Read Da'a Kaili 1 KORINTUS 1 Bible Online

1 KORINTUS 1 - Da'a Kaili bible

1 KORINTUS 1

¹Sura e'i nggari ja'iku i Paulus to nipelisi najadi suro Yesus Kristus nantuki dota Alatala mboto, pade nggari ja'i sampesuwuta i Sostenes,

²ka todea topomparasaya Alatala to naria ri ngata Korintus. Komi nipakagasa sabana nosaongu rara ante Yesus Kristus. Pade komi nipokio matuwu ante pokainggu to nagasa mosanggani-nggani ante pura-pura tau ri njumaongu dunia to nekakai ka sanga Pueta Yesus Kristus. I'a Pue ira bo Pueta wo'u.

³Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.

⁴Aku da'a nenonto nanguli tarima kasi ka Alatala ewa katuwu komi, sabana towe belona niwai ka komi to nosaongu rara ante Yesus Kristus.

⁵Riara mpengele-ngele katuwu komi nipakasugi sabana komi nosaongu rara ante Yesus Kristus. Komi niwai ka pompakule motesa ante napande bo komi niwai ka mpengele-ngele pangginjani to nabelona.

⁶Kareba ewa Kristus to nipatolele ka komi nipakanoto kakonona riara nggatuwu komi.

⁷Jadi we'i-we'i da'a ntoto nakura pompakule nggari ja'i Nosa Nagasa ri ja'i komi tempo komi mompopea karata Pueta Yesus Kristus bali ri dunia.

⁸I'a kana mompakaroso komi sampe ri kaopuna sampe komi da'a mamala rapakasala tempo Pueta Yesus Kristus marata bali ri dunia.

⁹Alatala namala raparasaya mompowia etu. I'amo to nompokio komi majadi saongu rara ante Anana Yesus Kristus, Pueta pura-pura.

¹⁰Sampesuwu-sampesuwu, aku merapi ka komi riara sanga Pueta Yesus Kristus ala komi masintuwu bo mosaongu rara. Ne'e sampe magero sintuwu komi, tapi komi kana masintuwu mosaongu rara bo pekiri samba'a bo samba'a.

¹¹Niuliku iwetu sabana naria ira nggari sapo i Kloe notesa ka aku naria posinggarau ri tatongo komi.

¹²To nipatujuku iwe'i: Ri tatongo komi naria to nanguli, “Aku e'i topantuki i Paulus,” pade naria sanupa to nanguli, “Aku e'i topantuki Apolos,” [1] pade naria ntanina nanguli, “Aku e'i topantuki Petrus,” [2] pade naria ntanina nanguli, “Aku e'i topantuki Kristus.”

¹³Toramo! Kristus da'a natibagi-bagi! Paulus da'a nipaku ri kayu parika manjaliku sala komi! Komi da'a nidiu ewa tandaina komi najadi topantuki i Paulus!

¹⁴Aku nosukuru sabana da'a ria ntanina nggari tatongo komi to nidiuku, aga i Krispus bo i Gayus.

¹⁵Ne'e sampe maria to manguli i'a nidiu ewa tandaina i'a najadi topantuki aku!

¹⁶(O, nitoraku, ira i Stefanus saongu njapo wo'u nidiuku. Tapi ntanina nggari ira etu da'a nitoraku ane naria to nidiuku.)

¹⁷Aku da'a nipakau Kristus mombadiu tau tapi ala mompatolele Kareba Belo. Pade tempo aku nompatolele Kareba etu aku da'a notesa nantuki noto nggari ja'i manusia ala ne'e sampe tau aga nanjarumaka kata'uku notesa. Ane iwetu kamate Kristus ri kayu parika da'a ria gunana.

¹⁸Kareba Belo ewa kamate Kristus ri kayu parika nireke ntau to da'a nipakasalama sangele tesa ntodoyo. Tapi ane kita to nipakasalama, kareba etu nireketa kuasa nu Alatala mboto.

¹⁹Riara Buku Nagasa naria Tesa nu Alatala to nanguli iwe'i: “Aku kana mompakaropu noto ntau to nanotona, pade kapande ntau to napandena kana kupakalipo.” [3]

²⁰Jadi nuapa gunana tau-tau to nanoto? Nuapa gunana tau-tau to napande? Nuapa gunana tau-tau to napande nosisono ri dunia e'i? Pura-pura noto manusia ri dunia e'i nipakanoto Alatala aga sangele to da'a ria gunana.

²¹Sabana manusia da'a namala mosinjani ante Alatala ane aga manjarumaka notona mboto. Tapi nggari kabelo rara nu Alatala I'a madota mompakasalama isema-sema to nomparasaya Kareba Belo. Tapi Kareba etu aga nireke tau-tau ri dunia e'i sangele tesa ntodoyo.

²²Tau-tau to Yahudi madota manggita tandai to nipogumaa ala mantakono Kareba to nipatolele. Pade tau-tau to Yunani aga mangelo noto nggari dunia e'i.

²³Tapi kami nompatolele Kareba Kristus to namate nipaku ri kayu parika. Kareba etu nompakaju'a rara tau-tau to Yahudi, pade nireke tau-tau to Yunani sangele tesa ntodoyo.

²⁴Tapi ka tau-tau to nipokio Alatala majadi todeana kareba Kristus etu nompakanoto iwenu Alatala nompopokita kuasa bo notona ka manusia, nabeloka tau-tau to Yahudi nabeloka tau-tau to Yunani.

²⁵Sabana powia Alatala to nireke manusia nadoyo neliu nggabelo nggari noto manusia. Pade powia Alatala to nireke manusia nalente neliu nggaroso nggari karoso manusia.

²⁶Sampesuwu-sampesuwu, toramo iwenu katuwu komi bopia tempo Alatala nompokio komi majadi todeana. Sakedi lau nggari tatongo komi to nanoto riara mpanggita dunia. Sakedi lau komi to nakuasa bo nalanga katuwuna.

²⁷Tapi to nireke nadoyo riara mpanggita manusia ri dunia nipelisi Alatala ala mompakaeya tau-tau to nanotona. To nireke nalente riara mpanggita manusia ri dunia nipelisina ala mompakaeya tau-tau to narosona.

²⁸To da'a ria gunana, to nisalai pade to nireke da'a ntoto ria batuana riara mpanggita manusia nipelisi Alatala ala mompakanoto nuapa to nitoiya manusia ri dunia e'i da'a ria gunana.

²⁹Patujuna ala ne'e maria manusia to mamala mombatoiya korona mboto ri ngayo Alatala.

³⁰Nggari Alatala mbotomo kita najadi saongu rara ante Yesus Kristus. Pade nggari Kristus kita nangginjani noto nggari ja'i Alatala. I'amo to nompakanoa kita riara mpanggita Alatala sampe kita najadi bagia nu Alatala to nagasana. Pade I'amo to nantolo silakata.

³¹Jadi ewa to nitulisi riara Buku Nagasa, “Isema-sema madota mombatoiya sangele i'a kana mombatoiya nuapa to nipowia i Pue.” [4]