Read Da'a Kaili SURO-SURO 2 Bible Online

SURO-SURO 2 - Da'a Kaili bible

SURO-SURO 2

¹Sangga narata tempo eo bete nto Yahudi to nosanga ka Eo Pentakosta, nasiromumo pura-pura topomparasaya i Pue Yesus ri saongu peto'o.

²Sampegoli niepe ira moni nggari langi ewa nguu nu bara naramboso. Nguu nu bara etu natiepe ri umba-umba riara njapo to nikasiromu ira etu.

³Pade nikita ira sangaya ewa jela nu apu nolenje mpojila nendele ri umba-umba pade netu'u ri ja'i ira samba'a bo samba'a.

⁴Ira pura-pura nipesua Nosa Nagasa nu Alatala, pade nompamulamo ira notesa ante basa-basa to nopu'u nggari ja'i Nosa Nagasa nu Alatala etu. Ira namala notesa basa-basa etu sabana kuasa Nosa Nagasa naria ri ja'i ira.

⁵Tempo etu wo'u nadea tau-tau to Yahudi ntanina naria ri ngata Yerusalem. Ira e'imo tau-tau to naroso poagamana to narata nggari umba-umba ngata ri dunia.

⁶Sangga nangepe nguu nu bara etu, naratamo tau dea nasiromu. Natekaja mpu'u ira sabana niepe ira basa ira mboto namala nipotesa topomparasaya i Pue Yesus.

⁷Ante rara to natekaja pade nogumaa ira notesa samba'a bo samba'a, “Kitamo! Tau-tau to notesa e'i, ira pura-pura to Galilea!

⁸Tapi iwenu sampe kita pura-pura nangepe ira notesa ante basa nggari ngatata mboto?

⁹Kita e'i tau nggari tana Partia, Media, Elam, nggari Mesopotamia, Yudea pade Kapadokia. Naria wo'u kita nggari Pontus bo Asia,

¹⁰nggari Frigia pade Pamfilia, nggari Masir pade nggari tana Libia namosu ante ngata Kirene. Naria wo'u ri tatongota e'i tau narata nggari Roma.

¹¹Sabagia nggari kita tau to Yahudi bo naria wo'u tau ntanina to nesua agama Yahudi. Naria tau to narata nggari Bagia Kreta bo Arab. Kita e'i tau nggari mpengaya basa tapi kita pura-pura nangepe ira notesa ante basata mboto ewa powia to neliu nggabelo to nipowia Alatala!”

¹²Nogumaa bo naingu puramo ira sampe nosipekutana samba'a bo samba'a, “Nuapa batuana kajadia e'i?”

¹³Tapi naria wo'u tau-tau ntanina ri setu to nompongei-ngei. Ira nanguli, “A, tau-tau etu, ira aga nalangu.”

¹⁴Nangepe tesa etu, nekanggoremo i Petrus nosanggani ante ira sampulu samba'a suro i Pue Yesus ntanina etu, pade notesamo i'a ka tau dea ante suara namangga. Niulina, “Sampesuwu-sampesuwu to Yahudi, pade komi pura-pura to neto'o ri ngata Yerusalem! Epemo mpakabelo-belo tesaku e'i! Kana kupakanoto ka komi batuana nuapa to najadi ri se'i.

¹⁵Kami e'i da'a nalangu ewa nibata komi, sabana we'i-we'i da'apa tempo panginu, datinti sasio mpadondona.

¹⁶Tapi kajadia e'i karata nu Nosa Nagasa ewa to nijanji Alatala nantuki tesa to niboto nabi Yoel nggaolu iwe'i:

¹⁷‘Alatala notesa: Ri tempo kaopu nu dunia banepia Aku kana mompopana'u Nosaku ka pura-pura manusia. Ana-ana komi, nabeloka langgai nabeloka besi, kana mompasimbayu tesaku ka komi. Kabilasa-kabilasa komi kana manggita panggita nggari ja'iku. Pade totu'a-totu'a komi kana mangipi ewa pangipi kuwai ka ira.

¹⁸Sampe ri batua-batuaku wo'u, nabeloka langgai nabeloka besi, kana kuwai ka Nosa Nagasa ri eo to nijanjiku etu. Pade ira kana mompasimbayu nuapa-nuapa kuuli ka ira.

¹⁹Aku kana mompopokita ka komi kabaraka-kabaraka ri langi pade tandai-tandai nipogumaa ri dunia e'i. Kana maria lei bo apu bo rangasu.

²⁰Mata eo kana mabali majadi marumau, wula kana majadi maralei. Etu kana majadi ruru pade marata eo bete to nabelona, etumo tempo i Pue marata ri dunia e'i.

²¹Pade isema-sema to mekakai ka i Pue kana rapakasalama.’ [4]

²²Sampesuwu-sampesuwuku to Israel, epemo tesaku e'i! Alatala nompopokita ka komi pura-pura I'a mpu'u-mpu'u naria nosanggani-nggani ante Yesus to Nazaret etu, sabana nadea kabaraka pade tandai-tandai to nipogumaa to nikawia Alatala niposabana Yesus etu. Komi mboto nangginjani etu sabana kajadia-kajadia etu pura-pura najadi ri tatongo komi mboto.

²³Yesus etu niwai riara mpale komi pade I'a nipatesi komi. I'a niwai komi ka tau naja'a ala I'a rapaku ira ri kayu parika. Tapi kakonona to najadi etu nantuki nia to nipakatantu Alatala, sabana ninjanina nggari pamula-mulana nuapa to majadi ante Yesus.

²⁴Komi nompatesi Yesus, tapi Alatala nompakatuwu bali I'a nggari tatongo ntau namate. Alatala nombakabasaka Yesus nggari kasesana I'a namate sabana da'a namala I'a rata'amaka ri peto'o ntomate.

²⁵Nanotomo etu sabana Magau Daud nggaolu nombatesa Yesus iwe'i: ‘Nikitaku i Pue namosu ante aku. I'a ri sabingga ngganaku ala momporoa aku ala aku da'a molengga ragoya nuapa-nuapa.

²⁶Etumo sampe nadamba raraku, pade aku mantoiya-toiya. Naupa aku manusia biasa, aku e'i aga maroo manjarumaka kuasamu.

²⁷Sabana Komi da'a nompalamba aku maboli riara dunia ntomate. Komi da'a nompalamba watabaku Batuamu to Nagasana maboli riara dayo sampe mapopo.

²⁸Nitujurakamu ka aku jala mpaka ri katuwua mabelo sampe ri kasae-saena. Neliu nggadamba raraku sabana Komi nosanggani ante aku.’ [5]

²⁹Sampesuwu-sampesuwuku, natantu nanotomo ka kita pura-pura da'a watabakuna mboto to nipatuju Magau Daud, sabana totu'ata i Daud etu namate pade nitana. Dayona danariapa ri tatongota sampe eo e'i.

³⁰Tapi i Daud samba'a nabi, pade ninjanina nuapa rakawia Alatala banepiana. Ninjanina pojanji Alatala ka i'a. Alatala nojanji ante netunda kana maria samba'a nggari muli i Daud banepia raonggotaka majadi magau nasimbayu ewa i Daud mboto. [6] Etu sampe i Daud nombaboto Magau to Mompakasalama iwe'i: ‘I'a da'a rapalamba maboli riara dunia ntomate, korona da'a rapalamba riara dayo sampe mapopo.’ [7]

³¹

³²Yesus etumo to nipatuju tesa i Daud etu, sabana I'amo to nipakatuwu Alatala bali. Kami pura-pura e'i najadi sabina sabana ante mata kami mboto kami nanggita I'a natuwu bali.

³³I'a nionggotaka Alatala ri peto'o to nibila ri sabingga ngganana ri suruga. Pade nitarimana Nosa Nagasa to nijanji Umana Pue Alatala bopia. Jadi sampesuwu-sampesuwu, to nikita komi pade to niepe komi we'i-we'i najadi sabana kuasa Nosa Nagasa etu to niwai Yesus ka kami.

³⁴Jadi da'a korona mboto to nipatuju tesa Magau Daud to niuli kami pane'a, sabana natantu da'a i Daud to natuwu bali pade neore mpaka ri suruga. Tapi i Daud nanguli, ‘Pue Alatala nanguli ka Pueku, kamai pekatokomo ri sabingga ngganaku

³⁵sampe Aku mompowia pura-pura balimu mekou ri ja'imu.’ ” [8]

³⁶Jadi kana ranjani pura-pura to Israel, natantumo Yesus e'i to nipaku komi ri kayu parika, I'amo to nionggotaka Alatala majadi Pue pade Magau to Mompakasalama!”

³⁷Tempo tau dea nangepe tesa i Petrus etu, nanjoso rara mpu'umo ira. Pade nekutanamo ira ka i Petrus bo suro-suro ntanina, “Sampesuwu-sampesuwu, ane iwetu, nuapa masipato rapowia kami?”

³⁸Nesonomo i Petrus, “Komi kana majea nggari silaka komi, pade komi kana radiu samba'a bo samba'a ante sanga Yesus Kristus ala silakamu raampungi. Pade Alatala kana mombawai ka komi Nosa Nagasana.

³⁹Pojanji Alatala e'i niwaina ka komi pura-pura, pade ka muli nu muli komi, pade ka tau-tau ri ngata nakawao. Pojanjina etu niwai Pueta Alatala ka pura-pura tau to nipokiona marata ri ja'ina.”

⁴⁰Da'a aga iwetu tesa i Petrus, tapi ante nadeapa tesa ntanina i'a notarangga ka ira. Pade nipopanjanina ka ira, “Poga'amo komi ante tau to nadenggo rarana ri dunia we'i-we'i sabana ira kana rasuku Alatala!”

⁴¹Naopu nangepe tesa i Petrus, nadeamo tau to nomparasaya tesana etu, pade ira nidiu ewa tandai ira topomparasaya i Pue Yesus. Pade ri eo etu kadea ntau to nomparasaya i Pue Yesus natetambai wo'umo tolunjobu mba'a kadeana.

⁴²Topomparasaya i Pue Yesus to nabou etu nabati mpu'u neguru nggari ja'i suro-suro, pade ira tunggai nasiromu mpasanggani-nggani. Ira naoso nanggoni bo nosambaya mpasanggani-nggani.

⁴³Nadea mpu'u kabaraka bo tandai nipogumaa to nipowia nu suro-suro sampe nogumaa puramo todea.

⁴⁴Pura-pura topomparasaya nosaongu rara, pade nuapa-nuapa to naria ri ja'i ira nipake ira mpasanggani-nggani.

⁴⁵Kayuaya pade mbara-mbara ira nipobalu pade doina etu nibagi-bagi ka isema-sema to naria paraluuna.

⁴⁶Eo-eo ira tunggai nasiromu ri Sapo Mpepue. Ira pura-pura nanggoni mpasanggani-nggani ri sapo-sapo ira ante nadamba bo naede rara.

⁴⁷Da'a nenonto-nonto ira nombatoiya Pue Alatala. Pura-pura todea ntanina nombabila ira. Pade eo-eo i Pue nantambai ka ira tau-tau ntanina to nipakasalamana.