Read Da'a Kaili ROMA 2 Bible Online

ROMA 2 - Da'a Kaili bible

ROMA 2

¹Jadi sampesuwu-sampesuwu, ane komi nompakasala roamu da'a mamala komi manguli, “Aku e'i da'a ria salaku.” Sabana komi mboto wo'u nompowia pokainggu to nasimbayu ewa pokainggu roa to nipakasalamu. Jadi ante nompakasala roamu iwetu komi wo'u nompakasala koromu mboto!

²Ninjanita mbotomo ane Alatala mombasuku tau to noinggu iwetu kabotu mpotangarana nanoa.

³Tapi sampesuwu-sampesuwu, komi mboto wo'u nanggawia pokainggu to nipakasalamu ka roamu. Jadi iwenu? Bara nipekiri komi naupa nowia iwetu komi mamala makabasaka nggari pesuku nu Alatala?

⁴Alatala nabelo mpu'u rarana, I'a mpu'u-mpu'u nosabara ri ja'i komi, pade I'a da'a nasalisa mombasuku silaka-silaka komi. Tapi ne'e komi manjapuaka kabelo nu Alatala etu! Toramo! Patuju kabelo nu rara Alatala etumo ala manggeni komi majea nggari silakamu!

⁵Tapi komi nako'o rara, da'a madota majea. Sabana etu komi mbotomo mantambai katomo nu pesuku to rapawela ka komi ri kaopu nu dunia tempo Alatala mompopokita rau rarana bo mombabutusi potangara ante manoa.

⁶Sabana Alatala kana mombabalasi butu mba'a tau nantuki powiana.

⁷I'a kana mombawai katuwua mabelo sampe ri kasae-saena ka ira to natutu nompowia to nabelona ala ira ratoiya bo rabila bo mombarata katuwu to da'a ria kaopu-opuna.

⁸Tapi I'a kana manggarau bo mombasuku butu mba'a tau aga nompekiri korona mboto pade da'a nantuki pepatuduki to nakonona tapi aga nantuki to naja'ana.

⁹Butu mba'a tau nompowia kaja'ana kana mandasa bo mombarasai kasusa, pamula-mulana tau-tau to Yahudi pade tau-tau da'a to Yahudi wo'u.

¹⁰Tapi pura-pura tau to nompowia kabelona kana ratoiya bo rabila bo mombarata katuwua mabelo, pamula-mulana tau-tau to Yahudi pade tau-tau da'a to Yahudi wo'u,

¹¹sabana Alatala da'a nanggita lenje.

¹²Ane tau-tau to da'a nangginjani Atura-atura agama Yahudi nompowia silaka, ira kana mamate bo rapopoga'a nggari ja'i Alatala sampe ri kasae-saena. Tapi pesuku etu da'a nibutusi nantuki Atura-atura agama Yahudi. Tapi tau-tau to nangginjani Atura-atura agama Yahudi kana rasuku nantuki Atura-atura agama etu ane ira mowia silaka.

¹³Sabana da'a tau-tau to nangepe Atura-atura agama to majadi manoa riara mpanggita Alatala, tapi tau-tau to nantuki Atura-atura etu.

¹⁴Tau-tau da'a to Yahudi da'a nangginjani Atura-atura agama Yahudi. Tapi ane nggari dota ira mboto ira mantuki parenta-parenta to naria riara Atura-atura etu, batuana pekiri rara nta'i ira mbotomo nanggeniaka katuwu ira nasimbayu ewa ira nangginjani Atura-atura agama Yahudi, naupa ira da'apa nangginjani Atura-atura etu.

¹⁵Pokainggu ira mboto nompakanoto nuapa to niparenta riara Atura-atura agama ewa natetulisi riara nta'i ira. Etu nipakanoto pekiri rara nta'i ira mboto, sabana naria pompekiri ira nompakasala ira bo naria wo'u pompekiri ira to nantakono ira.

¹⁶Jadi ri Eo Mpotangara banepia Alatala kana mompakau Yesus Kristus mombatangara pura-pura manusia iwetu nantuki pura-pura nuapa to nitabuniaka riara pekiri rara nta'i ira. Etumo to nipakanoto riara Kareba Belo to nipatoleleku.

¹⁷Tapi umba komi to nompangaku koro komi tau to Yahudi. Komi nanjarumaka majadi manoa riara mpanggita Alatala ante mantuki Atura-atura agama. Komi nangoa ante nanguli, “Kamimo todea to nipelisi Alatala!”

¹⁸Komi nangginjani dota nu Alatala pade komi nata'u nompakatantu nuapa to nabelona sabana komi nipatuduki nggari Atura-atura agama.

¹⁹Nipekirimu komimo to nata'u nompatuduki tau da'a nosinjani ante Alatala nasimbayu ewa tau nombanini toburo. Pade nipekirimu komi wo'u to najadi reme ri tatongo ntau to natuwu riara karumauna.

²⁰Pade nipekirimu komimo to nata'u nompatuduki tau-tau da'a ria adana pade nompaguru tau-tau nadoyo. Etu nipekirimu sabana riara Atura-atura agama Yahudi to naria ri ja'imu naria mpengele-ngele pangginjani bo pepatuduki to nakonona.

²¹Jadi komi nompatuduki tau ntanina, tapi nokuya komi da'a nompatuduki koro komi mboto? Komi nompatuduki ka tau ntanina, “Ne'e mangangga.” Tapi nokuya komi mboto nangangga?

²²Komi nompatuduki ka tau, “Ne'e mogau sala ante tau da'a rongomu mboto.” Tapi nokuya komi mboto nogau sala iwetu? Komi narau rara nanggita banta tapi nokuya komi mboto nangala nuapa-nuapa to naria ri bunggu banta etu?

²³Komi nadamba-damba sabana naria Atura-atura agama Yahudi ri ja'imu. Tapi nokuya komi nanjalai Alatala ante da'a nantuki Atura-aturana etu?

²⁴Riara Buku Nagasa naria nitulisi iwe'i: “Nggari pokainggu komi tau-tau to Yahudi sampe tau-tau da'a to Yahudi nombasalaraka Alatala.” [2]

²⁵Ane komi matundu riara Atura-atura agama Yahudi ada mposuna komi mpu'u-mpu'u naria gunana. Tapi ane komi mombaliunaka Atura-atura etu, ada mposuna komi mana ria gunana.

²⁶Jadi ane tau da'a to Yahudi to da'a nisuna mompariara parenta-parenta to nipakatantu riara Atura-atura agama, natantumo i'a kana ratarima Alatala nasimbayu ewa tau to Yahudi to nisuna.

²⁷Pade tau-tau to da'a nisuna kana mompakasala komi tau to Yahudi. Sabana nariamo buku Atura-atura agama ri ja'i komi pade komi nisuna, tapi komi nombaliunaka Atura-atura etu. Ira tau da'a nisuna, tapi iramo to natundu riara Atura-atura agama.

²⁸Jadi to Yahudi to nakonona to nireke todea nu Alatala da'a aga sangana to Yahudi. Pade ada mposuna to nakonona to nombatandai isema bagia nu Alatala da'a aga to nipowia ri koro manusia.

²⁹Tapi tau to Yahudi to mpu'u-mpu'u todea nu Alatala etumo tau to nantuki Alatala nggariara nta'ina. Pade powia to nombatandai isema bagia nu Alatala etumo pokarajaa Nosa Nagasa nu Alatala riara nta'i mompakalipo dota rara to naja'a, da'a ada mposuna to nipowia manusia nantuki Atura-atura agama. Tau noinggu iwetu da'a ratoiya manusia, tapi i'a kana ratoiya Alatala.