara atura-atura Eo Mpenonto.” Tapi naria wo'u santongo nanguli, “Umbamo tau nasilaka mamala manggawia kabaraka ewa etu?” Jadi nosisala paha mbotomo ira.

¹⁷Jadi nekutana wo'umo to Parisi ka toburo etu, “Iwenu pombaratamu ewa tau etu, sabana matamu to nipakanaana?” Nesonomo toburo etu, “I'a samba'a nabi.”

¹⁸Tapi topanggeniaka-topanggeniaka nto Yahudi etu da'a madota momparasaya tau etu mpu'u-mpu'u naburo pade lako nipakanaa matana. Jadi ira nompokio indo bo uma ntoburo to nipakabelo matana etu

¹⁹pade nipekutana ira, “Nakono mpu'u e'imo ana komi to niuli komi naburo mami nggari pesuwuna? Iwenu sampe we'i-we'i nabelomo matana?”

²⁰Nesonomo indo bo uma ntoburo etu, “To ninjani kami i'a etu mpu'u-mpu'u ana kami, pade i'a mpu'u-mpu'u naburo mami nggari pesuwuna.

²¹Tapi bara iwenu sampe i'a namala nekita we'i-we'i da'a ninjani kami. Pade da'a wo'u ninjani kami bara isemana to nompakabelo matana etu. Agina komi mompekutana i'a mboto. Nabetemo i'a. Namalamo i'a mboto motesa mombasono pompekutana komi etu.”

²²Indo bo umana nanguli iwetu sabana naekamo ira ka topanggeniaka-topanggeniaka nto Yahudi. Sabana nasintuwumo topanggeniaka-topanggeniaka bara isema-sema mompangaku Yesus Magau to Mompakasalama to nijanji Alatala ira mana rapaloga mesua riara sapo mpodade.

²³Etu sampe indo bo umana nanguli, “Nabetemo i'a. Agina komi mompekutana i'a mboto.”

²⁴Naopu etu ira nompokio toburo etu sangganipa pade niuli ira ka i'a, “Ulimo to nakonona ri ngayo Alatala! Ninjani kamimo tau nompakanaa matamu etu tau nasilaka!”

²⁵Pade nesonomo toburo etu, “Da'a ninjaniku ane I'a nasilaka bara da'a. Tapi to ninjaniku, pangane aku naburo, tapi we'i-we'i namalamo aku nekita.”

²⁶Pade nanguli wo'umo to Parisi ka i'a, “Nuapa nikawiana ka iko? Iwenu I'a nompakanaa matamu?”

²⁷Nesonomo toburo etu, “Naopumo nitesaku ka komi pani'a tapi komi da'a madota mangepe. Nokuya komi madota mangepe pesonoku wo'umo? Bara komi wo'u madota majadi topantuki I'a?”

²⁸Nangepe etu ira nanguli sinja'i i'a pade nanguli, “Iko etumo topantuki I'a, kami e'i da'a! Kami e'i topantuki i Musa!

²⁹Ninjani kami Alatala notesa ante i Musa nggaolu. Tapi ane tau etu, da'a ninjani kami nggari umba karatana.”

³⁰Pade nesono wo'umo toburo etu, “Etu sangele mpu'u-mpu'u nipogumaa! Da'a ninjani komi nggari umba karatana, tapi I'a nompakanaa mataku to naburo!

³¹Ninjanitamo Alatala da'a nangepe posambaya ntau nasilaka, tapi I'a nangepe posambaya ntau to nepue ka I'a pade tunggai nantuki dotana.

³²Nggari lamba pamulana da'apa sanggani niepeta naria tau namala nompakanaa mata ntau naburo mami nggari pesuwuna.

³³Ane tau etu da'a nggari ja'i Alatala, natantumo I'a da'a ntoto mamala mompowia nuapa-nuapa.”

³⁴Nesonomo ira, “Iwenu? Iko etu tau nasilaka mami nggari pesuwumu! Da'a ntoto masipato iko mompatuduki kami e'i!” Jadi nompamula nggari eo etu to Parisi mana mompaloga tau etu mesua riara sapo mpodade.

³⁵Sangga niepe Yesus tau etu mana nipaloga mesua riara sapo mpodade nto Yahudi nalaumo I'a nosirata ka i'a. Pade niuli Yesus ka i'a, “Iwenumo? Niparasayamu Ana nu Manusia?”

³⁶Nesonomo tau etu, “Isema tau to niuli Komi etu, Uma? Uli ka aku ala aku mamala momparasaya I'a.”

³⁷Nangulimo Yesus ka i'a, “Nikitamu I'a. I'amo to notesa ka iko.”

³⁸Pade nangulimo tau etu, “Pue, niparasayakumo!” Pade nekadedemo i'a nombasomba Yesus.

³⁹Nanguli Yesus ka i'a, “Patuju karataku ri dunia e'i ala mompakanoto sala ntau ala tau-tau naburo mamala mekita, pade tau-tau to nanaa matana majadi maburo.”

⁴⁰Tesa-tesa Yesus etu niepe bara sakuya mba'a tau to Parisi ri setu. Jadi ira nompekutana I'a, “Iwenumo? Niuli Komi kami e'i wo'u naburo?”

⁴¹Nesonomo Yesus, “Ane rapana komi naburo, natantumo da'a nasilaka komi. Tapi komi nanguli, ‘Kami namala nekita.’ Etu sampe komi bate-batena nasilaka.”