Read Da'a Kaili ROMA 5 Bible Online

ROMA 5 - Da'a Kaili bible

ROMA 5

¹Jadi we'i-we'i kita nireke nanoa riara mpanggita Alatala sabana nomparasaya. Etu sampe kita natuwu nosinggabelo ante Alatala nggari nuapa to nipowia Pueta Yesus Kristus ka kita.

²Ante nomparasaya Yesus Kristus kita niwai loga mombarasai towe belo nu Alatala ewa to nirasaita mamimo we'i-we'i. Pade nadamba mpu'u rarata sabana naria panjarumakata mombarata bagia riara kuasa bo kagaya nu Alatala to nipogumaa.

³Pade da'a aga etu, tapi kita wo'u nadamba-damba riara kasusa bo kapari to nirasaita sabana ninjanitamo nggari kasusa bo kapari etu kita majadi maroo.

⁴Pade ane kita maroo kita mamala manta'amaka tempo rapesoba sampe kita rakonoa Alatala. Pade ane ranjanita kita nikonoa Alatala, panjarumakata ri ja'ina mantambai maroso.

⁵Ane maria panjarumakata ewa etu da'a malente rarata. Nuapa to nisarumakata kana madupa. Nanotomo etu sabana nariamo towe Alatala riara nta'ita to najadi nggari Nosa Nagasa to niwaina ka kita.

⁶Iwe'imo to nompakanoto towe Alatala ka kita. Ewa nisuka tempo kita da'a nompakule mompakanoa korota mboto Kristus namate nanjaliku kita tau-tau to da'a nantuki dota Alatala.

⁷Ri pokainggu manusia nakura niratata tau to nasadia mamate manjaliku roana to nanoana. Ane roana tau mpu'u-mpu'u nabelo rarana bara maria samba'a romba'a to mabia mamate manjaliku i'a, tapi etu nakura najadi.

⁸Tapi Alatala nompopokita kabete nu towena ka kita iwe'i: Tempo kita danasilaka Kristus namate nanjaliku kita.

⁹Jadi ane we'i-we'i kita nireke nanoa riara mpanggita Alatala nggari katiti nu lei Kristus, natantumo kita kana rapakasalama Kristus nggari pesuku Alatala banepia.

¹⁰Bopia tempo kita danobali ante Alatala I'a nompakau Anana marata ri dunia mamate manjaliku kita ala kita rapoposinggabelo bali ante I'a. We'i-we'i nosinggabelo balimo kita ante Alatala nggari kamate Anana. Jadi ante iwetu natantumo kita kana rapakasalama nggari pesuku to marata, sabana Anana natuwu balimo nggari kamatena pade batena nosanggani-nggani ante kita.

¹¹Pade da'a aga iwetu, nadamba wo'u rarata sabana kita nosaongu rara ante Alatala. Etu najadi nggari powia Pueta Yesus Kristus to nompoposinggabelo bali kita ante Alatala.

¹²Naria silaka riara dunia sabana powia samba'a manusia to nombaliunaka parenta Alatala, etumo Adam. Pade nggari silaka Adam etu sampe naria kamatea ri dunia. Pade kaopuna kamatea nendai ka pura-pura manusia sabana pura-pura manusia nowia silaka.

¹³Tempo da'apa naria Atura-atura agama to nipapola i Musa naria mamimo silaka ri dunia. Tapi silaka-silaka etu da'apa nireke Alatala, sabana da'apa ria Atura-atura agama to nompakanoto powia nuapa nireke silaka.

¹⁴Tapi naupa iwetu nompamula nggari tempo Adam sampe ri tempo i Musa pura-pura manusia kana nawela kuasa kamatea. Naupa ira da'a nombaliunaka parenta Alatala ewa to nipowia Adam, ira batena nawela kuasa kamatea. Adam naria kasimbayuna ante tau to narata nggapurina, etumo Yesus.

¹⁵Tapi powia Adam bo powia Yesus da'a nasimbayu. Pewai bayangi nu Alatala ka kita da'a nasimbayu ante silaka Adam. Nggari silaka Adam etu pura-pura manusia nawela kuasa kamatea. Tapi neliu nggabetepa asele towe belo nu Alatala to niwaina ante kajoina ka pura-pura manusia nggari powia Yesus Kristus.

¹⁶Sangganipa kuuli pewai Alatala ka kita da'a nasimbayu ante silaka Adam. Nggari silaka samba'a tau pura-pura manusia nasala riara mpanggita Alatala bo masipato rasuku. Tapi nggari pewai bayangi nu Alatala etu silaka-silakata to nadea nipakalipo pade kita najadi nanoa riara mpanggitana.

¹⁷Nggari silaka samba'a tau etu pura-pura manusia nawela kuasa kamatea. Tapi neliu nggabetepa asele nu powia to samba'ana, etumo Yesus Kristus. Isema-sema to nomparasaya I'a kana mantarima towe belo nu Alatala to neliu-liuna sampe majadi tau nanoa riara mpanggitana. Pade ira kana matuwu bo moparenta mosanggani ante Kristus sampe ri kasae-saena.

¹⁸Jadi nggari sangele silaka nu samba'a, pura-pura manusia nasilaka sampe masipato rasuku. Pade nggari sangele powia nanoa to samba'ana pura-pura manusia mamala majadi manoa riara mpanggita Alatala sampe masipato matuwu mabelo sampe ri kasae-saena.

¹⁹Nggari pombaliunaka samba'a pura-pura manusia najadi nasilaka. Pade nggari katundu to samba'ana pura-pura manusia mamala majadi manoa riara mpanggita Alatala.

²⁰Atura-atura agama Yahudi niwai Alatala ala mantambai kadea nu silaka to nipowia manusia. Tapi naupa silaka manusia nantambai kadeana, nantambaipa kadeana towe belo nu Alatala.

²¹Bopia silaka nombakuasai pura-pura manusia sampe ira nawela kuasa kamatea. Tapi patuju nu Alatala ala towe belonamo to mombakuasai pura-pura manusia. Etu najadi tempo I'a nantarima kita ewa tau nanoa to masipato matuwu mabelo sampe ri kasae-saena sabana kita nosaongu rara ante Pueta Yesus Kristus.