Read Da'a Kaili ROMA 7 Bible Online

ROMA 7 - Da'a Kaili bible

ROMA 7

¹Sampesuwu-sampesuwu, komi pura-pura nangginjani atura-atura. Jadi natantumo ninjani komi ane kita danatuwu kita danisoko atura-atura. Tapi ane kita namatemo, kita mana nisoko atura-atura etu.

²Jonjona, samba'a besi to niporongo danisoko nu ada-ada mporongo ane rongona langgai danatuwu. Tapi ane rongona namatemo, besi etu nakabasaka nggari ada-ada mporongo to nompakaroso porongo ira njamboko.

³Jadi ane besi etu mangala langgai ntanina tempo rongona danatuwu, etu niuli nebualo. Tapi ane rongona langgai namatemo besi etu mana nisoko ada-ada mporongo. Jadi ane i'a niporongo langgai ntanina etu mana nireke nebualo.

⁴Iwetu wo'u ante komi, sampesuwu-sampesuwuku. Tempo Kristus namate komi wo'u ewa namate nosanggani-nggani ante I'a sampe komi mana nisoko Atura-atura agama. Ante iwetu we'i-we'i komi najadi bagia tau ntanina, etumo Kristus to natuwu bali nggari kamatena, ala katuwuta moguna ka Alatala.

⁵Bopia da'apa kita nomparasaya i Pue Yesus kita danatuwu nantuki dota rara to naja'a. Pade tempo etu dota rara to naja'a etu nipakapane nu Atura-atura agama to nombatagi kita mompowia kaja'ana. Etu sampe kita batena nompowia to naja'ana sampe kita masipato mamate bo rapopoga'a nggari ja'i Alatala.

⁶Tapi we'i-we'i kita nikabasakamo nggari Atura-atura agama to nompo'u kita bopia, sabana kita ewa namate nosanggani-nggani ante Kristus. Jadi kita da'a mana nantuki jala nokolu. Kita mana mekou ri ja'i Alatala ante mantuki Atura-atura agama to nitulisi. Tapi we'i-we'i kita nantuki jala to nabou, kita nekou ri ja'i Alatala ante petulungi nggari ja'i Nosana to Nagasa.

⁷Jadi ane iwetu bara maria to nompekiri Atura-atura agama etu naja'a. Tapi etu da'a ntoto nakono, sabana nggari Atura-atura agama nanotomo ka kita nuapa to niuli silaka. Ane rapana da'a ria atura agama to nanguli, “Ne'e maino ka mbara-mbara ntau,” [14] natantu da'a ninjaniku etu silaka.

⁸Tapi tempo aku nangepe atura etu silaka nombarata loga mompopeumba dota raraku maino ka mpengele-ngele. Ane da'a ria Atura-atura agama nompakanoto nuapa to niuli silaka, da'a ntoto ria kuasa silaka riara nggatuwuta.

⁹Bopia tempo aku da'apa nangginjani Atura-atura agama aku natuwu nasana. Tapi naopu aku nangginjani Atura-atura agama silaka to naria riara nta'iku nompamula nakuasa, pade nanotomo aku masipato mamate bo rapopoga'a nggari ja'i Alatala sampe ri kasae-saena.

¹⁰Atura-atura agama to nipatuju Alatala manggeni aku matuwu mabelo aga nompakanoto aku masipato mamate.

¹¹Tempo aku nangepe Atura-atura agama silaka nombarata loga mombabagiu aku. Pade nggari Atura-atura agama silaka namala nompakanawu aku sampe aku masipato mamate.

¹²Atura-atura agama nagasa bo parenta-parenta Alatala nagasa, nanoa bo nabelo.

¹³Ane iwetu bara maria to manguli iwe'i: “Atura-atura agama to nabelo etu nompakamate aku sampe aku masipato rapopoga'a nggari ja'i Alatala!” Tapi etu da'a ntoto nakono! Silakamo to nompakamate aku! Atura-atura agama to nabelo nipake silaka nompakanawu aku sampe aku masipato mamate. Nggari Atura-atura agama nantambai nanoto kaja'a nu silaka.

¹⁴Sampesuwu-sampesuwu, ninjanitamo Atura-atura agama nagasa sabana etu nggari ja'i Nosa Nagasa nu Alatala. Tapi aku e'i aga manusia nasilaka, aku nipobatua nu silaka.

¹⁵Sabana da'a ninjaniku pokaingguku mboto. Pokainggu to nabelo to nipodotaku da'a nipowiaku. Tapi pokainggu to niporau raraku, etumo to nipowiaku!

¹⁶Ane pokainggu anu da'a nipodotaku to nipowiaku, batuana aku nantakono Atura-atura agama. Aku nanguli Atura-atura etu nabelo.

¹⁷Ane iwetu mana aku to nompowia pokainggu to naja'a etu tapi silaka to naria riara nta'iku.

¹⁸Sabana ninjanikumo da'a ria kamba sangele to nabelona riara nta'iku, etumo riara ingguku ewa manusia. Sabana naupa aku madota mompowia to nabelona, da'a kupakule mowia etu.

¹⁹Pokainggu to nabelo to nipodotaku da'a nipowiaku, tapi kaja'ana to da'a nipodotaku, etumo to nipowiaku.

²⁰Jadi ane aku mompowia anu da'a nipodotaku iwetu, batuana da'a aku to nompowia pokainggu etu tapi silaka to naria riara nta'iku.

²¹Jadi iwe'imo to najadi riara nggatuwuku: Ane aku madota mompowia to nabelona bate-batena to naja'ana to nipowiaku.

²²Riara pekiri rara nta'iku aku nompokono Atura-atura nu Alatala.

²³Tapi riara koroku naria kuasa ntanina to nosibali ante pekiri rara nta'iku sampe aku nidagina bo nipobatua nu silaka to nombakuasai koroku etu.

²⁴Jadi iwe'imo katuwuku. Riara pekiri rara nta'iku aku madota matundu riara Atura-atura Alatala, tapi riara koroku aku bate-batena natundu riara silaka to nombakuasai aku. Nandasa mpu'umo aku e'i! Isema to mamala manggabasaka aku nggari kuasa silaka e'i to nanggeni aku mamate? Aku nosukuru ri ja'i Alatala sabana Pueta Yesus Kristus to nanggabasaka aku!