Read Da'a Kaili 1 KORINTUS 15 Bible Online

1 KORINTUS 15 - Da'a Kaili bible

1 KORINTUS 15

¹Sampesuwu-sampesuwu, aku madota mompopatora ka komi Kareba Belo to nipatoleleku ka komi to nitarima komi pade to naroso niparasaya komi.

²Kareba Belo etu namala manggeni komi rapakasalama ane komi maroo momparasaya tesa to nipatoleleku ka komi. Ane da'a, pomparasaya komi da'a ria gunana.

³Aku nompasimbayu ka komi bopia pepatuduki to neliu nggapokona to nitarimaku mboto, etumo Kristus namate nanjaliku silakata ewa to nitulisi riara Buku Nagasa. [25]

⁴I'a nitana riara dayo, pade ri eo katolueona I'a nipakatuwu bali nggari kamatena ewa to nitulisi riara Buku Nagasa. [26]

⁵Naopu etu I'a nompopokita korona ka i Petrus pade ka anaguru-anaguruna sampulu romba'a.

⁶Pade naopu etu nipopokitana korona ka topantuki-topantuki I'a nelabi nggari limatu mba'ana sanggani. Pade sabagia bete nggari ja'i ira danatuwu sampe we'i-we'i, tapi naria bara sakuya mba'a to namatemo.

⁷Naopu etu nipopokitana korona ka Yakobus, pade ka pura-pura tau to najadi surona.

⁸Pade kaopuna nipopokitana korona wo'u ka aku to nasimbayu ewa ngana nesuwu da'apa nagana mbulana.

⁹Sabana aku e'i suro i Pue Yesus to neliu nggaede katuwuku. Kakonona aku e'i da'a masipato rauli samba'a suro i Pue sabana aku nompandasa todea topomparasaya Alatala bopia.

¹⁰Tapi nggari towe belo nu Alatala aku najadi samba'a suro i Pue Yesus. Pade towe belona etu naria aselena riara nggatuwuku. Aku nokarajaa neliu nggatomo nggari pura-pura suro i Pue ntanina. Tapi kakonona da'a aku to nokarajaa ntomo iwetu. Etu asele nu towe belo nu Alatala to naria ri ja'iku.

¹¹Jadi da'a napokona ane komi nangepe Kareba Belo nggari ja'iku atau nggari ja'i suro-suro ntanina. To napokona kami nompatolele Kareba Belo pade Kareba etu niparasaya komimo.

¹²Jadi ane kami nompatolele ka komi tesa to nanguli Kristus nipakatuwu bali nggari kamatena, nokuya naria tau ri tatongo komi to nanguli tau namate da'a ntoto rapakatuwu bali?

¹³Ane tau namate da'a ntoto rapakatuwu bali batuana Kristus wo'u da'a nipakatuwu bali nggari kamatena.

¹⁴Pade ane Kristus da'a nipakatuwu bali nggari kamatena da'a ntoto ria gunana nggari Kareba Belo to nipatolele kami, pade da'a wo'u ria gunana pomparasaya komi.

¹⁵Pade da'a aga etu. Ane tesa ira nakono kami nodawa, sabana kami nanguli Alatala nompakatuwu bali Kristus nggari kamatena. Tapi ane rapana nakono tau namate da'a rapakatuwu bali batuana Alatala da'a nompakatuwu bali Kristus.

¹⁶Sabana ane tau namate da'a rapakatuwu bali natantumo Kristus da'a nipakatuwu bali.

¹⁷Pade ane Kristus da'a nipakatuwu bali, pomparasaya komi da'a ntoto ria gunana, komi bate-batena nasilaka.

¹⁸Pade topomparasaya-topomparasaya I'a to namatena mana ria panjarumaka.

¹⁹Ane kita mamala manjarumaka Kristus aga tempo kita natuwu ri dunia e'i kitamo tau-tau to neliu nggandasa.

²⁰Tapi kakonona Kristus mpu'u-mpu'u nipakatuwu bali nggari kamatena. Pade kajadia etu nompakanoto tau-tau namate kana rapakatuwu bali.

²¹Nggari powia samba'a tau, manusia kana mamate. Iwetu wo'u nggari powia to samba'ana, manusia mamala rapakatuwu bali nggari kamatena.

²²Pura-pura manusia kana mamate sabana silaka Adam nawela kita pura-pura. Iwetu wo'u kita pura-pura kana rapakatuwu bali nggari kamateta sabana nosaongu rara ante Kristus.

²³Tapi tau-tau to namatena kana rapakatuwu bali nantuki posisunjuna to nipakatantu. Kristus tau pamulana nipakatuwu bali. Pade maopu etu tau-tau to nosaongu rara ante I'a kana rapakatuwu bali tempo I'a marata bali ri dunia.

²⁴Maopu etu pade marata kaopu nu dunia. Tempo etu Kristus kana mompakaropu mpengele-ngele kuasa to naria, nabeloka balengga-balengga seta, nabeloka kuasa-kuasa to nipokaeka manusia, nabeloka pue-pue ntanina. Maopu etu I'a kana mombawai kuasana moparenta ewa magau ka Umana Pue Alatala.

²⁵Kristus kana moparenta ewa magau sampe Alatala mompowia pura-pura balina mekou ri ja'ina.

²⁶Pade bali kaopuna to rapakaropuna etumo kamatea.

²⁷Nanotomo pura-pura balina kana mekou ri ja'ina sabana naria to nitulisi riara Buku Nagasa iwe'i: “Alatala nompowia pura-pura nuapa to naria nekou ri ja'ina.” [27] Nanotomo Alatala mboto da'a nekou ri ja'i Kristus mosanggani-nggani ante pura-pura nuapa to naria, sabana I'amo to mompowia ira pura-pura mekou ri ja'i Kristus.

²⁸Jadi tempo pura-pura nuapa to naria mekou ri ja'i Kristus, I'a mboto ewa Ana nu Alatala kana mekou ri ja'i Umana to nompowia pura-pura nuapa mekou ri ja'ina, ala kaopuna Alatala kana momparenta mpengele-ngele to naria.

²⁹Ane tau namate da'a rapakatuwu bali rapokuya tau nidiu ewa tandaina ira topomparasaya i Pue Yesus manjaliku tau-tau to namatemo? Nuapa gunana mowia ada etu ane tau namate da'a ntoto rapakatuwu bali?

³⁰Pade ane tau namate da'a rapakatuwu bali rapokuya kami madota mantingayo kasusa bo kapari butu-butu eona?

³¹Eo-eo aku ntora namate. Aku da'a nodawa! Nanotomo kasana nu raraku nompekiri komi to nosaongu rara ante Pueta Yesus Kristus. Pade iwetu wo'u nanoto kakono nu tesaku e'i!

³²Pekirimo! Nuapa gunana aku nosibali ante tau-tau naja'a ri ngata Efesus nasimbayu ewa tau nosibali ante binata-binata nasoa? Natantumo da'a ntoto ria gunana ane aku nowia etu ewa samba'a manusia to da'a ria panjarumakana rapakatuwu bali nggari kamatena! Ane tau namate da'a rapakatuwu bali agina kita mantuki popata to nanguli iwe'i: “Kamaimo kita manggoni bo manginu ala madamba-damba, sabana naile kita kana mamate.” [28]

³³Tapi ne'e masalanjala! Ane komi masintuwu ante tau-tau to nadenggo pekirina pokainggu komi wo'u rapakadenggo.

³⁴Jadi pakanoto raramu we'i-we'i. Ne'e mana mowia silaka! Kakonona komi kana maeya mata sabana danaria ri tatongo komi tau-tau to da'apa nomparasaya Alatala!

³⁵Tapi bara naria to nekutana iwe'i: “Iwenu sampe tau namate rapakatuwu bali? Iwenumo koro bata ira ane rapakatuwu bali?”

³⁶Nadoyo tanu komi nompekutana iwetu! Ane komi nombatuja ri tinalu da'a ntoto ria to matuwu ane ongu to nituja da'a mokolu raiwu ntana nasimbayu ewa tomate!

³⁷Pade to nituja komi etu da'a tuja-tuja mboto. To nituja komi aga onguna, bara ongu gando atau ongu tuja-tuja ntanina.

³⁸Tapi Alatala nompakatuwu ongu-ongu to nituja etu nantuki dotana sampe butu-butu ongu najadi ewa lio nu tuja-tuja etu mboto.

³⁹Koro bata anu natuwu ri dunia e'i da'a butu nasimbayu. Koro bata manusia nosisala ante koro bata nu binata-binata bo koro bata tonji bo bau.

⁴⁰Pade iwetu wo'u nuapa to naria ri langi nosisala ante to naria ri dunia. Pade nosisala kagayana to naria ri suruga ante to naria ri dunia e'i.

⁴¹Kagaya nu mata eo sangele, bo kagaya nu wula sangele ntanina. Pade kagaya nu betu'e sangele wo'u, bo betu'e mboto mbau nosisala kagayana.

⁴²Iwetu wo'u ante koro bata ntau namate to rapakatuwu bali. Watabaku to nitana namala mapopo. Tapi koro bata to rapakatuwu bali da'a mana mamala mapopo.

⁴³Watabaku to nitana naja'a nikita bo nalente. Tapi koro bata to rapakatuwu bali nagaya bo naroso.

⁴⁴Watabaku to nitana koro manusia biasa, tapi koro bata to rapakatuwu bali koro nipakakuasa Nosa Nagasa nu Alatala. Naria koro manusia biasa, pade naria wo'u koro to nipakakuasa Nosa Nagasa nu Alatala.

⁴⁵Ewa to nitulisi riara Buku Nagasa iwe'i: “Manusia pamulana, Adam, najadi anu to natuwu.” [29] Tapi Kristus, to nireke Adam kaopuna, nombawai katuwua ka manusia sampe ri kasae-saena.

⁴⁶To najadi nokolu koro manusia biasa, da'a koro to nipakakuasa Nosa Nagasa nu Alatala. Koro to nipakakuasa Nosa Nagasa najadi ri purina.

⁴⁷Manusia pamulana etu nopu'u nggari tana ri dunia e'i, tapi Kristus, to nireke manusia karongelena, nopu'u nggari suruga.

⁴⁸Koro manusia ri dunia e'i nasimbayu ewa koro Adam to nopu'u nggari tana etu. Tapi tau-tau to nosaongu rara ante Kristus kana mombarata koro nggari suruga nasimbayu ewa koro Kristus.

⁴⁹We'i-we'i korota ri dunia nasimbayu ewa koro Adam to nopu'u nggari dunia e'i. Tapi kita topomparasaya Kristus kana mombarata koro nggari suruga nasimbayu ewa koro Kristus.

⁵⁰Sampesuwu-sampesuwu, iwe'imo patujuku: korota to nipajadi nggari isi bo lei da'a ntoto mamala mombarata bagia riara Poparenta nu Alatala. Korota to mamala mapopo da'a ntoto mamala mosanggani-nggani ante Alatala to da'a ria kamate-matena.

⁵¹Epemo! Kupopanjani ka komi sangele to nitabuniaka Alatala nggari lamba pamulana. Kita pura-pura da'a mamate, tapi kita pura-pura kana rabali

⁵²riara sampida mata tempo kololio i Pue kaopuna rapopomoni. Sabana kololio etu kana rapopomoni, pade tau-tau to namatena kana rapakatuwu bali ante koro to mana mapopo, pade kita pura-pura kana rabali.

⁵³Sabana korota to namala mapopo kana rasambei ante koro to mana mapopo. Koro to mamala mamate kana rasambei ante koro to da'a mana mamate.

⁵⁴Pade ane koro to mamala mamate bo mapopo rasambei ante koro to da'a mana mamate bo mapopo, kana madupa tesa to nitulisi riara Buku Nagasa iwe'i: “Nipakaopumo kamatea! Padagimo Alatala!” [30]

⁵⁵“Nidagimo kamatea! Mana ria kuasana mompandasa manusia!” [31]

⁵⁶Nggari silaka manusia sampe naria kuasa kamatea. Pade silaka nakuasa riara nggatuwu manusia sabana naria Atura-atura agama nompakanoto nuapa to niuli silaka.

⁵⁷Tapi ratoiyata Pue Alatala! I'amo to manggeni kita majadi padagi sabana kita nosaongu rara ante Pueta Yesus Kristus!

⁵⁸Jadi sampesuwu-sampesuwu to nipotoweku, mantora etu pura-pura komi kana maroo momparasaya. Ne'e mompakamba nuapa-nuapa mombagagoya pomparasaya komi. Ne'e menonto mompasimbuku ante mpu'u-mpu'u raramu mantui bago to niwai i Pue ka komi, sabana ninjani komi, pura-pura nuapa to rapowia komi ka i Pue natantumo kana maria aselena.