Read Da'a Kaili ROMA 3 Bible Online

ROMA 3 - Da'a Kaili bible

ROMA 3

¹Bara maria to nekutana, “Ane iwetu nuapa pelabina tau to Yahudi? Nuapa gunana mantuki ada mposuna?”

²Tantu nadea pelabina, naria mami gunana. Pamula-mulana tau to Yahudimo to niparasaya ka tesa-tesa nu Alatala.

³Tapi iwenu ane maria ri tatongo ira to da'a naroo nomparasaya Alatala? Etu batuana Alatala da'a namala raparasaya?

⁴Natantumo da'a ntoto nakono! Sabana nanotomo Alatala batena nanoa naupa pura-pura tau nodawa. Ewa to nitulisi riara Buku Nagasa iwe'i: “Pue, nuapa-nuapa mutesa, kana manoto kakono nu tesa etu. Pade naupa Komi rapakasala, Komi bate-batena nakono.” [3]

⁵Tapi ane kaja'ata mompakanoto kanoa rara nu Alatala, ne'e kita manguli Alatala da'a nanoa ane I'a mombabalasi kaja'ata etu. Etu pompekiri manusia.

⁶Tapi etu da'a ntoto nakono! Sabana ane Alatala da'a nanoa da'a masipato I'a mombatangara manusia ri dunia e'i.

⁷Bara naria tau to nompekiri iwe'i: “Nokuya kita nipakasala ewa tau nasilaka ane nggari pokaingguta to nadenggona kanoa nu Alatala mantambai manoto sampe I'a ratoiya?”

⁸Ante etu nakono agina kita manguli, “Kamaimo kita mowia kaja'ana ala meumba to nabelona!” Naria mamimo tau nompakaja'a sangaku ante nanguli aku mboto notesa iwetu. Tapi etu da'a ntoto nakono! Tau-tau to nanguli etu masipato rasuku Alatala!

⁹Jadi iwenu? Kami to Yahudi neliu nggabelopa nggari tau-tau ntanina riara mpanggita Alatala? Natantumo da'a! Sabana ewa to niuliku ri ba'ana, pura-pura manusia nasilaka, nabeloka tau to Yahudi nabeloka tau da'a to Yahudi.

¹⁰Ewa to nitulisi riara Buku Nagasa iwe'i: “Da'a ria samba'a to nanoana, nau kamba samba'a da'a ntoto ria.

¹¹Da'a ria samba'a to nanoto riara mpanggita Alatala, pade da'a wo'u naria nau aga samba'a to nangelo Alatala.

¹²Pura-pura tau nasalanjalamo, katuwu ira mana ria gunana. Da'a ria to nompowia kabelona, nau aga samba'a da'a ntoto ria. [4]

¹³Tesa-tesa ira nawau mpu'u nasimbayu ewa dayo ntomate to natebuka. Tesa bagiu nesuwu nggari jila ira. Sumba ira nompakaja'a nasimbayu ewa bisa nu ule. [5]

¹⁴Ira bate-batena netunda njilaka. [6]

¹⁵Ira nasalisa nalau mompatesi tau.

¹⁶Ri umba-umba nikalau ira, ira nompakagado bo nompakasusa tau ntanina.

¹⁷Da'a nadota ira natuwu mosinggabelo. [7]

¹⁸Pade ira da'a ntoto nekou ri ja'i Alatala.” [8]

¹⁹Ninjanitamo pura-pura to nitulisi riara Atura-atura agama to nipapola i Musa nitulisi ka tau-tau to natundu riara Atura-atura etu. Jadi mana ria kamba samba'a to namala mebali. Njumaongu dunia masipato rasuku Alatala.

²⁰Da'a ria samba'a tau to mamala rareke manoa riara mpanggita Alatala ante mantuki Atura-atura agama. Tapi Atura-atura etumo to nompakanoto ka kita pura-pura manusia nasilaka.

²¹Tapi we'i-we'i Alatala nompopokita ka kita iwenu sampe manusia mamala majadi manoa riara mpanggitana. Etu da'a majadi ante mantuki Atura-atura agama. Riara Buku i Musa bo buku nabi-nabi naria tesa to nombaboto iwenu Alatala mompakanoa kita.

²²Etumo manusia majadi manoa riara mpanggita Alatala ante momparasaya Yesus Kristus. Butu mba'a tau to nomparasaya kana rareke Alatala manoa. Da'a ria posisalana,

²³sabana pura-pura manusia nasilaka bo mana mamala mombarasai kabelo nu Alatala to nipogumaa.

²⁴Tapi kita najadi nanoa riara mpanggitana nggari kamate Yesus Kristus nantolo silakata. Etu niwai Alatala bayangi sabana towe belona mboto.

²⁵Yesus Kristus nipakatantu Alatala mamate majadi posompo silaka tau-tau to nomparasaya I'a. Etu nikawia Alatala ala mompopokita kanoana. Sabana tempo nggaolu I'a nosabara nanggita manusia nowia silaka sampe ira da'a nisukuna.

²⁶Patujuna ala mompopokita ka tau tempo we'i-we'i I'a nanoa bo I'a mantarima tau-tau to nomparasaya i Pue Yesus ewa tau nanoa riara mpanggitana.

²⁷Jadi ane iwetu, natantumo da'a namala kita mantoiya korota mboto. Nuapa sabana kita da'a namala mantoiya korota mboto? Sabana nanotomo kita da'a najadi nanoa riara mpanggita Alatala nggari powiata mboto tapi nggari pomparasayata ka Yesus Kristus.

²⁸Jadi katantuna iwe'i: manusia majadi manoa riara mpanggita Alatala ante momparasaya da'a ante mantuki Atura-atura agama.

²⁹Nanotomo Alatala da'a aga Alatala nto Yahudi. Tapi I'a wo'u Alatala ntau da'a to Yahudi.

³⁰Sabana Alatala aga samba'a lau, pade I'amo to mompakanoa tau-tau to Yahudi ane ira momparasaya i Pue Yesus, pade I'a wo'u mompakanoa tau-tau da'a to Yahudi ane ira momparasaya i Pue Yesus.

³¹Jadi iwenu? Ante momparasaya i Pue Yesus batuana kita manjapuaka Atura-atura agama to nipapola i Musa? Natantumo da'a! Kakonona, ante momparasaya i Pue Yesus kita mantakono Atura-atura agama.