Read Da'a Kaili ROMA 1 Bible Online

ROMA 1 - Da'a Kaili bible

ROMA 1

¹Sura e'i nggari ja'iku Paulus, batua Yesus Kristus, ka komi topomparasaya i Pue Yesus ri ngata Roma to nipotowe Alatala bo nipokiona majadi todeana. Aku nipelisi bo nisuro manggeni Kareba Belo nggari ja'i Alatala

²to nijanjina nggaolu nantuki tesa nggari nabi-nabi to nitulisi riara Buku Nagasa.

³Kareba Belo etu nantesa Ana nu Alatala, etumo Pueta Yesus Kristus. Ewa manusia I'a muli Magau Daud. Tapi I'a wo'u Ana nu Alatala. Etu nipakanoto Alatala ante kuasa Nosa Nagasana tempo I'a nompakatuwu bali Yesus nggari kamatena.

⁵Nggari ja'i Yesus wo'u kami nantarima rasi Alatala, etumo najadi surona, ala kami mamala manggeni tau nggari pura-pura ngata momparasaya bo mekou ri ja'i Pue Yesus ala sangana rabila bo ratoiya.

⁶Pade komi ri ngata Roma wo'u nesua todea to nipokio Alatala majadi bagia Yesus Kristus.

⁷Perapi Umata Pue Alatala bo i Pue Yesus Kristus mombagane komi bo mombawai katuwua mabelo ka komi.

⁸Pamula-mulana aku nosukuru ri ja'i Pue Alatalaku riara sanga Yesus Kristus sabana katuwu komi pura-pura. Sabana kareba to nantesa pomparasaya komi natolele ri umba-umba ri dunia.

⁹Aku tunggai nanggeni komi riara posambayaku. Alatala mboto namala mantakono tesaku e'i. I'amo Alatala to nitulungiku ante mpu'u-mpu'u raraku ante nanggeni Kareba Belo to nantesa Anana.

¹⁰Aku batena merapi ka Alatala ane rapodotana we'i-we'i aku mamala momai mantalioda komi.

¹¹Sabana naino mpu'u raraku mantalioda komi ala aku mamala mompalele ka komi pompakule nggari ja'i Nosa Nagasa nu Alatala sampe pomparasaya komi rapakaroso.

¹²To nipatujuku ala kita mpasanggani-nggani mamala mosipakaroso rara nggari pomparasayata samba'a bo samba'a.

¹³Sampesuwu-sampesuwu, to nipodotaku ala ranjani komi nadea ngganimo aku nonia momai mantalioda komi tapi sampe we'i-we'i bate-batena naria to nombalawa aku. Patujuku momai mantalioda komi ala maria asele nu bagoku ri tatongo komi nasimbayu ewa to najadi ri tatongo tau-tau da'a to Yahudi ntanina.

¹⁴Sabana aku masipato mantulungi pura-pura tau, nabeloka tau nangginjani ada, nabeloka tau da'a nangginjani ada, nabeloka tau nosikola, nabeloka tau da'a nosikola.

¹⁵Etu sampe aku mpu'u-mpu'u madota mompatolele Kareba Belo ka komi wo'u to neto'o ri ngata Roma.

¹⁶Da'a naeya mataku mompatolele Kareba Belo, sabana riara kareba etu naria kuasa Alatala to mompakasalama butu mba'a topomparasaya; pamula-mulana tau to Yahudi pade tau-tau da'a to Yahudi wo'u.

¹⁷Sabana riara Kareba Belo nipakanoto iwenu kita majadi manoa riara mpanggita Alatala, etumo ante momparasaya nggari pamulana sampe kaopuna. Etu nasimbayu ewa tesa to nitulisi riara Buku Nagasa iwe'i: “Tau to najadi nanoa riara mpanggita Alatala ante nomparasaya, i'amo to matuwu mabelo sampe ri kasae-saena.” [1]

¹⁸Nggari suruga Alatala nompopokita rau rarana ka pura-pura tau to nanjapuaka I'a bo nompowia kaja'ana. Powia ira to naja'a etu nombalawa tau mangginjani pepatuduki to nakonona ewa Alatala.

¹⁹Manusia masipato mawela rau rara nu Alatala sabana nanotomo ka ira nuapa to namala ranjani ira ewa Alatala. Etu nipakanoto Alatala mboto ka ira.

²⁰Sabana nompamula nggari tempo dunia nipajadi sampe we'i-we'i, nanotomo ka ira anu da'a natekita nggari ja'ina, etumo kuasana to da'a ria kaopu-opuna bo ingguna ewa Alatala. Etu nanotomo ka ira nggari pura-pura nuapa to nipajadina sampe da'a ria to namala manguli, “Da'a ninjani kami!”

²¹Sabana naupa ira nangginjani Alatala, ira da'a nombabila I'a ewa Alatala, pade ira da'a wo'u nosukuru ri ja'ina. Tapi ira aga nompekiri anu da'a ria gunana bo rara nta'i ira najadi narumau.

²²Ira nompangaku korona tau nanoto, tapi kakonona ira najadi todoyo.

²³Ira da'a nepue ka Alatala to da'a ria namate to neliu nggakuasa bo nagaya. Tapi ira aga nepue ka parantau-parantau nolenje mpomanusia, mpotonji, mpobinata to nokada patanggada bo binata to nekanjoyo to namala namate.

²⁴Sabana etu Alatala nompakamba ira nantuki dota rara ira mboto nowia kaja'ana, sampe ira nompakatantoru koro ira samba'a bo samba'a.

²⁵Ira nanjambei pepatuduki ewa Alatala to nakonona ante pepatuduki to nasala. Da'a Topolemo to nibila bo nipesomba ira, tapi aga to nipajadina. Kakonona Topolemo etumo to masipato ratoiya sampe ri kasae-saena. Amin!

²⁶Sabana etu Alatala nompakamba ira nantuki dota rara ira to naja'a to nompakaeya. Besi-besi mana nompokono langgai ewa to nabiasa najadi ri ja'i manusia, tapi nompokono simbau ira besi.

²⁷Iwetu wo'u langgai mana madota mosampaturu ante rongo ira mboto ewa to masipatona, tapi nariapa dota ira mogau sala ka ira simbau langgai. Ira nowia pokainggu to nompakaeya ira simbau langgai sampe kaopuna ira nawela balasi riara koro ira mboto to masipato ante powia ira to nasala.

²⁸Ira nompekiri da'a ria gunana mosinjani ante Alatala. Jadi etu sampe Alatala nompakamba pekiri ira najadi nagero sampe ira nompowia anu da'a masipato rapowia.

²⁹Jonjona: rara nta'i ira naponu ante mpengele-ngele inggu to naja'a bo nadenggo. Ira da'a nabasa ante nuapa to naria ri ja'i ira, nawau rara ira, ira nasiriati, ira nadota mepatesi bo mosinggarau bo mebagiu. Ira nomboli rau, ira tunggai nantesa roa ira nggalino

³⁰bo nompakaja'a sanga tau ntanina. Ira nomporau rara Alatala, ira nalanga rara bo nabiasa nangoa. Ira nata'u nangelo akala mowia kaja'ana bo ira da'a nekou ri ja'i ntotu'ana.

³¹Ira nadoyo, ira da'a namala raparasaya, da'a ria towe ira bo da'a ria asi mata ira nanggita sanggamanusiana.

³²Ninjani ira mamimo parenta nu Alatala to nanguli tau-tau to noinggu iwetu masipato rasuku sampe mamate. Tapi naupa iwetu kana nikawia ira wo'u pokainggu etu, pade da'a aga etu, ira nasituju wo'u ane tau ntanina nowia iwetu.