Read Da'a Kaili SURO-SURO 21 Bible Online

SURO-SURO 21 - Da'a Kaili bible

SURO-SURO 21

¹Ri setu nopasabimo kami ka topanggeniaka-topanggeniaka topomparasaya nggari ngata Efesus etu, pade nipalasi kamimo ira. Kami nesawi sakaya napola mpaka ri Lewuto Kos. Pade to nailena naratamo kami ri Lewuto Rodos. Nggari setu nosumomba wo'umo kami napola mpaka ri kasampoa sakaya ri ngata Patara.

²Ri Patara kami nomposintomu sakaya malau mpaka ri Bagia Fenisia. Sakaya etumo nipesawi kami pade nalau nosumomba.

³Nalaumo kami sampe nanggita Lewuto Siprus. Lewuto etu niliunaka kami ri sabingga njidi pade napolamo kami mpaka ri Bagia Siria. Nasampomo kami ri ngata Tirus sabana ri setumo pangulaya sakaya to nipesawi kami rata'uraka.

⁴Ri ngata Tirus etu kami nalau nanggita topomparasaya i Pue Yesus pade neto'o ri ja'i ira santipa kasaena. Ante pekeniaka Nosa Nagasa ira nompopatora ka i Paulus, “Agina ne'e mantende mpaka ri ngata Yerusalem!”

⁵Tapi sangga naganamo santipa kami neto'o ri setu nipalasi kamimo ira nalau nompapola polumako kami. Ira pura-pura nosanggani-nggani ante ana bo rongo ira nanggeni kami mpaka ri sawaliku ngata. Ri wiwi talinti setumo kami pura-pura notimbakotu nosambaya.

⁶Naopu etu nopasabimo kami nesawi sakaya. Pade nanjilimo ira mpaka ri sapo ira pura-pura.

⁷Nggari ngata Tirus etu nosumombamo kami sampe narata ri ngata Ptolemais. Ri setu kami nalau nombawai tabe ka topomparasaya i Pue Yesus. Pade neto'omo kami ante ira sambengi kasaena.

⁸Naeompadondo nalai wo'umo kami sampe narata ri ngata Kaisarea. Narata ri setu nalaumo kami neto'o ri sapo i Filipus samba'a topanggeni Kareba Belo. I'a samba'a nggari tatongo ira pitumba'a tau to nipelisi bopia mantulungi suro-suro.

⁹Naria ana i Filipus patamba'a randoo. Ira patamba'a etu nabi to niwai Alatala ka noto bo pompakule mompasimbayu tesa nggari ja'i Alatala.

¹⁰Naopu bara sakuya mbengi kami neto'o ri setu naratamo samba'a nabi nggari Bagia Yudea to nosanga ka Agabus.

¹¹I'a narata ri ja'i kami pade nialana sulepe i Paulus, pade niso'ona ka kadana bo palena mboto pade niulina, “Iwe'imo to niuli Nosa Nagasa nu Alatala: Pue sulepe e'i kana raso'o ntau to Yahudi ri ngata Yerusalem iwe'i, pade rawai ka tau-tau da'a to Yahudi.”

¹²Sangga nangepe tesana etu, kami ante pura-pura topomparasaya to neto'o ri ngata Kaisarea nerapi ka i Paulus ante mpu'u-mpu'u, “Ne'e mapola mpaka ri ngata Yerusalem!”

¹³Tapi nesonomo i Paulus, “Nokuya komi nageo nompakagero raraku? Nasadiamo aku e'i mpaka ri ngata Yerusalem da'a aga rapo'u tapi sampe mamate wo'u sabana aku topomparasaya i Pue Yesus!”

¹⁴Da'a madota Paulus nangepe tesa kami. Jadi nenontomo kami nombatagi i'a. Pade nanguli kami, “Palambamo dota i Pue madupa.”

¹⁵Naopu neto'o ri setu bara sakuya mbengi kasaena, nompakasadiamo kami mantende mpaka ri ngata Yerusalem.

¹⁶Naria bara sakuya mba'a topomparasaya nggari ngata Kaisarea wo'u nalau mpasanggani-nggani ante kami. Ira nanggeni kami mpaka ri sapo i Manason ri ngata Yerusalem, apa ri sapona etu rapesai kami maturu. Manason, etu samba'a tau nggari Lewuto Siprus to nasaemo najadi topomparasaya i Pue Yesus.

¹⁷Sangga narata ri ngata Yerusalem kami nitarima ntopomparasaya ri setu ante nadamba rara.

¹⁸Tonailena i Paulus nosanggani-nggani ante kami nalau nantalioda i Yakobus. Pura-pura topanggeniaka topomparasaya naria wo'u ri setu.

¹⁹Naopu kami nombatabe ira, i Paulus nombatesa ka ira nuapa pura to nikawia Alatala niposabana i'a ka tau-tau da'a to Yahudi.

²⁰Naopu nangepe tesa i Paulus etu Yakobus ante topanggeniaka-topanggeniaka topomparasaya ntanina etu nantoiya Alatala. Pade niuli ira ka i Paulus, “Sampesuwu, kana ranjani komi nonjobu-njobumo to Yahudi nomparasaya i Pue Yesus. Ira pura-pura etu natutu nantuki Atura-atura agama to nipapola i Musa.

²¹Tapi niepe ira komi nompatuduki tau-tau to Yahudi to neto'o ri tatongo ntau da'a to Yahudi ala manggabasaka Atura-atura etu. Niepe ira wo'u komi nanguli ne'e mana mombasuna ana ira pade wo'u mana mantuki ada-ada nto Yahudi.

²²We'i-we'i to Yahudi to nomparasaya etu kana mangepe nariamo komi ri se'i. Jadi we'i-we'i,

²³aginapa komi mantuki tesa kami e'i. Naria patamba'a tau ri se'i to nojanji ri ngayo i Pue nantuki adata.

²⁴Agina komi malau mompowia ada mompegasa koro mpasanggani-nggani ante ira, pade komi mombabayari oli pura-pura anu rapepue ira, ala wo'o ira mamala ragau nantuki pojanji ira etu. Ante iwetu kana manotomo ka pura-pura tau nuapa to niepe ira ewa komi da'a nakono, apa komi mboto nantuki Atura-atura agama to nipapola i Musa.

²⁵Ane tau-tau da'a to Yahudi to nomparasaya i Pue Yesus, nipakatu kami ka suramo mompakatantu atura-atura nuapa paraluu ratuki ira. Etumo, ira da'a mamala manggoni panggoni to nipakoni ka pue ntanina, da'a mamala manggoni lei bara manggoni bau nggari binata namate padu, pade da'a mamala ira mosampaturu ante tau da'a rongo ira mboto.”

²⁶Nangepe etu nasitujumo i Paulus ante tesa Yakobus bo topanggeniaka-topanggeniaka ntanina etu. Jadi naeompadondona nalaumo i'a mompowia ada mompegasa koro nosanggani-nggani ante ira patamba'a. Naopu etu nesuamo ira riara Sapo Mpepue notesa ka topanggeni agama ri setu nepitumbengipa ada mompegasa etu maopu pade pesomba ira samba'a bo samba'a rakeni rapesomba ka Alatala.

²⁷Tempo ntora naopu tempo nipakatantu ira mompowia ada mompegasa koro etu, naria bara sakuya mba'a to Yahudi nggari Propinsi Asia nanggita i Paulus riara Sapo Mpepue. Ira nompakagado todea ri setu pade nanjoko i Paulus,

²⁸ante nongare-ngare, “Tau-tau to Israel, tulungimo kami! E'imo tau to nalau ri umba-umba nompatuduki tau pura-pura nangewa kita to Yahudi! I'a nompatuduki tau mombabali Atura-atura agama to nipapola i Musa pade manjalai Sapo Mpepue e'i! Pade we'i-we'i i'a nanggeni tau da'a to Yahudi nesua riara Sapo Mpepue nompakaruto peto'o to nagasana e'i!”

²⁹Niuli ira iwetu, sabana nikita iramo i Trofimus samba'a tau da'a to Yahudi nggari ngata Efesus etu naria nosanggani-nggani ante i Paulus riara ngata, pade nipekiri ira i Paulus nanggeni i'a nesua ri Sapo Mpepue.

³⁰Nangepe etu nagado mpu'umo pura-pura tau riara ngata Yerusalem, pade nangowamo ira mpasanggani-nggani mpaka ri Sapo Mpepue nanjoko i Paulus. I'a niumbunjai ira mpaka ri sawalikuna. Tempo etu kaliu-liu pewobo Sapo Mpepue etu nipiku.

³¹Tempo topegado etu nompasimbuku mompatesi i Paulus naria tau nalau nopakilu ka balengga tantara Roma, “Nagadomo njumaongu ngata Yerusalem!”

³²Nangepe pakilu etu balengga tantara nasalisa nangala tantara-tantarana pade nalaumo ira mpaka ri peto'o to nagadona etu. Tempo tau dea etu nanggita balengga tantara ante roana narata, nenontomo ira nombaboba i Paulus.

³³Nalaumo balengga tantara etu nanjoko i Paulus pade nipakauna tau nombaso'o i'a ante rongu rante. Naopu etu nipekutanana ka tau dea etu, “Isema tau e'i? Nuapa nipowiana?”

³⁴Saga'a nggari tau dea etu nanguli iwe'i, pade naria wo'u saga'a nanguli iwetu. Iwetu kagadona sampe balengga tantara etu da'a namala nangginjani nuapa kakonona to najadina. Etu sabana i'a nomparenta ala i Paulus etu kana rakeni ri asrama tantara.

³⁵Tempo tantara to nanggeni i'a narata ri tangga asrama etu, topegado-topegado etu nanggarau mpu'u sampe i Paulus damo nikowa tantara nesua mpaka riara asrama.

³⁶Ira topegado etu netuki nggari puri pade nongare-ngare, “Patesimo i'a!”

³⁷Tempo ira ntora nesua riara asrama tantara, nangulimo i Paulus ka balengga tantara, “Mamala aku motesa ka komi sampalai?” Nangulimo balengga tantara ka i'a, “Hai! Namala tanu iko notesa ante basa Yunani!

³⁸Ane iwetu iko da'a tau to Masir to nangewa pomarenta pade nanggeni patanjobu mba'a topepatesi nalai ri karawa baina bopia!”

³⁹Nesonomo i Paulus, “Da'a. Aku e'i tau to Yahudi nggari ngata natolele, etumo ngata Tarsus ri Propinsi Kilikia. Aku merapi, wai ka aku loga motesa ka tau dea e'i.”

⁴⁰Naopu etu balengga tantara etu nompaloga i Paulus motesa. Jadi nenggoremo i Paulus ri tangga ri setu pade niwiatakana palena ala ira malino mangepe tesana. Nalinomo ira sakedi pade nompamulamo i Paulus notesa ka ira ante Basa Ibrani.