Read Da'a Kaili SURO-SURO 6 Bible Online

SURO-SURO 6 - Da'a Kaili bible

SURO-SURO 6

¹Nantambai kasaena nantambai kadea ntopomparasaya i Pue Yesus. Tempo etu topomparasaya i Pue Yesus to Yahudi to nompake Basa Yunani nongua ka topomparasaya i Pue Yesus to nobasa Yahudi. Nangulimo ira to nobasa Yunani, “Besi-besi kami to nabaluna da'a nombarata petulungi balanja eo-eo ewa to nipalele ka besi-besi tobalu to nobasa Yahudi.”

²Nangepe etu suro-suro sampulu romba'a etu nompokio pura-pura topomparasaya i Pue Yesus mompasiromu. Pade nangulimo suro-suro ka ira, “Da'a nabelo ane kami menonto mompatolele Tesa nu Alatala ala mompakasiayu panggoni. Agina bago etu rawai ka tau ntanina.

³Jadi sampesuwu-sampesuwu, aginapa komi mompelisi nggari tatongo komi pitumba'a tau to naria sangana nabelo, to naponu ante Nosa Nagasa nu Alatala pade nata'u. Pura-pura bago e'i kana rawai kami ka ira.

⁴Tapi bago kami e'i batena mosambaya pade mompatolele Tesa nu Alatala.”

⁵Sangga nangepe tesa suro-suro etu, nasituju puramo topomparasaya i Pue Yesus ante tesa etu. Jadi nipelisi iramo i Stefanus, samba'a tau to naroso pomparasayana pade to naponu ante Nosa Nagasa nu Alatala. Pade nipelisi ira wo'u i Filipus, pade i Prokhorus, i Nikanor, i Timon, i Parmenas, pade i Nikolaus samba'a tau nggari ngata Antiokhia. I'a da'a tau to Yahudi, aga i'a nesuamo agama Yahudi.

⁶Pitumba'a tau etu nikeni ka suro-suro. Naopu etu suro-suro nosambaya pade nombadika pale ri balengga ira ala mangonggotaka ira majadi topantulungi suro-suro.

⁷Ante jala iwetu Tesa nu Alatala natolele pade topomparasaya i Pue Yesus ri ngata Yerusalem tunggai nantambai kadeana. Pade nadea wo'u balengga topanggeni agama Yahudi najadi topomparasaya i Pue Yesus.

⁸Stefanus mpu'u-mpu'u niwai Alatala ka towe belo. Pade naria kuasa Alatala ri ja'ina sampe i'a namala nanggawia nadea kabaraka bo tandai to nipogumaa ri tatongo ntau dea.

⁹Tapi naria wo'u tau-tau nangewa i'a. Ira etu to Yahudi to nodade ri sapo mpodade to niuli Sapo Mpodade Batua to Nikabasaka. Ira tau to Yahudi nggari ngata Kirene bo ngata Aleksandria, pade nggari Propinsi Kilikia bo Propinsi Asia. Ira nosibali ante i Stefanus.

¹⁰Tapi ira da'a namala nombabali nuapa to nitesa i Stefanus, sabana Nosa Nagasa nu Alatala nombawai ka i'a kapande notesa.

¹¹Jadi ira nombasogo bara sakuya mba'a tau ala ira motesa, “Kami nangepe tau etu nompakakedi i Musa ante Alatala.”

¹²Iwetumo ira nompakapane rara ntau dea ante totu'a-totu'a nto Yahudi bo guru-guru agama. Naopu etu nalaumo ira nombasoko i Stefanus, pade i'a nikeni ira ratangara ri ngayo Polibu Bete Agama Yahudi.

¹³Nikeni ira wo'u sabi-sabi ri ngayo Polibu Bete etu nombatesa jarita to da'a nakonona ewa i Stefanus. Sabi-sabi etu nanguli, “Tau e'i bate-batena nanguli sinja'i Sapo Mpepue to Nagasana bo Atura-atura agama to nipapola i Musa ka kita.

¹⁴Kami nangepe i'a notesa Yesus tau nggari ngata Nazaret etu kana mombagero Sapo Mpepue e'i pade mombabali pura-pura ada to nipasumuli i Musa ka kita.”

¹⁵Pura-pura tau to naria riara Polibu Bete Agama etu nompenoto Stefanus. Pade tempo etu ira nanggita lenje i Stefanus nasimbayu ewa lenje samba'a malaeka.