Read Da'a Kaili SURO-SURO 4 Bible Online

SURO-SURO 4 - Da'a Kaili bible

SURO-SURO 4

¹Tempo i Petrus bo Yohanes danotesa ka tau dea, naratamo bara sakuya mba'a topanggeni agama, balengga topojaga Sapo Mpepue ante tau-tau to Saduki ri ja'i ira.

²Narau mpu'u ira sabana i Petrus bo Yohanes nompatuduki ka tau dea Yesus natuwu bali nggari kamatena. Pepatuduki etu nompakanoto tomate kana matuwu bali.

³Etu sabana ira nombasoko romba'a suro etu, pade nanjuaraka ira romba'a riara tarunggu. Tapi tempo etu nawengimo, da'apa namala ira ratangara. Jadi i Petrus bo Yohanes nita'amaka ri setu sampe naile mpadondona.

⁴Naupa iwetu tau-tau to nangepe pepatuduki nu suro-suro etu pane'a, nadea to nomparasaya i Pue Yesus. Jadi nantambaimo kadea ntopomparasaya i Pue Yesus sampe nitasere limanjobu mba'ana.

⁵Tonailena topanggeniaka-topanggeniaka agama Yahudi, totu'a-totu'a nto Yahudi ante guru-guru agama nasiromu ri ngata Yerusalem.

⁶Ira nasiromu ante Balengga Topanggeni Agama to nosanga ka i Hanas, nosanggani-nggani ante i Kayafas, Yohanes, Aleksander, bo sampesuwu ntanina Balengga Topanggeni Agama.

⁷Sangga nasiromumo ira, i Petrus bo Yohanes nikeni nantingayo ira pura-pura. Pade nompamulamo ira nomparesa i Petrus bo Yohanes ante nekutana, “Iwenu komi nompakabelo topunggu e'i? Ante baraka nuapa atau ante kuasa isema komi nompakabelo i'a?”

⁸Pade nesonomo i Petrus ante kuasa nggari ja'i Nosa Nagasa nu Alatala, “Uma-uma, topanggeniaka todea pade totu'a-totu'a ngata.

⁹Kami e'i nitangara komi we'i-we'i sabana powia kami nantulungi samba'a topunggu, pade sabana komi madota mangginjani ante baraka nuapa kami namala nompakabelo topunggu e'i.

¹⁰Jadi ala ranjani komi pade pura-pura to Israel wo'u, kami manguli ka komi, tau e'i nipakabelomo pade i'a nekanggore ri ngayo komi pura-pura sabana baraka nggari ja'i Yesus Kristus to Nazaret. Komi nombapaku I'a ri kayu parika sampe I'a namate, tapi Alatala nompakatuwu bali I'a nggari kamatena.

¹¹Yesus etumo to nipatuju ri tesa riara Buku Nagasa to nanguli iwe'i: ‘Watu to nitajiaka ntopowia sapo, watu etumo to najadi palo mpondasi to neliu nggaroso.’ [11]

¹²Aga Yesus etumo to namala mompakasalama manusia, sabana ri njumaongu dunia da'a ria samba'a ntanina to nipakatantu Alatala mompakasalama kita, aga Yesus mboto.”

¹³Tempo topolibu etu nanggita kabia i Petrus bo Yohanes notesa pade nikita ira romba'a suro etu aga tau-tau to naede katuwuna da'a nosikola nalanga, nogumaamo ira pura-pura. Pade nanotomo ka ira romba'a suro etu topomparasaya i Pue Yesus.

¹⁴Topolibu etu madota mombasapuaka kabaraka to nikawia Petrus bo Yohanes, tapi da'a namala sabana topunggu to nipakabelo etu naria nekanggore ri ngayo ira nosanggani-nggani ante i Petrus bo Yohanes.

¹⁵Jadi ira nompakau romba'a suro etu rakeni mpesuwu mpaka ri sawalikuna sampalai, pade ira nosimpekutanamo ira samba'a bo samba'a,

¹⁶“Nuapa rapowiata ka tau romba'a e'i? Nanotomo ka pura-pura tau to neto'o ri ngata Yerusalem sangele kabaraka to nabetena nipowia ira romba'a. Da'a mamala rasaputa kajadia etu.

¹⁷Tapi ala kareba e'i ne'e matolele sampe makawao ri ja'i ntau pura-pura, kamai kita momparangga ira romba'a ala ne'e mana ira motesa ka tau-tau ante sanga Yesus etu.”

¹⁸Naopu etu ira nompokio bali suro romba'a pangane pade niuli ira, “Ne'e mana ntoto komi motesa atau mompatuduki tau ante sanga Yesus!”

¹⁹Tapi nesonomo i Petrus bo Yohanes, “Pakatantu komi mbotomo nuapa to nakonona riara mpanggita Alatala, mantuki parenta komi atau mantuki parenta Alatala.

²⁰Kami e'i da'a namala menonto motesa ewa nuapa to nikita pade niepe kami mboto.”

²¹Naopu etu topolibu etu nomparangga wo'umo romba'a suro etu. Tapi kaopuna nikabasaka iramo. Da'a ntoto nirata ira jala mombasuku i Petrus bo Yohanes, sabana pura-pura tau nantoiya-toiya Alatala nggari kabaraka to nikawia ira etu.

²²Nogumaa mpu'u ira pura-pura sabana tau topunggu to nipakabelo etu, nelabi patampulu mpaemo umuruna.

²³Naopu i Petrus bo Yohanes nikabasaka, nanjilimo ira ri ja'i roa-roa ira. Naratapa ri setu nitesa ira ka roa-roa iramo, tewai-tewai nu balengga-balengga topanggeni agama bo totu'a-totu'a nto Yahudi ri ja'i ira romba'a.

²⁴Sangga niepe roa-roa ira tesa etu, nekakaimo ira pura-pura ka Pue Alatala ante nosaongu rara. Niuli ira, “Pue, Komimo to nompajadi langi bo dunia, bo tasi pade pura-pura isina.

²⁵Ante kuasa nggari ja'i Nosamu batuamu i Daud, totu'a kami nggaolu nombaboto iwe'i: ‘Tau-tau da'a to Yahudi narau. Pade tau-tau to Yahudi nowia nia anu da'a ria gunana.

²⁶Magau-magau ri dunia nasiromu pade pura-pura topanggeniaka ngata nosaongu rara mangewa i Pue bo Magau to Mompakasalama to nipelisina.’ [12]

²⁷O Pue, tesa nggari ja'i Daud e'i mpu'u-mpu'u nipakadupamo. Sabana da'apa nasae ri ngata e'i Magau Herodes pade i Pontius Pilatus nasiromu ante tau-tau da'a to Yahudi pade tau-tau to Yahudi. Patuju ira mangewa i Pue Yesus, Batuamu to Nagasana to nipelisimu majadi Magau to Mompakasalama.

²⁸Ira nosintuwu mompatesi i Pue Yesus. Tapi kakonona to nikawia ira nompakadupa nuapa to nipakatantumu nggari pamulana. Etu pura-pura najadi nantuki kuasa bo dotamu mboto.

²⁹Jadi niperapi kami, Pue, kitamo powia ira nomparangga kami. Rawai ka kami kuasa ala kami mamala motesa ante mabia mompatolele tesamu.

³⁰Popokita kuasamu, Pue, ala kami mamala mompakabelo tau-tau naju'a pade mowia kabaraka bo tandai to nipogumaa ante kuasa i Pue Yesus, Batuamu to nagasana etu.”

³¹Naopu ira nosambaya ka i Pue iwetu, sapo nikasiromu ira etu nogoya, pade ira pura-pura naponu ante Nosa Nagasa nu Alatala. Naopu etu nalaumo ira nompatolele Tesa nu Alatala ante kabia rara.

³²Pura-pura topomparasaya i Pue Yesus etu natuwu nosaongu rara pade nosaongu pekiri. Da'a ria samba'a ri tatongo ira etu nanguli mbara-mbarana anuna mboto. Tapi nuapa pura to naria ante ira, etu nipake ira mpasanggani-nggani.

³³Ante kuasa nabete suro-suro i Pue Yesus etu nompatolele kareba to nanguli Yesus natuwu bali. Pade Alatala nombawai ka ira pura-pura rasi nadea.

³⁴Da'a ria samba'a nggari tatongo ira etu nakura nuapa-nuapa, sabana ira to naria tanana bara sapona, nipobalu ira etu pade oli nu tana bara sapo etu

³⁵nikeni ira ri ja'i nu suro-suro. Doi etu nibagi-bagi suro-suro ka isema-sema to naria paraluuna.

³⁶Iwetu wo'u to nikawia Yusuf samba'a to Lewi nggari Lewuto Siprus. I'a nidae nu suro-suro i Barnabas to naria batuana “to nompakawoe rara ntau.”

³⁷Yusuf etu nompobalu tanana pade doi etu nikeni niwaina ka suro-suro i Pue Yesus.