Read Da'a Kaili SURO-SURO 3 Bible Online

SURO-SURO 3 - Da'a Kaili bible

SURO-SURO 3

¹Naria saeo i Petrus bo Yohanes nalau mpaka ri Sapo Mpepue tinti toluongu kaede nu eo, tempo mposambaya nto Yahudi.

²Ri bobaa bete to nosanga ka Bobaa Naramba naria samba'a langgai to napunggu mami nggari pesuwuna. Eo-eo i'a nikowa mpaka ri bobaa etu ala i'a mamala mantinande palena merapi-rapi ka topoliu nesua nalau mosambaya ri Sapo Mpepue etu.

³Tempo topunggu etu nanggita i Petrus bo Yohanes noliu mesua mpaka ri Sapo Mpepue etu, nitinandena palena nerapi ka ira romba'a nuapa to nariana.

⁴Ira nanggita topunggu etu pade notesamo i Petrus ka i'a, “Kitamo kami!”

⁵Topunggu etu nompenoto ira ante panjarumaka maria nuapa-nuapa rawai ka i'a.

⁶Tapi nanguli i Petrus ka i'a, “Da'a ntoto naria doiku, tapi nuapa to naria ri ja'iku, etumo kuwai ka iko. Ante kuasa Yesus Kristus to Nazaret etu, polumakomo iko!”

⁷Pade i Petrus nanjoko pale nggana topunggu etu, pade nantulungi i'a nekanggore. Kaliu-liu narosomo kada ante wuku lali ntopunggu etu.

⁸I'a kaliu-liu nekanggore pade nompamula nolumako gusa'a guse'i. Naopu etu nesuamo i'a riara Sapo Mpepue mpasanggani-nggani ante i Petrus bo Yohanes. I'a nolumako pade nekawantu-wantu pade nantoiya Alatala.

⁹Pura-pura tau riara Sapo Mpepue etu nanggita i'a nolumako pade nantoiya-toiya Alatala.

¹⁰Pade ninjani ntau i'a e'imo to nabiasa nekatoko ri Bobaa Naramba ri Sapo Mpepue nerapi-rapi ka tau. Nogumaa ante natekaja ira nanggita nuapa to najadi ri ja'i ntopunggu etu.

¹¹Topunggu etu pangane tunggai nantuki i Petrus bo Yohanes. Tempo ira tolumba'a narata ri tambale to niuli Tambale i Salomo, pura-pura tau narata nasiromu ri ja'i ira, apa natekaja ira nanggita topunggu etu nolumakomo.

¹²Tempo i Petrus nanggita tau dea etu notesamo i'a ka ira, “Sampesuwu-sampesuwuku to Israel, nokuya komi nogumaa nanggita anu najadi e'i? Nokuya komi tunggai nanggita kami? Natantu pombarata komi tau e'i nolumako sabana baraka kami mboto, atau sabana kami naroso poagama kami. Tapi etu da'a ntoto nakono!

¹³Etu najadi nggari Alatala to nipesomba totu'ata Abraham, Ishak, bo Yakub. Alatala nombabila pade nompakabete sanga batuana Yesus. Yesus e'i to niwai komi ka tau nakuasa. I'amo to nipoara komi ri ngayo i Pilatus tempo i Pilatus madota manggabasaka I'a.

¹⁴I'a nagasa bo nanoa, tapi komi pura-pura nompoara I'a pade nerapi ala i Pilatus mombakabasaka ka komi samba'a topepatesi.

¹⁵Komi nompatesi I'a, tano I'amo to nombawai katuwu ka manusia pura-pura. Tapi I'a nipakatuwu Alatala bali nggari kamatena. Kajadia etu nikita kami mbotomo!

¹⁶Pade topunggu to nikita pade ninjani komi e'i nipakabelo ante kuasa sanga Yesus. I'a nabelo ntotomo ri ngayo komi ri se'i sabana pomparasaya ka Yesus etu.

¹⁷Sampesuwu-sampesuwu, ninjaniku nuapa to nipowia komi bo topanggeniaka-topanggeniaka komi ka Yesus, etu nipowia komi sabana da'a ninjani komi I'amo Magau to Mompakasalama.

¹⁸Tapi powia komi etu nompakadupa nuapa to niboto Alatala nantuki tesa pura-pura nabina nggaolu, etumo Magau to Mompakasalama kana mombarasai kasusa bo kapari.

¹⁹Jadi sampesuwu-sampesuwu, kajeamo komi nggari pokainggumu to naja'a pade manjili ri ja'i Alatala ala silaka-silaka komi rapakalipona.

²⁰Kawiamo etu ala i Pue Alatala marata mompakasana rara komi pade ala I'a wo'u mompakau Yesus marata ri ja'i komi. Yesus etu to nipakatantu Alatala nggari pamula-mulana majadi Magau to Mompakasalama komi.

²¹I'a kana meto'o ri suruga ntani ruru sampe marata tempona Alatala mompakabou pura-pura dunia e'i ewa to niuli Alatala nantuki tesa nabi-nabina tempo nggaolu.

²²Naria tesa nggari ja'i nabi Musa nggaolu to nombaboto Yesus iwe'i: ‘Pue Alatala kana mangonggotaka ka komi samba'a nggari tatongo sampesuwumu mboto majadi samba'a nabi nasimbayu ewa aku e'i. Komi kana mompangala nuapa pura to raulina ka komi.

²³Isema da'a mompangala nuapa to raulina kana rapatani nggari todea nu Alatala pade rapatesi.’ [9]

²⁴Pura-pura nabi to nompasimbayu tesa nggari ja'i Alatala, nompamula nggari nabi i Samuel nggaolu pade nabi-nabi ntanina to narata nggapuri, ira pura-pura nombaboto nuapa to najadi tempo e'i.

²⁵Komimo to nantarima rasi to nijanji Alatala nantuki tesa nabi-nabi. Riara pojanji to nipowia Alatala ante Abraham totu'ata nggaolu niulina iwe'i: ‘Nggari mulimu banepia pura-pura manusia ri dunia kana mombarata rasi nggari ja'iku.’ [10] Sampesuwu-sampesuwuku, pojanji Alatala etu nawela ante komi wo'u we'i-we'i!

²⁶Etumo sabana Yesus to nipelisi Alatala nipakauna narata ri ja'ita to Yahudi nokolu, ala I'a mombawai rasi ka kita. Rasina etumo mompowia kita pura-pura majea nggari pokainggu to naja'ana.”