Read Da'a Kaili SURO-SURO 27 Bible Online

SURO-SURO 27 - Da'a Kaili bible

SURO-SURO 27

¹Naopu etu Gubernur Festus nompakatantu kami kana mosumomba mpaka ri ngata Roma ri Propinsi Italia. Jadi i Paulus ante bara sakuya mba'a tau ntanina nitarunggu niparasaya ka Yulius, samba'a tadulako nu tantara Roma to nosanga ka “Pasukan Magau Roma.”

²Kami nesawi saongu sakaya bete nopu'u nggari ngata Adramitium. Pade nanggaliwomo kami nggari ngata Kaisarea ante patuju mosumomba mesai ri kasampoa-kasampoa ri talinti-talinti Propinsi Asia. Naria wo'u samba'a tau nggari ngata Tesalonika ri Propinsi Makedonia to nosanga ka Aristarkhus nalau nosanggani ante kami.

³Tonailena sakaya kami nesai nasampo ri ngata Sidon. Yulius nabelo rarana ri ja'i Paulus, sampe niwaina loga ka i Paulus nalau nanggita roa-roana ri ngata Sidon etu ala ira mamala mombawai ka i'a nuapa to raparaluuna.

⁴Nggari setu kami nompapola posumomba kami. Tapi sakaya kami nompotomu poiri sampe kami kana nosale ri wiwi ntalinti Lewuto Siprus to nalendu sakedi nggari poiri etu.

⁵Naopu etu nosumombamo kami ri tasi ri ntoto Propinsi Kilikia bo Pamfilia, pade napola sampe narata ri ngata Mira ri Propinsi Likia.

⁶Ri ngata Mira etu Yulius nombarata saongu sakaya bete nggari ngata Aleksandria mosumomba mpaka ri Propinsi Italia. Pade kami nipakauna nolinja ri sakaya etu.

⁷Bara sakuya mbengimo kasaena sakaya etu nosumomba ante naole. Kaopuna ante kasusana kami namala nompakamosu ngata Knidus. Nggari setu, kami da'a nompapola posumomba kami nantuki nia pamulana sabana peburu mpoiri da'apa nabelo. Jadi sakaya kami etu nalau nosale ri wiwi ntalinti Lewuto Kreta nombaliunaka uju Salmone ala ne'e mawela gaga poiri bete etu.

⁸Nasusa mpu'u kami nosale ri wiwi ntalinti ri sabingga puluna Lewuto Kreta etu. Kaopuna naratamo kami ri kasampoa nggedi to nosanga ka Kasampoa Naramba, namosu ngata Lasea.

⁹Tempo etu nasae gagamo kami nosumomba sampe naliumo Eo Bete Nggapuasa nto Yahudi. Mana tempo mabelo mosumomba. Sabana etu nangulimo i Paulus ka ira riara sakaya etu,

¹⁰“Sampesuwu-sampesuwu, nantuki pombarataku ane kita mompapola posumombata e'i, kana mandasa mpu'u kita ngina. Kana marugi mpu'u kita, da'a aga pangulaya sakaya e'i, tapi kita e'i wo'u mamate!”

¹¹Tapi Yulius etu da'a nantuki tesa i Paulus, sabana nipompangalanapa tesa topompajala sakaya bo kapiteena pade tesa i Paulus.

¹²Kasampoa Naramba etu da'a nabelo rakasampo kami masae ri tempo nu leni. Sabana etu nadea nggari topesawi sakaya kami etu nanguli, “Agina kita mompalasi kasampoa e'i pade mompasimbuku mosumomba mpaka ri ngata Feniks masampo ri setu tempo leni.” Ngata Feniks etu saongu kasampoa Lewuto Kreta to nalendu nggari poiri ri tempo leni sabana nantingayo kasolo nu eo ri puluna pade tasina.

¹³Tempona etu nompamulamo poiri neburu naole-ole nggari sabingga puluna. Etu sampe nipekiri ira pura-pura patuju ira mapola mpaka ri kasampoa Feniks namala majadi. Sabana etu nionggotaka iramo balango sakaya etu, pade nosumombamo kami nosale ri wiwi ntalinti Lewuto Kreta etu.

¹⁴Tapi da'a nasae nggari setu naratamo poiri bete nggari Lewuto Kreta etu to niuli ntau “Poiri Bete nggari sabingga tasina pebulu nu eo.”

¹⁵Sakaya kami etu nirumpa nu poiri bete pade mana mamala mantingayo poiri. Jadi nipalamba kamimo sakaya etu nalome nikeni nu poiri.

¹⁶Tempo kami nalome nikeni nu poiri etu naratamo kami ri sabingga puluna saongu lewuto nggedi nosanga Kauda. Ri tempo etu kami nompasimbuku ante nasusa mpu'u nombataja mangore sakaya nggedi to nosanga ka sekoci riara nu sakaya bete etu.

¹⁷Sangga sekoci namala nionggotaka pade niboli ri bunggu nu sakayamo, sakaya bete etu nipakaroso anabua-anabua sakaya ante nipo'u nu kaloro nantalili koro nu sakaya etu. Naopu etu nipopana'u iramo somba nu sakaya, sabana naeka ira sakaya etu mombarumpa bone to nasore to namosu talinti tana Libia. Jadi iwetumo sakaya etu nipalamba ira nalome nikeni nu poiri.

¹⁸Da'a nenonto poiri naramboso etu nantawui sakaya kami, sampe naeompadondo nitajiaka ira saga'a pangulaya sakaya riara ntasi ala manga'a sakedi sakaya etu.

¹⁹Pade to nailena nitajiaka ira wo'umo parewa-parewa nu sakaya etu ante pale ira mboto mpaka riara ntasi.

²⁰Naopu etu bara sakuya mbengimo kasaena kami mana nanggita eo bo betu'e, pade poiri wo'u da'a ntoto nenonto karambosona. Kaopuna mana ria panjarumaka kami namala masalama.

²¹Bara sakuya mbengi kasaena tau-tau riara sakaya etu da'a mana nanggoni. Sabana etu nekanggoremo i Paulus ri tatongo ira pade nanguli, “Sampesuwu-sampesuwu, ane komi nantuki tesaku bopia nanguli ne'e mompalasi Lewuto Kreta, kita e'i da'a mandasa ante marugi ewa e'i!

²²Tapi we'i-we'i kuperapi ka komi pura-pura, pakaroo rara komi! Da'a ria samba'a nggari tatongota e'i mamate, tapi sakaya e'i kana marugi.

²³Ninjaniku etu sabana iwengi naria samba'a malaeka nggari ja'i Alatala to nipesombaku, etumo Alatala to nombajagai aku, narata ri ja'iku pade nanguli,

²⁴‘Ne'e maeka, Paulus! Iko kana mapola mantingayo Magau Roma. Pade nggari kabelo nu rara Alatala ri ja'imu, pura-pura tau nosanggani-nggani ante iko ri sakaya e'i kana masalama.’

²⁵Sabana etu, sampesuwu-sampesuwu, pakaroomo rara komi, sabana niparasayaku nuapa to niuli Alatala ka aku etu natantumo kana majadi!

²⁶Tapi sakaya kita e'i ngina kana mombarumpa bone nabua namosu wiwi talinti nu saongu lewuto.”

²⁷Tempo nagana kasampulu patambengina sakaya kami nolanto-lanto ri tasi Adria, kira-kira natongo wengina, anabua sakaya etu nombarasai sakaya ira etu mana nakawao nggari kabatana.

²⁸Sabana etu niukuru ira kandala nu tasi etu ante lui pade watu, rompulu ndopo kandala nu ue etu. Ira namaju sakedi da'a nakawaoka nggari setu pade niukuru ira wo'umo, sampulu alima ndopo kandala nu tasi etu.

²⁹Naopu etu niulunjaka ira pataongu balango nggari bagia puri nu sakaya etu ala mompopeta'a sakaya, sabana ira naeka sakaya kami etu mombarumpa watu gusu. Pade nisarumaka ira ane mamala masalisa-lisa maeo.

³⁰Tapi bara sakuya mba'a anabua nu sakaya etu nompasimbuku malai nggari sakaya etu. Niulunjaka ira sekoci mpaka ri bunggu nu tasi ewa ira madota mangulunjaka balango ri kolu nu sakaya etu.

³¹Nanggita kajadia etu nangulimo i Paulus ka Yulius ante tantara-tantarana etu, “Ane anabua-anabua sakaya etu mompalasi sakaya e'i, komi pura-pura da'a ntoto masalama!”

³²Nangepe tesa i Paulus tantara-tantara etu nombadapa kaloro nu sekoci pade nipalamba ira nalome.

³³Tempo ntora maeomo, i Paulus nompakau pura-pura tau kana manggoni. Niulina, “Sampulu patambengimo kasaena komi aga nompopea-pea, da'a ria komi nanggoni nuapa-nuapa!

³⁴Sabana etu kuperapi ka komi, kana manggoni komi sakedi we'i-we'i. Panggoni etu paraluu rakoni komi ala komi maroso bali pade mamala masalama nggari kasusa e'i. Komi pura-pura kana masalama. Da'a ria mokuya komi ngina, nau aga sambalaa wulu wo'o komi da'a maronto!”

³⁵Naopu notesa iwetu, i Paulus nangala roti pade niulina tarima kasi ka Pue Alatala ri ngayo ira pura-pura. Nibagi-bagina roti etu, pade nompamulamo i'a nanggoni.

³⁶Naopu etu naroso bali rara ira pura-pura, pade ira wo'u nanggoni.

³⁷Kadea kami pura-pura riara sakaya bete etu, roatu pitumpulu bo onomba'a.

³⁸Naopu nanggoni sampe nabosu puramo, ira nantajiaka gando to naria ri sakaya etu riara ntasi ala manga'a sakedi sakaya etu.

³⁹Tempo naeomo topompajala sakaya etu nanggita kabatana tapi da'a ninjani ira kabatana ri umba etu. Nikita ira saongu sidu nu tasi ante talintina. Patuju ira ala sakaya etu rapakasampo ira ri talinti etu.

⁴⁰Naopu etu nidapa ira kaloro nu balango-balango, pade balango-balango etu nipalasi ira naboli riara ntasi. Pade niwole ira kaloro-kaloro pompo'u guli ala sakaya mamala raguli. Pade niore ira somba ri kolu nu sakaya etu ala poiri mantawui sakaya etu malau mpaka ri talinti.

⁴¹Tapi da'apa narata ri talinti etu sakaya kami aga nombarumpa bone nabua. Bagia kolu nu sakaya etu nesua riara bone sampe sakaya etu mana namala mapola, pade bagia ri puri nu sakaya etu naropotaka nirumpa nu balumba bete etu.

⁴²Nanggita kajadia etu, tantara-tantara etu madota mompatesi pura-pura tau nitaha etu ala da'a ria samba'a morabu ri kabatana pade malai.

⁴³Tapi Yulius nantagi ira sabana i'a madota mompakasalama i Paulus etu. Pade nipakauna pura-pura tau to namala norabu motingganawu mokolu riara ntasi morabu mpaka ri talinti etu.

⁴⁴Pade tau-tau ntanina kana metuntumaka ante manjoko dopi pade kayu bingga-bingga nu sakaya etu. Jadi ante iwetumo kami pura-pura nasalama nesore ri kabatana.