Read Da'a Kaili ROMA 15 Bible Online

ROMA 15 - Da'a Kaili bible

ROMA 15

¹Kita to naroso pomparasayata masipato mantulungi roa-roata to nalente pomparasayana. Ne'e aga mompekiri kasana nu rarata mboto.

²Kita masipato mompakasana rara sanggamanusiata ala mompakabelo ira bo mompakaroso pomparasaya ira.

³Sabana Kristus wo'u da'a aga nangelo kasana nu rarana mboto, tapi I'a nasadia nipandasa. Naria nitulisi riara Buku Nagasa iwe'i: “Pura-pura tesa ira to nanjalai Alatala nawela aku.” [52]

⁴Pura-pura nuapa to nitulisi riara Buku Nagasa nggaolu nitulisi ala mompatuduki kita. Nggari pepatuduki to niratata nggari Buku Nagasa kita majadi maroo tempo nipandasa pade pomparasayata rapakaroso sampe kita maroo manjarumaka Alatala.

⁵Perapi Pue Alatala, to nompakaroso pomparasayata bo nompakaroo rarata tempo kita nipandasa, mantulungi komi matuwu mosaongu rara samba'a bo samba'a nantuki jonjo Yesus Kristus

⁶sampe komi mosaongu rara mantoiya bo mombabila Alatala, Uma nu Pueta Yesus Kristus.

⁷Jadi sampesuwu-sampesuwu, komi kana mositarima samba'a bo samba'a ante mabelo nasimbayu ewa Kristus wo'u nantarima komi ala ante iwetu Alatala rabila bo ratoiya ntau.

⁸To nipatujuku iwe'i: Kristus narata ri dunia mantulungi tau to Yahudi ala pojanji Alatala ka totu'a ira nggaolu madupa sampe manoto ka pura-pura tau Tesa nu Alatala etu nakono.

⁹Pade Kristus wo'u narata ala tau-tau da'a to Yahudi mantoiya Alatala sabana ira wo'u nipoasi matana. Naria tesa riara Buku Nagasa ewa etu to nanguli iwe'i: “Sabana etu, O Pue, aku kana mombabila Komi ri tatongo tau-tau da'a to Yahudi. Aku kana modade mombatoiya sangamu.” [53]

¹⁰Pade naria tesa ntanina riara Buku Nagasa to nanguli iwe'i: “Umba komi tau-tau da'a to Yahudi, Komi kana madamba-damba mpasanggani-nggani ante todea nu Alatala.” [54]

¹¹Pade naria wo'u tesa Alatala ntanina to nanguli iwe'i: “Umba komi tau-tau da'a to Yahudi, komi kana mantoiya Alatala. Pura-pura tau kana mantoiya I'a.” [55]

¹²Pade naria wo'u tesa to nitulisi nabi Yesaya iwe'i: “Nggari muli Isai kana meumba samba'a magau to moparenta tau-tau da'a to Yahudi. [56] I'amo to majadi panjarumaka ira.” [57]

¹³Perapi Pue Alatala, pu'u panjarumakata, mompakadamba rara komi bo mombawai ka komi katuwua mabelo sabana komi nomparasaya I'a, sampe mantambai eona mantambai panjarumaka komi ri ja'ina ante kuasa nggari ja'i Nosa Nagasana mboto.

¹⁴Sampesuwu-sampesuwuku, niparasayaku pokainggu komi batena nabelo. Ninjani komimo pura-pura pepatuduki to nakonona bo komi nompakule mosipakaroso rara samba'a bo samba'a.

¹⁵Tapi naupa iwetu aku nabia sakedi nantulisi bara sakuya ngele ka komi. Patujuku ala mompopatora ka komi, sabana etumo bago to niparasaya Alatala ka aku.

¹⁶I'a nangonggotaka aku najadi batua Yesus Kristus ala rasurona mpaka ri ja'i tau-tau da'a to Yahudi. Bagoku etu namala nirapaka ewa bago topanggeni agama Yahudi to nanggeni pesomba ntodea ka Alatala. Sabana aku nompatolele Kareba Belo ka tau-tau da'a to Yahudi ala ira to momparasaya namala kukeni ka Alatala ewa pesomba. Pade pesombaku etu natantumo ratarimana sabana ira nipakagasa Nosa Nagasa nu Alatala mboto.

¹⁷Jadi aku namala madamba-damba mompekiri bago to nituiku ka Alatala, sabana aku nosaongu rara ante Yesus Kristus.

¹⁸Aku aga mabia motesa ewa nuapa to nipowia Kristus niposabana aku. Nggari tesa bo powiaku aku nanggeni tau-tau da'a to Yahudi matundu ri ja'i Alatala.

¹⁹Pade etu nipowiaku ante kabaraka-kabaraka bo tandai-tandai to nipogumaa bo kuasa nggari ja'i Nosa Nagasa nu Alatala. Nggari ngata Yerusalem sampe ri tana Ilirikum pura-pura Kareba Belo ewa Kristus naopumo nipatoleleku.

²⁰Riara bagoku etu aku bate-batena nompasimbuku nompatolele Kareba Belo ka tau-tau to da'apa nangginjani sanga Kristus. Patujuku ala ne'e sampe aku manggeni Kareba Belo ka tau-tau to naopu nikeni ka kareba etu.

²¹Tapi aku madota mowia ewa to nitulisi riara Buku Nagasa to nanguli iwe'i: “Tau-tau to da'apa nikeni ka kareba ewa I'a kana manggita I'a. Ira to da'apa nangepe kana mangginjani karebana etu.” [58]

²²Sampesuwu-sampesuwu, kakonona nggari bagoku etumo sampe nadea ngganimo da'apa najadi aku malau manggita komi.

²³Tapi we'i-we'i bagoku ri se'i naopumo. Pade nompae-mpaemo dota raraku momai manggita komi.

²⁴Jadi nisarumakaku ane aku malau mpaka ri tana Spanyol aku mamala mesai manggita komi ri ngata Roma bo madamba-damba mpasanggani-nggani ante komi sampalai. Naopu etu kusarumaka komi mamala mantulungi aku riara mpolumakoku mpaka ri tana Spanyol.

²⁵Tapi da'apa aku momai ri ja'i komi aku mokolu malau mpaka ri ngata Yerusalem manggeni petulungi ka topomparasaya i Pue Yesus ri setu.

²⁶Sabana topomparasaya ri Propinsi Makedonia bo Akhaya nompakatantu mompakatu petulungi ka topomparasaya i Pue Yesus to napakasi ri ngata Yerusalem.

²⁷Etu nipowia ira nggari kadamba nu rara ira mboto. Tapi kakonona ira noinda ka roa ira topomparasaya to Yahudi iwetu. Sabana nggari tau to Yahudi sampe tau-tau da'a to Yahudi nombarata nadea rasi nggari ja'i Alatala. Jadi masipato mpu'u tau-tau da'a to Yahudi mantulungi tau-tau to Yahudi ante rasi nggari dunia e'i.

²⁸Jadi aku kana mokolu malau mpaka ri ngata Yerusalem manggeni doi petulungi to nipasiromu etu ka topomparasaya ri setu. Naopu etu aku kana mesai manggita komi riara mpolumakoku mpaka ri tana Spanyol.

²⁹Pade ninjaniku ane aku marata ri ja'i komi natantumo aku kana manggeni nadea rasi nggari ja'i Kristus ka komi.

³⁰Sampesuwu-sampesuwu, kita nosaongu rara ante Pueta Yesus Kristus bo kita mosipotowe samba'a bo samba'a ante pekeniaka Nosa Nagasa nu Alatala riara nta'ita. Sabana etu aku mpu'u-mpu'u merapi ka komi, pekakaimo ka Alatala mpasanggani-nggani ante aku riara posambayamu momposambaya aku.

³¹Posambayamo ala aku mamala matipalewa nggari ja'i tau-tau to Yahudi ri Bagia Yudea to da'a nomparasaya i Pue Yesus. Pade posambaya wo'umo ala doi petulungi to kukeni ka topomparasaya i Pue Yesus ri ngata Yerusalem mamala ratarima ira ante mabelo.

³²Ante iwetu, ane Alatala madota, aku mamala momai ri ja'i komi ante madamba mpu'u raraku, pade aku mamala mombarata kasana rara ri tatongo komi.

³³Perapi Pue Alatala, pu'u katuwua nabelo, mosanggani-nggani ante komi pura-pura. Amin!