Read Da'a Kaili SURO-SURO 19 Bible Online

SURO-SURO 19 - Da'a Kaili bible

SURO-SURO 19

¹Tempo Apolos danaria ri ngata Korintus, i Paulus nompesayo ngata-ngata ri buluna ri Bagia Galatia bo Frigia, pade naopu etu naratamo i'a ri ngata Efesus. Ri setu i'a nosintomu ante bara sakuya mba'a topomparasaya i Pue Yesus,

²pade nekutanamo i'a ka ira, “Tempo komi nomparasaya i Pue Yesus komi nipesua Nosa Nagasa nu Alatala?” Nesonomo ira, “Da'apa. Da'apa niepe kami nariamo Nosa Nagasa nu Alatala etu.”

³Pade nekutana wo'umo i Paulus, “Ane iwetu, pepatuduki isema to nituki komi tempo komi nidiu?” Nesono ira, “Pepatuduki to nipatolele Yohanes.”

⁴Pade nangulimo i Paulus, “Yohanes etu nombadiu tau ewa tandaina najeamo ira nggari silaka-silaka ira. Pade i'a wo'u nompatuduki ka tau-tau to Yahudi ira kana momparasaya samba'a tau to marata ri purina, etumo Yesus.”

⁵Tempona ira nangepe tesa i Paulus etu, ira to Efesus nidiu wo'u ante sanga i Pue Yesus.

⁶Paulus nombadika palena ri balengga ira pade kaliu-liu nana'umo Nosa Nagasa nu Alatala nesua ri ja'i ira. Pade nompamulamo ira notesa ante basa-basa to nopu'u nggari ja'i Nosa Nagasa nu Alatala pade nompasimbayu tesa nggari ja'i Alatala.

⁷Kadea ntau etu, kira-kira sampulu romba'a.

⁸Tempona i Paulus naria ri ngata Efesus, riara tolumbula kasaena i'a naoso nalau ri sapo mpodade nto Yahudi. Ri setu ante kabiana i'a notesa nosinjula pekiri ante ira ala manggeni ira momparasaya tesa ewa Poparenta nu Alatala.

⁹Tapi bara sakuya mba'a tau ri tatongo ira etu nako'o rara pade da'a madota momparasaya. Ri ngayo ntau pura-pura to nasiromu ri setu, ira nanjalai pepatuduki i Pue etu. Etumo sabana i Paulus nompalasi ira, pade nipakenina tau-tau to nomparasaya i Pue Yesus nalau mpaka ri sapo mpokulia i Tiranus. Ri setu eo-eo ira nosinjula pekiri ante tau-tau ntanina.

¹⁰Etumo to nipowia i Paulus rompae kasaena, sampe pura-pura tau to neto'o ri Propinsi Asia nangepe Tesa nu Pue, nabeloka tau to Yahudi, nabeloka tau da'a to Yahudi.

¹¹Alatala nombawai kuasa ka i Paulus nompowia kabaraka-kabaraka to nontani nggari ntanina,

¹²sampe nau aga pasapu bara buya to nipakena nikeni ka tau-tau naju'a, ju'a ira etu nabelo, pade seta-seta to nesua riara ntau nesuwu nggari ja'i ira.

¹³Ri tempo etu naria bara sakuya mba'a sando to Yahudi to nalau ri umba-umba nompopalai seta nggari ja'i ntau. To nompowia etu iramo pitumba'a langgai, ana nu samba'a balengga topanggeni agama Yahudi to nosanga ka i Skewa. Ira nompembai mompake sanga i Pue Yesus mompopalai seta-seta nggari ja'i ntau. Niuli ira, “Ante sanga Yesus to nipatolele i Paulus etu kami mompopalai iko!”

¹⁵Tapi nesonomo seta etu, “Ane Yesus, ninjaniku I'a, pade Paulus wo'u ninjanikumo. Tapi iko e'i, da'a ria batuana!”

¹⁶Pade nekawantumo tau nipesua nu seta etu nombarumpa nombabaga ira pitumba'a sampe ira pura-pura nidagina. Ira nangowa nalai nggari sapo ntau etu ante bela bo nelaya, sabana baju bo poruka ira etu niseri-seri ntau etu nggari koro ira pitumba'a.

¹⁷Pura-pura tau to neto'o ri ngata Efesus nangepe kajadia etu, nabeloka tau-tau to Yahudi, nabeloka tau-tau da'a to Yahudi. Sangga nangepe etu nogumaa puramo ira, pade sanga i Pue Yesus nantambai nibila pade nitoiya ira.

¹⁸Nadea mba'a nggari tatonga ira to nomparasaya i Pue Yesus etu nompangaku nangaku ri ngayo ntodea ewa powia-powia ira to naja'ana.

¹⁹Pade naria wo'u to nabiasa nompake pangginjani to naja'ana nompasiromu buku-buku ira, pade etu nipalabu ira ri ngayo ntodea. Nibila ira oli nu buku etu, kira-kira limampulu njobu mpeka doi salaka kadeana. [33]

²⁰Jadi nggari kajadia-kajadia nabaraka ewa etu, nantambai eona nantambai kadea ntau nangepe Tesa i Pue, pade nantambai kadea ntau to nompangala Tesa etu.

²¹Naopu kajadia-kajadia etu, i Paulus nonia malau mpaka ri Propinsi Makedonia ante Propinsi Akhaya, pade naopu etu patujuna mapola mpaka ri ngata Yerusalem. Niulina ka roana, “Maopu aku mpaka ri ngata Yerusalem, aku kana malau mpaka ri ngata Roma wo'u.”

²²Jadi nipakauna romba'a roana sampokarajaa mokolu ka i'a mpaka ri Propinsi Makedonia. Sanga ira romba'a, etumo i Timotius pade Erastus. Tapi i Paulus mboto daneto'o bara sakuya mbengipa kasaena ri Propinsi Asia.

²³Kira-kira ri tempona etu wo'u, neumbamo kakanano to nabetena ri ngata Efesus nggari pepatuduki i Pue Yesus. Iwe'imo tesana.

²⁴Ri ngata etu naria samba'a pande nu salaka to nosanga ka i Demetrius. Panggawiana mowia sapo-sapo nggedi nolenje sapo mpepue ka wiata Artemis. [34] Nggari panggawiana etu nadea mpu'u asele to nirata i Demetrius pade roa-roana.

²⁵I'a nompasiromu pura-pura roana sampokarajaa ante pande-pande salaka ntanina to nowia sapo-sapo nggedi wiata Artemis, pade niulina ka ira, “Sampesuwu-sampesuwu, ninjani komi mboto nggari panggawiata e'i pade kita matuwu.

²⁶We'i-we'i nikita komi pade niepe komi mbotomo nuapa nipowia i Paulus etu! I'a nanguli ka todea parantau-parantau wiata to nipowia nu pale manusia da'a nakono wiata. Pade nadeamo tau nomparasaya pepatudukina etu, da'a aga ri ngata Efesus e'i, tapi ntora pura-pura Propinsi Asia wo'u!

²⁷Jadi sampesuwu-sampesuwu, to nipokaekaku panggawiata e'i rasalai ntau. Da'a aga etu, tapi mamala sampe sapo mpepue wiata Artemis to nabetena etu rareke ntau mana ria gunana. Pade kabetena wiata Artemis mboto etu to nipesomba pura-pura tau ri Asia pade ri njumaongu dunia mana ria!”

²⁸Sangga nangepe tesa i Demetrius etu, nabilisi mpu'umo rara ira pura-pura, sampe ira nongare-ngare, “Matuwu Artemis, wiatata to Efesus!”

²⁹Pade natolelemo kakanano etu sampe ri njumaongu ngata Efesus. Todea etu nanjoko i Gayus bo Aristarkhus, etumo romba'a roa sampolumako ante i Paulus nggari Propinsi Makedonia, pade ira niumbunjai ntodea nalau nasalisa nesua ri lalowo bete ngata etu.

³⁰Paulus madota mesua mantingayo todea ri setu, tapi topomparasaya-topomparasaya i Pue Yesus da'a nompaloga i'a mesua.

³¹Wa'a wo'u bara sakuya mba'a topoparenta to noanggana nggari Propinsi Asia to nowega ante i Paulus. Ira nompakau tau nalau manguli ka i Paulus, “Ne'e mpu'u mesua mantingayo todea riara nu kasiromu etu!”

³²Tempo etu nagado mpu'umo tau dea to nasiromu ri setu. Naria to nongare iwe'i, naria wo'u to nongare iwetu, sabana nadea nggari ira etu da'a ninjani nuapa patuju ira nasiromu ri setu.

³³Nantuki pombarata sabagia nggari todea etu, kasiromu ira etu niposabana samba'a to Yahudi nosanga ka Aleksander, sabana i'amo to nipopokolu nu to Yahudi ri ngayo todea. Aleksander etu nombawiataka palena, tandaina i'a madota motesa manjaliku korona ka todea.

³⁴Tapi iwetu ira nanggita i'a etu samba'a to Yahudi, nongaremo ira mpasanggani-nggani rongu jaa kasaena, “Matuwu Artemis, wiatata to Efesus!”

³⁵Kaopuna juru tulisi ngata etu namala nompopondodo tau dea etu. Nangulimo i'a ka ira, “Tau-tau to Efesus, ninjani ntau pura-pura kita to Efesus e'i to nompiara sapo mpepue wiata Artemis bo watu nakarampua to nanawu nggari langi!

³⁶Da'a ria samba'a to nombabali etu! Sabana etu kuperapi ka komi, pekalino puramo! Ne'epa rapowia komi sangele ante da'apa nompekiri asele nu powia etu!

³⁷Tau-tau e'i nikeni komi pura-pura ri se'i, naupa ira da'a nangangga nuapa-nuapa nggari sapo mpepue wiatata Artemis, pade ira da'a wo'u nompakakedi sanga Artemis etu.

³⁸Ane i Demetrius ante roana sampokarajaa etu maria tesa pepangadu ira ka samba'a tau, aginapa ira manggeni parakara etu ri ngayo ntopotangara. Potangara natebea ri tempo to natantuna, pade topotangara-topotangara naria nepopea.

³⁹Pade ane danariapa sangaya ntanina rapekutana komi, etu kana rapakaopu ri ngayo polibu ntodea to nipakatantu nu pomarenta.

⁴⁰Sabana nuapa najadi eo e'i mamala mompakandasa kita pura-pura! Kita mamala rasangga nu pomarenta Roma tau topeewa, sabana da'a ria kamba saongu alasa to mamala raulita mantakono kakanano e'i!”

⁴¹Naopu juru tulisi nanguli etu pura-pura, nipakauna tau dea etu manjili.