Read Da'a Kaili SURO-SURO 16 Bible Online

SURO-SURO 16 - Da'a Kaili bible

SURO-SURO 16

¹Paulus nompapola polumakona mpaka ri ngata Derbe pade ri ngata Listra. Ri setu naria samba'a topomparasaya i Pue Yesus nosanga ka i Timotius. Indona samba'a to Yahudi to nomparasaya ka i Pue Yesus. Aga umana tau to Yunani.

²Timotius nibila pura-pura topomparasaya ri ngata Listra bo Ikonium.

³Paulus madota mangala i Timotius mantuki i'a. Jadi i'a nombasuna i Timotius ala Timotius etu mamala ratarima tau-tau to Yahudi ri bagia etu, sabana ninjani ira pura-pura uma i Timotius samba'a tau to Yunani to da'a nombasuna ana ira. [30]

⁴Naopu i Timotius nisuna i Paulus, nalaimo ira romba'a. Ri pura-pura ngata to nikalau ira nipapola ira ka topomparasaya i Pue Yesus kabotu nu polibu suro-suro ante topanggeniaka-topanggeniaka ntanina ri ngata Yerusalem. Nipatuduki ira ka topomparasaya etu ala ira pura-pura kana mantuki atura-atura to nipakatantu etu.

⁵Jadi iwetumo pomparasaya topomparasaya i Pue Yesus nipakaroso, pade nantambai eo nantambai kadea ntau nomparasaya.

⁶Nosa Nagasa nu Alatala da'a nompaloga i Paulus ante i Silas mompatolele Tesa nu Alatala ri Propinsi Asia. Jadi ira nompapola polumako ira mpaka ri Bagia Frigia bo Galatia ri Propinsi Galatia.

⁷Tempo ira narata ri kabingga Bagia Misia, nipembai ira mapola mesua ri Propinsi Bitinia. Tapi Nosa Nagasa i Pue Yesus nombatagi ira mapola.

⁸Jadi ira nolumako nombaliunaka Bagia Misia sampe narata ri ngata Troas ri wiwi ntasi. [31]

⁹Wengina etu ri ngata Troas nikita i Paulus sangaya panggita. Riara panggitana etu nikitana samba'a tau nggari Propinsi Makedonia nenggore ri ngayona pade nerapi mpu'u-mpu'u ka i'a, “Kamaimo mpaka ri Makedonia mantulungi kami ri se'i!”

¹⁰Jadi naopu i Paulus nanggita panggita etu, kami nompakasadia malau mpaka ri Propinsi Makedonia etu, sabana nipekiri kami, mpu'u-mpu'u Alatala nompakau kami mompatolele Kareba Belo etu ka tau-tau ri setu.

¹¹Kami nompalasi ngata Troas pade nesawi sakaya bete napola mpaka ri Lewuto Samotrake. Pade eo to nailena napolamo kami sampe narata ri ngata Neapolis ri Propinsi Makedonia.

¹²Nggari setu nantendemo kami mpaka ri ngata Filipi, etumo ngata natolele ri Propinsi Makedonia. Ngata Filipi etu ngata to nipeto'o ntau narata nggari ngata Roma. Ri setu kami neto'o bara sakuya mbengi kasaena.

¹³Ri Eo Mpenonto kami nalau ri wiwi ue bete ri sawaliku nu ngata sabana nipekiri kami ri setu bara maria peto'o raposambaya nto Yahudi. Pade nekatoko kami notesa-tesa ante besi-besi to nasiromu ri peto'o etu.

¹⁴Ri tatongo ira etu naria samba'a besi nggari ngata Tiatira nosanga ka i Lidia. I'a topobalu buya nakamumu to nasuli mpu'u olina, pade i'a samba'a tau to nombasomba Alatala. Tempo i'a nangepe tesa i Paulus, i Pue nombabuka pekirina sampe i'a nantarima pepatuduki etu.

¹⁵Naopu etu i Lidia pade ira sanjapo nidiu ewa tandaina ira topomparasaya i Pue Yesus. Naopu ira nidiu, i Lidia nombagaga kami malau meto'o ri sapona. Niulina, “Nikita komi aku e'i nomparasayamo i Pue. Jadi we'i-we'i kamaimo komi ri sapoku.” I'a mpu'u-mpu'u nerapi sampe kami nalau neto'o ri ja'ina.

¹⁶Naria saeo, tempo kami nalau ri peto'o posambaya etu, niposintomu kami samba'a batua besi. I'a nipesua seta to namala nombaboto kajadia-kajadia to marata. Ante mombaboto rasi ntau besi etu nombarata nadea saro ka madikana.

¹⁷Besi etu nantuki i Paulus bo kami ante nongare, “Tau-tau e'i batua nu Alatala to Neliu Nggalanga! Ira narata nompatolele ka komi iwenu komi mamala rapakasalama!”

¹⁸Bara sakuya mbengi kasaena besi etu aga nongare-ngare iwetumo. Kaopuna i Paulus mana namala nosabara mangepe i'a, sampe i'a neili ntaliku pade nanguli ka seta to naria riara besi etu, “Ante sanga Yesus Kristus, palaimo iko nggari ja'i besi etu!” Tempona etu wo'u nalaimo seta nggari ja'i besi etu.

¹⁹Sangga ninjani madika nu besi etu mana ria loga ira mombarata doi, nisoko iramo i Paulus bo i Silas. Pade ira romba'a etu niumbunjai nikeni ira ri ja'i topoparenta-topoparenta to naria ri potomu.

²⁰Tempo ira nantingayo topoparenta-topoparenta ri setu, nangulimo madika nu besi etu, “Tau-tau e'i tau to Yahudi to nompakagado ngata e'i.

²¹Ira nompatuduki tau mompowia ada to nitagi atura-aturata to Roma. Da'a mamala ratukita ada etu!”

²²Tau dea ri potomu etu wo'u nanggarau i Paulus bo i Silas. Pade topoparenta-topoparenta etu nompakau tau nombaseri pakea nggari koro romba'a suro etu pade nombaporo ira.

²³Naopu niporo mpakaju'a-ju'a, ira nisuaraka riara tarunggu. Pade balengga tarunggu nipakau manggatono ira mpakabelo-belo.

²⁴Jadi i'a nombasuaraka ira ri tombi tarunggu riarana mpu'u. Pade kada ira nibalanggu ante kayu.

²⁵Kira-kira natongo wengina i Paulus bo i Silas nosambaya pade nodade nantoiya Alatala. Tau-tau ntanina to nitarunggu ri setu wo'u nangepe ira nodade.

²⁶Sampegoli naratamo lingu bete nombagagoya sapo tarunggu etu sampe ri pondasina. Pura-pura pewobo natibea pade pura-pura pompo'u ntau riara tarunggu etu nawonju sanggani.

²⁷Nembangumo balengga tarunggu etu. Sangga nikitana pura-pura pewobo natebea, nibituna gumana ala mompatesi korona, sabana nipekirina tau-tau riara tarunggu etu nalai puramo.

²⁸Tapi nongaremo i Paulus ante suara namangga, “Ne'e mompatesi koromu! Kami kana naria pura ri se'i!”

²⁹Nangepe etu niperapi balengga tarunggu etu poindo pade nangowamo i'a nalau mpaka riara tarunggu. Ante nokalalete i'a nekadede ri ngayo i Paulus bo i Silas.

³⁰Pade nikenina ira mpaka ri sawalikuna pade niulina, “Nuapa masipato kupowia ala aku rapakasalama?”

³¹Nesonomo i Paulus ante i Silas, “Parasayamo i Pue Yesus, pade komi kana rapakasalama ante pura-pura tau neto'o riara njapo komi.”

³²Pade nitarangga i Paulus bo i Silas tesa i Pue ka balengga tarunggu etu, pade ka ira pura-pura saongu njapo.

³³Ri tongo wengi etu wo'u balengga tarunggu etu nanggeni ira pade nompegasa pura-pura bela ira. Naopu etu i'a ante pura-pura tau riara njapona etu kaliu-liu nidiu ewa tandaina ira topomparasaya i Pue Yesus.

³⁴Naopu etu nikeninamo i Paulus ante i Silas nalau ri sapona, pade ri setu nipakonina ira. Nadamba mpu'u rara ira sanjapo sabana ira nomparasayamo ka Alatala. Naopu etu i Paulus bo i Silas nikeni bali riara tarunggu.

³⁵Naeompadondona topoparenta-topoparenta ngata Filipi etu nompakau polisi malau mpaka ri tarunggu mompapola ka balengga tarunggu parenta iwe'i: “Kabasakamo tau romba'a to nitarunggu yowi etu.”

³⁶Nangepe etu nangulimo balengga tarunggu etu ka i Paulus, “Topoparenta-topoparenta ngata nomparenta aku mombakabasaka komi. We'i-we'i mamala komi malai. Pakabelo-belo ri jala.”

³⁷Tapi nangulimo i Paulus ka polisi to narata ri setu, “Kami e'i todea Roma! Naupa iwetu da'apa nitangara kami niporo ri ngayo ntau dea, pade nisuaraka riara tarunggu! Pade we'i-we'i topoparenta-topoparenta mompakau kami malau nggalino! Kami da'a madota! Ira mboto kana marata mompopesuwu kami!”

³⁸Polisi-polisi etu nompakilu tesa etu ka topoparenta-topoparenta ngata. Sangga nangepe i Paulus bo i Silas etu todea Roma, naekamo ira.

³⁹Pade nalaumo ira mboto nerapi ampu ri ja'i Paulus bo i Silas. Naopu etu nikeni ira romba'a suro etu ri sawalikuna, pade niperapi ira, “Aginamo komi malai nggari ngata e'i.”

⁴⁰Jadi nalaimo i Paulus bo i Silas nompalasi tarunggu etu nalau mpaka ri sapo i Lidia. Ri setu ira nosintomu ante topomparasaya-topomparasaya i Pue Yesus pade nompakaroo rara ira. Naopu etu nalaimo ira nggari ngata Filipi etu.