Read Da'a Kaili ROMA 9 Bible Online

ROMA 9 - Da'a Kaili bible

ROMA 9

¹Nuapa to kuuli e'i mpu'u-mpu'u nakono. Aku da'a nodawa, sabana aku nosaongu rara ante Kristus. Pade Nosa Nagasa nu Alatala to naria riara pekiri rara nta'iku wo'u nantakono tesaku e'i.

²Nalebuku bo nasusa mpu'u raraku nompekiri sampesuwuku to Israel sabana nakura ira to nomparasaya i Pue Yesus. Kakonona aku nasadia rajanjiaka Alatala bo rapopoga'a nggari ja'i Kristus manjambei ira to nosangata ante aku.

⁴Ira to Israel todea nu Alatala to nionggotakana najadi ana-anana mboto. Ira to nipopokita ka kuasa bo kagayana. Ira to niwai ka pojanji-pojanjina, pade ira to niwai ka Atura-atura agama. Ira to nipatuduki ka ada-ada mepue ka Alatala, pade ira to nantarima nadea mpu'u pojanji Alatala ntanina.

⁵Ira muli Abraham, Ishak bo Yakub, totu'a nggaolu to Israel. Pade tempo Kristus netimbali najadi manusia I'a najadi tau to Israel. I'amo to neliu nggalanga nggari ntanina, I'amo Alatala to masipato ratoiyata sampe ri kasae-saena. Amin!

⁶Naupa nadea to Israel da'a nomparasaya i Pue Yesus etu da'a batuana Alatala da'a nompakadupa pojanjina. Sabana da'a pura-pura muli Israel to nipelisi Alatala majadi todeana.

⁷Pade da'a wo'u pura-pura muli Abraham to nireke mulina to masipato mantarima nuapa to nijanji Alatala. Sabana Alatala nanguli ka Abraham iwe'i: “Aga mulimu nggari Ishak to rareke mulimu.” [16]

⁸Etu batuana da'a pura-pura tau to nipomuli Abraham nireke ana-ana nu Alatala, aga ira to nomparasaya pojanji Alatala nasimbayu ewa Abraham.

⁹Sabana iwe'imo pojanji Alatala to niparasaya Abraham: “Mpae marata Aku kana manjili manggita komi, pade da'apa Aku marata rongomu i Sara kana moana samba'a ngana langgai.” [17]

¹⁰Pade da'a aga etu, ri tesa ewa i Ribka, rongo ntotu'ata nggaolu Ishak, neliu ngganoto ka kita Alatala nompelisi tau nantuki dotana mboto. Ribka natiana ka ana Ishak.

¹¹Tapi da'apa i'a nangote romba'a ngana norapi, Alatala nanguli ka i'a iwe'i: “Anamu ulumbua kana rapobatua nu tua'ina.” [18] Tempo Alatala notesa etu romba'a ngana etu da'apa nesuwu, ira da'apa nompowia nuapa-nuapa to nabelo atau to naja'a. Tapi Alatala nompakatantu nokolu ngana umbana to nipelisina mantarima rasi nggari ja'ina. Nipowiana iwetu ala mompakanoto I'a da'a nompelisi tau nantuki powia ira, tapi I'a nompelisi tau nantuki dotana mboto.

¹³Etumo patuju nu tesa riara Buku Nagasa to nanguli iwe'i: “Yakub nipotoweku, tapi Esau nipowua mataku.” [19]

¹⁴Jadi ane iwetu, ne'e kita manguli powia Alatala etu da'a nanoa. Etu da'a ntoto nakono!

¹⁵Sabana I'a nanguli ka nabi Musa nggaolu iwe'i: “Aku kana maasi mata ka isema to kupoasi mata bo mompotowe ka isema to kupotowe.” [20]

¹⁶Jadi etu majadi da'a nggari dota manusia atau nggari powia manusia, tapi nggari asi mata Alatala mboto.

¹⁷Riara Buku Nagasa naria Tesa Alatala ka Firaun, Magau tana Masir nggaolu iwe'i: “Aku nangonggotaka iko najadi magau ante sangele lau patuju, etumo ala nggari powiaku riara nggatuwumu Aku mompopokita kuasaku bo sangaku ratoiya bo rapakabete ri njumaongu dunia.” [21]

¹⁸Jadi nanotomo ka kita Alatala naasi matana ri ja'i isema-sema to nipodotana bo I'a nompakako'o rara isema-sema to nipodotana.

¹⁹Natantumo kana maria tau to manguli iwe'i: “Ane iwetu, nokuya Alatala danompakasala manusia, sabana kita da'a namala mangewa dotana?”

²⁰Tapi sampesuwu-sampesuwu, ne'e manjapuaka Alatala! Namala kura manguli ka topowiana, “Nokuya iko nompowia aku iwe'i?” Natantu da'a ntoto namala!

²¹Topomandu kura nakuasa nombamandu tana lei nantuki dotana mboto. Nggari salemo tana lei i'a nombamandu rongu kura, saongu to nagayana pade saongu kura biasa.

²²Iwetu wo'u ante Alatala. I'a nakuasa nompowia nuapa-nuapa to nipodotana ri ja'ita. Kakonona Alatala nonia mompopokita rau rarana ka tau-tau naja'a bo mompopokita kuasana sabana ira masipato rasuku sampe ri kasae-saena. Tapi naupa iwetu I'a danosabara ri ja'i ira to masipato mawela rau rarana.

²³I'a nosabara iwetu ala mompopokita kabete nu towena bo asi matana ka tau-tau to nipakatantuna nggari lamba pamulana mantarima bagia nggari kabelona.

²⁴Pade kita e'imo tau-tau to nipokiona mantarima rasi etu, da'a aga tau-tau to Yahudi, tapi tau-tau da'a to Yahudi wo'u.

²⁵Naria tesa Alatala riara buku nabi Hosea to nanguli iwe'i: “Tau-tau da'a todeaku kana kuuli todeaku. Ira to da'a nipotoweku kana kuuli to nipotoweku.” [22]

²⁶“Pade ri umba peto'o pue ngata niuli da'a todeaku, ri setumo ira kana rauli ana nu Alatala to Natuwuna.” [23]

²⁷Naria wo'u tesa to niboto nabi Yesaya nantesa to Israel iwe'i: “Naupa muli Israel nadea mpu'u, ewa kadea nu bone ri wiwi ntalinti, aga sabagia nggedi nggari tatongo ira to rapakasalama,

²⁸sabana i Pue kana masalisa mombasuku pura-pura manusia ri dunia. I'a da'a mombasoro-soro tempo etu.” [24]

²⁹Naria tesa nabi Yesaya ntanina to nanguli iwe'i: “Ane rapana Alatala to Neliu Nggakuasa da'a nombaboli mulita, tantu mpu'u-mpu'u kita maropu nasimbayu ewa pue ngata Sodom bo Gomora nggaolu.” [25]

³⁰Jadi iwe'imo to nipatujuku: Tau-tau da'a to Yahudi da'a nompasimbuku majadi manoa riara mpanggita Alatala. Tapi sabana ira nomparasaya, ira nireke Alatala nanoa.

³¹Tapi tau-tau to Israel nasaemo nompasimbuku majadi manoa riara mpanggita Alatala ante mantuki Atura-atura agama. Tapi etu da'a najadi.

³²Nuapa sabana? Sabana ira aga nanjarumaka pokainggu ira mboto to nabelo, ira da'a nanjarumaka pomparasaya ira ka Alatala ala majadi manoa. Ira ewa tau natepasunu ri watu, sabana nakaja rara ira momparasaya kamate i Pue Yesus ri kayu parika.

³³Etu niboto riara Buku Nagasa iwe'i: “Kita we'i! Aku nomboli samba'a tau ri Bulu Sion [26] to nirapaka ewa saongu watu bete. Nadea tau kana matepasunu ri watu etu pade madungga. Tapi isema-sema momparasaya I'a da'a rapakaeya.” [27]