Read Da'a Kaili ROMA 14 Bible Online

ROMA 14 - Da'a Kaili bible

ROMA 14

¹Ane maria topomparasaya to nalente pomparasayana, tarimamo ira ante mabelo. Ne'e manjalaraka pombarata ira.

²Naria tau to nomparasaya i'a namala nanggoni mpengele-ngele panggoni. Tapi tau ntanina to nalente pomparasayana aga nanggoni uta-uta, da'a nanggoni bau.

³Kakonona tau to nanggoni mpengele-ngele panggoni da'a masipato manjalaraka tau to da'a nanggoni bau. Pade tau da'a nanggoni bau, ne'e manjalaraka tau to nanggoni mpengele-ngele panggoni. Sabana ira nitarima Alatalamo majadi todeana.

⁴Da'a masipato komi manjalaraka batua tau ntanina. Ane pokainggu batua etu nakono atau nasala, etu urusa madikana mboto, da'a urusa komi. Kakonona pokaingguna bate-batena makono sabana i Pue nakuasa nombasaro i'a.

⁵Naria topomparasaya nompekiri saongu eo neliu nggabelo nggari eo ntanina. Tapi naria topomparasaya i Pue Yesus ntanina nompekiri pura-pura eo nasimbayu. To napokona butu mba'a tau kana maroso momparasaya nuapa to naria riara nta'ina.

⁶Tau to nombabila saongu eo nombabila eo etu sabana nipekirina etu nompakadamba rara i Pue. Pade wa'a wo'u tau to nanggoni mpengele-ngele panggoni. Nikonina etu sabana nipekirina etu nompakadamba rara i Pue, sabana i'a nanguli tarima kasi ka Pue Alatala. Pade wa'a wo'u tau to da'a nanggoni bau. I'a da'a nanggoni bau sabana nipekirina etu nompakadamba rara i Pue, pade i'a wo'u nanguli tarima kasi ka Alatala.

⁷Kita da'a aga natuwu nantuki dotata mboto. Pade kita da'a namate nantuki dotata mboto.

⁸Natuwu atau namate kita batena nantuki dota i Pue. Natuwu atau namate kita batena bagia i Pue.

⁹Etumo sampe Kristus namate pade natuwu bali nggari kamatena, ala I'a majadi Pue nu pura-pura manusia, nabeloka to natuwuna, nabeloka to namatena.

¹⁰Jadi ane iwetu, nokuya komi nombasalaraka roamu topomparasaya? Nokuya komi nanjalai i'a? Toramo! Kita pura-pura kana mantingayo Alatala banepia ala ratangarana.

¹¹Nanotomo etu sabana riara Buku Nagasa naria nitulisi iwe'i: “Alatala nanguli, ‘Natantumo butu mba'a tau kana motimbakotu ri ngayoku. Pura-pura tau kana mompangaku Akumo Alatalana.’ ” [51]

¹²Jadi sampesuwu-sampesuwu, kita pura-pura kana mompangaku pokaingguta mboto ri ngayo Alatala banepia.

¹³Sabana etu kuuli ka komi, ne'e mana kita mosisalaraka. Tapi kita kana mainga ala ne'e maria pokaingguta to manggeni roata topomparasaya rapesoba atau manawu ante mowia pokainggu to nirekena nasala.

¹⁴Ewa tau to nosaongu rara ante i Pue Yesus, ninjaniku bo niparasayaku da'a ria panggoni nuapa-nuapa to natantoru riara mpanggita Alatala. Tapi ane maria tau to nomparasaya panggoni etu natantoru, etu mpu'u-mpu'u natantoru ka i'a.

¹⁵Ane nggari panggoni to nikoni komi roamu topomparasaya naju'a rarana, batuana komi mana matuwu ante towe. Ne'e sampe panggoni to nikoni komi mompakagero pomparasaya nu roamu, sabana i'a wo'u samba'a topomparasaya to nitolo ante kamate Kristus.

¹⁶Jadi ne'e sampe panggoni to nireke komi nabelo rakoni majadi sabana sampe komi rasalai tau ntanina. Agina ne'e manggoni panggoni to nireke roamu natantoru.

¹⁷Sabana ane kita najadi todea to niparenta Alatala nuapa to nikonita atau niinuta da'a napokona. To napokona rarata kana manoa, kita kana matuwu mosinggabelo ante roata bo madamba-damba sabana naria Nosa Nagasa nu Alatala riara nta'ita.

¹⁸Ane kita mantuki Kristus ante pokainggu iwetu, kita kana rakonoa Alatala bo rabila manusia.

¹⁹Etu sampe kita kana mompasimbuku matuwu mosinggabelo ante roata, pade mosipakaroso rara samba'a bo samba'a.

²⁰Ne'e sampe kita mompakagero nuapa to nipowia Alatala riara nggatuwu roata ante manggoni panggoni to nirekena natantoru. Kakonona pura-pura panggoni namala rakoni, da'a ria to natantoru. Tapi kita nasala ane nuapa to nikonita manggeni roata rapesoba.

²¹Agina ne'e mana manggoni bau atau manginu panginu to mepakalangu atau mowia nuapa-nuapa to mombagero pomparasaya roamu.

²²Ane komi nomparasaya powiamu etu da'a nasala, kawiamo etu ri ngayo Alatala aga komi mboto tapi ne'e ri ngayo roa-roamu to nalente pomparasayana. Nasana mpu'u tau to da'a nisalaraka pekiri rara nta'ina mboto ewa nuapa to nirekena namala rakonina.

²³Tapi tau to norongu rara manggoni sangele, i'a nasala ane manggoni panggoni etu, sabana i'a da'a nantuki nuapa to niparasayana. Pade nuapa-nuapa to nipowiata anu da'a nantuki pomparasayata, powia etu silaka.