Read Da'a Kaili SURO-SURO 10 Bible Online

SURO-SURO 10 - Da'a Kaili bible

SURO-SURO 10

¹Ri ngata Kaisarea naria samba'a langgai nosanga ka i Kornelius. I'a samba'a balengga tantara Roma, panggana kapitee to nanjoko satu mba'a tantara ri Pasukan Italia.

²I'a samba'a tau to naeka ri ja'i Alatala, pade ira pura-pura saongu njapo nepue ka Alatala, naupa ira da'a to Yahudi. Nadea ngganimo i'a nantulungi tau-tau to Yahudi to napakasi, pade i'a naoso nosambaya ka Alatala.

³Naria saeo kira-kira tinti toluongu kaede eo, i'a nanggita saongu panggita. Riara panggitana etu nikitana ante nanoto samba'a malaeka Alatala narata nanguli ka i'a, “Kornelius!”

⁴Naeka mpu'u Kornelius nanggita malaeka etu. Pade niulina, “Nuapa, Pue?” Nesonomo malaeka, “Posambayamu pade petulungimu ri ja'i ntau napakasi nikonoa rara nu Alatala sampe I'a nantora iko.

⁵We'i-we'i pakaumo tau mpaka ri ngata Yope mompokio samba'a tau to nosanga ka i Simon Petrus.

⁶I'a neto'o ri sapo samba'a topokarajaa kulimba nosanga ka i Simon to neto'o ri wiwi ntalinti.”

⁷Sangga nalaimo malaeka to notesa ka i'a, i Kornelius nompokio romba'a batua nggariara njapona pade samba'a tantarana to niparasayana to nepue ri ja'i Alatala.

⁸Pade nitesana ka ira tolumba'a nuapa lako najadi riara mpanggitana etu. Naopu etu nipakauna ira malau mpaka ri ngata Yope.

⁹Naile ntongo eo kira-kira tinti sampulu rongu tempo ira tolumba'a dariara mpolumako namosumo marata ri ngata Yope, i Petrus nepone mosambaya ri bunggu ata nu sapo.

¹⁰Tempo i'a ri setu naoro mpu'umo ta'ina, madota manggoni. Tempo panggoni danipakasadia, i'a nanggita saongu panggita.

¹¹Nikitana langi natibea pade sangaya ewa sabala kae tarapaal nabini natiloe ri siduna patanjidu nateulunjaka nggari langi sampe ri tana.

¹²riara nu kae tarapaal etu naria nompengele binata: naria to nokada patanggada, naria to nenjoyo, pade naria wo'u tonji-tonji to nailana.

¹³Pade niepe i Petrus suara nanguli ka i'a, “Petrus, pekanggoremo! Sambalemo binata-binata e'i pade konimo etu!”

¹⁴Tapi nesonomo i Petrus, “O, da'a, Pue. Da'apa ria sanggani aku nanggoni to nakapali pade natantoru ewa etu!”

¹⁵Tapi nanguli wo'umo suara etu ka i'a karongganina, “Nuapa to niuli Alatala nabelo rakoni ne'e muuli nakapali!”

¹⁶Panggitana etu nisili sampe nagana tolunggani. Naopu etu kae tarapaal ante binata etu nateoremo mpaka ri langi.

¹⁷Naingu mpu'u rara i Petrus nompekiri batuana nggari panggitana to lako nikitana etu. Tempo i'a danompekiri etu, naratamo tau tolumba'a to nipakau i Kornelius etu ri ngata Yope. Ira nompekutana pue ngata, “Ri umba sapo i Simon?” Sapo etu nitujuraka ka ira pade nalaumo ira mpaka ri ngayo pewobo sapo etu,

¹⁸pade nekutana, “Naria tau nosanga ka i Simon Petrus neto'o ante komi ri se'i?”

¹⁹Tempo i Petrus danompekiri batuana panggitana pane'a etu, Nosa Nagasa nu Alatala notesa ka i'a, “Petrus, naria tau tolumba'a narata nompaelo iko.

²⁰Anumo, masalisa mana'u mpaka ri tambena pade ne'e iko makini-kini mantuki ira, sabana Aku mboto nompakau ira marata mompokio iko.”

²¹Nangepe etu nana'umo i Petrus mpaka ri tambena pade notesamo i'a ka tau tolumba'a etu, “Aku e'imo to nielo komi. Nuapa patuju komi marata ri se'i?”

²²Nesonomo ira, “Kami e'i nipakau Kapitee Kornelius mpaka wemai. I'a samba'a tau nabelo rarana to naeka ri ja'i Alatala, pade i'a nibila pura-pura tau to Yahudi. Samba'a malaeka nu Alatala nompakau i'a mompokio komi malau ri sapona ala mangepe nuapa rauli komi ka i'a.”

²³Naopu etu i Petrus nanta'amaka ira maturu ri sapo setu sambengi. Naeompadondo nalaumo i Petrus mpasanggani-nggani ante ira, pade bara sakuya mba'a topomparasaya nggari ngata Yope wo'u nantuki ira.

²⁴Ira naturu sambengi ri jala, pade nailena naratamo ira ri ngata Kaisarea. Ri setu ira nipopea-pea i Kornelius saongu njapo. Naria wo'u sampesuwu-sampesuwuna ante wega-wega rapana to nipokiona nasiromu ri sapona.

²⁵Sangga naratapa i Petrus, nalaumo i Kornelius nantomunaka i'a, pade notimbakotumo i'a ri ngayo i Petrus mombasomba i'a.

²⁶Tapi i Petrus nanjoko palena nompopenggore i'a ante nanguli, “Pekanggoremo, Uma. Aku e'i aga manusia biasa wo'u nasimbayu ante komi.”

²⁷Tempona notesa ante i Kornelius nesuamo i Petrus riara njapo. Ri setu nikitana nadeamo tau nasiromu.

²⁸Pade notesamo i'a ka ira, “Sampesuwu-sampesuwu, ninjani komi mboto nantuki Atura agama Yahudi, kami to Yahudi da'a mamala mompasanggani ante tau-tau da'a to Yahudi, kami nitagi mesua ri sapo-sapo ira. Tapi Alatala naopu nompakanoto ka aku riara panggitaku da'a mamala aku manguli manusia natantoru sampe da'a mamala aku mosigalo ante ira.

²⁹Etumo sabana da'a ria katomo nu raraku marata wemai tempo aku nipokio komi. Jadi we'i-we'i kuperapi, uli ka aku nuapa ntoto patuju komi nompokio aku e'i marata ri se'i?”

³⁰Nesonomo i Kornelius, “Tolumbengi naliu, kira-kira ewa tempo we'i, tinti toluongu kaede eo wo'u, aku nosambaya ri sapoku e'i. Sampegoli naria samba'a malaeka nikitaku nekanggore ri ngayoku. Pakeana nenggila-nggila.

³¹Nangulimo i'a ka aku, ‘Kornelius! Posambayamu nitarima nu Alatalamo, pade nitorana kajoi nu raramu nantulungi tau napakasi.

³²Jadi pakaumo tau mpaka ri ngata Yope mompokio wemai tau to nosanga ka i Simon Petrus. I'a neto'o ri sapo samba'a tau topokarajaa kulimba nosanga ka i Simon, sapona ri wiwi ntalinti.’

³³Etumo sabana aku nasalisa nompakau tau nalau nompokio komi. Mpu'u-mpu'u nabelo rara komi narata wemai. We'i-we'i kami e'i puramo nasiromu ri ngayo nu Alatala ala mangepe pura-pura nuapa to nipakauna ratesa komi ka kami.”

³⁴Naopu etu nompamulamo i Petrus notesa ka ira, “Sampesuwu-sampesuwu, we'i-we'i nanotomo raraku Alatala da'a nompoposisala manusia, tapi manusia pura-pura nirekena nasimbayu pura.

³⁵Isema-sema to naeka ri ja'ina pade powiana nanoa, tau etumo nikonoa rara Alatala. Da'a nikitana tau etu nggari ngata ri umba.

³⁶Sampesuwu-sampesuwu, ninjani komi mbotomo kareba to nipasimbayu Alatala ka kami tau to Israel. Kareba etu nompakanoto Yesus nompoposinggabelo manusia ante Alatala. Yesus etumo Pue pura-pura manusia da'a aga tau to Yahudi.

³⁷Natantu ninjani komi kajadia-kajadia ri pura-pura tana to Yahudi. Kajadia etu nompamula nggari Bagia Galilea naopu Yohanes nombadiu tau ewa tandaina najeamo ira nggari silaka-silaka ira.

³⁸Pade ninjani komi wo'u ewa Yesus nggari Nazaret. Alatala nompelisi I'a pade nombawai ka I'a Nosa Nagasa pade kuasa. I'a nalau ri umba-umba nompowia anu nabelo pade nompakabelo pura-pura tau to nipandasa Magau nu Seta. Etu nikawia Yesus sabana kuasa Alatala nosanggani-nggani ante I'a.

³⁹Kami e'imo to nanggita pura-pura nuapa to nipowia Yesus nabeloka ri tana ntau to Yahudi nabeloka ri ngata Yerusalem. Kaopuna Yesus etu nipatesi ntau to Yahudi, I'a nipaku ira ri kayu parika.

⁴⁰Yesus e'imo to nipakatuwu Alatala bali nggari kamatena ri eo katolueona pade nipopokitana ka manusia.

⁴¹Tapi da'a pura-pura tau nanggita I'a, aga kami to nipelisi Alatala nokolu majadi sabi-sabina. Naopu Yesus natuwu bali, kami e'i nanggoni pade nanginu mpasanggani-nggani ante I'a.

⁴²Pade I'a nompakau kami e'i mompatolele Kareba Belo ka pura-pura tau, pade mompakanoto ka tau Yesus etumo to nilanti Alatala majadi Topotangara pura-pura manusia, nabeloka tau danatuwu, nabeloka tau to namatena.

⁴³Yesus etumo to nitesa pura-pura nabi nggaolu. Nantuki tesa ira isema-sema nomparasaya Yesus, silaka-silakana kana raampungi.”

⁴⁴Tempo i Petrus danotesa, nana'umo Nosa Nagasa nu Alatala nesua ri ja'i pura-pura tau to nangepe tesa i Petrus etu.

⁴⁵Nanggita etu nogumaa puramo tau-tau to Yahudi to nomparasaya i Pue Yesus to nantuki i Petrus nggari Yope, sabana tau-tau da'a to Yahudi wo'u nipesua Nosana Nagasa nu Alatala.

⁴⁶Nanotomo ira nipesua Nosa Nagasa etu sabana ira notesa ante basa-basa to nopu'u nggari ja'i Nosa Nagasa nu Alatala, pade ira nantoiya Alatala. Nanggita etu notesamo Petrus ka roana,

⁴⁷“Kitamo! Tau da'a to Yahudi e'i wo'u nipesua Nosa Nagasa nu Alatala nasimbayu ante kita to Yahudi. Ane iwetu ira wo'u mamala radiu ewa tandaina ira topomparasaya i Pue Yesus!”

⁴⁸Pade nangulimo i Petrus ka Kornelius saongu njapo, “Komi kana radiu ante sanga Yesus Kristus.” Naopu nidiu, ira Kornelius saongu njapo nerapi ala Petrus meto'o ante ira ruru bara sakuya mbengipa kasaena.