Read Da'a Kaili SURO-SURO 28 Bible Online

SURO-SURO 28 - Da'a Kaili bible

SURO-SURO 28

¹Sangga nasalama puramo kami nesore ri kabatana ri wiwi talinti etu, ninjani kamimo lewuto etu nosanga ka Lewuto Malta.

²Pue ngata Malta etu najole mpu'u ira ri ja'i kami. Ira nantarima kami pura-pura ante nabelo pade niparega ira apu raponeru kami, sabana nompamulamo nauja pade rawana wo'u nalenimo.

³Paulus nalau nompasiromu rangga-rangga nu kayu. Sangga nitu'una kayu etu ri apu, nesuwumo samba'a ule nggari kayu sabana kapane nu apu etu, pade nantuda palena.

⁴Sangga nikita pue ngata ule etu neloe ri pale i Paulus, notesamo ira ka roana samba'a bo samba'a, “Tau e'i natantumo i'a samba'a topepatesi, sabana naupa nasalamamo i'a nggari tasi, Wiata Topotangara da'a mompakamba i'a matuwu.”

⁵Tapi i Paulus aga nantarampea ule etu mpaka riara nu apu, pade da'a ntoto nirasaina ju'ana.

⁶Pue ngata etu nompekiri pale i Paulus kana mebangga, bara i'a madungga bo mamate. Tapi nasae nipopea ira, da'a ria nakuya-kuya i'a. Nanggita etu nabalimo pompekiri ira, pade niuli ira i Paulus etu samba'a wiata.

⁷Da'a nakawao nggari setu naria tana ntopoparenta Lewuto Malta etu, sangana i Publius. I'a nantarima kami ante kadamba nu rarana pade tolumbengi kasaena kami nitoratana riara njapona.

⁸Tempona etu uma i Publius etu nakambole naturu sabana naju'a kokora bo natero. Paulus nesua ri ja'ina pade ante nosambaya bo nombadika palena ri koro ntau naju'a etu nipakabelona ju'ana etu.

⁹Sangga nangepe kajadia etu naratamo pura-pura tau ntanina to naju'a nggari lewuto etu ri ja'i Paulus, pade ira wo'u nipakabelona.

¹⁰Ira mpu'u-mpu'u nombabila kami, pade tempo nasadiamo kami manggaliwo, nikeni ira ka sakaya nipesawi kami pura-pura nuapa to niparaluu kami riara posumomba kami etu.

¹¹Naopu tolumbula kasaena kami neto'o ri Lewuto Malta etu, nosumomba wo'umo kami ante saongu sakaya nggari ngata Aleksandria to nosanga ka “Wiata Mporapi Kastor bo Poluks”. Sakaya etu nesai nasampo ri Lewuto Malta etu sampe naopu tempo leni.

¹²Nosumombamo kami sampe narata ri ngata Sirakusa, pade tolumbengi kasaena kami naturu ri setu.

¹³Nggari setu nosumomba kami nosale talinti sampe narata ri ngata Regium. To nailena nompamulamo poiri neburu nggari puluna sampe riara rombengipa naratamo kami ri kasampoa Putioli ri Propinsi Italia.

¹⁴Ri setu kami nosintomu ante bara sakuya mba'a topomparasaya i Pue Yesus, pade kami nipakeni meto'o ante ira pitumbengi kasaena. Pade naopu etu nolumakomo kami mapola mpaka ri ngata Roma.

¹⁵Tempo topomparasaya-topomparasaya i Pue Yesus ri ngata Roma etu nangepe kareba kami mamosu maratamo, naratamo ira mombatomunaka kami ri Potomu Apius pade ri ngata Pasanggaraha Tiga. Sangga nosintomupa kami ante ira nosukurumo i Paulus ka Pue Alatala, pade naroomo rarana.

¹⁶Sangga naratapa kami ri ngata Roma i Paulus mana nitarunggu. I'a nipaloga meto'o ri umba-umba nipodotana. Tapi naria samba'a tantara nanggatono i'a ri setu.

¹⁷Nagana tolumbengi nggari setu, i Paulus nompokio totu'a-totu'a nto Yahudi nggari ngata Roma etu. Sangga nasiromupa ira nangulimo i Paulus ka ira etu, “Sampesuwu-sampesuwuku, aku da'a nasala nuapa-nuapa ka sampesuwu-sampesuwuta to Yahudi bara mombaliunaka ada-ada to nitarimata nggari ja'i totu'a-totu'ata nggaolu. Tapi naupa iwetu aku nisoko ri ngata Yerusalem pade niwai riara mpale tau-tau to Roma.

¹⁸Naopu parakaraku e'i niparesa ira, ira nadota mombakabasaka aku, sabana nanotomo da'a ria sala nipowiaku masipato aku rasuku mamate.

¹⁹Tapi tempo tau-tau to Yahudi da'a nasituju ante patuju etu, da'a ria jala ntanina, aku kana mekitangara ri ja'i Magau Roma. Naupa iwetu da'a ria pepangaduku nuapa-nuapa ri ja'i sampesuwu-sampesuwuku tau to Yahudi etu.

²⁰Jadi etu sampe aku nerapi mosintomu ante komi. Aku madota motesa ka komi ewa parakaraku e'i. Kakonona aku e'i nibalanggu sabana aku nomparasaya Magau to Mompakasalama to nisarumaka pura-pura to Israel.”

²¹Nangepe tesa i Paulus etu nesonomo ira, “Kami e'i da'a ria nantarima kamba santa'u sura nggari Bagia Yudea nosinggawela ewa parakara komi etu. Pade da'a wo'u naria tau nggari setu narata nanggeni kareba nosinggawela ante komi bara motesa anu naja'a ewa komi ka kami.

²²Tapi kami e'i madota mangepe tesamu, sabana to ninjani kami, ri umba-umba tau nanjalai pepatuduki to nituki komi etu.”

²³Jadi totu'a-totu'a nto Yahudi etu nompakatantu saeo rakasiromu ira ante i Paulus. Tempo naratamo eo to nipakatantu ira etu, nadeamo tau narata nasiromu ri sapo i Paulus. Pade nggari mpadondo sampe ngguwiana i Paulus nombatarangga ka ira ewa Poparenta nu Alatala. Nipakena isi buku-buku nabi i Musa pade buku-buku nabi-nabi ntanina motarangga ka ira ala manggeni ira momparasaya Yesus Magau to Mompakasalama to nijanji Alatala.

²⁴Naria to nomparasaya nuapa to niuli Paulus, tapi naria wo'u to da'a nomparasaya.

²⁵Kaopuna, nompamula ira nalai nggari setu sabana posisala pombarata ira ewa pepatuduki i Paulus etu. Tapi da'apa ira nalai nangulimo i Paulus ka ira, “Nakono ntoto Tesa nggari ja'i Nosa Nagasa nu Alatala to nipasimbayu nabi Yesaya ka totu'a-totu'ata nggaolu iwe'i:

²⁶‘Kau uli ka tau-tau to Yahudi iwe'i: Komi maoso mangepe, tapi da'a ria ranjani komi batuana. Komi maoso mompariara, tapi da'a ria rakita komi nuapa majadi.

²⁷Etu majadi sabana tau-tau e'i netiwatumo, ira netimbongomo, pade mata ira nipisi iramo. Ane etu da'a nipowia ira, mamala ira manggita nuapa majadi, mamala ira mangepe pade mangginjani batuana, mamala ira mangginjani to nakonona pade manjili ri ja'iku ala Aku mompakabelo ira.’ ” [37]

²⁸Kaopuna niuli i Paulus wo'umo ka ira, “Sampesuwu-sampesuwuku, kana ranjani komi, Kareba Belo e'i to nompakanoto iwenu Alatala mompakasalama manusia, nipatolelemo ka tau-tau da'a to Yahudi. Iramo to mompangala Kareba etu!” [

²⁹Naopu nangepe tesa i Paulus etu, tau-tau to Yahudi nagaro nompalasi peto'o etu ante nosinggarau samba'a bo samba'a.]

³⁰Rompae kasaena i Paulus neto'o ri ngata Roma ri sapo to nisioana mboto. Ri setu nitarimana ante nadamba rarana pura-pura tau to narata ri ja'ina.

³¹Nipatolelena ka ira kareba ewa Poparenta nu Alatala, pade nipatudukina ka ira kareba i Pue Yesus Kristus. Etu pura-pura nipowiana ante da'a ria kakinina. Da'a ria i'a nilawa-lawa ntau.