Read Da'a Kaili ROMA 10 Bible Online

ROMA 10 - Da'a Kaili bible

ROMA 10

¹Sampesuwu-sampesuwu, dota raraku bo posambayaku ka Alatala ala tau-tau to Israel mamala rapakasalama.

²Ninjanikumo ira mpu'u-mpu'u naraji mepue ka Alatala, tapi da'a ninjani ira jala to nakono mepue ka I'a.

³Da'a nitarima ira jala to nipakasadia Alatala ka manusia ala majadi manoa riara mpanggitana. Ira da'a natutu nantuki jala etu sabana ira aga nompasimbuku mompakanoa koro ira mboto riara mpanggita Alatala ante nantuki Atura-atura agama to nipapola i Musa.

⁴Tapi ante karata Yesus Kristus, Atura-atura agama mana nalaku pade we'i-we'i isema-sema momparasaya i Pue Yesus kana rareke manoa riara mpanggita Alatala.

⁵Naria tesa to nitulisi nabi i Musa ewa jala majadi manoa riara mpanggita Alatala ante mantuki Atura-atura agama. Niulina iwe'i: “Isema-sema to nantuki pura-pura atura agama, ira kana mombarata katuwua mabelo.” [28]

⁶Tapi naria tesa ntanina riara Buku Nagasa ewa jala majadi manoa riara mpanggita Alatala ante momparasaya. Iwe'imo tesa etu: “Ne'e mompekiri riara nta'imu iwe'i: Isema mamala meore mpaka ri suruga? Isema mamala mana'u ri dunia ntomate?” [29] Da'a paraluu kita meore mpaka ri suruga mangelo Kristus, sabana naratamo I'a ri ja'ita ri dunia. Pade da'a paraluu kita mana'u mpaka ri dunia ntomate manggeni Kristus nggari setu, sabana natuwu balimo I'a nggari kamatena. Kakonona majadi manoa riara mpanggita Alatala ante momparasaya da'a sangele to nakaja.

⁸Tapi iwe'imo to nitesa riara Buku Nagasa: “Namosumo Tesa i Pue ante komi, naria ri sumbamu bo naria wo'u riara nta'imu.” [30] Etumo tesa to nipatolele kami to nanggeni tau momparasaya.

⁹Jadi ane komi mompangaku ante sumbamu, “Yesus I'amo Pueku,” pade ane komi momparasaya riara nta'imu Alatala nompakatuwu bali I'a nggari kamatena, komi kana rapakasalama.

¹⁰Sabana kita momparasaya riara nta'ita sampe majadi manoa riara mpanggita Alatala, pade kita mompangaku ante sumbata sampe rapakasalama.

¹¹Riara Buku Nagasa naria nitulisi iwe'i: “Isema-sema to momparasaya I'a da'a rapakaeya.” [31]

¹²Tesa-tesa e'i nosinggawela ka pura-pura tau sabana da'a ria posisalana ri olo ntau to Yahudi bo tau da'a to Yahudi. Aga samba'a lau Pue, pade I'a Pue ntau pura-pura. I'a nombawai rasi to neliu-liuna ka pura-pura tau to nekakai ka I'a.

¹³Sabana “Isema-sema to mekakai ka i Pue kana rapakasalama.” [32]

¹⁴Tapi iwenumo tau mekakai ka i Pue ane ira da'apa nomparasaya I'a? Pade iwenu ira momparasaya i Pue ane ira da'apa nangepe karebana? Pade iwenu ira mangepe karebana ane da'apa ria tau nompatolele kareba etu ka ira?

¹⁵Pade iwenu tau mompatolele Kareba Belo ane da'apa ria to nombasuro ira manggeni kareba etu? Ewa to nitulisi riara Buku Nagasa iwe'i: “Nabelo mpu'u karata ntau to nanggeni Kareba Belo.” [33]

¹⁶Nariamo tau nanggeni Kareba Belo. Tapi da'a pura-pura tau nantarima Kareba etu. Naria tesa nabi Yesaya nggaolu ewa etu to nanguli iwe'i: “Pue, da'a nadea tau nomparasaya tesa to nikeni kami!” [34]

¹⁷Jadi tau namala momparasaya ane ira mangepe Kareba Belo, pade Kareba Belo etumo tesa ewa Kristus.

¹⁸Tapi aku nekutana, “Iwenu? Tau to Israel da'apa nangepe Kareba Belo?” Natantu niepe iramo, sabana naria nitulisi riara Buku Nagasa iwe'i: “Tesa to niuli ira natolele sampe ri njumaongu dunia. Kareba to nikeni ira natolele sampe ri umba-umba ri dunia.” [35]

¹⁹Tapi sangganipa kupekutana, “Tau to Israel da'apa nangginjani batuana Kareba etu?” Natantu ninjani iramo. Sabana nokolu naria tesa Alatala ewa to Israel to nipasimbayu i Musa iwe'i: “Aku kana mompowia komi majadi masiriati tempo komi manggita toweku ri ja'i tau-tau da'a to Yahudi to nireke komi da'a todeaku. Komi kana maju'a rara manggita asi mataku ri ja'i tau-tau to nireke komi tau nabodo to da'a nangginjani Alatala.” [36]

²⁰Pade ri purina nabi Yesaya ante nabia nompasimbayu tesa Alatala ewa tau-tau da'a to Yahudi iwe'i: “Tau-tau to da'a nompasimbuku mangelo Aku, iramo to nosirata ante Aku. Pade tau-tau to da'a nekakai ka Aku, iramo to nanggita Aku.” [37]

²¹Tapi iwe'imo tesa Alatala ewa tau-tau to Israel: “Njineo ntua Aku nangojo paleku madota mantarima ira, tapi ira da'a madota mekou ri ja'iku. Ira aga nompakako'o rara.” [38]