Read Da'a Kaili ROMA 6 Bible Online

ROMA 6 - Da'a Kaili bible

ROMA 6

¹Jadi ane iwetu bara maria to nompekiri iwe'i: “Agina kita tunggai mowia silaka ala mantambai kadea nu towe belo nu Alatala.”

²Tapi ne'e ntoto mompekiri iwetu. Da'a mana masipato kita tunggai mowia silaka sabana kita mana nikuasai silaka.

³Tantu ninjani komimo tempo kita nidiu ewa tandaina kita topomparasaya Yesus Kristus ewa kita wo'u namate nosanggani-nggani ante I'a.

⁴Tempo kita nidiu ewa kita namate bo nitana nosanggani-nggani ante I'a. Etu najadi ala tempo Kristus nipakatuwu bali nggari kamatena ante kuasa Umana to nabetena, kita wo'u mamala matuwu ante pokainggu to nabou.

⁵Sabana ane kita namate nosanggani-nggani ante I'a natantumo kita wo'u kana matuwu bali mosanggani-nggani ante I'a.

⁶Ninjanitamo tempo Kristus namate nipaku ri kayu parika pokaingguta nokolu wo'u nipatesi nosanggani-nggani ante I'a ala kuasa silaka riara nggatuwuta rapakaropu. Ante iwetu kita mana mamala rapobatua nu silaka.

⁷Sabana tau to namate nikabasakamo nggari kuasa silaka.

⁸Jadi ane kita namate nosanggani-nggani ante Kristus, niparasayata natantumo kita kana matuwu mosanggani-nggani ante I'a.

⁹Sabana ninjanita Kristus nipakatuwu balimo nggari kamatena pade I'a mana mamate. Kamatea mana mamala mombakuasai I'a.

¹⁰I'a namate sanggani lau ala nombadagi kuasa silaka sampe ri kasae-saena. Pade we'i-we'i I'a batena natuwu mompakadamba rara Alatala.

¹¹Iwetu wo'u komi kana matuwu ewa tau to nikabasaka nggari kuasa silaka bo to natuwu mompakadamba rara Alatala, sabana komi nosaongu rara ante Yesus Kristus.

¹²Sabana etu ne'e mana mompalamba silaka mombakuasai koro komi to mamate sampe komi mantuki dota rara to naja'ana.

¹³Pade ne'e komi mompake sipa nu koromu mompowia kaja'ana. Tapi jujumo koromu ka Alatala ewa tau to natuwu bali nggari kamatena. Jujumo sipa nu koromu ka Alatala ala etu rapake mompowia to nanoana,

¹⁴sabana komi mana nikuasai silaka. Nanotomo etu sabana komi mana nisoko Atura-atura agama, tapi komi nisoko towe belo nu Alatala.

¹⁵Jadi iwenu? Mamalamo kita mowia silaka sabana kita mana nisoko Atura-atura agama tapi aga nisoko towe belo nu Alatala? Natantumo da'a ntoto mamala!

¹⁶Natantu ninjani komi ane komi mekou ri ja'i samba'a tau bo mantuki parentana komi najadi batuana. Iwetu wo'u ane komi mantuki dota rara to naja'a komi majadi batua silaka pade kaopuna komi mamate bo moga'a nggari ja'i Alatala sampe ri kasae-saena. Tapi ane komi mekou ri ja'i Alatala komi majadi batuana pade rareke manoa riara mpanggitana.

¹⁷Bopia komi batua nu silaka. Tapi nosukuru mpu'u ka Alatala, sabana we'i-we'i ante mpu'u-mpu'u rara komi nantuki pepatuduki to nipatolele ka komi.

¹⁸Komi nikabasakamo nggari kuasa silaka pade we'i-we'i komi nompowia to nanoana.

¹⁹Aku nompake porapa nggari katuwuta eo-eo ewa batua ala da'a makaja komi mangginjani patujuku, sabana pompaha komi danakura. Bopia komi nipobatua silaka sampe komi nompake sipa nu koromu nompowia to natantoru bo naja'a sampe pokainggumu nantambai naja'a. Tapi we'i-we'i komi kana mompake sipa nu koromu mompowia to nanoana sampe katuwu komi majadi magasa.

²⁰Bopia tempo komi nipobatua nu silaka komi da'a nompekiri to nanoana.

²¹Nuapa asele to nitarima komi nggari pokainggu komi etu to nompakaeya matamu we'i-we'i? Natantumo da'a ntoto ria, sabana asele pokainggu etu aga kamatea.

²²Tapi we'i-we'i komi nikabasakamo nggari kuasa silaka pade najadi batua nu Alatala. Aselena etumo pokainggu komi najadi nagasa bo komi nombarata katuwua nabelo sampe ri kasae-saena.

²³Sabana tambo nu silaka kamatea, tapi pewai bayangi nggari ja'i Alatala etumo katuwua mabelo sampe ri kasae-saena sabana nosaongu rara ante Pueta Yesus Kristus.