Read Da'a Kaili ROMA 13 Bible Online

ROMA 13 - Da'a Kaili bible

ROMA 13

¹Butu mba'a tau kana matundu ri ja'i pomarenta, sabana da'a ria topoparenta to da'a nombarata kuasana nggari ja'i Alatala. Pura-pura topoparenta to naria we'i-we'i nipakakuasa Alatala.

²Etu sampe tau to nangewa pomarenta nangewa nuapa to nipakatantu Alatala mboto. Pade tau noinggu iwetu natantumo kana rasuku.

³Pomarenta da'a paraluu rapokaeka ntau to noinggu nabelo. Aga tau to noinggu naja'a to masipato maeka ri ja'i pomarenta. Jadi ane komi madota matuwu ante da'a ria eka rara ri ja'i pomarenta, kawiamo to nabelona pade komi kana ratoiya ntopoparenta.

⁴Sabana topoparenta batua nu Alatala to nokarajaa mompakabelo katuwuta. Tapi ane komi mowia kaja'ana, natantumo komi kana maeka ri ja'i ira, sabana naria mami kuasa ira mombasuku tau naja'a. Ira batua nu Alatala to mompakawela pesuku Alatala ka tau-tau to mowia kaja'ana.

⁵Etu sabana kita masipato mekou ri ja'i pomarenta. Kita mekou ri ja'i ira ala kita da'a mawela pesuku. Tapi da'a aga etu, kita wo'u mekou ri ja'i ira sabana pekiri rara nta'ita mboto nompakanoto ka kita etu masipato rapowiata.

⁶Etu wo'u sampe kita masipato mombabayari balasitee, sabana topoparenta batua nu Alatala to nipakatantu mantui bago etu wo'u.

⁷Wai ka pura-pura pomarenta nuapa to masipato rawai ka ira. Bayarimo balasitee ka ira to nipakatantu mantarima balasitee. Pade bayarimo bea ka ira to nipakatantu mantarima bea. Pekoumo ri ja'i ntau to masipato rapekou, bo bilamo tau to masipato rabila.

⁸Ne'e kita moinda nuapa-nuapa ka tau ntanina, tapi kita kana tunggai mosipotowe samba'a bo samba'a. Aga etu inda to masipato ka kita. Sabana isema-sema to nosipotowe batuana ira natundu riara pura-pura Atura agama.

⁹Riara Atura etu naria parenta-parenta iwe'i: “Ne'e mogau sala ante tau da'a rongomu mboto, ne'e mepatesi, ne'e mangangga, ne'e maino manggita anu roamu.” [49] Parenta etu pura-pura bo parenta-parenta ntanina wo'u nesua riara saongu parenta, etumo: “Potowemo sanggamanusiamu nasimbayu ewa komi nompotowe koromu mboto.” [50]

¹⁰Isema-sema nompotowe sanggamanusiana, natantumo i'a da'a mompowia kaja'ana ka ira. Jadi ane kita mompotowe sanggamanusiata batuana kita matundu riara pura-pura Atura agama.

¹¹Kita masipato mosipotowe iwetu sabana ninjanita tempo we'i-we'i namosumo karata i Pue Yesus bali ri dunia. Kita kana manoto rara bo mainga, sabana karata i Pue Yesus namosupa we'i-we'i pade tempo kita nompamula nomparasaya.

¹²Tempo narumau ntora naopumo. Namosumo tempo nareme. Jadi etu sampe kita kana manggabasaka pokainggu-pokainggu to narumau bo mompake parewa mposibali to masipato ka tau natuwu riara karemena.

¹³Kita kana matuwu ante pokainggu to masipato ka tau to natuwu riara karemena. Ne'e kita masiromu manggoni mpebasa bo manginu sampe malangu. Ne'e kita mogau sala ante tau da'a rongota mboto atau mompebasa-basa mantuki dota rarata to naja'a. Ne'e kita mosinggarau atau masiriati.

¹⁴Tapi pasialamo pokainggu Pue Yesus Kristus riara nggatuwuta, ne'e mana mompiara bo mantuki dota rara to naja'a.