Read Da'a Kaili SURO-SURO 8 Bible Online

SURO-SURO 8 - Da'a Kaili bible

SURO-SURO 8

¹Tempo i Stefanus nipatesi nasituju wo'u i Saulus. Naopu etu tau-tau to naeka ri ja'i Alatala nombatana i Stefanus ri dayo. Ante nasusa mpu'u rara ira nombatangi i'a. Nompamula eo etu wo'u topomparasaya i Pue Yesus ri ngata Yerusalem mpu'u-mpu'u nipandasa to Yahudi sampe ira nagaro nosimpotatare mpaka ri umba-umba ri tana Yudea ante Samaria. Aga suro-suro i Pue Yesus da'a.

³Tapi i Saulus nompasimbuku mompakaropu topomparasaya i Pue Yesus etu. Butu-butu sapo ira nipesuana pade isema-sema to nomparasaya i Pue Yesus, nabeloka langgai nabeloka besi, niumbunjaina ri sawalikuna pade nisuarakana riara tarunggu.

⁴Topomparasaya i Pue Yesus to nagaro nosimpotatare etu nompatolele kareba i Pue Yesus mpaka ri umba-umba.

⁵Samba'a nggari ja'i ira nosanga ka i Filipus. I'a nalau ri ngata Samaria pade nipatolelena ka tau-tau ri setu tesa Magau to Mompakasalama to nijanji Alatala.

⁶Nadea tau to nipesua seta nipakabelona. Seta-seta etu nesuwu ante nongare-ngare. Pade nadea tau napunggu pade tau nakejo wo'u nipakabelona. Tempo tau-tau nangepe tesa i Filipus pade nanggita kabaraka-kabaraka to nikawiana, ira ante nosaongu rara nompariara nta'i pade nantarima nuapa to nitesa i Filipus.

⁸Jadi nadamba mpu'umo rara tau-tau ri ngata Samaria etu.

⁹Riara ngata etu naria samba'a sando nosanga ka i Simon. Bara sakuya kasaena i'a nompowia tau-tau ri ngata Samaria natekaja ante panggawiana. Pade i'a nanguli ka tau i'a samba'a tau nabaraka.

¹⁰Pura-pura tau riara ngata etu, nabeloka totu'a-totu'a nabeloka ngana-ngana, nompariara nta'i tesana. Ira nanguli, “Tau e'imo naria kuasa nggari ja'i Alatala to niuli Kuasa Bete!”

¹¹Ira pura-pura nantuki i'a apa nasaemo i'a nipogumaa ira sabana nggari kasandona etu.

¹²Tapi we'i-we'i niparasaya iramo tesa i Filipus to nompatolele ka ira Kareba Belo ewa Poparenta nu Alatala pade wo'u ewa Yesus Kristus, Magau to Mompakasalama to nijanji Alatala. Naopu ira nomparasaya, ira nidiu ewa tandaina ira topomparasaya i Pue Yesus, nabeloka langgai nabeloka besi.

¹³Simon mboto wo'u nomparasayamo, pade naopu i'a nidiu nalaumo i'a mpasanggani-nggani ante i Filipus. Nogumaa mpu'u i'a nanggita kabaraka-kabaraka ante tandai-tandai to nipogumaa to nikawia i Filipus.

¹⁴Suro-suro ri ngata Yerusalem nangepe kareba tau-tau ri ngata Samaria nantarima Tesa nu Alatala. Jadi ira nompakau i Petrus bo Yohanes mpaka gusa'a.

¹⁵Tempo ira romba'a narata ri setu, ira nosambaya ka tau-tau to Samaria etu ala ira rapesua Nosa Nagasa nu Alatala.

¹⁶Nikawia ira iwetu sabana Nosa Nagasa nu Alatala da'apa nana'u nesua ri ja'i to Samaria to nomparasaya. Ira aga nidiu ante nanguli sanga i Pue Yesus.

¹⁷Pade i Petrus bo Yohanes nombadika pale ira ri balengga tau-tau to Samaria etu, pade ira nipesua Nosa Nagasa nu Alatala.

¹⁸Nikita i Simon Nosa Nagasa nu Alatala nesua ri ja'i ntau tempo suro-suro nombadika pale ri balengga ira. Jadi nikenina doi ka i Petrus bo Yohanes madota mangoli baraka etu.

¹⁹Niulina, “Wai ka aku wo'u sanu baraka komi etu ala ane aku wo'u mombadika paleku ri balengga ntau ira wo'u mamala rapesua Nosa Nagasa nu Alatala.”

²⁰Tapi nesonomo i Petrus, “Masurukawu mpu'u iko ante doimu sabana nipekirimu baraka to niwai Alatala mamala raoli ante doi!

²¹Iko da'a ntoto masipato metuki riara panggawia kami e'i, sabana raramu da'a nanoa ri ja'i Alatala.

²²Ninjaniku iko etu naponu ante siriati raramu pade iko nipobatua to naja'ana! Sabana etu kabasakamo patujumu to naja'ana etu, pade perapimo ka i Pue, ala I'a mombaampungi pompekirimu to naja'ana etu.”

²⁴Pade nanguli i Simon, “Ai! Tulungi posambaya komi ka aku, perapi ka i Pue ala ne'e maria sangaya to niuli komi etu madupa ri ja'iku.”

²⁵Sangga naopu Petrus bo Yohanes notesa nompakanoto ka tau isema Yesus pade nompatolele tesa i Pue ka ira, nanjilimo ira mpaka ri ngata Yerusalem. Pade riara mpolumako etu ira nompatolele Kareba Belo ri nadea ngata nto Samaria.

²⁶Pade naria samba'a malaeka narata nanguli ka i Filipus, “Kalaumo iko ri sabingga puluna ri poga'a jala motua nggari ngata Yerusalem mpaka ri ngata Gaza.” Jala etu nakalinoa.

²⁷Jadi nalaumo i Filipus. Tempona etu naria samba'a tau Etiopia nanjili nggari ngata Yerusalem. I'a samba'a pangga bete nipakakuasa nombaurusi mbara-mbara Magau Besi Etiopia. Magau Besi etu nosanga ka i Kandake. Pangga bete etu dariara mpolumakona natingguli nombasomba Alatala nggari ngata Yerusalem. Tempo dokana nolumako i'a nekatoko nombabasa buku nabi Yesaya.

²⁹Pade nangulimo Nosa Nagasa ka i Filipus, “Kau polumako iko mompakamosu doka ntau etu.”

³⁰Jadi nangowamo i Filipus nompakamosu doka ntau etu. Niepena tau etu nombabasa buku nabi Yesaya. Pade nipekutanana i'a, “Tua, ninjani komi batuana nuapa nibasa komi etu?”

³¹Nesonomo tau etu, “Iwenu aku mangginjani ane da'a ria tau mompakanoto batuana ka aku? Kamai pesawimo ri doka e'i, pekatokomo ri sinjoriku se'i.”

³²Iwe'imo tesa-tesa to nibasa ntau etu, “I'a ewa bimba niumbu rakeni rasambale, ewa saongu ana bimba da'a nombee ane wuluna ragari. Iwetu wo'u I'a da'a ntoto notesa, nau aga sambela.

³³I'a nisalai pade I'a nitangara ante da'a naria kakonona. Da'a ria mulina to mamala ratutura ntau, sabana I'a nipatesi, mana ria ri dunia e'i.” [21]

³⁴Nangulimo pangga bete etu ka i Filipus, “Ane mamala, uli ka aku isema ntoto kakonona to niuli nabi Yesaya e'i tempo i'a notesaka tau nirapaka ewa bimba, korona mboto bara tau ntanina?”

³⁵Pade i Filipus nombatarangga etu ka i'a. I'a nompamula nggari tesa-tesa to nibasa pangga bete etu pade nipasimbayuna ka i'a Kareba Belo i Pue Yesus.

³⁶Riara mpolumako etu naratamo ira ri saongu peto'o to naria ue. Nanguli pangga bete etu, “Kitamo! Etu naria ue. Mamala aku radiu komi we'i-we'i?” [

³⁷Nesonomo i Filipus, “Ane komi nomparasaya ante rara mpu'u-mpu'u, komi mamala radiu.” Nangulimo pangga bete Etiopia etu, “Aku nomparasaya Yesus etu Ana nu Alatala!”]

³⁸Naopu etu nipakauna nompopeta'a dokana. Pade nana'umo ira romba'a nggari doka pade nalaumo ira riara ue. Pade pangga bete etu nidiu i Filipusmo ewa tandaina i'a topomparasaya i Pue Yesus.

³⁹Tempo ira nesore nggariara ue, Nosa Nagasa nu Alatala nangala i Filipus nggari setu. I'a da'a mana nikita pangga bete nggari Etiopia etu. Pade ante nadamba mpu'u rarana pangga bete etu nompapola polumakona.

⁴⁰Ante da'a ninjani-njani i Filipus, nariamo i'a ri ngata Asdod. Pade napolamo i'a nompatolele Kareba Belo ka tau-tau ri pura-pura ngata sampe i'a narata ri ngata Kaisarea.