Read Da'a Kaili SURO-SURO 13 Bible Online

SURO-SURO 13 - Da'a Kaili bible

SURO-SURO 13

¹Ri tatongo ntopomparasaya ri ngata Antiokhia naria bara sakuya mba'a nabi pade guru to nompasimbayu Tesa nu Alatala, etumo i Barnabas, i Simeon to nidae i Wuri, pade i Lukius nggari ngata Kirene, i Menahem to nipakabete mpasanggani-nggani ante Magau Herodes Antipas, pade i Saulus.

²Naria sanggani, tempo ira pura-pura nantoiya Alatala pade napuasa, Nosa Nagasa nu Alatala notesa ka ira, “Onggotaka ka Aku i Barnabas bo i Saulus ala ira manjoko panggawia to nipakatantuku ka ira.”

³Jadi naopu ira pura-pura napuasa pade nosambaya wo'umo ira nombadika pale ira ri balengga i Barnabas bo i Saulus, pade nisuromo ira romba'a etu nalau mompatolele Kareba Belo.

⁴Jadi nalaumo i Barnabas bo i Saulus mpaka ri ngata Seleukia nantuki tesa nggari ja'i Nosa Nagasa nu Alatala ka ira. Nggari setu nosumombamo ira mpaka ri Lewuto Siprus.

⁵Narata ri ngata Salamis, nipatolele iramo Tesa nu Alatala ri sapo-sapo mpodade to Yahudi. Yohanes Markus wo'u nantuki nantulungi ira riara mpolumako ira.

⁶Naopu Lewuto Siprus etu nipolumako ira, naratamo ira ri ngata Pafos. Ri setu ira nomposirata ka samba'a tau to Yahudi to nosanga ka i Bar-Yesus. I'a samba'a sando to nompangaku korona samba'a nabi Alatala, tapi da'a nakono.

⁷I'a nowega ka Gubernur ri lewuto etu, to nosanga ka i Sergius Paulus. Gubernur etu samba'a tau to nata'una. I'a nompokio i Barnabas bo i Saulus sabana i'a madota mangepe Tesa nu Alatala.

⁸Aga sando etu i Bar-Yesus, to nosanga wo'u Elimas riara Basa Yunani, nangewa i Barnabas bo i Saulus. I'a nompasimbuku ala Gubernur etu ne'e momparasaya Yesus.

⁹Tapi i Saulus, to nidae wo'u i Paulus, naponu ante Nosa Nagasa nu Alatala. I'a nompenaa mpadodo sando etu,

¹⁰pade niulina, “He iko, topebagiu to naja'ana, ana Magau nu Seta! Ikomo bali pura-pura anu to nanoana! Nokuya iko da'a nenonto mompakadenggo jala i Pue to nabelona?

¹¹Kita we'i! Pue kana mombasuku iko! Iko kana maburo sampe da'a mana mamala manggita eo bara sakuya mbengi kasaena!” Nangepe etu kaliu-liu naburomo mata i Bar-Yesus sampe i'a kana nalau nangelo-ngelo tau mombanini i'a.

¹²Sangga nikita Gubernur nuapa to najadina etu, niparasayanamo i Pue Yesus. Nasumara mpu'u i'a nangepe pepatuduki ewa i Pue.

¹³Nggari ngata Pafos i Paulus bo roa-roana nesawi sakaya mpaka ri ngata Perga ri Propinsi Pamfilia. Ri setu Yohanes Markus nompalasi ira pade nanjili bali mpaka ri ngata Yerusalem.

¹⁴Nggari ngata Perga Paulus bo i Barnabas nompapola polumako ira mpaka ri ngata Antiokhia ri Bagia Pisidia. Tempo Eo Mpenonto nalaumo ira nesua ri sapo mpodade to Yahudi pade nekatoko ri setu.

¹⁵Naopu nombabasa tesa nggari buku i Musa bo buku-buku nabi-nabi, topanggeniaka-topanggeniaka sapo mpodade etu nompakau tau mompekutana i Paulus bo roa-roana, “Sampesuwu-sampesuwu, ane maria tesa komi mompakaroso pomparasaya tau-tau e'i, kami mombawai loga ka komi mombatesa etu ka ira.”

¹⁶Jadi nekanggoremo i Paulus, pade niwiatakana palena, pade niulina, “Sampesuwu-sampesuwuku to Israel, pade pura-pura sampesuwu-sampesuwuku ntanina ri se'i to naeka ri ja'i Alatala. Epemo tesaku!

¹⁷Alatala to nipesombata to Israel to nompelisi totu'a-totu'ata nggaolu majadi todeana. Pade i'a nompakadea muli ira tempo ira daneto'o ri tana Masir. Naopu etu ante kabaraka nabete Alatala nanggeni ira nesuwu nggari tana Masir.

¹⁸Pade patampulu mpae kasaena Alatala nosabara nanggita pokainggu ira riara karawa baina.

¹⁹Pade naopu I'a nompakaropu pitumba'a magau ante todea-todea ira ri tana Kanaan, tana etu nibagi-bagina ka to Yahudi majadi tana ira.

²⁰Etu pura-pura nikawia Alatala riara patatu limampulu mpae kasaena. Naopu tana Kanaan etu nibagi-bagina ka to Yahudi, Alatala nompakatantu ka ira topotangara-topotangara nanggeniaka ira. Topotangara kaopuna etumo i nabi Samuel.

²¹Naopu etu ira nerapi samba'a magau raonggotaka ka ira to mamala manggeniaka ira. Jadi Alatala nompakatantu ka ira i Saul, ana i Kish nggari muli i Benyamin najadi magau ira. Pade i'a nanggeniaka ira patampulu mpae kasaena.

²²Pade naopu i Saul nileso Alatala, nipelisina wo'u i Daud najadi magau ira. Iwe'imo to niuli Alatala ewa i Daud: ‘Nikitaku i Daud ana Isai samba'a tau to nompakadamba raraku. I'a kana manggawia nuapa pura to kupodota.’ [23]

²³Pade nggari muli i Daud etu nionggotaka Alatala ka to Israel samba'a Magau to Mompakasalama to nijanjina, etumo Yesus.

²⁴Da'apa Yesus nompamula panggawiana, Yohanes Topediu nompatuduki ka to Israel ira pura-pura kana majea nggari silaka pade ira kana radiu.

²⁵Pade tempo mana masaeka maopu panggawiana nangulimo Yohanes ka tau dea, ‘Aku e'i da'a Magau to nipopea komi! Tapi toramo! I'a kana marata maliu aku e'i, pade I'apa neliu nggabete pade aku. Nau aga mombawole lui sapatuna aku da'a masipato.’

²⁶Sampesuwu-sampesuwu pura-pura, nabeloka komi muli Abraham nabeloka komi pura-pura to naeka ri ja'i Alatala. Kitamo to nipakatu Alatala ka Kareba Belo etu to nompakanoto iwenu kita mamala rapakasalama.

²⁷Tau-tau to neto'o ri ngata Yerusalem bo topanggeniaka-topanggeniaka ira da'a nangginjani Yesus etumo Magau to Mompakasalama. Da'a wo'u ninjani ira pepatuduki nu nabi-nabi to nibasa ri Eo-eo Mpenonto. Tapi tesa nabi-nabi etu nipakadupa ira tempo ira nombasuku Yesus.

²⁸Naupa da'a nirata ira nau aga sangele sala nggari ja'ina to masipato rasuku mamate, niperapi ira ka Gubernur Pilatus ala Yesus rapatesi.

²⁹Sangga naopupa ira nompowia pura-pura to nitulisi riara Buku Nagasa ewa I'a, watabakuna nita'uraka nggari kayu parika pade niboli riara dayo.

³⁰Tapi Alatala nompakatuwu bali I'a nggari kamatena.

³¹Pade naopu etu riara bara sakuya mbengi nadea nggani I'a nompopokita korona ka tau to nantuki I'a nggari tana Galilea mpaka ri ngata Yerusalem. Ira etumo to najadi sabi-sabina ka tau to Yahudi.

³²Jadi sampesuwu-sampesuwu, we'i-we'i kami narata mompatolele ka komi Kareba Belo etu. Nuapa to nijanji Alatala ka totu'a-totu'ata nggaolu,

³³etu nipakadupanamo ka kita tempo I'a nompakatuwu bali Yesus nggari kamatena. Naria nitulisi riara Mazmur karonguna iwe'i: ‘Ikomo Anaku, eo e'i Aku najadi Umamu.’ [24]

³⁴Alatala nompakatuwu bali Yesus nggari kamatena, pade da'a nompakamba watabakuna mapopo riara dayo. Nanotomo etu sabana niulina iwe'i: ‘Pojanji to nagasa bo natantu rapakadupa to nijanjiku ka i Daud, pojanji etu kana kupakadupa ka Iko.’ [25]

³⁵Naria wo'u tesa Mazmur ntanina to nanguli, ‘Pue da'a mompakamba Batuana to Nagasana mapopo riara dayo.’ [26]

³⁶Tesa etu da'a nosinggawela ante i Daud, sabana naopu i'a nompowia nuapa to nipakau Alatala ka i'a, namatemo i'a. Pade i'a nitana namosu dayo ntotu'ana nggaolu, pade watabakuna naopumo napopo.

³⁷Tapi Yesus to nipakatuwu Alatala bali nggari kamatena da'a ria napopo.

³⁸Jadi sampesuwu-sampesuwu, kana ranjani komi aga Yesus to namala mombaampungi silaka.

³⁹Silaka-silakata da'a namala raampungi ane kita aga mantuki Atura-atura agama to nipapola i Musa ka kita. Tapi butu mba'a tau to nomparasaya Yesus, silakana kana raampungi.

⁴⁰Etumo sabana komi kana mainga ala ne'e majadi ka komi nuapa to niuli nabi-nabi iwe'i:

⁴¹‘Kita we'i komi topesalaraka! Komi kana mawiora pade maropu sanggani, sabana tempo we'i-we'i Aku kana mompowia sangele anu da'a ntoto raparasaya komi, nau damo maria tau motarangga etu ka komi.’ ” [27]

⁴²Naopu notesa iwetu nesuwumo i Paulus bo i Barnabas nggari sapo mpodade etu. Narata ri sawalikuna ira niperapi ntau ala manjili bali ri Eo Mpenonto marata mompapola tesa to nitesa ira etu.

⁴³Sangga nesuwu puramo tau-tau nggariara sapo mpodade etu, nadea tau-tau to Yahudi bo tau ntanina to nesuamo ri agama Yahudi nantuki i Paulus bo i Barnabas. Suro-suro etu nompatuduki ira ala ira maroo rara metidombo ri towe belo nu Alatala.

⁴⁴Eo Mpenonto marata miki pura-pura tau riara ngata etu narata mangepe Tesa nu Alatala.

⁴⁵Tempo to Yahudi nanggita tau dea etu, nasiriati mpu'u rara ira. Ira nombasalaraka i Paulus, pade pura-pura to nitesana niewa ira.

⁴⁶Naupa iwetu, i Paulus bo i Barnabas nelabi kabiana notesa ka ira, “Tesa nu Alatala kana ratesa ka komi to Yahudi ntanimo ruru. Aga komi mombabali tesa etu. Komi nompoara mombarata katuwua mabelo sampe ri kasae-saena. Sabana etu kami mana mompatolele tesa etu ka komi to Yahudi! We'i-we'i kami malau ri ja'i ntau da'a to Yahudi,

⁴⁷sabana to niparenta i Pue ka kami iwe'i: ‘Aku mompakatantu komi majadi reme mombawanta tau-tau da'a to Yahudi, ala nggari ja'i komi, pura-pura tau ri dunia mangginjani iwenu Alatala mompakasalama manusia.’ ”

⁴⁸Tempo tau-tau da'a to Yahudi ri setu nangepe tesa etu, nadamba mpu'u rara ira. Pade ira nanguli, “Nabelo mpu'u Tesa nu Alatala e'i!” Pade tau-tau to nipakatantu Alatala mombarata katuwua mabelo sampe ri kasae-saena, tau-tau etumo nomparasaya i Pue Yesus.

⁴⁹Pade Tesa i Pue natolele ri umba-umba ri bagia etu.

⁵⁰Tapi tau-tau to Yahudi ri setu nompakapane rara besi-besi to noanggana to naeka ri ja'i Alatala ante balengga-balengga riara ngata etu. Ira nompopeumba posiewa ante i Paulus bo i Barnabas pade nompopalai ira romba'a nggari bagia etu.

⁵¹Jadi i Paulus bo i Barnabas etu nombasapunai sowu nggari kada ira ewa tandaina tau-tau etu kana rasuku Alatala. Pade nalaimo ira mpaka ri ngata Ikonium.

⁵²Topomparasaya-topomparasaya i Pue Yesus ri ngata Antiokhia mpu'u-mpu'u nadamba rara, pade ira naponu ante Nosa Nagasa nu Alatala.