Read Da'a Kaili SURO-SURO 14 Bible Online

SURO-SURO 14 - Da'a Kaili bible

SURO-SURO 14

¹Ri ngata Ikonium najadi wo'umo nasimbayu ewa nuapa to najadi ri ngata Antiokhia etu. Paulus bo i Barnabas nalau wo'u ri sapo mpodade to Yahudi, pade ri setu ira notesa-tesa ka tau sampe nadea tau to Yahudi bo tau-tau da'a to Yahudi nomparasaya Yesus.

²Tapi tau-tau to Yahudi to da'a madota momparasaya Yesus nompakapane rara tau-tau ntanina da'a to Yahudi sampe narau mpu'u rara ira ri ja'i topomparasaya i Pue Yesus.

³Sabana etu i Paulus bo i Barnabas nasae neto'o ri setu. Ante kabia ira nompatolele kareba i Pue. Pade i Pue mboto nombawai kuasa ka ira nompowia kabaraka-kabaraka ante tandai-tandai to nipogumaa ala mantakono tesa ira ewa towe belona etu.

⁴Tapi tau-tau riara ngata etu nosiewa mbotomo samba'a bo samba'a. Naria to nosinjabingga ka to Yahudi to da'a nomparasaya, pade naria wo'u nosinjabingga ka i Paulus bo i Barnabas.

⁵Pade nosintuwumo tau to Yahudi ante topanggeniaka-topanggeniaka ira nosanggani-nggani ante tau-tau ntanina da'a to Yahudi mompandasa pade mombarempe i Paulus bo i Barnabas etu ante watu.

⁶Tapi ira romba'a nangginjani nia etu sampe ira nalai mpaka ri Bagia Likaonia, etumo ri ngata Listra, ngata Derbe pade ri ngata-ngata ntanina ri bagia etu.

⁷Pade ri setu wo'u ira nompatolele ka tau Kareba Belo.

⁸Ri ngata Listra naria samba'a langgai kadana napunggu mami nggari pesuwuna. I'a da'a ntoto namala nolumako sabana nalente mpu'u kadana.

⁹Tau etu nekatoko ri setu nangepe tesa i Paulus. Tempo i Paulus nanggita tau etu ninjanina tau etu nomparasaya mpu'u sampe i'a mamala rapakabelo. Jadi i Paulus nanggita i'a,

¹⁰pade nanguli ante suara namangga, “Pekanggore pakanoa!” Sangga nangepe etu nekanggoremo topunggu etu nasalisa pade nompamula nolumako ri setu.

¹¹Sangga nikita ntau dea ri setu nuapa to nikawia i Paulus nongaremo ira ante basa ira mboto to niuli Basa Likaonia, “Nana'umo wiata-wiata ri dunia nolenje mpomanusia!”

¹²Niuli ira i Barnabas i'amo wiata Zeus, pade i Paulus wiata Hermes apa i'amo topotesa. [28]

¹³Naopu etu naratamo topanggeniaka baruga wiata Zeus to naria ri sawaliku ngata etu. I'a nanggeni japi-japi pomawa ante wunga-wunga mpaka ri bobaa ngata etu sabana i'a ante todea etu madota mombasomba i Paulus bo i Barnabas etu.

¹⁴Sangga niepe i Paulus bo i Barnabas nuapa patuju tau dea etu, niseka iramo pakea ira mboto ante nasusa mpu'u rara sabana tau dea etu madota mombasomba ira. Nangowamo ira mpaka ri tatongo ntau dea etu pade nongare nombatagi todea etu iwe'i:

¹⁵“Sampesuwu-sampesuwu, ne'e komi mombasomba kami! Kami e'i manusia biasa wo'u ewa komi! Kami narata ri se'i mompatolele Kareba Belo ka komi ala komi mompalasi ada komi mepue ka wiata-wiata e'i pade marata ri ja'i Alatala to natuwuna. I'amo to nompajadi langi bo dunia bo tasi pade pura-pura to naria riarana.

¹⁶Tempo nokolu Alatala nompalamba pura-pura manusia natuwu nantuki dota ira mboto.

¹⁷Naupa iwetu, bate-batena naria powiana to nabelo ewa tandai to nompakanoto ka kita I'amo Alatala. Niwaina ka kita uja nggari langi, pade niwaina isi panggawiata ane narata ntoana. Niwaina wo'u ka kita panggoni pade niwaina wo'u kadamba rara.”

¹⁸Naupa suro-suro etu nombatagi iwetu, sakedi-sakedipa da'a namala ira mombata'amaka tau dea mombasomba ira.

¹⁹Naopu etu naratamo bara sakuya mba'a tau to Yahudi nggari ngata Antiokhia ri Bagia Pisidia bo nggari ngata Ikonium. Ira nantanara tau dea ri Listra etu ala ira wo'u mangewa Paulus. Pade ira nombarempe i Paulus ante watu, pade i'a niumbunjai ira mpaka ri sawaliku ngata. Niuli ira namatemo i'a.

²⁰Tapi tempo topomparasaya-topomparasaya ri setu nekanggore nantatiku i'a, nembangu bali i'a pade nesua wo'umo i'a riara ngata. Pade naeo to nailena nalaumo i'a mpaka ri ngata Derbe mpasanggani-nggani ante i Barnabas.

²¹Ri ngata Derbe i Paulus bo i Barnabas nompatolele Kareba Belo pade ri setu nadea tau nomparasaya i Pue Yesus. Naopu etu nanjilimo ira romba'a mpaka ri ngata Listra. Pade nggari setu nalaumo ira mpaka ri ngata Ikonium pade mpaka ri ngata Antiokhia ri Bagia Pisidia.

²²Ri ngata-ngata etu ira nompakaroo rara topomparasaya i Pue Yesus. Niuli ira, “Kita kana maroso momparasaya i Pue Yesus. Ne'e mokanggaura. Kita kana mombarasai madea susa ntanimo ruru pade mamala kita mesua riara Poparenta nu Alatala.”

²³Pade ri ngata-ngata etu i Paulus bo i Barnabas nangonggotaka topanggeniaka-topanggeniaka topomparasaya i Pue Yesus. Ira napuasa bo nosambaya ka topanggeniaka-topanggeniaka etu ala ira raporoa i Pue to niparasaya ira.

²⁴Naopu etu napolamo i Paulus bo i Barnabas nombaliunaka Bagia Pisidia sampe narata ri Bagia Pamfilia.

²⁵Pade naopu ira nompatolele Tesa nu Alatala ri ngata Perga, notuamo ira mpaka ri ngata Atalia ri wiwi ntasi.

²⁶Nggari setu ira nesawi sakaya bete manjili mpaka ri ngata Antiokhia ri Bagia Siria. Ri ngata etumo ira nokolu niposambaya ntopomparasaya i Pue Yesus ala Alatala momporoa ira riara panggawia to lako nipakaopu ira we'i-we'i.

²⁷Sangga narata ri ngata Antiokhia nipasiromu ira topomparasaya ri setu. Pade nitesa iramo pura-pura nuapa to nipowia Alatala niposabana ira. Nitesa ira wo'u iwenu Alatala nombawai loga ka tau-tau da'a to Yahudi momparasaya Yesus.

²⁸Pade nasaemo i Paulus bo i Barnabas neto'o ri ngata Antiokhia nosanggani-nggani ante topomparasaya i Pue Yesus ri setu.