Read Da'a Kaili ROMA 4 Bible Online

ROMA 4 - Da'a Kaili bible

ROMA 4

¹Jadi pekirimo jonjo Abraham, totu'ata nggaolu. Nuapa to najadi riara nggatuwuna?

²Ane rapana Abraham najadi tau nanoa sabana powiana to nabelo i'a namala mantoiya korona mboto. Tapi da'a namala i'a mantoiya korona iwetu ri ngayo Alatala.

³Sabana naria tesa ri Buku Nagasa to nanguli iwe'i: “Abraham nomparasaya Alatala, pade nggari pomparasayana etu i'a nireke Alatala tau nanoa.” [9]

⁴Ane tau nokarajaa gajina da'a nireke pewai bayangi, tapi etu sangele to masipato ratarimana.

⁵Tapi da'a iwetu kita ante Alatala. Kita nireke nanoa riara mpanggitana da'a nggari powiata to nabelo tapi nggari pomparasayata ka Alatala to nompakanoa tau-tau to nadenggona.

⁶Etu nasimbayu ewa tesa Magau Daud nggaolu. I'a notesa ewa kasana nu rara ntau to nireke Alatala nanoa da'a nggari powiana to nabelo tapi nggari pomparasayana ka Alatala.

⁷Daud nanguli iwe'i: “Nasanamo tau to niampungi salana, to nitampunisi silakana.

⁸Nasanamo tau mana nireke Alatala nasilaka.” [10]

⁹Jadi iwenu? Nariamo kasana to nitesa Magau Daud etu aga ka tau to Yahudi to nantuki ada mposuna atau ka tau-tau da'a to Yahudi wo'u to da'a nantuki ada mposuna? Natantumo ka ira pura-pura! Sabana ewa niuli kami ri ba'ana, Abraham nireke Alatala nanoa nggari pomparasayana.

¹⁰Ipia Abraham najadi nanoa riara mpanggita Alatala, naopu i'a nisuna atau da'apa i'a nisuna? Natantumo etu najadi da'apa i'a nisuna.

¹¹I'a nisuna nggapurina, pade posunana etu najadi tandaina i'a nireke Alatala nanoa nggari pomparasayana tempo i'a da'apa nisuna. Jadi ante iwetu i'a najadi “Uma” nu pura-pura tau to nomparasaya tapi da'apa nisuna nantuki ada agama Yahudi. Ira wo'u nireke Alatala nanoa ante nomparasaya nasimbayu ewa Abraham.

¹²Pade i'a wo'u najadi “Uma” tau-tau nisuna, etumo ira to da'a aga nantuki ada mposuna agama Yahudi tapi to nantuki jonjo pomparasaya Abraham tempo i'a da'apa nisuna.

¹³Tempo nggaolu Alatala nojanji ka Abraham iwe'i: “Dunia e'i kana majadi bagiamu sampe ri muli-mulimu.” [11] Alatala nojanji iwetu da'a sabana Abraham nantuki Atura-atura agama, tapi sabana i'a nanoa riara mpanggita Alatala nggari pomparasayana.

¹⁴Sabana ane aga tau to nanjarumaka Atura-atura agama ala majadi manoa to mantarima nuapa to nijanji Alatala ka ana-anana, batuana pomparasaya ka Alatala da'a ntoto ria gunana, pade pojanjina aga pojanji bayangi.

¹⁵Kakonona nggari Atura-atura agama sampe nanotomo rau rara Alatala sabana manusia bate-batena nombaliunaka Atura-atura etu. Ane rapana da'a ria Atura-atura agama, da'a ria tau rareke nasala.

¹⁶Jadi kita mantarima nuapa to nijanji Alatala ante momparasaya, ala manoto etu nggari towe belo nu Alatala da'a nggari powia manusia. Patuju nu Alatala ala nuapa to nijanjina namala ratarima pura-pura muli Abraham, da'a aga ira to nompasimbuku mantuki Atura-atura agama, tapi wo'u ira to nomparasaya Alatala nasimbayu ewa Abraham. Sabana Abraham najadi umata pura-pura.

¹⁷Ewa tesa Alatala to nitulisi riara Buku Nagasa iwe'i: “Aku nangonggotaka iko majadi uma ntodea ri umba-umba ri dunia.” [12] Riara mpanggita Alatala Abraham najadi umata pura-pura. I'a nomparasaya ka Alatala to nakuasa nompakatuwu tomate bo to nompakule mompajadi ante tesana anu da'a naria najadi naria.

¹⁸Naupa da'a masipato i'a manjarumaka majadi uma ntodea ri umba-umba ri dunia i'a batena nanjarumaka bo nomparasaya tesa Alatal ka i'a to nanguli, “Kadea nu mulimu banepia masimbayu ewa betu'e ri langi.” [13]

¹⁹Tempo Abraham nangepe pojanji etu namosu satumpae umuruna. Tapi da'a nalente pomparasayana tempo i'a nompekiri korona to natu'a mpu'umo bo rongona i Sara to nagampa.

²⁰I'a da'a nolengga-lengga nomparasaya nuapa to nijanji Alatala ka i'a, tapi pomparasayana nompakaroso rarana sampe i'a nantoiya bo nombabila Alatala.

²¹Niparasayana mpu'u Alatala nompakule nompakadupa pojanjina.

²²Jadi etu sampe i'a nireke Alatala nanoa.

²³Tesa-tesa “i'a nireke Alatala nanoa” da'a aga nipawela ka Abraham,

²⁴tapi etu wo'u nipawela ka kita. Sabana kita wo'u rareke Alatala manoa ane kita momparasaya ka Alatala to nompakatuwu bali Pueta Yesus nggari kamatena.

²⁵I'a niwai Alatala rapatesi mombasompo silakata, pade naopu etu I'a nipakatuwu bali ala kita mamala majadi manoa riara mpanggita Alatala.