Read Da'a Kaili SURO-SURO 26 Bible Online

SURO-SURO 26 - Da'a Kaili bible

SURO-SURO 26

¹Pade nangulimo Magau Agripa ka i Paulus, “Iko rawai loga motesa mombabali tesa ntau to nompangadu iko.” Jadi i Paulus nangonggotaka palena, pade nompamulamo i'a notesa iwe'i:

²“Magau Agripa to nibilaku, aku nombarasai nauntu mpu'u sabana eo e'i aku namala motesa ri ngayo komi mombabali pura-pura tesa to nipangadu nto Yahudi ka aku.

³Kaiyampuuna sabana komi mpu'u-mpu'u nangginjani pura-pura ada bo pepatuduki to nipoposisala to Yahudi. Sabana etu aku merapi ante mpu'u-mpu'u ala komi mosabara mangepe tesaku e'i.

⁴Ninjani ntau to Yahudi puramo jala nggatuwuku nggari kakediku, sabana aku natuwu ri tatongo ira nompamula ri ngataku mboto pade ri ngata Yerusalem wo'u.

⁵Nasaemo ira nosinjani aku e'i, pade ane ira madota, mamala ira mantakono tesaku e'i. Nompamula nggari tempo aku danakabilasa aku nantuki pepatuduki to Parisi, etumo pepatuduki to mpu'u-mpu'u nantuki pura-pura Atura agamata to Yahudi.

⁶Pade we'i-we'i aku nenggore ratangara ri ngayo komi ri se'i aga sabana aku nomparasaya Alatala kana mompakadupa pojanjina ka totu'ata nggaolu.

⁷Pojanji etumo to nisarumakata nto Yahudi, muli nggari sampulu romba'a ana i Israel. Etumo sampe kita da'a nabasa-basa mepue ka Alatala eo wengi. O Magau to nibilaku, aku nipangadu tau-tau to Yahudi sabana aku nanjarumaka pojanji etu!

⁸Iwenumo sampesuwu-sampesuwuku to Yahudi? Nokuya komi nompekiri Alatala da'a mamala mompakatuwu bali tau namate?

⁹Nokolu aku mboto e'i wo'u nompekiri aku kana mompowia mpengele-ngele ala mangewa Yesus to Nazaret etu.

¹⁰Pade etu mpu'u-mpu'u to nipowiaku ri ngata Yerusalem. Ante sura kuasa nggari ja'i balengga-balengga topanggeni agama nadea topomparasaya i Pue Yesus nisuarakaku riara tarunggu. Pade tempo ira nisuku mamate, aku wo'u nasituju.

¹¹Nadea ngganimo aku nompandasa ira riara sapo mpodade ala mompasu'u ira mombasapu pomparasaya ira ka Yesus. Narau mpu'u raraku ri ja'i ira sampe aku nalau mompandasa ira sampe ri ngata-ngata ntanina nakawao.”

¹²“Ante patuju etu aku nanggeni sura kuasa nggari ja'i balengga-balengga topanggeni agama nalau mpaka ri ngata Damsyik.

¹³Magau to nibilaku, tempo aku da ri tatongo jala kira-kira tongo eo, aku nanggita reme nggari langi nelabi mpu'u karemena nggari reme nu eo. Reme etu nombawanta aku ante roa-roaku sanjala.

¹⁴Kami pura-pura nadungga, pade niepeku suara nanguli ka aku ante Basa Ibrani, ‘Saulus, Saulus, nokuya iko nompandasa Aku? Iko aga mompakasusa koromu mboto ane iko mangewa pekeniakaku!’

¹⁵Pade nekutanamo aku, ‘Isema Komi, Pue?’ Nesono wo'umo suara etu, ‘Aku e'imo Yesus to nipandasamu!

¹⁶Tapi we'i-we'i pembangumo iko, pade pekanggoremo! Aku nompopokita koroku ka iko ala mangonggotaka iko majadi batuaku bo sabiku. Iko kana mompatolele ka tau-tau ntanina ewa nuapa to nikitamu eo e'i pade ewa nuapa kupopokita ka iko ri tempo marata.

¹⁷Iko kana kukabasaka nggari kuasa ntau to Yahudi pade nggari kuasa ntau da'a to Yahudi to madota mompakasusa iko. Aku mompakau iko malau mpaka ri ja'i ira.

¹⁸Pakanoto rara ira ala ira mamala mesuwu nggariara karumauna pade megoli mesua riara karemena, ala ira mamala makabasaka nggari kuasa Magau nu Seta pade mantarima kuasa nggari ja'i Alatala. Pade ante momparasaya Aku silaka-silaka ira raampungi pade ira mamala majadi todea nu Alatala.’ ”

¹⁹“Sabana etu, Magau Agripa, aku e'i bate-batena natutu nantuki nuapa to nikitaku riara mpanggitaku nggari ja'i Alatala etu.

²⁰Pamula-mulana aku nalau notesa ka tau-tau to Yahudi ri ngata Damsyik, pade ri ngata Yerusalem ante njumaongu Bagia Yudea. Pade nalau wo'umo aku ri ja'i tau-tau da'a to Yahudi. Niuliku ka ira pura-pura, ‘Kana majea komi nggari silaka-silaka, pade megoli mombajuju koro komi ka Alatala. Pade popokita ante pokainggu to nabelo, mpu'u-mpu'u najeamo komi nggari silaka-silaka etu.’

²¹Etumo sabana tau-tau to Yahudi nombasoko aku riara Sapo Mpepue pade ira nompasimbuku mompatesi aku.

²²Tapi naupa iwetu, sampe iwe'i-we'i aku danikalendu nu Alatala sampe danamalapa aku nekanggore notesa ka pura-pura tau, nabeloka tau nalanga panggana, nabeloka todea biasa. Nuapa to nitesaku etu nasimbayu ewa nuapa to niboto i Musa ante nabi-nabi ntanina nggaolu.

²³Etumo, Magau to Mompakasalama to nijanji Alatala etu, kana masusa sampe mamate. Pade I'amo pamula-mulana tau namate natuwu bali, ala ante iwetu I'a manggeni reme to mompakabelo pura-pura manusia, nabeloka tau to Yahudi, nabeloka tau-tau da'a to Yahudi.”

²⁴Tempo i Paulus danotesa iwetu, nongaremo i Festus, “Nagilamo, iko Paulus! Pangginjanimu to nadea etu nompakagila iko!”

²⁵Tapi nesonomo i Paulus, “Aku e'i da'a nagila, Tua. Tesa-tesa to niuliku e'i nakono pade nesuwu nggari pekiriku to nanotona.

²⁶Ninjani Magau Agripa mboto nuapa to nitesaku pane'a nakono. Etu sampe aku nabia notesa iwetu ri ngayona, apa kajadia etu pura-pura da'a nitabuniaka.

²⁷Magau Agripa to nibilaku, ninjaniku komi wo'u nomparasaya nuapa to niuli nabi-nabi nggaolu.”

²⁸Pade nangulimo Magau Agripa ka i Paulus, “Niulimu aku e'i mamala mupajadi to Karistee riara tempo da'a masae e'i!”

²⁹Pade nesonomo i Paulus, “Bara masae bara da'a masae, aku merapi doa ka Alatala ala komi pade pura-pura tau to nangepe tesaku eo e'i, mamala majadi topomparasaya i Pue Yesus nasimbayu ewa aku. Aga ne'e sampe komi ratarunggu.”

³⁰Kaopuna nekanggoremo Magau Agripa pade Gubernur bo i Bernike pade pura-pura tau ntanina to nasiromu etu, pade nesuwumo ira nggari polibu etu.

³¹Sangga ira naria ri sawalikuna, nangulimo ira samba'a bo samba'a, “Da'a ria kamba sangaya to nipowia ntau e'i to masipato rasuku mamate bara ratarunggu.”

³²Nangulimo Magau Agripa ka i Festus, “Kakonona tau e'i mamalamo rakabasaka ane i'a da'a nekitangara ri ngayo Magau Roma.”