Read Da'a Kaili 1 KORINTUS 14 Bible Online

1 KORINTUS 14 - Da'a Kaili bible

1 KORINTUS 14

¹Jadi pasimbukumo ante mpu'u-mpu'u rara mompotowe tau ntanina. Pade komi kana mpu'u-mpu'u maria dota rara mombarata pompakule-pompakule nggari ja'i Nosa Nagasa nu Alatala, neliu-liupa pompakule mompasimbayu tesa nggari ja'i Pue.

²Ane samba'a tau notesa basa-basa to nopu'u nggari ja'i Nosa Nagasa i'a notesa ka Alatala da'a ka manusia, sabana da'a ria tau to namala mangginjani batuana tesa etu. Ante pekeniaka Nosa Nagasa i'a notesa anu da'apa ninjani manusia.

³Tapi ane samba'a tau nompasimbayu tesa nggari ja'i Pue i'a notesa ka manusia ala mompakaroso pomparasaya ira, mompatuduki ira bo mompakawoe rara ira.

⁴Tau to notesa basa to nopu'u nggari ja'i Nosa Nagasa nompakaroso pomparasayana mboto, tapi tau to nompasimbayu tesa nggari ja'i Alatala nompakaroso pomparasaya todea topomparasaya i Pue.

⁵To nipodotaku ala komi pura-pura mamala motesa basa-basa to nopu'u nggari ja'i Nosa Nagasa. Tapi neliu nggari etu to kupodota ala komi pura-pura mamala mompasimbayu tesa nggari ja'i Pue. Tau to nompasimbayu tesa nggari ja'i Pue riara mpodade neliu nggaguna nggari tau to notesa basa-basa to nopu'u nggari ja'i Nosa Nagasa. Tapi ane i'a mamala mompakanoto batuana tesa-tesa etu, nasimbayu gunana ante nompasimbayu tesa nggari ja'i Pue, sabana todea topomparasaya mamala mangginjani batuana tesa etu, pade pomparasaya ira mamala rapakaroso.

⁶Sampesuwu-sampesuwu, ane rapana aku marata ri ja'i komi pade motesa basa-basa to nopu'u nggari ja'i Nosa Nagasa, nuapa gunana etu ka komi? Natantu da'a ntoto ria gunana. Tapi kana maria gunana ka komi ane aku mompakanoto ka komi sangele tesa nggari ja'i Alatala, atau motarangga ka komi sangele kareba anu da'apa ninjani komi, atau mompasimbayu ka komi tesa nggari ja'i Pue, atau mompatuduki komi.

⁷Pekirimo jonjo parewa-parewa musi to da'a nonosa ewa sasuli bara koronjo. Ane parewa musi etu da'a rapopomoni ante manoto da'a ria tau mamala mangginjani dade to nipopomoni.

⁸Pade ane kololio da'a rapopomoni ante manoto mompokio tantara malau mangewa bali-bali ira, natantu da'a maria tantara mompakasadia korona malau mosibali ante balina.

⁹Iwetu wo'u ante komi. Ane komi motesa basa-basa to da'a ninjani roa-roamu, iwenu ira mangginjani patuju nu tesamu? Tesa-tesamu da'a ria gunana. Komi aga masimbayu ewa tau notesa ka lombona.

¹⁰Ri dunia e'i nadea ngele basa, da'a ninjaniku sakuya kadeana. Tapi naupa iwetu pura-pura basa naria batuana.

¹¹Tapi ane aku da'a nangginjani batuana basa to nitesa samba'a tau, aku majadi ewa torata nggari sawaliku ngata riara mpanggitana, bo wa'a wo'u i'a riara mpanggitaku.

¹²Jadi iwetu wo'u ane komi motesa ka roamu riara basa to nopu'u nggari ja'i Nosa Nagasa. Sampesuwu-sampesuwuku, ninjaniku komi mpu'u-mpu'u madota mombarata pompakule nggari ja'i Nosa Nagasa nu Alatala. Jadi nabelopa komi mompasimbuku mompopoguna pompakule-pompakule to mantulungi topomparasaya ala mantambai maroso pomparasaya ira.

¹³Sabana etu tau to notesa basa-basa to nopu'u nggari ja'i Nosa Nagasa riara mpodade kana mosambaya merapi ala i'a rawai pompakule mompakanoto batuana tesa-tesa etu.

¹⁴Sabana ane aku mosambaya riara basa to nopu'u nggari ja'i Nosa Nagasa pekiriku da'a najala, tapi aku aga notesa nantuki tesa-tesa to niwai Nosa Nagasa ka aku.

¹⁵Jadi nuapa masipato kupowia? Iwe'imo: aku kana mosambaya riara basa to nopu'u nggari ja'i Nosa Nagasa, pade aku kana mosambaya wo'u nantuki pekiriku. Aku kana modade riara basa to nopu'u nggari ja'i Nosa Nagasa, pade aku kana modade wo'u nantuki pekiriku mboto.

¹⁶Ane komi mosukuru ka Alatala riara basa to nopu'u nggari ja'i Nosa Nagasa pade maria tau-tau ntanina riara mpodade etu to da'a nangginjani batuana tesamu etu, iwenu ira mantakono posambayamu etu? Sabana da'a ninjani ira batuana tesamu etu.

¹⁷Naupa posambayamu etu nabelo mpu'u tapi tau ntanina etu da'a ntoto nipakaroso pomparasayana.

¹⁸Aku nosukuru ri ja'i Alatala sabana aku niwai ka pompakule motesa basa-basa to nopu'u nggari ja'i Nosa Nagasa neliu nggari komi pura-pura.

¹⁹Tapi naupa iwetu, riara kasiromu todea topomparasaya nipokonokupa motesa limambela tesa to ninjani ntodea ala mompatuduki ira. Etu neliu nggabelo nggari motesa njobu-njobu mbela tesa riara basa to nopu'u nggari ja'i Nosa Nagasa nu Alatala.

²⁰Sampesuwu-sampesuwuku, ne'e mana mompekiri ewa ngana-ngana! Ane mompekiri kaja'ana komi kana masimbayu ewa ngana nggedi to da'apa nangginjani mompowia kaja'ana. Tapi ane mompekiri pompakule nggari ja'i Nosa Nagasa etu komi kana manoto ewa tau to nabetemo.

²¹Riara Buku Nagasa naria nitulisi iwe'i: “Nangulimo i Pue, ‘Nggari tau-tau to notesa basa-basa ntanina, etumo nggari tau-tau nggari sawaliku ngata, Aku kana motesa ka todeaku e'i. Tapi naupa iwetu ira da'a mompetalinga tesaku.’ ” [24]

²²Jadi pompakule motesa basa-basa to nopu'u nggari ja'i Nosa Nagasa sangele tandaina to nompakanoto isema tau-tau da'a nomparasaya. Etu da'a tandaina to nompakanoto isema topomparasaya i Pue. Pade pompakule mompasimbayu tesa nggari ja'i Alatala tandaina to nompakanoto isema topomparasaya, da'a nompakanoto isema tau-tau da'a nomparasaya.

²³Jadi ane pura-pura topomparasaya masiromu sanggani pade komi pura-pura motesa basa-basa to nopu'u nggari ja'i Nosa Nagasa, nuapa majadi ane maria tau-tau to da'apa nangginjani Tesa nu Alatala atau tau-tau da'a nomparasaya mesua ri setu? Natantumo ira kana mompekiri komi pura-pura aga tau nagila.

²⁴Tapi ane tau-tau da'a nomparasaya atau tau to da'apa nangginjani Tesa nu Alatala mesua ri kasiromu komi tempo pura-pura topomparasaya mompasimbayu tesa nggari ja'i Pue, tesamu etu kana mompakanoto silaka-silaka ira etu. Pura-pura pokainggu ira kana rapakanoto nggari tesa-tesa etu.

²⁵Pura-pura pompekiri ira to nitabuniaka riara nta'i ira kana rapakanoto sampe ira kana motimbakotu mombasomba Alatala ante manguli, “Mpu'u-mpu'u Alatala naria ri tatongo komi ri se'i.”

²⁶Jadi sampesuwu-sampesuwuku, nuapa patuju to napokona nggari tesaku e'i? Iwe'imo: Ane komi masiromu modade, kana maria tau to modade, pade maria tau ntanina to mompatuduki, kana maria tau mompakanoto tesa nggari ja'i Alatala. Pade tau ntanina kana motesa riara basa-basa to nopu'u nggari ja'i Nosa Nagasa, pade tau ntanina kana mompakanoto batuana tesa-tesa etu. Tapi pura-pura etu kana rapowia komi ala mompakaroso pomparasaya ntodea.

²⁷Ane maria to motesa basa-basa to nopu'u nggari ja'i Nosa Nagasa ne'e meliu nggari romba'a atau tolumba'a, pade ira kana motesa mosimpaliu samba'a bo samba'a. Pade kana maria to mamala mompakanoto batuana tesa-tesa etu.

²⁸Ane da'a ria to mamala mompakanoto batuana tesa-tesa etu, agina topotesa basa-basa etu malino riara mpodade etu. Agina ira motesa-tesa basa etu riara nta'i ira mboto ka Alatala.

²⁹Ane tau mompasimbayu tesa nggari ja'i Alatala nabelopa aga romba'a atau tolumba'a motesa pade tau ntanina kana mompetalinga mpakabelo-belo ala mompoposisala tesa-tesa etu.

³⁰Pade ane samba'a tau ntanina to nekatoko ri setu mombarata tesa-tesa nggari ja'i Alatala, topotesa pamulana kana menonto.

³¹Komi pura-pura mamala mompasimbayu tesa nggari ja'i Pue mosimpaliu samba'a bo samba'a ala pura-pura topomparasaya mamala rapatuduki bo rapakaroso.

³²Toramo! Tau to nompasimbayu tesa nggari ja'i Pue namala motesa atau menonto motesa nantuki dotana mboto.

³³Sabana to nipokono Alatala da'a kagadona tapi kaamana. Naria sangele pepatuduki to nalaku ri tatongo topomparasaya ri umba-umba ngata,

³⁴etumo, besi-besi kana malino riara mpodade. Ira da'a nipaloga motesa-tesa. Tapi ira kana mekou ewa to nitulisi riara Atura-atura agama.

³⁵Ane maria to madota ranjani ira, agina ira mekutana ka rongo ira tempo ira manjili ri sapo ira mboto. Sabana da'a masipato besi-besi motesa mompakagado podade ntopomparasaya.

³⁶Iwenumo? Da'a nasituju komi ante atura-atura etu? Toramo! Tesa nu Alatala da'a nopu'u nggari ja'i komi! Pade da'a aga komi to nipatolele ka tesa etu!

³⁷Ane maria tau to mompekiri i'a samba'a nabi to niwai ka pompakule mompasimbayu tesa nggari ja'i Alatala atau to niwai ka pompakule ntanina nggari ja'i Nosa Nagasa, kana ranjanina tesa-tesa to nitulisiku e'i parenta nggari ja'i Pue mboto.

³⁸Tapi ane i'a da'a madota mantarima tesaku e'i ne'e komi mompariara tesana.

³⁹Jadi sampesuwu-sampesuwuku, komi kana mpu'u-mpu'u maria dota rara mombarata pompakule mompasimbayu tesa nggari ja'i Pue. Tapi ne'e mombatagi tau motesa basa-basa to nopu'u nggari ja'i Nosa Nagasa.

⁴⁰Tapi pura-pura to rapowia komi kana rapowia mantuki akala to nalusu bo nasiayu.