Read Da'a Kaili 1 KORINTUS 12 Bible Online

1 KORINTUS 12 - Da'a Kaili bible

1 KORINTUS 12

¹Sampesuwu-sampesuwu, ane pompekutana komi ewa pompakule nggari ja'i Nosa Nagasa nu Alatala, iwe'imo pesonoku: To nipodotaku ala komi mangginjani pepatuduki to nakonona ewa pompakule-pompakule etu.

²Ninjani komi mbotomo tempo komi da'apa nomparasaya i Pue Yesus komi batena nikeni mepue ka pue-pue ntanina to da'a nasowa notesa.

³Etu sampe aku manguli ka komi da'a ria tau to nikuasai Nosa Nagasa nu Alatala mamala manguli, “Nasurukawumo Yesus.” Pade iwetu wo'u da'a ria tau mamala mompangaku, “Yesusmo Pueku,” ane i'a da'a nikuasai Nosa Nagasa nu Alatala.

⁴Naria mpengele-ngele pompakule nggari Nosa Nagasa nu Alatala, tapi etu pura-pura nopu'u nggari ja'i Nosa Nagasa nu Alatala to samba'a lau.

⁵Naria mpengele-ngele bago mantulungi i Pue, tapi aga samba'a lau Pue to nitulungi.

⁶Pade naria mpengele-ngele baraka ri tatongo topomparasaya tapi aga samba'a lau Alatala to nombawai baraka etu ka pura-pura tau.

⁷Kita pura-pura niwai ka pompakule nggari ja'i Nosa Nagasa nu Alatala ala manggeni belo ka tau ntanina.

⁸Naria tau to niwai Nosa Nagasa ka pompakule mompasimbayu noto nggari ja'i Pue. Tau ntanina niwai Nosa Nagasa etu ka pompakule mompasimbayu pangginjani to niratana nggari ja'i Pue.

⁹Tau ntanina niwai Nosa Nagasa ka pompakule momparasaya neliu nggari biasa. Pade tau ntanina niwai Nosa Nagasa ka baraka mompakabelo ju'a-ju'a ntau. Pade etu pura-pura nggari ja'i Nosa Nagasa to nasimbayu.

¹⁰Pade tau ntanina niwai ka pompakule mowia kabaraka. Tau ntanina niwai ka pompakule mompasimbayu tesa nggari ja'i Pue, pade tau ntanina niwai ka pompakule mompoposisala nuapa to nopu'u nggari Nosa Nagasa nu Alatala ante nuapa to nopu'u nggari kuasa-kuasa ntanina. Pade tau ntanina niwai ka pompakule notesa basa-basa to nopu'u nggari ja'i Nosa Nagasa nu Alatala. Pade to samba'ana niwai ka pompakule mompakanoto batuana tesa-tesa nggari basa-basa etu.

¹¹Pompakule etu pura-pura nggari kuasa Nosa Nagasa nu Alatala to samba'a lau. Butu-butu mba'a nipalele ka pompakule to natantuna nantuki dota Nosa Nagasa nu Alatala etu.

¹²Koro batata saongu lau naupa nadea sipana. Tapi naupa nadea sipa nu koro etu, ira bate-batena saongu koro. Iwetu wo'u kita topomparasaya Kristus to nirapaka ewa saongu koro. Naupa kita nadea, kita bate-batena nosaongu.

¹³Kita pura-pura nidiu Nosa Nagasa to samba'a lau ala majadi saongu koro, nabeloka tau-tau to Yahudi, nabeloka tau-tau da'a to Yahudi, nabeloka batua-batua nabeloka tau da'a batua. Kita pura-pura nipesua Nosa Nagasa to samba'a lau.

¹⁴Koro batata da'a aga saongu lau sipana tapi nadea.

¹⁵Ane rapana kadata manguli, “Aku e'i da'a sipa nu koro sabana aku da'a pale,” natantumo etu da'a nakono. Kada etu batena sipa nu korota.

¹⁶Pade ane rapana talingata manguli, “Aku e'i da'a sipa nu koro sabana aku da'a mata,” natantumo etu da'a wo'u nakono. Talinga etu batena sipa nu korota.

¹⁷Ane rapana pura-pura korota majadi mata, iwenumo kita meepe? Pade ane rapana pura-pura korota majadi talinga, iwenumo kita meenga?

¹⁸Tapi kakonona Alatala nompakatantu butu-butu sipa nu koro ri peto'o to masipatona nantuki dotana mboto.

¹⁹Ane rapana aga saongu lau sipa nu koro, natantumo da'a ntoto ria koro bata.

²⁰Kakonona nadeamo sipa ri korota, tapi pura-pura sipa etu batena saongu koro.

²¹Jadi mata da'a mamala manguli ka pale, “Aku da'a nomparaluu iko.” Pade iwetu wo'u balengga da'a mamala manguli ka kada, “Aku da'a nomparaluu iko.”

²²Tapi sipa-sipa nu koro to nireke nalente, kakonona to neliu nggapokona.

²³Pade sipa to nireke da'a nibila, sipa etumo to neliu nibilata. Pade sipa to da'a nagaya nikita, sipa etumo to nipariara nta'ita mpakabelo-belo.

²⁴Tapi sipa to nagayana da'a paraluu rapariara nta'ita iwetu. Alatala mboto nompowia pura-pura korota sampe sipa-sipa to nireke da'a nibila niwai neliu nggadea pebila

²⁵ala korota ne'e matibagi-bagi. Butu-butu sipa kana mompekiri kabelo nu sipa-sipa ntanina.

²⁶Ane saongu sipa nandasa, pura-pura sipa nu koro etu wo'u nandasa. Ane saongu sipa nibila, pura-pura sipa nu koro wo'u nibila.

²⁷Komi pura-pura ewa koro Kristus pade komi samba'a bo samba'a ewa sipa nu korona.

²⁸Pade ri tatongo todea topomparasaya, Alatala nangonggotaka tau-tau mantui mpengele-ngele bago. Pamulana naria tau-tau nionggotakana majadi surona. Pade karongelena naria tau-tau nionggotakana majadi nabi to nompasimbayu tesa nu Alatala. Katolungelena naria tau-tau to nionggotakana majadi guru. Pade naria wo'u to niwaina ka pompakule mowia kabaraka. Naria to niwaina ka pompakule mompakabelo ju'a-ju'a ntau. Naria to niwaina ka pompakule mantulungi tau-tau ntanina, naria to niwaina ka pompakule manggeniaka todea, pade naria to niwaina ka pompakule motesa basa-basa to nopu'u nggari ja'i Nosa Nagasa.

²⁹Natantumo da'a pura-pura tau nionggotaka majadi suro! Da'a pura-pura tau nionggotaka majadi nabi. Da'a pura-pura tau nionggotaka majadi guru. Da'a pura-pura tau niwai ka pompakule mowia kabaraka.

³⁰Da'a pura-pura tau niwai ka pompakule mompakabelo ju'a-ju'a ntau. Da'a pura-pura tau niwai ka pompakule motesa basa-basa to nopu'u nggari ja'i Nosa Nagasa. Pade da'a pura-pura tau niwai ka pompakule mompakanoto batuana tesa-tesa nggari basa-basa etu.

³¹Jadi komi kana mpu'u-mpu'u maria dota rara mombarata pompakule-pompakule to neliu mpu'u kagunana. Pade we'i-we'i aku kana mompopokita ka komi sangele to neliu mpu'u kabelona.