Read Da'a Kaili ROMA 11 Bible Online

ROMA 11 - Da'a Kaili bible

ROMA 11

¹Jadi aku nekutana, “Alatala nompoara todeana to Israel?” Natantumo etu da'a ntoto nakono! Sabana aku mboto tau to Israel, muli Abraham to nipomuli i Benyamin.

²Alatala da'a ntoto nompoara todeana to nipelisina nggari lamba pamulana. Tantu ninjani komi mbotomo tesa nggari Buku Nagasa ewa nabi Elia. I'a nompangadu to Israel ri ngayo Alatala iwe'i:

³“Pue, nabi-nabimu nipatesi ira, bo peto'o pesomba ka Pue nigero iramo. Damo njamba'aku e'i topomparasaya to nabolina, pade ira nompasimbuku mompatesi aku.” [39]

⁴Tapi nuapa to niuli Pue ka i'a? Niulina, “Danaria pitunjobu mba'apa to niboliku najadi bagiaku mboto. Ira da'a sanggani nekadede mombasomba wiata Baal.” [40]

⁵Iwetu wo'u tempo we'i-we'i. Danaria sabagia nggedi nggari to Israel to nomparasaya i Pue Yesus. Iramo to nipelisi Alatala nantuki towe belona mboto.

⁶Ira nipelisina nantuki towe belona mboto, da'a nantuki pokainggu ira to nabelo. Sabana ane ira nipelisi nantuki pokainggu ira mboto, batuana towe belo Alatala etu da'a towe belona mpu'u. Etu aga pombabalasi pokainggu ira to nabelo.

⁷Jadi iwenumo? Todea to Israel da'a nombarata kabelona to nielo ira. Aga sabagia nggedi to Israel to nombarata kabelona etu pade najadi nanoa riara mpanggita Alatala, etumo ira to nipelisi Alatala nggari lamba pamulana. Pura-pura tau to Israel ntanina aga nompakako'o rara.

⁸Etu ewa to nitulisi riara Buku Nagasa iwe'i: “Alatala nompakabungu pekiri bo rara nta'i ira. I'a nompakaburo mata ira sampe ira da'a namala manggita jala to nakonona, bo I'a nompakabongo talinga ira sampe ira da'a namala nangepe pepatuduki to nakonona sampe ri eo e'i.” [41]

⁹Pade Magau Daud wo'u nanguli iwe'i: “Pue, waikamo rasi to naria ri ja'i ira majadi ewa talia manjoko ira, sampe ira mpu'u-mpu'u rasuku.

¹⁰Waikamo mata ira maburo sampe da'a mamala ira manggita jala to nakonona. Pade pakandasamo ira ante katomona sampe ira mabunggu sampe ri kasae-saena.” [42]

¹¹Jadi sangganipa kupekutana, “Iwenumo? Tau-tau to Israel nanawu riara silaka sampe ri kasae-saena?” Natantumo da'a! Tapi nggari silaka ira tau-tau da'a to Yahudi nombarata loga rapakasalama. Ante manggita kajadia etu tau-tau to Israel kana masiriati ka tau-tau da'a to Yahudi.

¹²Nggari silaka tau-tau to Israel etu, tau-tau ntanina ri dunia nombarata rasi nadea. Pade nggari kanawu ira, tau-tau da'a to Yahudi nombarata belo. Jadi ane iwetu to najadi sabana tau-tau to Israel da'a nomparasaya, natantumo neliu nggadea rasi nggari ja'i Alatala ane ira pura-pura majea bo momparasaya.

¹³Tesaku e'i kupawela ka komi tau-tau da'a to Yahudi. Aku suro i Pue Yesus to nisurona manggeni Kareba Belo ka komi tau-tau da'a to Yahudi. Bagoku e'i mpu'u-mpu'u nitesaku ka tau pura-pura

¹⁴ante manjarumaka aku mamala mompakaino rara sampesuwu-sampesuwuku to Israel sampe maria ira to madota momparasaya bo rapakasalama.

¹⁵Jadi tempo ira nipoara Alatala jala nibuka ka pura-pura tau ntanina ri dunia ala mosinggabelo ante I'a. Pade neliupa kabelona ane tau to Israel ratarimana bali. Natantumo kajadia etu masimbayu ewa tau namate matuwu bali!

¹⁶Ane asele ntanata pamulana niwai ka Alatala, batuana pura-pura asele ntanata wo'u bagiana. [43] Pade ane kale nu kayu nireke bagia nu Alatala, batuana rangga-ranggana wo'u bagiana.

¹⁷Tau-tau to Israel to nipoara Alatala namala nirapaka ewa rangga-rangga kayu zaitun to nikoto bo nitajiaka. Pade komi tau-tau da'a to Yahudi to nomparasaya Yesus nirapaka ewa rangga-rangga kayu zaitun nggakayu to nipataka ri walea rangga-rangga to nikoto etu ri olo rangga-rangga kayu zaitun to nipiara. Pade komi wo'u nombarata rasi bo belo to niwai Alatala ka tau-tau to Israel nggaolu nasimbayu ewa rangga-rangga to nipataka mombarata panggoni nggari kale kayu zaitun to nipiara.

¹⁸Jadi sampesuwu-sampesuwu da'a to Yahudi, ne'e komi masombo manggita tau to Israel to nipoara ewa rangga-rangga to nikoto etu. Toramo! Komi aga ewa rangga, pade da'a rangga to nompakatuwu kale, tapi kale to nompakatuwu rangga.

¹⁹Bara maria ri tatongo komi to manguli iwe'i: “Rangga-rangga etu nikoto ala kami mamala rapataka.”

²⁰Etu nakono, tapi toramo! Ira nipoara sabana ira da'a nomparasaya, pade komi nitarima sabana komi nomparasaya. Tapi naupa iwetu ne'e komi masombo, agina komi maeka ka Alatala!

²¹Sabana ane naliu rara Alatala nompoara tau-tau to Israel to nirapaka ewa rangga kayu, natantumo I'a wo'u maliu rarana mompoara komi ane komi da'a momparasaya!

²²Jadi nggari setu nanotomo ka kita kabelo nu rara Alatala bo kako'ona mombasuku. I'a nako'o nombasuku tau-tau to Israel to da'a nomparasaya, tapi I'a nabelo rara ri ja'i komi to nomparasaya ane komi maroo manjarumaka kabelona etu. Tapi ane da'a, komi wo'u kana rapoarana.

²³Ane ira tau-tau to Israel mana manjapuaka Alatala tapi majea bo momparasaya, ira wo'u kana ratarima Alatala bali. Sabana I'a nakuasa mantarima ira mpanjili.

²⁴Komi tau-tau da'a to Yahudi nasimbayu ewa rangga-rangga kayu zaitun nggakayu. Ane komi namala rakoto nggari batanggayu pade rapataka ri kayu zaitun to nipiara naupa etu nontani nggari biasa, neliu-liupa ira to Israel to nasimbayu ewa rangga-rangga kayu zaitun to nipiara. Natantumo ira namala rapataka mpanjili ri batana mboto!

²⁵Sampesuwu-sampesuwu, to nipodotaku ala komi mangginjani sangele to nitabuniaka nggari lamba pamulana sampe we'i-we'i. Tesa e'i kuuli ka komi ala ne'e komi mompakalanga rara ante mompekiri komi nangginjani mpengele-ngele. Tesa to nitabuniaka etumo iwe'i: sabagia nggari tau to Israel nompakako'o rara we'i-we'i, tapi ira aga moinggu iwetu sampe maganamo tau-tau da'a to Yahudi to nipakatantu Alatala momparasaya i Pue Yesus.

²⁶Jadi ane etu majadi, pura-pura tau to Israel wo'u kana rapakasalama. Kajadia etu nosinggawela ante tesa Alatala riara Buku Nagasa iwe'i: “Magau to Mompakasalama kana marata nggari Bulu Sion, pade I'a kana mompakalipo pura-pura kaja'ana nggari muli Yakub. [44]

²⁷Pade Aku kana mombaampungi silaka-silaka ira nantuki pojanjiku ka ira nggaolu.” [45]

²⁸Ri tempo we'i-we'i tau-tau to Israel najadi bali nu Alatala sabana ira da'a madota momparasaya Kareba Belo. Pade etumo to nanggeni rasi ka komi tau-tau da'a to Yahudi. Tapi naupa iwetu, tau-tau to Israel danipotowe Alatala, sabana I'a nompelisi ira nggaolu najadi todeana, pade I'a bate-batena nantora pojanjina ka totu'a ira nggaolu.

²⁹Sabana ane Alatala mompakatantu mompelisi bo mombawai rasi ka tau, I'a da'a mombabali katantuna etu.

³⁰Tempo nokolu komi tau-tau da'a to Yahudi da'a natundu ri ja'i Alatala. Tapi tempo tau-tau to Israel da'a natundu ri ja'i Alatala komi nipoasi matana.

³¹Iwetu wo'u tau-tau to Israel. We'i-we'i ira da'a natundu ri ja'i Alatala ala komi rapoasi matana. Tapi kana marata tempona banepia ira wo'u rapoasi mata Alatala nasimbayu ewa komi.

³²Sabana Alatala nompakamba pura-pura manusia da'a natundu ri ja'ina, ala I'a mamala mompopokita asi matana ka ira pura-pura banepia.

³³O, nabete mpu'u kabelo nu Alatala! I'a mpu'u-mpu'u nanoto bo pangginjanina da'a ria panta'ana! Da'a ria samba'a to namala mompakanoto katantuna! Da'a ria to namala mangginjani pura-pura niana.

³⁴Riara Buku Nagasa naria nitulisi iwe'i: “Isema nangginjani pekiri Alatala? Isema mamala mompatuduki I'a? [46]

³⁵Isema nombawai sangele ka I'a sampe I'a masipato mompopatingguli ka ira balasina? Natantu da'a ntoto ria!” [47]

³⁶Sabana pura-pura nuapa to naria nopu'u nggari ja'i Alatala pade natuwu nggari kuasana bo najadi bagiana mboto. I'amo to masipato ratoiya bo rabilata sampe ri kasae-saena! Amin!