Read Da'a Kaili 1 KORINTUS 11 Bible Online

1 KORINTUS 11 - Da'a Kaili bible

1 KORINTUS 11

¹Jadi pasialamo pokaingguku nasimbayu ewa aku nompasiala pokainggu Kristus.

²Sampesuwu-sampesuwu, aku nantoiya komi sabana komi batena nantora aku riara mpengele-ngele, pade komi naroo nantuki pepatuduki to nipatudukiku ka komi.

³Tapi naria sangele paraluu ranjani komi iwe'i: Kristusmo to najadi balengga nu butu mba'a langgai, langgai to najadi balengga nu besi, pade Alatala to najadi balengga Kristus.

⁴Jadi langgai to nosambaya atau nompasimbayu tesa nggari ja'i Alatala riara mpodade ante nombabungu balenggana i'a da'a nombabila Kristus to najadi balenggana.

⁵Pade besi to nosambaya atau nompasimbayu tesa nggari ja'i Alatala riara mpodade ante da'a nombabungu balenggana, i'a da'a nombabila rongona langgai to najadi balenggana. Da'a ria posisalana besi etu ante besi to nigau wo'ona.

⁶Ane besi da'a madota mombabungu balenggana agina wo'ona ragunji sanggani. Tapi ane nireke sangele to nompakaeya mata ane wo'ona ragunji atau ragau iwetu, agina i'a mombabungu balenggana riara mpodade.

⁷Da'a masipato langgai mombabungu balenggana tempo nosambaya atau nompasimbayu tesa nggari ja'i Alatala sabana i'a nipajadi nantuki lenje Alatala ala mompopokita kuasa bo kagaya nu Alatala mboto. Tapi besi nipajadi ala mompopokita kuasa bo kagaya nu rongona langgai.

⁸Sabana langgai da'a nipajadi nggari besi, tapi besi nipajadi nggari langgai.

⁹Pade iwetu wo'u langgai da'a nipajadi Alatala ala mantulungi besi, tapi besi nipajadi Alatala ala mantulungi langgai.

¹⁰Etu sampe besi masipato mombabungu balenggana ewa tandaina i'a nekou ri ja'i rongona langgai, sabana pokaingguna etu nikita malaeka-malaeka i Pue.

¹¹Tapi naupa iwetu toramo! Riara nggatuwuta ewa topomparasaya i Pue, besi paraluu langgai pade langgai paraluu besi.

¹²Sabana naupa besi pamulana nipajadi nggari usu langgai, langgai-langgai kana niote nu besi. Tapi pura-pura to nipajadi etu nopu'u nggari ja'i Alatala.

¹³Pekiri komi mbotomo. Masipato besi mosambaya ka Alatala riara mpodade ane balenggana da'a nibungu? Natantu da'a.

¹⁴Nantuki kabiasa to naria ri ja'ita mboto ninjanita ane langgai nandoe wo'ona etu sangele to nompakaeya.

¹⁵Tapi ane besi nandoe wo'ona etu sangele to nompakagaya i'a. Sabana besi niwai wo'o ewa sangele pombungu balenggana.

¹⁶Ane maria tau to madota mosinggarau ewa pepatuduki e'i, aga sangele lau kutesa ka ira: Da'a ria kabiasa ntanina to nituki kami bo pura-pura todea topomparasaya Alatala.

¹⁷Da'a namala aku mantoiya pokainggu komi ewa tewai to kuuli ri se'i. Sabana kasiromu komi topomparasaya da'a nanggeni belo ka komi, tapi aga nanggeni kaja'ana.

¹⁸To niepeku, tempo komi nasiromu naria komi natibagi-bagi. Pade niparasayaku sabagia nggari kareba to niepeku etu nakono.

¹⁹Kakonona kana maria komi matibagi-bagi iwetu ala manoto isema nggari tatongo komi mpu'u-mpu'u topomparasaya to nakonona.

²⁰Tempo komi nasiromu nanggoni mpasanggani-nggani pokainggu komi da'a masipato ka tau to nantuki posusa mantora kamate i Pue.

²¹Sabana ri posusa etu komi aga nosimpago nanggoni panggoni komi mboto, komi da'a nompopea sampe pura-pura tau nombarata panggonina. Jadi naria tau to da'a nombarata panggoni nuapa-nuapa, pade naria ntanina nanginu sampe nakalangu.

²²Nokuya iwetu? Nokuya komi da'a manggoni bo manginu ntani ruru ri sapomu mboto? Nokuya komi nompakaja'a kasiromu todea topomparasaya Alatala? Nokuya komi nompakaeya tau da'a nompakule manggeni panggoni ri posusa etu? Iwenumo? Nuapa masipato kuuli ka komi? Masipato aku mombatoiya pokainggu komi etu? Natantu da'a ntoto masipato!

²³Pepatuduki ewa posusa mantora kamate i Pue nitarimaku nggari ja'i Pue mboto, pade etumo to nipatudukiku ka komi bopia. Etumo ri tempo nggawengina i Pue Yesus nipobalu ka balina I'a nangala roti,

²⁴pade niulina tarima kasi ka Alatala. Naopu etu nibingga-binggana roti etu ante nanguli, “Roti e'i koro bataku to niwai manjaliku komi. Kawiamo ada e'i ala mombatora Aku.”

²⁵Pade iwetu wo'u naopu ira nanggoni nialana saongu sanggiri pade niulina, “Panginu e'i tandaina Pojanji Alatala to nabouna to rapakaasa ante leiku. Butu nggani komi manginu panginu ada e'i kawiamo etu ala mombatora Aku.”

²⁶Sabana butu nggani komi manggoni roti bo manginu panginu ada e'i komi mompatolele kamate i Pue sampe I'a marata bali ri dunia e'i.

²⁷Sabana etu isema-sema to nanggoni roti atau nanginu panginu ante pokainggu to da'a masipato ri posusa mantora kamate i Pue, ira nompowia silaka ri ja'i Pue to nombawai koro bo leina manjaliku kita.

²⁸Jadi butu mba'a tau kana momparesa korona mboto ntani ruru. Pade naopu etu i'a mamala manggoni roti bo manginu panginu ri posusa mantora kamate i Pue etu.

²⁹Sabana tau to manggoni roti bo manginu panginu etu ante da'a nantora koro i Pue natantumo kana rasuku Alatala.

³⁰Etu sampe nadeamo tau ri tatongo komi nalente bo naju'a, pade bara sakuya mba'a nggari tatongo komi namatemo.

³¹Tapi ane kita momparesa korota ntani ruru da'apa mantuki posusa mantora kamate i Pue kita da'a rapakawela pesuku.

³²Tapi ane rapana kita rapakawela pesuku Alatala ewa etu, patujuna ala kita rapatudukina ala ne'e kita rasuku mpasanggani-nggani ante tau-tau ri dunia to da'a nomparasaya i Pue.

³³Jadi sampesuwu-sampesuwuku, ane komi masiromu manggoni ri posusa mantora kamate i Pue, komi kana mosipopea pura pade manggoni mpasanggani-nggani.

³⁴Ane maria tau naoro ta'ina, agina i'a manggoni ri sapona mboto ntani ruru, ala ne'e sampe komi mawela pesuku Alatala sabana pokainggu komi da'a nabelo tempo komi masiromu mpasanggani-nggani. Pade ane aku momai ri ja'i komi aku kana mompakasiayu nuapa-nuapa ntanina to da'apa nasiayu.