Read Da'a Kaili SURO-SURO 24 Bible Online

SURO-SURO 24 - Da'a Kaili bible

SURO-SURO 24

¹Limambengi kaliuna notuamo Balengga Topanggeni Agama Yahudi to nosanga ka Ananias bo bara sakuya mba'a topanggeniaka to Yahudi mpaka ri ngata Kaisarea. Nikeni ira wo'u samba'a topojarita to nosanga ka i Tertulus. Ira nantingayo i Gubernur Feliks, pade nitesa iramo tesa pepangadu ira ewa kasala i Paulus.

²Paulus nipokio mantingayo i Feliks pade nompamulamo i Tertulus nompangadu i Paulus iwe'i: “Gubernur to nibilaku, kami todea riara poparenta komi natuwu ante nasana-sana. Pade nggari kanoto komi moparenta, nadeamo to nipakabelo ri ngata kami.

³Pura-pura panggawia komi to nompakabelo ngata kami e'i nitarima kami ante nadamba rara. Pade da'a mabasa-basa kami manguli tarima kasi.

⁴Jadi ala ne'e komi masae mopea, kami merapi ala komi mamala mangepe sampalai tesa pepangadu kami to nambukuna e'i.

⁵Tau e'i nirata kami topegado to neliu kaja'ana. Ri umba-umba ri dunia i'a nowia kakanano ri tatongo ntau to Yahudi. Pade i'a wo'u samba'a topanggeniaka ntau to nantuki Pepatuduki Yesus nggari ngata Nazaret.

⁶I'a wo'u mompembai mompakaruto Sapo Mpepue, tapi i'a nisoko kami. Patuju kami mombatangara i'a nantuki Atura-atura agama kami mboto.

⁷Aga balengga tantara i Lisias nangago i'a nggari ja'i kami,

⁸pade niparentana ala pura-pura topangadu kana mantingayo komi. Jadi Gubernur to nibilaku, ane komi momparesa tau e'i, kana ranjani komi mboto nggari ja'ina etu nakono nuapa to nipangadu kami ka i'a.”

⁹Pade pura-pura tau to Yahudi to naria ri setu wo'u nompangadu i Paulus pade nantakono nuapa to niuli i Tertulus etu.

¹⁰Naopu etu Gubernur nowiataka palena ka i Paulus ala i'a motesa. Pade nangulimo i Paulus, “Gubernur to nibilaku, ninjaniku komi nompae-mpaemo najadi topotangara ri ngata e'i. Etumo sabana nadamba mpu'u raraku mamala mombabali tesa ntau nompangadu aku ri ngayo komi.

¹¹Mamala komi mboto mompakatantu da'apa nelabi nggari sampulu rombengi kaliuna aku nantende mpaka ri ngata Yerusalem nalau mepue ri Sapo Mpepue.

¹²Da'a ria sanggani tau to Yahudi etu nombarata aku nosinggarau, bara nompowia kakanano, nabeloka riara Sapo Mpepue, nabeloka ri sapo-sapo mpodade, nabeloka riara ngata.

¹³Da'a wo'u namala ira mompopokita ka komi tesa pepangadu ira etu nakono.

¹⁴Tapi aku kana mompangaku ri ngayo komi, aku e'i nantuki pepatuduki Yesus nombasomba Alatala to nipesomba totu'a kami nggaolu. Pepatuduki etu nireke ira to Yahudi e'i nasala. Tapi aku batena nomparasaya pura-pura to nitulisi riara buku-buku i Musa pade buku-buku nabi-nabi ntanina.

¹⁵Nasimbayu ante to Yahudi e'i aku wo'u manjarumaka ka Alatala pura-pura tau kana matuwu bali nggari kamatena, nabeloka tau-tau nanoa rarana, nabeloka tau-tau nadenggo rarana.

¹⁶Etumo sabana aku mompasimbuku mpakabelo-belo matuwu ante raraku malusu bo magasa ri ngayo nu Alatala pade ri ngayo manusia wo'u.

¹⁷Naria bara sakuya mpae aku nompalasi ngata Yerusalem. Pade lako bara sakuya mbengi naliu e'i aku nanjili bali nanggeni doi nantulungi sampesuwuku to Yahudi, pade wo'u ala mombawai pesombaku ka Alatala.

¹⁸Tempo aku danaria ri Sapo Mpepue, naria bara sakuya mba'a tau to Yahudi nggari Propinsi Asia nomposirata aku naopu aku nowia ada nompakagasa koroku. Da'a ria nadea tau nosanggani-nggani ante aku, pade da'a wo'u naria kakanano tempo etu.

¹⁹Kakonona kana maria wo'u ira ri se'i mompangadu aku ri ngayo komi ane maria tesa pepangadu ira ka aku.

²⁰Atau agina tau-tau to nompangadu aku e'i motesa nuapa kaja'ana to nirata ira ri ja'iku tempo aku naria ri ngayo Polibu Bete Agama.

²¹Da'a ria sala ntanina nirata ira, aga sambela tesa e'i to nitesaku ri ngayo ira, ‘Aku nitangara eo e'i sabana aku nomparasaya tau-tau namate kana matuwu bali.’ ”

²²Gubernur Feliks nangginjani ante nabelo pepatuduki to niuli Pepatuduki Yesus. Jadi i'a nompopenonto polibu etu pade nanguli, “Aku mompakaopu parakara e'i ane mariamo balengga tantara i Lisias ri se'i.”

²³Naopu etu niparentana samba'a balengga tantara manggatono i Paulus. Tapi naupa i'a nikatono, i'a niwai loga molumako sakedi pade roana nipaloga marata mantulungi i'a.

²⁴Bara sakuya mbengi kaliuna, naratamo i Gubernur Feliks nosanggani-nggani ante rongona to nosanga ka i Drusila. Drusila etu samba'a tau to Yahudi. Feliks nompakau tau lau mangala i Paulus rakeni ri ja'ina. Sangga naratapa i Paulus pade nipetalinga i Feliksmo tesana ewa pomparasayana ka Yesus Kristus.

²⁵Nangulimo i Paulus ka ira, “Pokaingguta kana manoa, pade kita kana manta'amaka dota rarata to naja'ana, sabana kita kana ratangara Alatala banepia.” Tempo i Feliks nangepe tesa i Paulus etu naeka mpu'umo i'a. I'a nanguli, “Naganamo we'i-we'i! Kalau ntanimo ruru iko. Ane maria loga damo rapokio motesa wo'umo.”

²⁶Kakonona i Feliks nanjarumaka i Paulus mombawai doi ka i'a ala i'a rakabasaka. Etu sampe mpanggani-ngganimo i Paulus nipokio Feliks motesa-tesa ante i'a.

²⁷Rompae kaliuna, i Feliks etu nisambei, pade i Perkius Festus najadi Gubernur ri bagia etu. Tempo i Feliks nalai, nipalambanamo i Paulus riara tarunggu sabana i'a madota mangala rara tau-tau to Yahudi.