Read Da'a Kaili SURO-SURO 9 Bible Online

SURO-SURO 9 - Da'a Kaili bible

SURO-SURO 9

¹Ri tempo etu wo'u i Saulus bate-batena nadota mompararai pade mompatesi topomparasaya-topomparasaya i Pue Yesus. Nalaumo i'a ri ja'i Balengga Topanggeni Agama Yahudi,

²pade nerapi sura kuasa rakenina ka topanggeniaka-topanggeniaka sapo-sapo mpodade nto Yahudi ri ngata Damsyik. Patujuna ane raposintomuna ri setu ngina tau-tau to nantuki Pepatuduki Yesus, rasokona tau-tau etu rakenina ira mpaka ri ngata Yerusalem ala ratangara, nabeloka langgai nabeloka besi.

³Riara mpolumakona mpaka ri ngata Damsyik tempo namosumo i'a ri ngata, sampegoli naria saongu reme newanta nggari langi nantatiku i'a.

⁴Nadunggamo i'a pade niepena suara nanguli ka i'a, “Saulus, Saulus! Nuapa sabana iko nompandasa Aku?”

⁵Nekutanamo i Saulus, “Isema Komi, Pue?” Nesonomo suara etu, “Akumo Yesus to nipandasamu.

⁶We'i-we'i pekanggoremo iko pesuamo riara ngata e'i. Ri setu pade rauli ka iko nuapa masipato mupowia.”

⁷Tau-tau to nosanggani ante Saulus etu, natekaja mpu'u ira sampe da'a nasowa notesa, sabana ira wo'u nangepe suara etu, tapi da'a nikita ira tau topotesa etu.

⁸Naopu etu nekanggoremo i Saulus, niboarakana matana, tapi matana mana nanoto nanggita nuapa-nuapa. Jadi i'a damo ninini roana nesua ri ngata Damsyik.

⁹Tolumbengi kasaena i'a da'a namala nekita pade i'a da'a nanggoni bara nanginu nuapa-nuapa.

¹⁰Ri ngata Damsyik naria samba'a topomparasaya i Pue Yesus to nosanga ka Ananias. Riara saongu panggitana i Pue notesa ka i'a. Niuli i Pue, “Ananias!” Nesono Ananias, “Iyo, e'imo aku, Pue.”

¹¹Notesamo Pue, “Kalaumo we'i-we'i mpaka ri sapo Yudas ri jala to nosanga ka Jala Nanoa. Elomo ri setu samba'a tau nggari ngata Tarsus to nosanga ka i Saulus. We'i-we'i i'a nosambaya

¹²pade riara panggitana nikitana iko narata ri ja'ina nombadika palemu ri balenggana ala i'a mamala mekita bali.”

¹³Nesonomo Ananias, “Pue, nadea tesa niepeku nggari ja'i ntau nantesa Saulus etu. Niuli ira nadea mpu'u topomparasaya i Pue ri ngata Yerusalem nipandasana.

¹⁴Pade we'i-we'i i'a nomai ri se'i ante kuasa nggari ja'i balengga-balengga topanggeni agama Yahudi ala manjoko pura-pura tau nomparasaya Komi, Pue.”

¹⁵Tapi nangulimo i Pue, “Iko kana malau! Sabana i'a nipelisiku malau mompatolele sangaku ka tau-tau da'a to Yahudi, ka magau-magau pade ka tau-tau Yahudi wo'u.

¹⁶Damo Aku mboto ngina mompakanoto ka i'a kasusa to raratana sabana i'a mantuki Aku.”

¹⁷Jadi nalaumo Ananias mpaka ri sapo i Yudas ri Jala Nanoa etu. Pade nesuamo i'a nombadika palena ri balengga i Saulus, pade niulina, “Sampesuwuku, Saulus. Pue Yesus to nikitamu ri tatongo jala tempo komi mpaka wemai, nompakau aku marata ri se'i ala komi mamala mekita bali pade rapesua Nosa Nagasa nu Alatala.”

¹⁸Kaliu-liu ewa ruke nu bau nanawu nggari mata i Saulus sampe namala i'a nekita bali. Naopu etu nembangumo i Saulus pade i'a nidiu ewa tandaina i'a topomparasaya i Pue Yesus.

¹⁹Naopu nidiu nanggonimo i'a pade naroso bali wukuna. Naopu etu i Saulus neto'o ante topomparasaya-topomparasaya i Pue Yesus ri ngata Damsyik bara sakuya mbengi kasaena.

²⁰Tempo etu wo'u, i'a kaliu-liu nalau ri sapo-sapo mpodade ri Damsyik nompatolele kareba ka tau-tau to Yahudi to nanguli, “Yesus, I'amo Ana nu Alatala!”

²¹Nogumaa puramo tau nangepe i Saulus. Ira nanguli, “Iwenu sanga tau e'i? I'amo tau to nompatesi tau-tau nomparasaya Yesus ri ngata Yerusalem bopia. Tantu i'a wo'u narata wemai ante patujuna mombasoko ira to nomparasaya Yesus ri se'i pade manggeni ira ratangara ri ja'i balengga-balengga topanggeni agama Yahudi!”

²²Tapi nantambai eona nantambaimo kuasa i Saulus nompatolele kareba i Pue Yesus. I'a mpu'u-mpu'u nompakanoto ka tau-tau to Yahudi ri ngata Damsyik Yesus Magau to Mompakasalama to nijanji Alatala, sampe mana namala ira mombabali tesana.

²³Naliu bara sakuya mbengi nggari setu, nasiromumo tau-tau to Yahudi nosintuwu mompatesi i Saulus.

²⁴Eo wengi ira nanggatono bobaa tembo ri ngata etu ala ane Saulus mesuwu i'a mamala rapatesi ira. Tapi nia ira etu ninjani i Saulusmo.

²⁵Jadi naria sambengi topantuki-topantuki i Saulus nombarata akala ala i'a mamala malai nggari ja'i ntau to madota mompatesi i'a. Saulus niala nidika ira riara karanji lauro, pade niulunjaka ira nggari bunggu nu tembo ngata etu mpaka ri sawalikuna.

²⁶Nggari setu nalaumo i Saulus mpaka ri ngata Yerusalem. Ri setu i'a nompasimbuku nompasanggani ante topomparasaya-topomparasaya i Pue Yesus. Tapi naeka ira nanggita i Saulus. Da'apa niparasaya ira i'a etu mpu'u-mpu'u topomparasaya i Pue Yesus.

²⁷Tapi i Barnabas nalau nomporoa i Saulus pade nanggeni i'a ri ja'i suro-suro i Pue Yesus. Nitesana ka ira iwenu i Saulus nanggita i Pue Yesus ri tatongo jala, pade iwenu i Pue notesa ka i'a. Nitesana wo'u ka ira iwenu i Saulus notesa ante kabiana nompatolele Kareba i Pue Yesus ka tau-tau ri ngata Damsyik.

²⁸Nangepe tesa etu, suro-suro nantarima i Saulus neto'o mpasanggani-nggani ante ira. Pade nalaumo Saulus ri umba-umba ri ngata Yerusalem nompatolele Kareba i Pue Yesus ante kabiana.

²⁹I'a wo'u notesa bo nosisono ka tau-tau to Yahudi to nobasa Yunani. Tapi ira etu nompasimbuku mompatesi i'a.

³⁰Tempo topomparasaya nangginjani etu ira nanggeni i Saulus notua mpaka ri ngata Kaisarea pade i'a nipakau ira nanjili mpaka ri ngata Tarsus, ngatana mboto.

³¹Jadi topomparasaya i Pue Yesus ri njumaongu Bagia Yudea, Galilea pade Samaria mana nipandasa. Nantambai eona nantambai kadea ntau to nomparasaya i Pue Yesus, pade nantambai karoso pomparasaya ira. Etu najadi sabana ira nekou ri ja'i Pue pade nggari petulungi Nosa Nagasa ka ira.

³²Tempo etu i Petrus nalau ri umba-umba nanggita topomparasaya i Pue Yesus. Naria sanggani i'a nesai ri ngata Lida.

³³Ri setu i'a nosintomu ante samba'a langgai nosanga ka Eneas. Walumpaemo kasaena i'a napunggu, pade mana ntoto namala nembangu nggari paturuna.

³⁴Nangulimo i Petrus ka i'a, “Eneas, Yesus Kristus mompakabelo iko. Pembangumo, pasiayumo ompa paturumu e'i.” Kaliu-liu nabelomo Eneas pade nembangumo i'a.

³⁵Pura-pura tau to neto'o ri ngata Lida bo Bagia Saron nanggita Eneas nabelomo. Pade ira pura-pura nomparasaya i Pue Yesus.

³⁶Ri ngata Yope naria samba'a besi to nomparasaya i Pue Yesus, sangana i Tabita. Ante Basa Yunani sangana i Dorkas, batuana “rusa.” Pokaingguna nabelo pura, pade i'a tunggai nantulungi tau-tau napakasi katuwuna.

³⁷Tempo etu naju'amo i'a sampe namate. Sangga watabakuna naopu nidiu i'a nikeni niboli riara ntombi kalangana.

³⁸Ngata Yope da'a nakawaoka nggari ngata Lida. Etu sampe topomparasaya i Pue Yesus ri ngata Yope nangepe i Petrus naria ri ngata Lida. Jadi ira nompakau romba'a tau nalau ri ja'i Petrus ante nitewai iwe'i: “Kamai masalisa mpaka ri ngata Yope.”

³⁹Sangga nangepe tesa ntau romba'a etu, nalaumo i Petrus nantuki ira mpaka ri ngata Yope. Narata ri setu i'a nikeni mpaka ri tombi kalangana etu. Pura-pura tobalu besi notumangi nantaguni i Petrus ante nompopokita ka i'a baju-baju pade pakea to nijau i Tabita ka ira tempo i'a danatuwu.

⁴⁰Naopu etu i Petrus nompakau ira pura-pura nesuwu, pade notimbakotumo i'a nosambaya. Naopu etu i'a nantingayo watabaku i Tabita pade niulina, “Tabita, pembangumo!” Tabita nombaboaraka matana pade tempo i'a nanggita i Petrus nembangumo i'a pade nekatoko.

⁴¹Pade i Petrus nanjoko palena nantulungi i'a nekanggore. Naopu etu i Petrus nompokio topomparasaya ri setu nosanggani-nggani ante tobalu-tobalu besi pane'a, pade nipopokitana ka ira i Tabita natuwu bali.

⁴²Kareba ewa kajadia etu natolele ri njumaongu ngata Yope, sampe nadea mpu'u tau nomparasaya i Pue Yesus.

⁴³Petrus neto'o ri ngata Yope etu bara sakuya mbengipa ri sapo samba'a tau topokarajaa kulimba to nosanga ka i Simon.